1. Bõe yĩng tɩ d mi n maand rabeem?

 RABEEM mi n yõka d ned kam fãa. Yaa sɩd tɩ d sẽn zãms Biiblã kɩtame tɩ d pa le zoet kũum, zĩn-dãmbã la sẽn wat beoog ye. La d mi n yãta bũmb toor-toor sẽn “kẽesd rabeem” wala zaba, bi-be-tʋʋm la bãase. (Luk 21:11) Sẽn paase, tõe tɩ d zoeta ninsaalba, wala makre, goosneema-rãmb sẽn weoogd tõndo, bɩ d zakã neb sẽn namsd tõnd d tũudmã yĩnga. Neb kẽer maanda yɩɩr n tagsdẽ tɩ b pa na n tõog toog zu-loɛɛg b sẽn maood ne taoore, wall zu-loees b sẽn tõe n wa paam taoore.

2. A Davɩɩd sẽn wa n be Gatã, yɛlã ra yaa wãn ne-a?

² Wakat n zĩnd t’a Davɩɩd maan dabeem. Rĩm a Sayull sẽn wa n baood a Davɩɩd n na n kʋ wã, a zoe n kẽnga Gat sẽn yaa Filisti nebã tẽngã. Pa yã n kaoos la Gat rĩm a Akis wʋm t’a Davɩɩd la gãndaoog ning b sẽn da yɩɩnd n pẽgda, a sẽn kʋ Filisti neb “tus-piig” yĩngã ye. A Davɩɩd sẽn bãng rẽ wã “rabeem kẽ-a-la wʋsgo.” (1 Sãm. 21:10-12) A ra yɛɛsda bũmb ning a Akis sẽn tõe n maan-a wã. Bõe n sõng a Davɩɩd t’a bãng a sẽn na n maanega, baa ne a sẽn da zoet rabeemã?

3. Sã n yaa ne Yɩɩn-sõamyã 56:1-3, 11 wã, bõe n sõng a Davɩɩd a sẽn wa n zoet rabeemã?

³ Yɩɩn-sõamyã 56 pʋgẽ, a Davɩɩd togsa yellã sẽn nams-a to-to a sẽn wa n be Gatã. Yɩɩn-kãng pʋgẽ, a Davɩɩd wilga a sẽn da yɛɛsd to-to, la a wilg a sẽn maan to-to n tõog a rabeemã me. Rabeemã sẽn wa n tar a Davɩɩdã, a teega a Zeova. (Karm-y Yɩɩn-sõamyã 56:1-3, 11.) A Davɩɩd ra bee bʋʋm la a sẽn teeg a Zeova wã. Ne a Zeova sõngre, a yãka yam n maan bũmb sẽn tõe n ling nebã. A maana wa a yaa gãeenga! A sẽn maanã yãka nenga. A Akis ra pa le  get-a wa ned sẽn tõe n maan yell ye. A sẽn da rat bal yaa a Davɩɩd we n looge. Rẽ kɩtame t’a Davɩɩd paam n põse.—1 Sãm. 21:13–22:1.

