A Zeova nin-buiidã tigis-kãsemsã yaa sũ-noog wakate
A Zeova nin-buiidã tigis-kãsemsã yaa sũ-noog wakate
“Bɩ y tigim nebã fãa, rapã ne pagbã la kambã ne sãamb nins sẽn be y tẽnsã pʋsẽ wã.”—TÕO. 31:12.
Y NA N LEOKAME TƖ BÕE?
Kiba-bʋs n wilgd tɩ tigis-kãsemsã sɩng n tara yõod ne a Zeova nin-buiidã?
Bõe la Israyɛll neb wʋsg ra maand n kẽnd kibs toɛy-toɛyã Zerizalɛm?
Bõe yĩng tɩ y segd n kẽnd tigis-kãsemsã fãa?
1, 2. Bõe yell la d na n gom sõs-kãngã pʋgẽ?
HAL na maan yʋʋma, a Zeova Kaset rãmbã maanda tigis-kãsemse. Tõe tɩ tõnd sʋkã, neb wʋsg zoe n kẽnga tigis-kãens naoor ka tɛka.
2 Yʋʋm tusa sẽn looge, Wẽnnaam nin-buiidã ra tigimda taab me. D na n goma tigis-kãens yelle, n ges b sẽn wõnd rũndã-rũndã tigis-kãsemsã to-to. D na n yãa tigis-kãsemsã kẽnd sẽn nafd tõnd to-to wã me.—Yɩɩl 44:2; Rom 15:4.
TIGIS-KÃSEMS SẼN TALL YÕOD WƲSGO
3. a) Pipi tigis-kãseng ning yell Biiblã sẽn gomã sasa, bõe n maane? b) Wãn to la Israyɛll nebã ra bãngd tɩ b segd n tigma taaba?
3 Pipi tigis-kãseng yell Biiblã sẽn gomd yaa a Zeova sẽn kɩt tɩ Israyɛll nebã tigim taab Sinayi tãngẽ wã t’a zãms-bã. Tigis-kãng talla yõod wʋsgo. Baraare, a Zeova wilg-b-la a pãn-kãsengã, la a kõ-b tõogã. Sãmbg sẽn ka be, Israyɛll nebã pa tol n yĩm a yell ye. (Yik. 19:2-9, 16-19; karm-y Yikr 20:18; Tõod 4:9, 10.) Yaa ra-kãng la Israyɛll lebg buud Wẽnnaam sẽn so. Tigis-kãng poor bilfu, a Zeova wilga a Moiiz b sẽn segd n maand to-to n tigimd nebã. A yeel-a lame t’a maan tãntãad a yiib ne wanzuri, tɩ b sã n dat tɩ “nebã fãa” tigim taab “sɛk-zĩigã zak noor” bɩ b peebe. (Sõd. 10:1-4) Tags-y n ges-y tigis-kãens sẽn da kõt nebã sũ-noog ningã!
4, 5. Bõe yĩng tɩ tigis-kãsems nins a Moiiz ne a Zozue sẽn maanã tall yõod wʋsgo?
4 Israyɛll nebã sẽn yeeb rasempʋɩɩgẽ wã tɩ wa kolg yʋʋm 40, a Moiiz tigma b fãa. Tigis-kãng talla yõod wʋsg ne-ba, bala, ra keta bilf tɩ b kẽ kãabg tẽngã pʋgẽ, t’a Moiiz ges tɩ zemsame t’a tẽeg-b bũmb nins a Zeova sẽn maan b yĩnga, la a sẽn na n maan n kõ-bã.—Tõo. 28:69–29:14; 30:15-20; 31:30.
