Wẽnnaam sẽn naan ãdem-biisã tɛka, a tũnuga ne malɛgs la ne no-rɛɛsdb n gom ne ninsaalbã. A kɩtame me tɩ b gʋls a goamã, la a sẽn pʋlem bũmb ninsã n bĩngi. Wẽnnaam pʋlmame tɩ d tõe n paama sũ-noog beoog-daare. Rũndã-rũndã, yɛ la d tõe n yã Wẽnnaam pʋlemsã?

Wẽnnaam sẽn taas tõnd goam ninsã bee Gʋls-sõamyã pʋgẽ. (2 Tɩmote 3:16) A maana wãn n tõog tɩ no-rɛɛsdb gʋls a goamã? Wẽnnaam ninga a goamã b sũyã pʋsẽ, tɩ b bãng n gʋlse. (2 Pɩyɛɛr 1:21) Yaa woto me rũndã-rũndã. Patrõ sã n kɩt t’a sekertɛɛr gʋls bũmb n tool neda, a soabã na n yeelame bal tɩ yaa patrõ wã goam la pa sekertɛɛrã ye. Dẽnd baa Wẽnnaam sẽn kɩt tɩ rap gʋls a goamã, d tõe n yeelame tɩ Wẽnnaam sebrã pʋgẽ goamã yaa Wẽnnaam n gʋlse.

Wẽnnaam goamã tara yõod wʋsgo, hal t’a rat tɩ nebã fãa karem-a la b wʋm a võore. Rũndã-rũndã, Wẽnnaam “koe-noog sẽn ka sɛtã” beeme, tɩ “neb sẽn yit buud toɛy-toɛy pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ” tõe n paame. (Vẽnegre 14:6) Ne Wẽnnaam sõngre, b yiisa Wẽnnaam sebrã tõrã bɩ a pʋɩ-sʋk ne buud-goam 3000 la zaka. Sebr kae tẽngã zug t’a sõorã ta woto ye.