Dũni-kãngã sẽn na n sa to-to
Dũni-kãngã sẽn na n sa to-to
“Yãmb ka be lik pʋgẽ tɩ da-kãng na n ling yãmb wa wagdr ye.”—1 TES. 5:4.
Y TÕE N WILGA A VÕOR BƖ?
Bõe sẽn nan wat yell la vɛrse kãensã gomda?
1. Bõe n na n sõng-d tɩ d ket n gũudẽ la d tõog toog makr sasa?
KA LA bilfu, yel-kãsems n na n maan dũniyã zugu. Biiblã bãngr-goamã n wilgd rẽ, tɩ d segd n ket n gũudẽ. La bõe n na n sõng-d tɩ d gũ? Tʋm-tʋmd a Poll sagl-d lame tɩ d “get bũmb nins nin sẽn ka ne wã.” Sɩd me, d segd n ninga d yamẽ t’a Zeova pʋlmame tɩ d na n wa paama vɩɩm sẽn kõn sa saasẽ, wall tẽngã zugu. A Poll yeela a tẽed-n-taasã woto n na n tẽeg-b tɩ b sã n kell n tũ Wẽnnaam, b na n wa paama keoore. Sẽn paase, na n sõng-b lame tɩ b tõog toog makr la namsg sasa.—2 Kor. 4:8, 9, 16-18; 5:7.
2. a) Bõe la d segd n maan n kell n tall tẽebo? b) Bõe yell la d na n gom sõs-kãngã la sẽn pʋgd-a wã pʋgẽ?
2 A Poll saglgã wilgda tõnd bũmb sẽn tar yõod wʋsgo. Wilgdame tɩ d sã n dat n kell n tall tẽebo, d pa segd n get yɛl nins nin sẽn ne wã bal ye. D segd n tagsda yel-kãsems sẽn nan wat yell me. (Heb. 11:1; 12:1, 2) Sõs-kãngã la sẽn pʋgd-a wã pʋgẽ, d na n goma bũmb piig yelle. Bõn-kãens n na n maan tɩ d yaool n paam vɩɩm sẽn pa sɛtã.
BÕE N NA N DENG N MAANE?
3. a) Pipi Tesalonik rãmb 5:2, 3 wã gomda bõe sẽn na n zĩnd yelle? b) Bõe la nanambsã na n maane, la tõe tɩ ãnd dãmb n na n naag-ba?
3 A Poll lɛtr ning a sẽn tool Tesalonik kiris-nebã pʋgẽ, a wilga bũmb sẽn na n maan beoog-daare. (Karm-y 1 Tesalonik rãmb 5:2, 3.) A goma “Zusoabã daar” yelle. Vɛrse kãensã pʋgẽ, ‘Zusoabã daarã’ yaa wakat sẽn na n sɩng ne ziri tũudmã sãoongo, n tall n tãag Armagedõ zabrã. La a Poll wilgame t’a Zeova daarã sã n wa kolge, dũniyã nanambsã na n mooname tɩ “laafɩ la yĩn-maasem” wa-yã. Tõe tɩ b na n moona vugr wall naoor wʋsgo. Tõe tɩ nanambsã na n wa tẽedame tɩ b na n tõog n welga b zu-loe-kãsems kẽere. La tũudum taoor dãmbã yẽ? B sẽn yaa dũniyã rẽndã yĩnga, tõe tɩ b na n teela nanambsã. (Wil. 17:1, 2) B na n maana wa Zida ziri no-rɛɛsdbã. No-rɛɛsdb kãens ra yeta nebã woto: “Laafɩ bal la d gãe ne!” La a Zeova yeel-b lame “tɩ laafɩ yaool n kaẽ ye.”—Zer. 6:14; 23:16, 17, Sebr Sõngo.
