Bõe Yĩng tɩ d segd n lʋɩɩs a Zeova raabã taoore?

“Mam noor na n togsa yãmb tɩrlem ne yãmb fãagr tʋʋmã daar fãa.”—YƖƖL 71:15.

Y NA N LEOKAME TƖ BÕE?

Bõe n kɩt t’a Nowe, a Moiizi, a Zeremi ne a Poll fãa lʋɩɩs a Zeova raabã taoore?

Wãn to la y tõe n bãng y sã n pa sãamd y sẽkã?

Bõe yĩng tɩ y yãk yam n lʋɩɩs a Zeova raabã taoore?

1, 2. a) Ned sã n dɩk a meng n kõ a Zeova, bõe la a pʋlm-a? b) Wãn to la a Nowe, a Moiizi, a Zeremi la a Poll mak-sõngã tõe n naf-do?

YÃMB sẽn wa n dɩk y meng n kõ a Zeova n deeg lisg n lebg a Zezi karen-biigã, y maana bũmb sẽn tar yõod wʋsgo. Yaa yam-yãkr kãng n tar yõod n yɩɩda. Wakat kãnga, y yeela a Zeova woto: ‘Mam datame tɩ f yɩ mam Zusoaba. Mam yaa f tʋm-tʋmda. Mam datame tɩ f sõng-m tɩ m da sãam m sẽkã, la f wilg-m bũmb nins m sẽn tog n lʋɩɩsd taoore, la m sẽn tog n tʋmd ne m paoongã la m bãngrã to-to.’

² Y sã n dɩka y meng n kõ a Zeova n deeg lisgu, yaa wa y sẽn pʋlm-a woto. Y sẽn maanã seka pẽgre. Yaa bũmb sẽn zemse, la yam bũmb me. La y sẽn sak n deeg t’a Zeova la y Zusoab masã wã, wãn to la y tõe n da sãam y sẽkã? A Nowe, a Moiiz ne a Zeremi n paas tʋm-tʋmd a Poll mak-sõngã tõe n sõng-d lame tɩ d bãng sok-kãngã leoore. B tʋma a Zeova tʋʋmdã ne b sũyã fãa. B ned kam fãa sega yɛl sẽn wõnd tõnd yɛlã. D sã n ges b sẽn da lʋɩɩsd bũmb ning taoorã, tõe n kɩtame tɩ d bãng d sã n pa sãamda d sẽkã.—Mat. 28:19, 20; 2 Tɩm. 3:1.

SẼN DENG SÃOONG SA-KÃSENGÃ

3. Wãn to la tõnd wakatã wõnd a Nowe wakatã?

³ A Zezi maka a Nowe wakatã ne tõnd wakatã, n yeel woto: “Bũmb ning sẽn zĩnd a Nowe wakatã na n zĩnda Ninsaal Biigã waoong wakat me. Tɩ bõe, sẽn deng sãoong sa-kãsengã, nebã ra dɩtame la b yũuda, la b peesd pagba, la b kõt b kamb sɩdb hal tɩ ta daar ning a Nowe sẽn kẽ koom-koglgã pʋgẽ. La bãmb ka bãng hal tɩ  sãoong sa-kãsengã wa n loog ne bãmb fãa.” (Mat. 24:37-39) Rũndã-rũndã, nebã fãa la bal vɩɩ wa b sẽn date, n pa kelgd Wẽnnaam nin-buiidã sẽn moond n wilgdẽ tɩ tõnd wakatã pa reem wakatã ye. Wʋsg maanda wa a Nowe wakatẽ nebã, n pa tẽed tɩ Wẽnnaam na n sãama nin-wẽnsã ye. B pʋd n laada neb nins sẽn tẽed rẽ wã. (2 Pɩɛ. 3:3-7) La baa a Nowe zãmaanẽ nebã sẽn da pa kelgd a koe-moonegã, bõe la a maan-yã?

