Wẽnnaam yaa ãnda?
Wẽnnaam Gomdã sẽn yete
Wẽnnaam yaa ãnda?
Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.
1. Wẽnnaam yaa ãnda?
Wẽnnaam yaa sẽn naan-a bũmb fãa wã. B boond-a-la Biiblã pʋgẽ tɩ “rĩm ning sẽn be-a wakat sẽn kõn sa,” sẽn dat n yeel t’a pa tall sɩngre, a pa na n tall saab me ye. (1 Tɩmote 1:17, Kãab-paalgã Koe-noogo) Sẽn yaa yẽ la vɩɩmã kõtã yĩnga, yẽ bal la d segd n pʋʋs la d tũ.—Karm-y Wilgr 4:11.
2. Wẽnnaam yaa wãn-wãna?
Ned nan pa yã Wẽnnaam ye. Bala a yaa sɩɩga, tɩ ninsaal pa tõe n yã-a ye. (Zã 1:18; 4:24) Wẽnnaam sẽn naan bũmb ninsã wilgda a sẽn yaa a soabã. Wala makre, d sã n ges tɩɩsã biis la tɩ-puudã toor-toorã, la d ges b neermã, d bãngdame tɩ Wẽnnaam yaa nonglem la yam kãseng soaba. Saasã la tẽngã sẽn yalem to-to wã me wilgda tõnd t’a yaa pãn-kẽeng soaba.—Karm-y Rom dãmb 1:20.
D sã n karem Biiblã, d bãngda bũmb wʋsg Wẽnnaam zug n paase. Wala makre, Biiblã togsda tõnd Wẽnnaam sẽn nong la a sẽn kisi, a manesem sẽn yaa to-to ne nebã, la a sẽn maand to-to yɛl kẽer pʋgẽ.—Karm-y Yɩɩl Sõamyã 103:7-10.
3. Wẽnnaam tara yʋʋr bɩ?
A Zezi ra yeelame tɩ: “Tõnd Ba sẽn be arzãna [bɩ saasẽ], tɩ yãmb yʋʋr yɩ ne waoogre.” (Matɩe 6:9) Baa ne Wẽnnaam sẽn tar naam yʋy wʋsgã, a tara yʋ-peell a ye bala. B sẽn boond a yʋʋrã to-to buud-goam toor-toorã pʋgẽ wã pa yembr ye. Ne moorã, d yetame tɩ “Zeova” bɩ “Yaawe.”—Karm-y Yɩɩl Sõamyã 83:18, NW.
Rũndã-rũndã Biibl dãmb wʋsg pʋgẽ, b yãka Wẽnnaam yʋʋrã n ledg ne Zu-soaba, bɩ Wẽnnaam. La bãng-y tɩ b sẽn da wa n gʋls Biiblã n sa wã, Wẽnnaam yʋʋrã ra bee a pʋgẽ sẽn na ta zĩis 7 000. A Zezi kɩtame tɩ nebã bãng Wẽnnaam yʋ-peellã, bala a sã n da wilgd Wẽnnaam Gomdã goam võore, a ra pʋta yʋ-kãngã. A sõnga nebã tɩ b bãng Wẽnnaam sõma.—Karm-y Zã 17:26.
4. Tõnd yell paka a Zeova bɩ?
A Zeova sẽn kelgd tõnd pʋʋsgã a toorã wilgdame t’a nonga tõndo, n dat d neere. (Yɩɩl Sõamyã 65:3) Namsgã sẽn yaa wʋsgã wilgdame tɩ tõnd yell pa pak Wẽnnaam bɩ? Neb kẽer yetame tɩ yaa Wẽnnaam n kɩtd tɩ d namsd sẽn na yɩl n mak tõnd n gese, la woto pa sɩd ye. Biiblã yetame tɩ “Wẽnnaam Sẽn-tõe-a-fãa wã zãra ne wẽnga.”—Zoob 34:10; karm-y Zak 1:13.
Wẽnnaam kõo ninsaal fãa tõog t’a tõe n yãk yam. D sẽn tar tõog n tõe n yãk yam n tũ Wẽnnaamã pa bõn-sõng sɩda? (Zozue 24:15) Yaa neb wʋsg sẽn yãk yam n maand b taabã wẽngã yĩng la namsgã sẽn yaa wʋsgã. A Zeova nee yel-kɛg-kãensã, tɩ sãamd a sũuri.—Karm-y Sɩngr 6:5, 6.
Ka la bilfu, a Zeova na n kɩtame t’a Zezi menes namsg toor-toorã, la neb nins sẽn wat ne-bã. La nananda, bãng-y tɩ yaa bʋʋm sẽn sek yĩng n kɩt t’a Zeova bas tɩ namsgã nan beẽ wã. Sõsg a to n na n wilg bũmb ning sẽn kɩt tɩ Wẽnnaam bas tɩ namsgã beẽ wã.—Karm-y Ezai 11:4.
5. Bõe la Wẽnnaam dat tɩ tõnd maane?
A Zeova naana tõndo, n kõ-d tõog sẽn kɩt tɩ d tõe n bãng-a la d nong-a. A ratame tɩ tõnd bao n bãng yẽ sẽn sɩd yaa a soabã. (1 Tɩmote 2:4) D sã n zãms Biiblã, d na n bãnga Wẽnnaam sõma, hal t’a lebg d zoa.—Karm-y Yelbũn 2:4, 5.
Sẽn yaa a Zeova n kõ tõnd vɩɩmã, d segd n nong-a lame n yɩɩd ned buud fãa. D sã n gomd ne Wẽnnaam ne pʋʋsgã maasem la d maand a sẽn datã, d wilgd-a lame tɩ d nong-a lame. (Yelbũna 15:8) A Zeova ratame tɩ d manesmã ne neb a taabã pʋgẽ bɩ d wilgdẽ tɩ d nong-b lame.—Karm-y Mark 12:29, 30; 1 Zã 5:3.
[Foto, seb-neng 23]
Bʋʋm sẽn sek n kɩt tɩ Wẽnnaam bas tɩ namsgã nan beẽ wã