5 Tõe tɩ yɩɩ sasa kãng la a Moiiz sẽn wilg nebã tɩ tigsg la b na n maand yʋʋm a yopoe fãa wã. Tigis-kãng ra na n zemsda zãn kibsã sasa. Rapã, pagbã, kambã, la sãambã ra segd n tigma zĩig a Zeova sẽn da na n yãke, n bao n bãng tõogã sõma sẽn na yɩl n zoe a Zeova la b sak-a. (Karm-y Tõod 31:1, 10-12.) Dẽnd yaa vẽeneg t’a Zeova sɩng n datame t’a nin-buiidã tigimd taaba, n baood n bãngd a noyã la a raabã. Israyɛll nebã sẽn wa n zab n deeg kãabg tẽngã poore, a Zozue tigim-b lame. Tẽns nins sẽn da gũbg-bã sẽn da pa tũud a Zeova wã yĩnga, a Zozue ra rat n kenga Israyɛll nebã raood tɩ b kell n sak a Zeova. Baraare, nin-buiidã pʋlmame tɩ b na n kell n tũu Wẽnnaam.—Zoz. 23:1, 2; 24:1, 15, 21-24.
6, 7. Bõe yĩng tɩ d tõe n yeel tɩ tigis-kãsems nins yell d sẽn gomã talla yõod wʋsgo?
6 Tigis-kãsems a taab me n tall yõod wʋsg ne a Zeova nin-buiidã. Tigis-kãens sõngame tɩ b bãng toeeng nins sẽn maand a Zeova siglgã pʋgẽ wã, la sõng-b me tɩ b wʋm vɛrse kẽer võor sõma. (Yel. 4:18) Pipi tigis-kãseng Biiblã Zãmsdb sẽn maan dũni gill pipi zabrã poor yɩɩ yʋʋmd 1919 soabã. A zĩnda Sedaar Põent sẽn be Ohio, Etazĩni soolmẽ wã, tɩ kɛlgdbã ta 7000. Be, b wilgame tɩ Wẽnnaam nin-buiidã na n maana b sẽn tõe tɛk n moon koɛɛgã dũniyã gill zugu. Yʋʋmd 1922 soabã, b maana tigis-kãseng a to sẽn kaoos rasem a wɛ be. Tigis-kãng sasa, a Joseph Rutherford sõsa ne kɛlgdbã, n sagl-b tɩ b kell n moon koɛɛgã zĩig fãa, n tãag Babilon-kãsengã sãoongo. A yeela woto: “Rũndã raarã yaa kãsenga. Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y Rĩmã la a rĩungã.” Woto kenga sẽn zĩnd-b be wã ne b tẽed-n-taasã fãa raoodo, tɩ b maneg n moon koɛɛgã ne yẽesem.
7 Yʋʋmd 1931 soabã pʋgẽ, Biiblã Zãmsdb maana tigis-kãseng a to Kolõmbus sẽn be Ohio soolmẽ wã. Yaa tigis-kãng sasa la b sak tɩ b na n boond-b t’a Zeova Kaset rãmba. Yʋʋmd 1935 soabã, tigis-kãseng n zĩnd Wasĩnton, tɩ saam-biig a Rutherford wilg kʋʋn-kãseng ning Wilgr sebrã sẽn yeel tɩ yasa “geerã ne Pe-bilã taoorã” sẽn yaa neb ninsi. (Wil. 7:9-17) Yʋʋmd 1942 soabã, a Nathan Knorr kõo sõsg gom-zug sẽn yaa: “ La paix de demain sera-t-elle de longue durée ? “ Rẽ tɩ dũni gill zabr a yiib-n-soabã be a zug tẽn-sʋka. A wilga “rũm-zẽeg” ning yell Wilgr sak 17 soabã sẽn gomdã sẽn makd bũmb ninga, la a paas tɩ zabrã poore, koe-moonegã na n maneg n paama pãnga.
8, 9. Bõe yĩng tɩ tigis-kãsems kẽer yɩ Wẽnnaam nin-buiidã noog wʋsgo?
8 Yʋʋmd 1946 soabã, tigis-kãseng n zĩnd Klevlãnd sẽn be Ohio soolmẽ wã t’a gom-zug yaa: “ Nations joyeuses. ” Saam-biig a Knorr kõo sõsg gom-zug sẽn yaa: “ Problèmes de reconstruction et d’expansion. ” Saam-biig sẽn da zĩ ɛstraadã zug sõsgã sasa wilga kɛlgdbã manesem sẽn yɩ to-to. A yeelame tɩ saam-biig a Knorr sẽn wa n wilgd b sẽn dat n yalg Bruklin Betɛllã la sɛbã maaneg zĩig to-to wã, nebã ra wẽeda nug-pogse. A yeelame tɩ baa yẽ sẽn da zãrã, a ra neeme tɩ nebã fãa sũur noomame. Yʋʋmd 1950 soabã, tigis-kãseng n zĩnd Niuyork. Kɛlgdbã sũur yɩɩ noogo, b sẽn paam Les Écritures grecques chrétiennes — Traduction du monde nouveau wã. B wa n lebga Biiblã babs nins sẽn da kellã, tɩ d paam Biibl goam võor wʋmb sẽn yaa nana, la sẽn tar Wẽnnaam yʋʋrã zĩig ning fãa a sẽn segd n zĩndã.—Zer. 16:21.