4. Wẽnnaam sẽn kõ a Nowe tʋʋmdã poore, bõe la a maan-yã, la bõe yĩnga?

⁴ Wẽnnaam sẽn togs a Nowe t’a na n wa sãama nin-wẽnsã poore, a kõ-a-la tʋʋmde. A Nowe kaa koom koglg sẽn na yɩl tɩ neb la rũms wa paam n põse. (Sɩng. 6:13, 14, 22) Sẽn paase, a mooname n wilg a Zeova sẽn dat n maan bũmb ningã. Tʋm-tʋmd a Pɩɛɛr yeelame t’a Nowe yɩɩ “tɩrlem koe-moonda,” tɩ wilgdẽ t’a bao n na n sõnga nebã tɩ b bãng tɩ b wakatã pa reem wakat ye. (Karm-y 2 Pɩɛɛr 2:5.) Rẽ yĩnga a Nowe ne a zakã rãmb sã n da bao tʋʋmd sẽn na yɩl n paam arzɛka, yʋʋr la naare, ra na yɩ yam tʋʋmd sɩda? Ayo! B sẽn da mi bũmb ning sẽn watã yĩnga, b pa bas tɩ baa fʋɩ tiis-b ye.

EZIPT NA-YIRÃ BIIG A YE YAM-YÃKRE

5, 6. a) Bõe yĩng tɩ b zãms a Moiiz Ezipt dãmbã yam fãa? b) Bõe yĩng t’a Moiiz pa bao n na n yɩ nin-kãseng Ezipti?

⁵ Bɩ d gom a Moiiz mak-sõngã yell masã. B wub-a-la Ezipt na-yirã, tɩ b ra get-a wa a Faraõ bi-pugl biiga. Woto kɩtame tɩ b “zãms-a Ezipt dãmbã yam fãa.” (Tʋʋ. 7:22; Yik. 2:9, 10) Tõe tɩ b sẽn zãms-a woto wã ra yaa sẽn na yɩl t’a wa tʋm tʋʋm-kãsems a Faraõ yĩnga. A ra tõe n wa lebga nin-kãseng Ezipti, tẽng ning sẽn tar pãng n yɩɩd tẽns a taabã wakat kãngã pʋgẽ. A ra na n paama arzɛk la ziir sẽn yaa kãsenga. La rẽ yĩnga bõn-kãensã ra tara yõod a Moiiz nifẽ bɩ?

⁶ A Moiiz yãadmẽ, a roagdbã sõng-a lame t’a bãng a Zeova. Rẽnd a tog n da mii bũmb nins a Zeova sẽn pʋlem a yaab-rãmb a Abrahaam, a Izaak la a Zakoobã. A ra tẽeda pʋlem-kãense. Tõe t’a tagsa rẽ pidsgã yell wʋsgo, la a sẽn na n maan to-to n tõog n sak a Zeova. La wakat n wa n zĩnd t’a ra segd n yãk a sã n na n tʋma na-yirã, bɩ a na n lebga yamb wa Israyɛll nebã. A manesem yɩɩ wãna? A Moiiz “tagsame t’a sã n lagem ne Wẽnnaam nebã n sak namsgo, yaa neer n yɩɩd sũ-noog ning yel-wẽnã sẽn kõt wakat bilf pʋgẽ wã.” (Karm-y Hebre dãmb 11:24-26.) Kaoosg zugẽ, a Moiiz saka a Zeova sẽn wilg-a t’a maan bũmb ningã. (Yik. 3:2, 6-10) Bõe yĩng t’a Moiiz sake? Bala, a ra tẽeda bũmb nins Wẽnnaam sẽn pʋlmã. A ra miime tɩ bũmb ning fãa a sẽn tõe n paam Ezipt soolmẽ wã  pa na n kaoos ye. Sɩd me, Wẽnnaam wa n kɩtame tɩ tood piig paam Ezipt nebã. A Moiiz mak-sõngã tõe n nafa neb nins fãa sẽn dɩk b mens n kõ a Zeova rũndã-rũndã wã. A mak-sõngã wilgdame tɩ d segd n lʋɩɩsda a Zeova raabã taoore, la d ra bao tʋʋm-bɛd wall arzɛgs dũni-kãngã pʋgẽ ye.

A ZEREMI RA MIIME TƖ SÃOONG N WATE

7. Bõe yĩng t’a Zeremi wakatã ne tõnd wakatã wõnd taaba?

⁷ Ned a to me sẽn lʋɩɩs a Zeova raabã taoor yaa a Zeremi. A Zeova ra yãk-a lame t’a lebg a no-rɛɛsa, n segd n taas a bʋ-kaoor koees Zerizalɛm la Zida nebã sẽn da bas-a n pʋʋsd bõn-naandsã. A Zeremi yɛlã ra yaa wa tõnd yɛlã. A vɩɩmda Zida ne Zerizalɛm soolmã yaoolem day sasa. (Zer. 23:19, 20, MN) A ra mii vẽeneg tɩ sãoong n wate.