4. Bõe la d tõe n maan n maneg n kɩs a Zeova sɩda? Rɩk-y makre.

⁴ Tõnd me sã n teeg a Zeova, d yam tõe n gãanda bãane, baa d sã n wa zoet rabeem. La bõe la d tõe n maan n maneg n teeg a Zeova, sẽn yɩɩd fãa d sã n wa maand rabeem? D rɩk makre. Yãmb sã n bãng tɩ y bẽeda bãaga, sɩngrẽ wã rabeem tõe n yõk-y lame. La y sã n kɩs y logtorã sɩda, y rabeemã tõe n boogame. Tõe t’a zoe n tɩpa neb wʋsg sẽn da tar bã-kãng tɩ b paam laafɩ. A na n maaga a yĩng n kelg-y tɩ y wilg-a bũmb ning sẽn kẽesd-y rabeemã, tɩ y neẽ tɩ y yell pak-a lame. A na n wilga yãmb tɩɩm sẽn sãoog neb a taaba. Woto me, d sã n tagsd bũmb nins a Zeova sẽn zoe n maan tõnd yĩngã, a sẽn maand rũndã-rũndã la a sẽn nan na n maanã yelle, d na n maneg n kɩs-a-la sɩda. Yɩɩ woto la a Davɩɩd maan-yã. D sã n wa gomd goam nins Wẽnnaam sẽn vẽneg-a t’a gʋls Yɩɩn-sõamyã 56 soabã pʋgẽ wã kẽer yelle, bɩ y tags n ges yãmb me sẽn tõe n maan to-to n maneg n kɩs a Zeova sɩda, tɩ sõng-y tɩ y yam gãand bãan baa y sã n wa maand yɩɩre.

BÕE LA A ZEOVA ZOE N MAANE?

5. A Davɩɩd sẽn wa n yɛɛsdẽ wã, bõe yell la a ra tagsda? (Yɩɩn-sõamyã 56:12, 13)

⁵ A Davɩɩd vɩɩmã sẽn wa n ket n be yell pʋgẽ wã, a ra tagsda bũmb nins a Zeova sẽn zoe n maanã yelle. (Karm-y Yɩɩn-sõamyã 56:12, 13.) Rẽ yaa bũmb a Davɩɩd sẽn maan a vɩɩmã tõre. Wala makre, a ra mi n tagsda bũmb nins a Zeova sẽn naanã yelle. Bõn-kãens ra tẽegd-a lame t’a Zeova yaa pãn-kãseng soaba, la t’a nonga ninsaalbã wʋsgo. (Yɩɩn. 65:6-9) A Davɩɩd ra bʋgsda bũmb nins a Zeova sẽn maan n kõ neb a taabã me zugu. (Yɩɩn. 31:19; 37:25, 26) Sẽn paase, a ra bʋgsda bũmb nins a Zeova sẽn zoe n maan n kõ yẽ mengã zugu. Hal a yãadmẽ, a Zeova teel-a lame la a kogl-a. (Yɩɩn. 22:9, 10) Mams-y n ges-y-yã a Davɩɩd sẽn da bʋgsd  rẽ zugã sẽn kɩt t’a maneg n teeg a Zeova to-to!

6. D sã n wa maand rabeem, bõe n tõe n sõng-d tɩ d kɩs a Zeova sɩda?

⁶ Y sã n wa maand rabeem bɩ y sok y meng yaa: ‘Bõe la a Zeova zoe n maane?’ Tags-y bũmb nins a sẽn naanã yelle. Wala makre, “maag-y y yĩng n ges” a Zeova sẽn get liuuli wã la tɩ-puudã yell to-to, baa a sẽn pa naan-b a meng wõneg tɩ b tõe n waoog-a wã. D sã n maag d yĩng n bʋgs rẽ zugu, tõe n sõng-d lame tɩ d maneg n kɩs sɩd t’a Zeova na n gesa d yelle. (Mat. 6:25-32) Tags-y bũmb nins a Zeova sẽn maan n kõ neb sẽn tũ-a pĩnd wẽndẽ la rũndã-rũndã yelle. Y tõe n zãmsa ned sẽn zĩnd pĩnd wẽndẽ n tall tẽeb kibare, wall y karem ned sẽn tũud a Zeova rũndã-rũndã kibare. a Sẽn paase, bʋgs-y-yã a Zeova sẽn zoe n sõng-y to-to wã zugu. Wala makre, a sẽn sõng-y to-to tɩ y bãng sɩdã, (Zã 6:44) a sẽn leok y pʋʋsg to-to, (1 Zã 5:14) la a Bi-nongrã maoongã sẽn nafd-y to-to beoog sẽn vẽeg fãa.—Efɛɛ. 1:7; Ebre. 4:14-16.