9 A Zeova Kaset rãmbã maana tigis-kãsems tẽns pʋsẽ b sẽn da namsd-b wall b sẽn da gɩdg tɩ b ra moone. Tigis-kãens yɩɩ neb wʋsg noogo. Wala makre, a Adolf Hitler ra wẽename t’a na n menesa a Zeova Kaset rãmbã Alemayn. La yʋʋmd 1955 soabã, neb 107000 n zĩnd tigis-kãseng b sẽn maan Nuremberg zĩig ning a Hitler ne a poorẽ dãmbã sẽn da nong n tigimd taabã. Sẽn zĩnd-b be wã wʋsg raaga sũ-noog nintãm. Yʋʋmd 1989 soabã, neb 166518 n kẽng Poloyn n tɩ maan tigis-kãseng gom-zug sẽn yaa: “ La piété. ” B wʋsg yii Iniyõ Sovietik la Kekoslovaki n paas Erop delɛst tẽns a taaba. Ne kẽere, yɩɩ pipi b sẽn maan tigsg tɩ nebã sõor yɩɩg 15 bɩ 20. Yʋʋmd 1993 soabã, b maana tigis-kãseng Kiɛv sẽn be Ikrɛn soolmẽ wã, t’a gom-zugã yaa: “Wẽnnaam Zãmsgã.” Tags-y n ges-y sũ-noog ning sẽn zĩnd-b be wã sẽn paame, b sẽn yã neb 7402 sẽn deeg lisgã. D tagsdame tɩ raar pa zĩnd tɩ neb sõor sẽn ta woto reeg lisg n lebg a Zeova Kaset rãmb ye.—Ezai 60:22; Aze 2:7.
10. Tigis-kãsems sẽn yɩ yãmb noog n yɩɩd la bʋse, la bõe yĩnga?
10 Tõe tɩ tigis-kãseng ning n yɩ yãmb noog wʋsgo. Yãmb ket n tẽra pipi tigis-kãseng ning y sẽn kẽngã, wall a soab ning y sẽn deeg lisgã bɩ? Tigis-kãens talla yõod wʋsg ne-yã, tɩ y pa segd n yĩm b yell ye.—Yɩɩl 42:5.
TIGIS-KÃSEMSÃ YAA SŨ-NOOG WAKATE
11. Kibs bʋs la Wẽnnaam ra yeel Israyɛll nebã tɩ b maand yʋʋmd fãa?
11 A Zeova ra yeela Israyɛll nebã tɩ b tigimd taab Zerizalɛm naoor a tãab yʋʋmd fãa, n maand bur sẽn ka rabɩll kibsã, dẽenem biis kibsã b sẽn wa n boondẽ tɩ Pãntekotã, la zãn kibsã. Ad a sẽn yeele: “Yʋʋmd pʋgẽ fãa, bɩ yãmb dapã fãa wa soaalã sẽn yaa Zusoabã taoor naoor a tãabo.” (Yik. 23:14-17) La rap wʋsg sẽn da mi tɩ tigis-kãens tara yõod wʋsgã, b ra kẽngda ne b zakã rãmb fãa.—1 Sãm. 1:1-7; Luk 2:41, 42.
12, 13. Bõe la Israyɛll neb wʋsg ra maand n kẽnd kibs-rãmbã, la bõe yĩng tɩ rẽ yaa mak-sõngo?
