ASTOROLOZI WÃ: Neb kẽer tẽedame tɩ ãdsã sẽn wat n be zĩig ning ned rogem daarã wilgda a soabã beoog sẽn na n yɩ to-to. B karemda oroskopã n na n bãng bũmb ning sẽn tõe n paam-ba, n gil rẽ, wall b sẽn tõe n maan n paam tɩ b vɩɩmã yɩ noogo.

BAGRE: Neb kẽer tẽedame tɩ bagrã tõe n sõngd-b lame tɩ b wʋm yɛl nins sẽn paamd-bã võore, la b bãng b sẽn segd n maan rẽ wɛɛngẽ. Rẽ masã, b tõe n bãng n põsa yell ning sẽn da tõe n paam-bã, tɩ sõng-b tɩ b vɩɩmã yɩ sõma.

YAAB-RÃMBÃ SẼN KI WÃ WAOOGRE: Neb a taab me tagsdame tɩ b segd n maana bũmb kẽer n sigs wẽnnaam-dãmbã wall b yaab-rãmbã sẽn ki wã sũyã, sẽn na yɩl n paam tɩ b kogl-ba, la b ning-b barka. Pag a ye sẽn be Viɛtnam, t’a yʋʋr boond t’a Van yeelame. “Mam da tẽedame tɩ m sã n waoogd m yaab-rãmbã sẽn ki wã, m vɩɩmã na n yɩɩ noog masã menga, la tɩ maam ne m kambã na n paamame tɩ d beoog yɩ neere.”

LEBG-N-DOGÃ: Neb wʋsg tẽedame tɩ neb nins fãa sẽn kiidã lebgd n dogdame, la tɩ yaa woto wakat fãa. B tẽedame tɩ bõn-sõma la bõn-wẽns nins sẽn paamd-b rũndã-rũndã wã yaa b sẽn da tʋm tʋʋm nins pĩndã yĩnga.

Neb wʋsg yaool n getame tɩ woto fãa yaa tẽeb ziri. Baa ne rẽ, b bʋgda bagre, b karemda oroskopã, b wẽeda bĩisri, la b maand yɛl a taaba. B tagsdame tɩ woto fãa tõe n sõng-b lame tɩ b bãng b beoogã sẽn na n yɩ to-to.

Rẽ yĩnga, neb nins sẽn tẽed bõn-kãensã la b maand-bã paamdame tɩ b vɩɩmã yaa noogo, tɩ b beoog vɩɩmã me na n yɩ sõma bɩ?

D gom rao a ye sẽn be Viɛtnam, t’a yʋʋr boond t’a Hawo yelle. A wa n kẽe astorolozi wã, bagrã, la yaab-rãmbã sẽn ki wã waoogre, n da tẽed tɩ rẽ n na n sõng-a. La rẽ yĩnga, sɩd sõng-a lame bɩ? Ad a sẽn yeele: “M bõna m ligd wʋsgo, m kẽe sama, m zakã rãmb ra pa zemsd taaba, m da maanda yɩɩr wʋsg me.”

Rao a ye yʋʋr sẽn boond t’a Kuwiming n be Taiwan me ra tẽeda astorolozi wã, lebg-n-dogã, zu-noogã, la yaab-rãmbã sẽn ki wã waoogre. La a sẽn maag a yĩng n vaees yel-kãensã fãa wã poore, a yeelame: “Mam gũus n gesame tɩ bõn-kãensã fãa sẽn baood tɩ f maan bũmb ningã kɩɩsda taaba, la kɩtdẽ tɩ f pa mi f sẽn maandg ye. Mam gũus n gesame tɩ naoor wʋsgo, astorolozi wã sẽn pʋlemd bũmb ninsã pa pidsd ye. La sã n yaa ne lebg-n-dogã, f sã n pa tẽr bũmb nins f sẽn maan f pĩnd vɩɩmã pʋgẽ wã, f yɩta wãn n tõog n toeeme, n bãng n vɩɩmd sõma masã n yɩɩd pĩndã.”

Wala a Hawo ne a Kuwiming la neb a taab sẽn wa n bãngã, pa zu-noogã, ãdsã, d yaab-rãmb nins sẽn ki wã wall lebg-n-dogã n tõe n kɩt tɩ d beoog yɩ neer bɩ pa yɩ neer ye. La rẽ yĩnga, woto rat n yeelame tɩ bũmb kae, sẽn tõe n sõng-d tɩ d bãng d sẽn tõe n maan tɩ d beoog yɩ neer bɩ?

Neb wʋsg tagsdame tɩ sẽn na yɩl n paam tɩ b beoog yɩ neere, yaa b sẽn na n karem karen-bɛda, bɩ n bao arzɛgse. Neb kẽer sẽn yãk yam n maan woto wã, baasa wãna?