Biiblã tõe n sõnga tõnd tɩ d bãng sẽn yaa sɩdã
Baa pĩnd wẽndẽ, neb buud toor-toor n da mi tɩ Biiblã tõe n sõnga ned t’a bãng sẽn yaa sɩdã. Rũndã-rũndã, neb milyõ-rãmb sakd n tũuda Biiblã sẽn yetã. La neb kẽer me yetame tɩ Biiblã pa le tar yõodo, t’a goamã yaa sẽn naane, la tɩ yaa nasaar-dãmb sebre. La yãmb yẽ tagsg yaa wãna? Biiblã tõe n sõnga yãmb tɩ y bãng bũmb sã n sɩd yaa sɩd bɩ?
BŨMB NING SẼN KƖT TƖ Y TÕE N KƖS BIIBLÃ SƖDÃ
Y maanda wãn n bãng y sã n tõe n kɩsa Biiblã goamã sɩda? D rɩk makre: Yãmb zoa y sẽn mi hal yʋʋm wʋsg sã n sɩng n togsda yãmb sɩd wakat fãa, y na n yeelame tɩ yaa ned y sẽn tõe kɩs sɩda. La rẽ yĩnga, Biiblã sɩng n togsda sɩd wakat fãa bɩ? N-ye. Ad bũmb a wãn sẽn wilgd rẽ:
Sẽn gʋls-b Biiblã maana pʋ-peelem
Sẽn gʋls-b Biiblã maana pʋ-peelem meng-menga. Naoor wʋsgo, b vẽneg n togsa b kongre. Wala makre, no-rɛɛs a Zonaas sebrã pʋgẽ, a togsa bũmb a sẽn maan n kɩɩs Wẽnnaam. (Zonaas 1:1-3) A sebrã baasgẽ, a pʋd n togsa Wẽnnaam sẽn sɩbg-a to-to wã. La a sẽn pa rat n bao pẽgrã, a pa gom yẽ sẽn maan to-to n dems a tagsgã ye. (Zonaas 4:1, 4, 10, 11) Biiblã gʋlsdbã fãa sẽn maan pʋ-peelmã wilgdame tɩ b raabã ra yaa b sõng nebã tɩ b bãng sẽn yaa sɩdã.
Biiblã saglsã sɩd nafda nebã
Yaa wakat fãa la Biiblã saglsã nafd ned bɩ? N-ye! Wala makre, bõe la Biiblã yeta, tɩ tõe n sõng tɩ zems-n-taar zĩnd nebã ne taab sʋka? Ad b sẽn yeele: “Yãmb sẽn dat tɩ nebã maan yãmb bũmb ninsã, yãmb me segd n maana bãmb bõn-kãense.” (Matiye 7:12) “Leok-bʋgsg sigsda sũuri, la gom-kɛgeng paasda sũ-puugri.” (Yel-bũnã 15:1) Hakɩɩka, Biiblã saglsã ket n nafda nebã rũndã-rũndã me.
Biiblã sẽn togsd kʋdemd yɛl ninsã yaa sɩda
Bũmb wʋsg la tẽn-vaeesdbã yãnd-yã, tɩ kõt kaset tɩ neb nins yell Biiblã sẽn gomdã, la zĩis nins yell a sẽn gomdã sɩd zĩndame, la tɩ kibay nins a sẽn togsdã yaa sɩda. Ad kaset a ye sẽn wilgd rẽ. Biiblã yeelame t’a Neemi wakatẽ wã, Tɩɩr neb (Fenisi neb sẽn be Tɩɩr) sẽn da be Zerizalɛm ra “wata ne zĩma, la koosem buud a taaba,” n na n koose.—Neemi 13:16.
Tẽn-vaeesdbã yãa bũmb sẽn wilgd tɩ Biiblã gom-kãnga yaa sɩd bɩ? N-ye. B yãa Fenisi rãmbã te-koosdem Israyɛll tẽngã, tɩ wilgdẽ tɩ tẽns a yiibã ra leebda ne taaba. Sẽn paas me, Zerizalɛm tẽngã, Mediterane mogrã zĩm-kõab la b bugs-yã. Tẽn-vaeesdbã yeelame tɩ tog n yaa lɛɛbdbã n tall n yi tẽn-zãrg n wa. Bãngd a ye n maag a yĩng n ges rẽ fãa, n wa baas n yeel yaa: “B sẽn togs Neemi 13:16 tɩ Tɩɩr neb n da koosd zĩm Zerizalɛmmã tog n yaa sɩda.”