7. Wãn to la no-rɛɛs a Dãniyɛll kibarã sõng a Vanesa t’a pa bas tɩ rabeemã tõog-a?

⁷ A Vanesa b sẽn yaa saam-bi-poak sẽn be Haiti wã paama zu-loɛɛg sẽn kẽes-a rabeem wʋsgo. Rao a ye n da boond-a la a toond-a mesaaz-rãmb daar fãa n dat t’a sak a rolemdo. A Vanesa zãgsa fasɩ. Raoã sũur yika wʋsgo, hal t’a yeel t’a sã n pa sake a na n maan-a-la yelle. A Vanesa yeelame: “M da yɛɛsdame.” Bõe n sõng-a t’a pa bas tɩ rabeemã tõog-a? A maana bũmb takɩ n kogl a menga. Kãsem-soab a ye n sõng-a t’a tɩ togs polɩɩs-rãmbã. Sẽn paase, a bʋgsa a Zeova sẽn kogl a nin-buiidã to-to pĩnd wẽndẽ wã zugu. A Vanesa yeelame yaa: “Ned ning yell m sẽn tags pipi yaa no-rɛɛs a Dãniyɛlle. B lob-a-la gɩgma kom sẽn da tar bokẽ, baa a sẽn da pa maan bũmb sẽn yaa wẽngã, la a Zeova kogl-a lame. M basa yellã a Zeova nugẽ. Rẽ poore, m da pa le maand rabeem ye.”—Dãn. 6:12-22.

BÕE LA A ZEOVA MAAND RŨNDÃ-RŨNDÃ?

8. A Davɩɩd ra kɩsa sɩd ne bõe? (Yɩɩn-sõamyã 56:8)

⁸ Baa a Davɩɩd sẽn wa n be Gat t’a vɩɩmã be yell pʋgẽ wã, a pa bas tɩ rabeemã tõog-a ye. A yãka yam n na n tags a Zeova sẽn sõngd-a to-to wakat kãngã yelle. A Davɩɩd yãame t’a Zeova wilgd-a-la sor la a kogend-a, la t’a mii a zu-loeesã sẽn namsd-a to-to. (Karm-y Yɩɩn-sõamyã 56:8.) Sẽn paase, a Davɩɩd ra tara zo-rãmb wala a Zonatã ne maan-kʋʋdb kãsem a Ahimelɛke. B sõng-a-la ne b sũur fãa. (1 Sãm. 20:41, 42; 21:6, 8, 9) Baa ne rĩm a Sayull sẽn da baood a Davɩɩd n na n kʋ wã, a tõog n põsame. A ra kɩsa sɩd t’a Zeova mii a zu-loɛɛgã, la rẽ sẽn namsd-a to-to wã.

9. Bõe la a Zeova mi tõnd ned kam fãa zugu?

⁹ Y sã n wa maood ne zu-loɛɛg sẽn kɩt tɩ y maand rabeem, bɩ y tẽeg t’a Zeova mii y zu-loɛɛgã, la rẽ sẽn namsd yãmb to-to. Wala makre, pa b sẽn da namsd Israyɛll nebã Ezɩpt soolmẽ wã bal la a Zeova ra ne ye. A ra “mii toog ning b sẽn paamdã” me. (Yik. 3:7) A Davɩɩd yeelame t’a Zeova nee a “namsgã” la a “sũ-sãangã sẽn yaa wʋsgã.” (Yɩɩn. 31:7) Baa Wẽnnaam nin- buiidã sã n mi n yãk yam n maan bũmb sẽn pa sõma tɩ namsd-ba, yaa “toog ne yẽ” mengã. (Eza. 63:9) Y sã n wa maand rabeem, a Zeova wʋmda y yɛlã võore, n tʋll n sõng-y tɩ y yam gãand bãane.