8, 9. a) Bõe yĩng t’a Baruk sẽn da get yɛlã to-to wã pa zemse? b) Bõe la d segd n lʋɩɩsd taoor d magb fãa pʋgẽ?

⁸ A Zeremi sẽn da mi bũmb ning sẽn watã yĩnga, a manesem yɩɩ wãna? A pa bao arzɛgs ye. A sã n da maan woto, pa yam tʋʋmd ye. La a Zeremi seb-gʋlsd a Baruk yẽ ra pa get yɛlã woto ye. Rẽ kɩtame tɩ Wẽnnaam vẽeneg a Zeremi t’a yeel-a woto: “Gese, mam sãama bũmb ning mam sẽn da me wã, la m võ bũmb nins mam sẽn da selã. Mam na n maana woto dũniyã tɛk fãa. Fo baooda bõn-kãsems f meng yĩng la? Base, ra bao bũmb a woto ye. Tɩ bõe, gese, mam na n kɩtame tɩ toog paam ninsaalbã fãa . . . La mam na n gũu fo vɩɩm fo sẽn na n kẽng zĩig ninga fãa tɩ f põse.”—Zer. 45:4, 5.

⁹ D pa mi “bõn-kãsems” nins a Baruk sẽn da baoodã sẽn yaa bũmb nins ye. * D miime bal tɩ bõn-kãens ra pa na n kaoos ye. Babilon nebã ra na n naag-b-la ne Zerizalɛm n sãam yʋʋmd 607 soabã sẽn deng a Zezi rogmã. Yam bʋg la d tõe n dɩk kiba-kãngã pʋgẽ? Yɩl n tõog n paam bũmb nins sẽn yaa tɩlae ne-dã, rẽndame tɩ d mi n mag beoogo. (Yel. 6:6-11) La rẽ yĩnga tara yõod tɩ d tʋm wʋsg n bao teed sẽn pa na n naf-d n kaoos sɩda? Yaa sɩd t’a Zeova siglgã ket n meta Rĩungã roto, filiyall-dãmba, la rot a taaba. La woto yaa teed sẽn na n tall yõod wakat fãa, bala, b met-b-la Rĩungã tʋʋm yĩnga. Rẽnd segdame t’a Zeova nin-buiidã ned kam fãa me lʋɩɩsd Wẽnnaam Rĩungã taoor a magb fãa pʋgẽ. Rẽ yĩnga y kɩsa sɩda tɩ y rengd n baooda Rĩungã ne a Zeova tɩrlmã bɩ?—Mat. 6:33.

A GEELGA BÃMB “WA SAGDO”

10, 11. a) Nand t’a Poll lebg kiris-neda, bõe n da tar yõod a nifẽ? b) Bõe n kɩt t’a Poll toeem a sẽn da get yɛlã to-to wã?

¹⁰ Sẽn na n baase, d gom a Poll mak-sõngã yelle. Nand t’a lebg kiris-neda, nebã ra tagsdame t’a na n wa lebga nin-kãsenga. A ra paamame tɩ wakat kãng karen-saam-kãseng a ye zãms-a zʋɩf-rãmbã tõogã, tɩ zʋɩf-rãmbã maan-kʋʋdbã kãsem me wa bobl-a tʋʋmde. Sẽn paase, a ra tara yẽesem wʋsg zʋɩf-rãmbã tũudum pʋgẽ n yɩɩd a rog-taas wʋsgo. (Tʋʋ. 9:1, 2; 22:3; 26:10; Gal. 1:13, 14) La a Poll sẽn wa n bãng t’a Zeova pa le teend zʋɩf-rãmbã, a yɛlã fãa toeemame.

¹¹ A Poll bãngame tɩ bao n lebg nin- kãseng zʋɩf-rãmbã sʋk pa tar yõod a Zeova nifẽ ye. Zʋɩf-rãmbã tẽng ra na n paama sãoongo. (Mat. 24:2) A bãnga Wẽnnaam daabã sẽn yaa bũmb ningã, n da miẽ tɩ koe-moonegã yaa zu-zẽkr bũmbu. A Poll pʋd n yeelame tɩ yẽ geelgda bũmb nins a sẽn da get tɩ tara yõodã “wa sagdo.” A basa zʋɩf-rãmbã tũudum, la a yãk yam n na n moon koe-noogã a yõor tɛka.—Karm-y Filip rãmb 3:4-8, 15; Tʋʋ. 9:15.

