A MOYIIZ tõogã ra kõo sor tɩ ned tõe n wẽene. La a Zeezi wakatẽ wã, ra lebga minungu, hal tɩ ned sã n da gom gomd fãa bɩ a rat n wẽen sẽn na yɩl n wilg t’a sẽn yetã yaa sɩda. Hal naoor a yiibu, a Zeezi wilgame tɩ woto pa zems ye. A sagla nebã, n wilg b sẽn tog n maanã. Ad a sẽn yeele: “Bɩ yãmb n-yẽe yɩ n-yẽe, tɩ y ayo yɩ ayo.”—Mat. 5:33-37; 23:16-22.

Sebr a ye yeelame tɩ f sã n ges Talmuudã zĩis kẽere, f sɩd neeme tɩ wẽenegã yaa minung sẽn da tar pãng zʋɩf-rãmbã sʋka, bala b sã n da gom gomd fãa, b ra nong n wẽendame n na n wilg tɩ yaa sɩda. Sebrã yeelame me tɩ Talmuudã pʋgẽ, b wilga ned sẽn segd n wẽen bũmb nins yĩnga, la bũmb nins yĩng sẽn pa tɩlɛ t’a wẽene.

Pa a Zeezi bal n wilg tɩ pa zems tɩ b wẽend yaar ye. Wala makre, kʋdemdã yel-mit a Flavius Zozɛf sẽn da yaa zʋɩfã goma zʋɩf-rãmbã tũudum sull a ye yelle, n wilg tɩ b ra pa nong wẽeneg ye. A yeelame tɩ b ra getame tɩ wẽeneg yaa yel-wẽnd wẽnem sẽn yɩɩd ziri yagbo, la tɩ sã n wa lebg tɩlɛ tɩ ned wẽen tɩ b yaool n tẽ-a, rẽnda a soab yaa ziri yagda. Zʋɩf-rãmbã sebr a ye me yeelame: “Sẽn nong-a wẽeneg yaa nin-wẽnga.” (A Sira Biig Sebre 23:11) A Zeezi wilgame tɩ b pa segd n dɩk wẽenegã wa reem yell ye. D sã n togsd sɩd wakat fãa, pa na n wa yɩ tɩlɛ tɩ d wẽen sẽn na yɩl tɩ b tẽ d gomd ye.