10. Bõe n kɩt tɩ y tõe n kɩs sɩd tɩ y yell paka a Zeova, la t’a na n sõng-y lame tɩ y mao ne zu-loɛɛg buud fãa?

¹⁰ La y sã n wa maood ne zu-loɛɛg sẽn kẽesd rabeem, y tõe n maanda sãmbs a Zeova sã n teend-y lame. Sã n wa yaa woto, bɩ y kos-a t’a sõng-y tɩ y yã a sẽn teend-y to-to. (2 Rĩm. 6:15-17) Rẽ poor bɩ y sok y meng yaa: ‘M pa kelg sõsg wall leoor tigsg sasa tɩ keng m raood sɩda? M pa karem sebre, n ges video wall m kelg yɩɩn-noog tɩ keng m raood sɩda? Ned pa togs maam gomd wall vɛrse tɩ yɩ-m noog sɩda?’ D tõe n yĩma d tẽed-n-taasã nonglmã, Biiblã la siglgã sẽn yiisd bũmb ninsã sẽn sõngd tõnd to-to wã nana-nana. La b yaa kũun sẽn yit a Zeova nengẽ. (Eza. 65:13; Mark 10:29, 30) B yaa kaset t’a Zeova geta y yelle. (Eza. 49:14-16) B leb n yaa kaset tɩ zemsame tɩ y kɩs-a sɩda.

11. Bõe n sõng a Ayida t’a rabeemã booge?

¹¹ A Ayida sẽn yaa saam-bi-poak sẽn be Senegallã gũus n gesa a Zeova sẽn sõng-a to-to zu-loɛɛg sasa. A sẽn yaa a roagdbã pipi biigã yĩnga, b ra ratame t’a bao tʋʋm n tõog n ges a meng yelle, la a ges bãmb me yelle. La a sẽn yãk yam n bas bũmb kẽer baoob sẽn na yɩl n lebg so-pakdã poore, a pa le paamd ligd wʋsg ye. Rẽ kɩtame t’a zakã rãmb sũur yik ne-a tɩ b ra ningd-a taale. A yeelame: “M da yɛɛsdame tɩ m pa na n tõog n ges m roagdbã yelle, la tɩ nebã fãa na n wɩt-m lame. M da ningda a Zeova taal menga, a sẽn bas tɩ yɛlã keng woto wã yĩnga.” La a wa n kelga sõsg tigsg sasa. Rẽ poore a yeelame: “Sõsdã tẽegd-d lame tɩ baa yɛlã sẽn namsd-d to-to, a Zeova miime. M sẽn tũ kãsem-dãmbã la neb a taab saglsã, bilf-bilfu, m wa n kɩsa sɩd t’a Zeova nong-m lame. Rẽ tɛka m le sɩnga a Zeova pʋʋsg ne bas-m-yam, tɩ m sẽn ne a sẽn leokd m pʋʋsgã kɩt tɩ m yam gãe bãane.” A Ayida wa n paama tʋʋmde, tɩ sõng-a t’a tõe n ges a meng yell n kell n yɩ so-pakda, la a  get a roagdbã ne neb a taab me yelle. Ad a sẽn yeele: “M bãnga teeg a Zeova zãng-zãngã sẽn dat n yɛɛlga. Masã m sã n pʋʋse, m rabeemã n satame.”

BÕE LA A ZEOVA NA N MAAN BEOOG SẼN WATE?

12. Sã n yaa ne Yɩɩn-sõamyã 56:9 wã, a Davɩɩd ra kɩsa sɩd ne bõe?

¹² Karm-y Yɩɩn-sõamyã 56:9. Vɛrse-kãngã wilgda bũmb a to sẽn sõng a Davɩɩd t’a yam gãande. Baa a vɩɩmã sẽn da ket n be yell pʋgẽ wã, a bʋgsa bũmb ning a Zeova sẽn nan na n maan n kõ-a wã zugu. A Davɩɩd ra miime tɩ wakatã sã n ta, a Zeova na n fãag-a lame. Sɩd me, a Zeova ra yeelame t’a Davɩɩd na n lebga Israyɛll rĩma. (1 Sãm. 16:1, 13) Ne a Davɩɩde, a Zeova sẽn pʋlem fãa yaa waaziba.