Siãnsã wɛɛngẽ me, Biiblã togsda sɩda
Yaa sɩd tɩ Biiblã yaa tũudum sebre, la sebr sẽn togsd yɛl sẽn zĩnd pĩnd wẽndẽ. La a sã n gom bũmb yelle, tɩ siãnsã rãmb me gomd rẽ yelle, wat n mikame t’a sẽn yetã yaa kɛpɩ. Ad makr a ye.
Na maan yʋʋm 3500 woto, Biiblã ra pĩnd n yeelame tɩ tẽngã ‘yaga vɩʋʋgẽ.’ (Zoob 26:7) Nebã yaool n da tẽedame tɩ tẽngã bee koom zugu, pa rẽ bɩ yaa kur-kẽeng zug la a rog-yã. B sẽn gʋls Zoob sebrã, yʋʋm 1100 poore, nebã ra ket n pa tẽed tɩ tẽngã tõe n yaga vɩʋʋgẽ ye. Ne bãmb tagsgo, rẽnda a rog bũmb zugu. Yaa yʋʋmd 1687, rat n yeel tɩ sẽn zems yʋʋm 300 woto la bãngd a Isaac Newton yiis sebr sẽn wilgd tɩ tẽngã yaa gilga, n yilimdẽ, la tɩ yaa pãng buud nif sẽn pa ne n zãad-a. Ra yaa bõn-paall ne nebã, la yaool n yaa kaset tɩ bũmb ning Biiblã sẽn sɩng n togs na maan yʋʋm 3000 la zakã yaa sɩda.
A sẽn pĩnd n togs yɛl ninsã pidsda kɛpɩ
Goam nins Biiblã sẽn pĩnd n togsã yaa sɩd bɩ? D gom bũmb a ye yelle. Yaa Babilond lʋɩɩsã, no-rɛɛs a Ezayi sẽn pĩnd n togsã.
Gomdã: Yaa yʋʋmd 732 sẽn deng a Zeezi rogmã la a Ezayi gʋls a sebrã n sa. Sebrã pʋgẽ, a yeelame tɩ b na n wa reega Babilonde, la t’a na n wa lebga ra-boogo. Rẽ tɩ Babilond nan pa lebg tẽng sẽn tar pãng wʋsg meng ye. (Ezayi 13:17-20) A Ezayi pʋd n togsame tɩ rao ning sẽn na n zab n deeg tẽngã yʋʋr na n yɩɩ a Siruus. A togsa a sẽn na n maan to-to wã. A yeelame t’a na n ‘kʋɩɩsa kʋɩlsã koom.’ A reng n wilgame me tɩ na n mikame tɩ b pagsa tẽngã kʋɩlensã n base.—Ezayi 44:27–45:1.
Gomdã pidsgã: Na maan yʋʋm 200 woto a Ezayi sẽn togs gomdã, Pɛrs rĩm n sɩd wa n zab ne Babilond. A yʋʋr la a bõe? A Siruus. Babilond sẽn da gũbg ne lal-bɛda, tɩ Efrat kʋɩlgã koom me ra zoet tẽngã foollã, ned ra pa tõe n paam n ta tẽngã lalsẽ wã meng ye. La a Siruus kɩtame tɩ b tuk ko-sor tɩ kʋɩlgã koom boog n zemse, t’a sodaasã tõe n pasg n paam n ta tẽngã lalsẽ. Mikame tɩ Babilond nebã maana yalemdo, n pags tẽngã kʋɩlens nins sẽn tees kʋɩlgã n base. A Siruus sodaasã kell n tũu be n kẽ n deeg tẽngã.
La b sẽn yeel tɩ Babilond na n wa lebga ra-boogã yẽ? Rẽ me pidsame bɩ? N-ye. Maana yʋʋm kobs tɩ neb ra ket n vɩ be. La rũndã-rũndã, Babilond ra-boogã sẽn pẽ Bagdaad sẽn be Irak soolmẽ wã yaa kaset tɩ no-rɛɛsã sẽn pĩnd n togsã pidsa kɛpɩ. Hakɩɩka, Biiblã sã n togs baa yaa bũmb sẽn nan wate, d tõe n kɩsa sɩd tɩ na n pidsame.