BÕE LA YÃMB LƲƖƖSD TAOORE?

12. A Zezi lisgã poore, bõe la a lʋɩɩs taoore?

¹² A Nowe, a Moiizi, a Zeremi, a Poll la neb a taab tʋma Wẽnnaam tʋʋmdã ne b pãng fãa. B kõo tõnd mak-sõngo. La yaa vẽeneg tɩ ned ning sẽn kõ a Zeova nin-buiidã mak-sõng n tɩ yɩɩd yaa a Zezi. (1 Pɩɛ. 2:21) A lisgã tɛk n tãag a sẽn wa n na n leb saasẽ wã, a rɩka a sẽkã fãa n moon koe-noogã la a waoog a Zeova. Dẽnd kiris-ned ning fãa sẽn sak n deeg t’a Zeova la a Zusoab segd n lʋɩɩsa a Zeova raabã taoore. Yãmb maanda woto bɩ? La wãn to la d tõe n lʋɩɩs Wẽnnaam daabã taoore, la d baood bũmb nins sẽn yaa tɩlae ne-dã?—Karm-y Yɩɩl Sõamyã 71:15; 145:2.

13, 14. a) B sagenda a Zeova Kaset rãmbã fãa tɩ b maan bõe? b) Sũ-no-bʋg la Wẽnnaam nin-buiidã ned kam fãa tõe n paame?

¹³ Sẽn na maan yʋʋma, a Zeova siglgã sagenda kiris-nebã tɩ b ges b sã n pa tõe n lebg so-pakdba, la tɩ b pʋʋsd a Zeova rẽ wɛɛngẽ. A Zeova Kaset rãmbã kẽer yɛl sẽn yaa to-to wã kɩtame tɩ b pa tõe n moon koɛɛgã lɛɛr 70 kiuug fãa ye. La b pa segd n sãam b sũur dẽ yĩng ye. (1 Tɩm. 5:8) La yãmb yẽ yɛlã yaa wãn to? Rẽ yĩnga, so-pakrã sɩd yɩɩda y pãng bɩ?

¹⁴ Tẽeg-y sũ-noog ning tigimsã neb wʋsg sẽn paam tʋʋlg kiuugã pʋgẽ wã. Ki-kãng sẽn deng Tẽegrã, b kõo sẽn dat n dɩk-b sõngr so-pakrã sor tɩ b yãk b sã n na n moona lɛɛr 30 bɩ 50. (Yɩɩl 110:3) Koe-moondb milyõ-rãmb n dɩk sõngr so-pakrã, tɩ sũ-no-kãseng zĩnd tigimsã pʋsẽ. Rẽ yĩnga y tõe n manega y sẽkã n dɩkd sõngr so-pakrã naoor wʋsg yʋʋmd fãa bɩ? Kiris-ned sã n yaa so-pakda, yʋng fãa, a tõogd n yeela a Zeova woto: “Mam sũur yaa noogo, bala m tʋma f tʋʋmdã ne m pãng tɛka.”

15. Bõe yell la bi-bɩɩg sẽn nan ket lekoll segd n tags sõma?

¹⁵ Y sã n yaa bi-bɩɩg tɩ y karengã kolg saabo, y tõe n tara keelem, tɩ y zɩɩbã me pa waoogẽ ye. Rẽ yĩnga y tagsda so-pakrã yell bɩ? Tõe tɩ y karen-saam-dãmbã tagsdame tɩ yaa y sẽn na n karem n kẽng inivɛrsite bal la y na n wa tõog n paam tʋʋm-sõngo. B teega dũni-kãngã siglsã ne a arzɛgsã sẽn na n loog ka la bilfã. La y sã n kẽes y meng so-pakrã tʋʋmda pʋgẽ, y tʋmda tʋʋmd sẽn na n naf-y masã la wakat fãa yĩnga. Sẽn paase, y tũuda a Zezi mak-sõngã. Yam-yãkr a woto na n kõ-y-la sũ-noogo, la kɩt tɩ y paam koglg me. Leb n na n wilgame tɩ y tʋlla ne y sũur fãa n pids bũmb ning y sẽn pʋlem a Zeova wã.—Mat. 6:19-21; 1 Tɩm. 6:9-12.