12 Tags-y n ges-y Israyɛll ned sẽn da modgd to-to sẽn na yɩl n kẽng Zerizalɛm ne a zakã rãmbã. Wala makre, a Zozɛf ne a Maari ra segd n yii Nazarɛte, n kẽn sẽn na maan kɩlo 100 n ta Zerizalɛm. So-toakã sẽn da yaa ne nao tɩ b tar kom-bõonegã, yaa vẽeneg tɩ kaoosdame. D sã n karem kibar ning sẽn gomd a Zezi sẽn kẽng Zerizalɛm a sẽn wa n tar yʋʋm 12 wã yellã, d mikdame tɩ nebã mi n togda sorã ne b roagdb la b zo-rãmba. So-toakã sasa, b ra segenda b rɩɩbã ne taaba, la b sõngd taab sẽn na yɩl tɩ ned kam fãa paam zĩig n gãand sãandã weoogo. La d miime tɩ b ra tõe n basa b yam, bala baa a Zezi sẽn da yaa biigã, a roagdbã ra pa gũusd-a wakat fãa ye. So-toak fãa ra noom-b lame, sẽn yɩɩd fãa kom-bõonegã.—Luk 2:44-46.
13 Israyɛll nebã sẽn wa n sãeegã, kẽer da yita tẽns toor-toor n wat Zerizalɛm. Wala makre, yʋʋmd 33 Pãntekotã, zʋɩf-rãmb la neb a taab sẽn da mi kibs-rãmbã yõodã yii tẽns wala Itali, Libi, Kɛrɛte, Azimineer la Mezopotami n wa.—Tʋʋ. 2:5-11; 20:16.
14. Kibs sasa, Israyɛll nebã manesem da yaa wãna?
14 Ne Israyɛll neb kẽere, sẽn da tar yõod n yɩɩd yaa b sẽn da paamd n naagd neb tusa sẽn nong a Zeova n waoogd-a wã. Kibs sasa, nebã manesem da yaa wãna? A Zeova sẽn wa n gomd zãn kibsã yellã, a yeela Israyɛll nebã woto: “Bɩ yãmb ne y kom-dibli wã la y kom-pugli wã ne y yem-daadã la y yem-pogsã ne Levi nebã la sãambã la kɩɩbsã ne pʋg-kõapã sẽn be yãmb tẽnsã pʋsẽ wã maan sũ-noog y kibsã yĩnga. Maan-y kibsã rasem a yopoe Zusoab a Wẽnnaam waoogr yĩnga, zĩig ning bãmb sẽn yãkã. Tɩ bõe, Zusoab a Wẽnnaam na n ninga yãmb bark tɩ y paam koodo, la b sõng yãmb ne y tʋʋmã fãa tɩ y paam sũ-noog wʋsgo.”—Tõo. 16:14, 15; karm-y Luk 11:28.
BÕE YĨNG TƖ D SEGD N NAND TIGIS-KÃSEMSÃ?
15, 16. Wãn to la y modgd sẽn na yɩl n kẽnd tigis-kãsemsã, la bõe yĩng tɩ y maand rẽ ne yamleoogo?
15 Kibs nins b sẽn da maand Zerizalɛmmã wilgda tõnd bũmb wʋsgo. Tõnd tigis-kãsemsã sasa, bũmb kẽer la d maand tɩ wõnd b sẽn da maand pĩndã. Wala makre, tõnd wʋsg me segd n modgame n kẽnd tigis-kãsemsã. La d sẽn mi tigis-kãsemsã sẽn wat ne nafa ninsã, d maanda rẽ ne yamleoogo. Tigis-kãsemsã ket n tara yõod wʋsgo. Be, d paamda saglse, la d paamd n wʋmd Biiblã goam võor sõma. Rẽ yaa tɩlae sẽn na yɩl tɩ zood ning d sẽn tar ne Wẽnnaamã kell n tall pãnga. Tigis-kãsemsã sõngda tõnd tɩ d tũud Biiblã saglsã, tɩ d tõogd n gind zu-loeesã, la d lʋɩɩsd bũmb nins sẽn kõt sũ-noog hakɩkã taoore.—Yɩɩl 122:1-4.
