D zoa sã n bẽed bãag sẽn kɩt t’a sũur pa noom ne a menga, d tõeeme n pa mi d sẽn na n maan n sõng-a ye. La bũmb wʋsg la d tõe n maan n sõng-a, tɩ wilg t’a yell pak-d lame. Bõe la d tõe n maane?

‘Wɩng-y ne kelgre.’—ZAK 1:19.

Bũmb y sẽn tõe n maan n sõng y zoa wã n tɩ yɩɩda, yaa y sẽn na n maag y yĩng n kelg-a a sã n wa gomda. Ra tags-y tɩ yaa tɩlɛ tɩ y leok bũmb ning fãa a sẽn na n yeel ye. Maan-y t’a bãng tɩ y kelgd-a-la neere, la tɩ y kʋmd-a lame. Bao-y n wʋm-y a yellã võore, la y ra yɩ tao-tao n ning-a taal ye. Bãng-y t’a tõe n togsa gomd n pa reng n tagse, n wa maand a bãngẽ.—Zoob 6:2, 3.

‘Gomd-y goam sẽn belsde.’—1 TESALONIK RÃMBÃ 5:14.

Y zoa wã tõe n maanda yɩɩre, wall n tagsdẽ t’a ka võor ye. Y sã n wilg-a t’a yell pak-y lame, tõe n bels-a lame la keng a raoodo, baa y sã n pa mi y sẽn na n yeel ye.

“F zoa hakɩɩk nong-f-la wakat fãa.”—YEL-BŨNÃ 17:17.

Maand-y bũmb takɩ n sõngd-a. Ra tags-y tɩ y mii y sẽn tõe n maan n sõng-a ye. Sok-y-yã-a a sẽn dat tɩ y maane. Sã n yaa toog ne y zoa wã t’a togs a sẽn datã vẽenega, bɩ y bao bũmb y sẽn tõe n naag taab n maane, wala  makre, n yi n kẽn n kok pemsem. Y tõe n kosame n sõng-a ne tẽed kẽer raabo, a roogã la a zakã manegre, wall ne tʋʋm a taaba.—Galat-rãmbã 6:2.

‘Maan-y sũ-mare.’ —1 TESALONIK RÃMBÃ 5:14.

Y zoa wã tõeeme n wa pa rat n gom ye. Wilg-y-yã-a t’a sã n wa rat n gom fãa, bɩ a bas a yam tɩ y na n kelg-a lame. A bãagã yĩnga, a tõe n yeelame wall a maan bũmb tɩ sãam y sũuri. A tõe n far-y lame n base, wall a sũur yik ne-yã. Y sã n wa sõngd-a bɩ y tall sũ-mar la y yɩ wʋmda.—Yel-bũnã 18:24.

“M modgdame sẽn na yɩl n yɩ zoa a sẽn tõe n teege. Baa m sẽn pa tar a yellã tɩɩmã, m modgda wakat fãa n kelgd-a. Wakat ninga, a sẽn dat bal yaa ned sẽn na n kelg-a, t’a yam gãande.”—A Farra. a A zoa wã maooda ne bãag sẽn kɩt t’a yam ka rɩɩbo, n maand yɩɩre, t’a yam ka a menga.

“Mam zoa a ye n yaa nin-sõngo, la ned sẽn kengd a taab raoodo. A boola maam a zakẽ, tɩ d rɩ rɩ-noogo. A sẽn maan woto tɩ wilg t’a nong-m lame wã yĩnga, kɩtame tɩ m bas m yam n togs-a bũmb nins sẽn namsd maamã. Sɩd kenga m raoodo!”—A Hawun. A bẽeda bãag sẽn kɩt t’a yam ka a menga.

“Sũ-marã tara yõod wʋsgo. Mam pagã sã n maan bũmb tɩ sãam m sũuri, m tẽegdame tɩ yaa a sẽn ka laafɩ wã yĩnga. Woto kɩtdame tɩ m pa yikd m sũuri, la m wilgdẽ t’a yell pak-m lame.”—A Zakoob. A pagã bẽeda bãag sẽn kɩt t’a yam ka a menga.

“Mam pagã sõngda maam la a kengd m raood wʋsgo. M sã n wa maand yɩɩr tɩ loog noore, a pa modgd maam tɩ m maan bũmb m sẽn pa rat n maan wakat kãng ye. Wakat ninga, a pa paamd n maan bũmb a sẽn nong ye. A sẽn mongd a meng bũmb kẽer la a sõngd maamã noom-m-la wʋsgo.”—A Ẽnriko. A bẽeda bãag sẽn kɩt t’a maand yɩɩr tɩ loog noore.