13. D tõe n basa d yam t’a Zeova na n maana bõe?

¹³ Bõe la a Zeova pʋlem t’a na n maan n kõo yãmba? D miime t’a Zeova pa na n kogl tõnd tɩ zu-loɛɛg baa a ye ra paam-d ye. c La sẽn wa n yaa zu-loɛɛg ning fãa la y segd rũndã-rũndã, a Zeova na n kɩtame t’a sa dũni-paalgã sẽn watã pʋgẽ. (Eza. 25:7-9) D Naandã tara tõog n tõe n vʋʋg kũum, n sãoog d bãas buudã fãa, la a menes nin-wẽnsã fãa.—1 Zã 4:4.

14. Bõe zug la d tõe n bʋgse?

¹⁴ Y sã n wa maand rabeem bɩ y bʋgs bũmb nins a Zeova sẽn na n maan beoog sẽn watã zugu. Mams-y n ges-y y sũur sẽn na n yɩ noog to-to a Sʋɩtãan sã n wa pa le beẽ, tɩ nin-wẽnsã fãa menem n kell nin-tɩrsã, tɩ nebã zemsd zãng bilf-bilf beoog sẽn vẽeg fãa. Yʋʋmd 2014 rasem a tãab tigis-kãsengã sõsg a ye sasa, b maana mak-n-wilg n na n sõng-d tɩ d bãng d sẽn tõe n bʋgs bũmb nins d sẽn saagd n na n wa paamã zug to-to. Rao n da sõsd ne a zak rãmb 2 Tɩmote 3:1-5 wã zugu, n toeem vɛrse-kãens goamã sẽn na yɩl tɩ zems ne vɩɩmã sẽn na n yɩ to-to arzãnã pʋgẽ wã. A yeelame: “Dũni-paalgã pʋgẽ, sũ-noog wʋsg na n zĩndame. Bala nebã na n yɩɩ neb sẽn nong b taabã, neb sẽn nong sɩda, sik-m-mens rãmba, neb sẽn pẽgd Wẽnde, n sakd b ba-rãmb la b ma-rãmba, sẽn nong sẽn sõmbe, neb sẽn maand sɩda, neb sẽn nong b zakã rãmba, neb sẽn baood laafɩ, neb sẽn pa gomd ned yell wẽnga, neb sẽn tar yõk-m-menga, sũ-bʋgsem dãmba, neb sẽn nong maan-neere, pʋ-peelem dãmba, bas-taal rãmba, neb sẽn pa mi zẽk-m-menga, neb sẽn nong Wẽnnaam n yɩɩd yõ-noogrã. B raab yaa b sak Wẽnnaam ne b sũy fãa. Bɩ f mogd n bao nin-kãens zoodo.” Yãmb wae n sõsda ne y zakã rãmb wall ne y tẽed-n-taasã n gomd dũni-paalgã sẽn na n yɩ to-to wã yell bɩ?

