A Zeezi ra yeelame: “Buud na n yika zabr ne buud a to, tɩ rĩung me yik zabr ne rĩung a to. Tẽn-digimd-kãsems na n zĩndame, tɩ kom la bã-longds me zĩnd zĩig-zĩiga.” (Luk 21:10, 11) Yel-kãensã fãa na n naaga taab n yɩ bãnd sẽn wilgd tɩ “Wẽnnaam Rĩungã kolgame,” wa sobg la sa-yãgb sẽn wilgd tɩ saag n dat n wa wã. La rẽ yĩnga, yɛl a woto maanda dũniyã gill zugu, hal tɩ yaa vẽeneg bɩ? D ges makr a wãna.

1. ZABÃ

Zabr n yik yʋʋmd 1914, t’a wẽnemã buud ra zɩ n zĩnd hal kʋdemd wẽndẽ n tãag wakat kãng ye. Kʋdemdã yel-mitb yeelame tɩ yʋʋmd 1914 tɛka, dũniyã yɛlã toeema hal wʋsgo, bala yʋʋm-kãng la dũni gill pipi zabr zĩnd-yã. Sã n pa zab-kãng sasa, ninsaalbã ra zɩ n tall saar-dãmba, sɩls sẽn lobd bõmb-dãmba, masĩn-dãmb sẽn tãood vẽenã, gaaz-rãmb sẽn kʋʋde, la zab-teed a taab wʋsg woto n zab ye. Rẽ poore, yɩɩ dũni gill zabr a yiib-n-soabã. Zab-kãng sasa la ninsaalbã maan bõmb atomikã. Yʋʋmd 1914 tɛka, zabr pa tol n kong dũniyã zug ye. Neb milyõ ka tɛk n ki zab-kãens sasa.

2. TẼN-DIGIMDSÃ

Sebr a yembr pʋgẽ (Britannica Academic), b yeelame tɩ yʋʋmd fãa, tẽn-digimds sẽn ta bãmb 100 sẽn sek na sãam teed wʋsg n maande. Etazĩni tʋʋmd noor a ye (United States Geological Survey) yeelame tɩ kibay b sẽn tar hal yʋʋmd 1900 sẽnes n tãag tõnd wakatã wilgdame tɩ tẽn-digimds bãmb 16 sẽn tar pãng wʋsg n na n zĩnd yʋʋmd fãa. Neb kẽer yetame tɩ yaa d sẽn tar masĩn-bɛd masã wã n kɩt tɩ d tõe n bãng tɩ tẽn-digimds n maandã, lakae pa b sõorã n paas ye. La sẽn be bala, tẽn-digimd-kãsems n maand dũniyã zĩis toor-toore, n kʋʋd neb wʋsg la b sãamd teed hal t’a buud ra zɩ n zĩnd ye.

 3. KOMÃ

Zabã, pʋ-lik tʋʋmã, ligdã zu-loees la koodã sẽn ka sakd sõma wã kɩtame tɩ komã namsd neb wʋsg dũniyã gill zugu. Nasiõzĩni wã tʋʋmd noor ning sẽn get naong rãmbã rɩlgr yellã yʋʋmd 2018 wã rapoor pʋgẽ, b wilgame tɩ “dũniyã gill zugu, neb milyõ 821 la komã namsda,” la tɩ b sʋkã, bãmb “milyõ 124 la komã namsd hal sõma.” Komã me kɩtame tɩ na maan kamb bãmb milyõ a 3 la tus 100 kiid yʋʋmd fãa. Yʋʋmd 2011 wã pʋgẽ, kamb nins fãa sẽn maan kaalem dũniyã gill zugã bãmb 100 zugu, 45 wã fãa yaa komã n kʋ.

4. BÃASÃ LA BÃ-LONGDSÃ

Nasiõzĩni wã siglg ning sẽn get laafɩ wã yellã wilgame tɩ yʋʋmd 2001 wã tɛka, bã-longds sẽn namsd nebã wʋsg n puki. B paasame tɩ bã-kʋd wala sãad-n-wʋbdẽ wã, kõodrã la a taab lebg n pukame, tɩ bã-paal wala fulunfuudã bãase, giripã, ebola wã la a taab me puki. Sẽn nan pa kaoose, koronavirisã bã-loangdgã n puki. Baa bãngdbã la logtoɛɛmbã sẽn bãng bũmb wʋsg bãasã zugã, b pa tõog n paam bãasã fãa tɩɩm ye.

5. KOƐƐGÃ NA N MOONA DŨNIYÃ GILL FÃA

A Zeezi togsa bũmb a to me sẽn na n wilg tɩ Wẽnnaam Rĩungã naam sɩngame. Ad a sẽn yeele: “Rĩungã koe-no-kãngã na n moona dũniyã tɛk fãa tɩ yɩ kaset buud fãa yĩnga. Yaa rẽ poor la saabã na n ta.” (Matiye 24:14) Baa ne zu-loeesã sẽn be zĩig fãa wã, buud toɛy-toɛy neb sẽn yɩɩd bãmb milyõ a nii n moond Wẽnnaam Rĩungã koe-noogã tẽns 240 pʋsẽ, la buud-goam 1 000 la zak pʋgẽ. Ninsaalbã sẽn be dũni zug tɛka, woto buud ra zɩ n maan ye.

A Zeezi sẽn yeel tɩ bũmb nins na n yɩɩ bãndã fãa bee rũndã-rũndã. Bõe yĩng tɩ woto fãa segd n pak tõndo? Bala, a Zeezi ra yeelame yaa: “Yãmb sã n wa yã tɩ bõn-kãensã maandame, bɩ y bãng tɩ Wẽnnaam Rĩungã kolgame.”—Luk 21:31.

D sã n ges bũmb nins a Zeezi sẽn yeel tɩ na n yɩɩ bãndã, la d tik Biiblã me sẽn yet yɛlã sẽn pʋgd taab to-to wã wɛɛngẽ n sõd yʋʋmã, d mikdame tɩ Wẽnnaam lugla a Rĩungã saasẽ yʋʋmd 1914. a Yʋʋm-kãnga, Wẽnnaam kɩtame t’a Bi-riblã sɩng naam rɩɩbo. (Yɩɩn-sõamyã 2:2, 4, 6-9) Ka la bilfu, Wẽnnaam Rĩungã na n sooga dũniyã gilli, la a sãam goosneema-rãmbã fãa, la a kɩt me tɩ tẽngã fãa lebg arzãn tɩ ninsaalbã vɩɩmd a zug wakat sẽn kõn sa.

Ka la bilfu, pʋʋsg ning a Zeezi sẽn wilg a karen-biisã goam na n pidsame. A ra yeelame: “Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã.” (Matiye 6:10) La Rĩungã naam sẽn sɩng yʋʋmd 1914 tɛkã, bõe la a zoe n maane? Rĩungã sã n wa so dũniyã gilli, bõe la a na n maan n kõ ãdem-biisã?