16, 17. Sogs-bʋs la a Zeova Kaset soab fãa segd n sok a menga?

¹⁶ Rũndã-rũndã, kiris-neb sõor sẽn waoog tʋmda wʋsg sẽn na yɩl n paam bũmb nins sẽn yaa tɩlae ne b zagsã rãmbã. La tõe tɩ kẽer nengẽ pa sẽn na yɩl n paam sẽn yaa tɩlaeyã bal ye. (1 Tɩm. 6:8) Dũniyã ligd-baoodbã maanda b sẽn tõe fãa n dat tɩ d tẽ tɩ  yaa tɩlae tɩ d paam teed wʋsgo, la te-paals nins fãa b sẽn yiisdã. La kiris-neb hakɩkã pa rat n bas t’a Sʋɩtãan dũniyã neb wilg-b bũmb nins b sẽn segd n lʋɩɩs taoorã ye. (1 Zã 2:15-17) La bõe la sẽn dɩk-b retrɛtã tõe n maane? Sẽn na yɩl n da sãam b sẽkã, yɩta sõma tɩ b lʋɩɩs a Zeova tʋʋmdã taoore, n lebg so-pakdba.

¹⁷ A Zeova Kaset soab fãa segd n soka a meng woto: Bõe n tar yõod ne maam n yɩɩda? Mam lʋɩɩsda Wẽnnaam Rĩungã taoor bɩ? Mam dɩka a Zezi naoore, n sakd n mongd m meng bũmb kẽer bɩ? Mam tũuda a Zezi wakat fãa wa a sẽn sagl-dã bɩ? Rẽ yĩnga m tõe n manega m sẽkã n tõog n moon koɛɛgã n paas wall m tʋm Wẽnnaam tʋʋm a taab bɩ? Baa m yɛlã sẽn yaa to-to wã sã n kɩt tɩ m nan pa tõe n maan dẽ, rẽ yĩnga m ket n maanda m sẽn tõe tɛk bɩ?

‘YAA WẼNNAAM N KÕT YÃMB RATMÃ LA PÃNGA’

18, 19. Bõe wɛɛngẽ la y tõe n pʋʋse, la bõe yĩng tɩ pʋʋsg a woto noom a Zeova?

¹⁸ D sã n get Wẽnnaam nin-buiidã sẽn tar yẽesem ningã, kõta sũ-noogo. La baa kẽer sẽn tõe n lebg so-pakdbã, b pa rat ye. Sãnda me tõe n getame tɩ b minimã pa sek b na lebg so-pakdb ye. (Yik. 4:10; Zer. 1:6) Sã n yaa woto ne yãmba, bõe la y tõe n maane? Pʋʋs-y-yã a Zeova n kos a sõngre. A Poll yeela a tẽed-n-taasã woto: “Yaa Wẽnnaam n maand b tʋʋmd yãmb pʋsẽ, la b kõt yãmb ratmã, la pãng tɩ [y] maan wa sẽn zems bãmb daabã.” (Fil. 2:13, Kãab-paalgã Koe-noogo) Woto wã, y yam sã n pa be so-pakrã tʋʋmd bɩ y kos a Zeova t’a sõng-y tɩ y tʋlg n lebg so-pakda, la a sõng-y me tɩ y tõoge.—2 Pɩɛ. 3:9, 11.

¹⁹ A Nowe, a Moiizi, a Zeremi, a Poll ne a Zezi fãa tũu Wẽnnaam ne b sũy fãa. B moona a Zeova bʋ-kaoor koees b pãng tɛka. B pa bas tɩ baa fʋɩ tiis-b ye. Dũni-kãngã saabã ta n saame. Woto yĩnga, tõnd fãa sẽn dɩk d mens n kõ Wẽnnaam n deeg lisgã segd n feesda d mense, n get d sã n maanda d sẽn tõe fãa n tũud nin-kãensã mak-sõngã. (Mat. 24:42; 2 Tɩm. 2:15) D sã n maand woto, d noogda a Zeova sũuri, t’a na n ning-d barka.—Karm-y Malaki 3:10.

[Tẽngr note]

[Zãmsgã sogsgã]

[Foto seb-neng 22]

Nebã pa kelg a Nowe koe-moonegã ye

[Foto seb-neng 25]

Y magame n ges y sã n pa tõe n lebg wakat fãa so-pakd bɩ?