15. Baa a Taniya sẽn da maand rabeemã, bõe n sõng-a t’a yam gãand bãane?

¹⁵ Masedoan dinoor saam-bi-poak a ye yʋʋr sẽn boond t’a Taniya bʋgsa bark nins d sẽn na n wa paamã zug tɩ boog a rabeemã. A roagdbã ra namsd-a-la wʋsg a sẽn zãmsd Biiblã yĩnga. A yeelame: “Bũmb nins m sẽn da yɛɛsd tɩ na n maaname wã kẽer maaname. M ma ra pãbda maam tigsg fãa poore. M roagdbã yeelame tɩ m sã n saag n lebg a Zeova Kaset soaba, b na n kʋ-m lame.” A Taniya roagdbã wa n dig-a lame n yiis zakẽ wã. A manesem yɩɩ wãna? A yeelame: “M da tagsda m sũur sẽn na n yɩ noog to-to wakat fãa yĩnga, m sã n kell n tall m burkĩndã. Sẽn paase, m da tagsda a Zeova sẽn na n keo-m to-to dũni-paalgã pʋgẽ,  bũmb nins fãa m sẽn tõe n bõn dũni-kãngã pʋgẽ wã yĩnga, la d sẽn pa na n le tẽeg wẽng buud fãa yellã.” A Taniya kell n talla a burkĩndã. Ne a Zeova sõngre, a pa gãand yɩng ye. Rũndã-rũndã, a Taniya kẽe kãadem ne saam-biig sẽn maand sɩd ne a Zeova tɩ b kẽes b mens zãng a Zeova tʋʋmdã pʋgẽ.

MANEG-Y N KƖS-Y-YÃ A ZEOVA SƖDA

16. D sã n wa ne bãngr-gomd ning sẽn be Luk 21:26-28 wã sẽn pidsdi, bõe n na n sõng-d tɩ d kell n tall raoodo?

¹⁶ To-kãsengã sasa, “nebã na n soba rabeemã yĩnga.” La Wẽnnaam nin-buiidã na n talla raood n yals kãn-kãe. (Karm-y Luk 21:26-28.) Bõe n kɩt tɩ d pa na n zoe rabeem? Bala rẽ tɩ d zoe n zãmsa a Zeova teegre. A Taniya sẽn yaa saam-bi-poak ning yell d sẽn gom tɩ loogã yeelame t’a sẽn mao ne zu-loeesã sõng-a-la zu-loees a taab sasa. A paasame yaa: “M bãngame tɩ zu-loɛɛg kae a Zeova sẽn pa tõe n sõng-d tɩ d tõog n mao ne ye. Wakat ninga, tõe n wõnda bũmb pa tõe n gɩdg neb a taabã tɩ b pa maan tõnd b sẽn dat ye. La sɩd-sɩda, yaa a Zeova n nan bas-b n getẽ. Sẽn paase, baa zu-loɛɛg sẽn yaa kɛgeng to-to, a wat n saame.”

17. Wãn to la yʋʋmd 2024 vɛrse wã na n sõng-do? (Ges-y sebrã pipi neng fotã.)

¹⁷ Rũndã-rũndã, d pa tõe n pa wa maan rabeem ye. La d tõe n dɩka a Davɩɩd togs-n-taare, n da bas tɩ rabeemã tõog-d ye. Yʋʋmd 2024 vɛrse wã yaa gomd a Davɩɩd sẽn togs a Zeova a sẽn wa n pʋʋsd-a. A yeelame yaa: “Rabeem sã n wa tar maam, mam teegda yãmba.” (Yɩɩn. 56:3) Sebr a yembr pʋgẽ, b goma vɛrse-kãngã yell n yeel t’a Davɩɩd “ra pa tagsd bũmb ning sẽn kẽesd-a rabeemã yell wakat fãa, wall a zu-loeesã yell ye. A ra teega soab ning sẽn na n fãag-a wã.” Tagsd-y d yʋʋmdã vɛrse wã yell kiis nins sẽn watã pʋgẽ, sẽn yɩɩd fãa y sã n wa segd zu-loees sẽn kẽesd rabeem. Maagd-y y yĩng n bʋgsd bũmb nins a Zeova sẽn maan pĩndã, a sẽn maand masã wã, la a sẽn na n maan beoog sẽn watã zugu. Woto, y na n tõog n yeela wa a Davɩɩd yaa: “Mam teega Wẽnnaam. Mam pa zoet rabeem ye.”—Yɩɩn. 56:4.