16 Wakat fãa, neb nins sẽn kẽnd tigis-kãsemsã paamda sũ-noogo. Wala makre, b goma yʋʋmd 1946 soabã tigis-kãseng yelle, n yeel woto: “F sã n da ne a Zeova Kaset rãmb tusa sẽn naag taab n tar sũ-noogã, bee yamleoogo. La sẽn da be yamleoog n yɩɩd yaa f sã n da kelgd orkɛstrã saam-biisã la saam-bi-pogsã sẽn yaa wʋsg n deemd ne yʋʋm-teedã, tɩ kɛlgdbã fãa naag n yɩɩnd n pẽgd a Zeova wã.” B paasa woto: “Sẽn get-b yamleoog tʋm-tʋmdbã yellã paamame tɩ neb wʋsg sak n tʋm tʋʋm toor-toore, b sẽn dat n sõng b tẽed-n-taasã yĩnga.” Yãmb me paamda sũ-noog a woto tigis-kãsemsã sasa bɩ?—Yɩɩl 110:3; Ezai 42:10-12.
17. Bõe n kɩt tɩ rũndã-rũndã tigis-kãsemsã pa wõnd pĩnd rãmbã?
17 Rũndã-rũndã tigis-kãsemsã pa wõnd pĩnd rãmbã zãng ye. Wala makre, tigis-kãseng ning ra tõe n kaoosa rasem a nii. Sõssã ra bee yibeoogo, zaabr la yʋngo. B ra mi n yãka wakat me n yi n moon koɛɛgã. Sõss kẽer da sɩngda yibeoog wakat a wɛ. La naoor wʋsgo, tigsgã tata yʋng wakat a wɛ. Tõnd tẽed-n-taas n da tʋmd wʋsg n segend rɩɩb n kõt kɛlgdbã naoor a tã daar fãa. La tigis-kãsemsã pa le kaoosd woto ye. Sẽn paase, d tẽed-n-taasã sẽn wat ne rɩɩbã, d tõe n paam n kelga sõssã neere.
18, 19. Tigis-kãsemsã sasa, bõe n noom yãmb n yɩɩda, la bõe yĩnga?
18 Bũmb kẽer b sẽn sɩng n maand tigis-kãsemsã sasa la d gũud ne d sũyã fãa. Wala makre, sõssã la seb-paalã d sẽn paamdã. B kõta sagls sẽn zems b wakate, la b sõngd-d tɩ d wʋmd Biiblã noyã la a bãngr-goamã võor sõma. (Mat. 24:45) B yiisa seb-paal kẽer sẽn na yɩl tɩ d tõog n sõng d taabã tɩ b bãng Biiblã. Teyatr nins sẽn tik Biiblã zug b sẽn maandã sõngda kom-bɩɩsã la kãsembã tɩ b fees b mens n ges b sã n tũuda a Zeova ne yam-sõngo. Sõngd-b lame me tɩ b tõog n gũus ne dũniyã yamã. Lisgã sõsgã sõngda d ned kam fãa t’a fees a meng n ges bõe n pak-a n yɩɩda. Sẽn paase, d sã n yãt neb sẽn dɩk b mens n kõ a Zeova sẽn deegd lisgã, kõt-d-la sũ-noog wʋsgo.
19 Tigis-kãsemsã sɩng n bee bũmb nins a Zeova sẽn dat t’a nin-buiidã maandẽ wã sʋka. B kõta tõnd sũ-noogo, la b sõngdẽ tɩ d ket n sakd a Zeova baa zu-loees pʋgẽ. B kõt-d-la raood me tɩ d tʋmd a tʋʋmdã ne yẽesem. Sasa kãense, d paamda zo-rãmba. D neeme me tɩ d naaga saam-biis sẽn be dũniyã gill zug n nong taaba. A Zeova tũnugda ne tigis-kãens me n get a nin-buiidã yell la a ningd b barka. Bɩ tõnd ned kam fãa maand modgr sẽn na yɩl n paamd tigis-kãsemsã sõssã fãa n kelgdẽ.—Yel. 10:22.
[Zãmsgã sogsgã]
[Foto seb-neng 30]
Tigis-kãseng sẽn zĩnd Niuyork yʋʋmd 1950 soabã
[Foto seb-neng 32]
Mozãmbik
[Foto rãmba, seb-neng 32]
Kooredisiid