4. Bõe võor la tõnd wʋmd tɩ nebã wʋsg pa wʋmdẽ?
4 Sẽn wa n yaa neb nins n na n naag taab n gomd ‘laafɩ la yĩn-maasmã’ yellã me, na n wilgame t’a Zeova daarã taame. Rẽ n so t’a Poll yeel woto: “M ba-biisi, yãmb ka be lik pʋgẽ tɩ da-kãng na n ling yãmb wa wagdr ye. Yãmb fãa yaa vẽenem kamba, la wĩntoog kamba.” (1 Tes. 5:4, 5) Biiblã sõngda tõnd tɩ d wʋmd bũmb nins sẽn maand rũndã-rũndã wã võore, tɩ nebã wʋsg pa miẽ ye. La wãn to la bãngr-gomd ning sẽn wilgd tɩ nebã na n wa gomda “laafɩ la yĩn-maasem” yellã na n pidsi? D nan pa mi ye. Rẽ n so tɩ d segd n ket n gũudẽ.—1 Tes. 5:6; Sof. 3:8.
“RĨM-POAK” SẼN PA BÃNG TƖ B NA N SÃAM-A LAME
5. a) “To-kãsengã” na n sɩnga ne bõe? b) Ãnda n get a meng wa “rĩm-poaka,” n tagsdẽ tɩ bũmb pa tõe n paam-a?
5 A Poll wilga bũmb ning sẽn na n pʋgle. A yeela woto: ‘Wakat ning nebã sẽn na n yeel tɩ laafɩ la yĩn-maasmã, wakat kãng bala, toog na n paama bãmba.’ Pipi toogã yaa b sẽn na n zab ne “Babilon-kãsengã” sẽn yaa ziri tũudmã fãa sẽn naag taabã b sẽn boond tɩ pʋg-yoodrã. (Wil. 17:5, 6, 15) B sẽn na n zab ne kiris-neb ne yʋʋrã la ziri tũudum a taabã n na n yɩ “to-kãsengã” sɩngre. (Mat. 24:21; 2 Tes. 2:8) Yel-kãngã na n linga neb wʋsgo. Bõe yĩnga? Bala, hal n tãag wakat kãnga, pʋg-yoodrã na n geta a meng wa “rĩm-poaka,” n tagsdẽ t’a pa na n tol n paam “sũ-sãoong” ye. La zĩig pʋgẽ, a na n bãngame t’a belga a menga. A sãoongã na n yɩɩ tao-tao wa bũmb b sẽn maan “daar a ye.”—Wil. 18:7, 8.
6. Ãnd n na n sãam ziri tũudmã?
6 Biiblã wilgame tɩ we-rũng sẽn tar ‘yɩɩl piig’ n na n sãam pʋg-yoodrã. D sã n bao n wʋm Wilgr sebrã goam võore, d mikdame tɩ we-rũngã makda Nasiõzĩni wã, tɩ “yɩɩl piigã” makd politik pãn-soaadb nins sẽn teend “rũm-zẽegã.” * (Wil. 17:3, 5, 11, 12) Pʋg-yoodrã sãoong na n yɩɩ wãn-wãna? Nasiõzĩni wã tẽnsã taoor dãmb na n zaeya a paoongã, n puka a bãongo, “la b yõog-a bugum.” B na n sãama pʋg-yoodrã zãnga.—Karm-y Wilgr 17:16.
7. Na n sɩnga wãn tɩ ‘we-rũngã’ wa zab ne pʋg-yoodrã?
7 Biiblã bãngr-goamã wilgda sẽn na n sɩng to-to tɩ b wa zab ne Babilon-kãsengã. A Zeova na n kɩtame tɩ nanambsã “maan [a] yam,” n sãam pʋg-yoodrã. (Wil. 17:17) Ziri tũudmã yaa sabab tɩ zabã piuugdẽ. B ket n wata ne zu-loees a taab me. Rẽnd tõe tɩ nanambsã na n tagsame tɩ ziri tũudmã sãoongã na n nafa bãmb mensã. Sɩd me, b na n tagsame tɩ yaa bãmb n yãk yam n na n zab ne pʋg-yoodrã. La yaool n yaa Wẽnnaam n tũnugd ne-b n na n sãam ziri tũudmã. Rẽnd a Sʋɩtãan dũniyã politikã rãmb n na n wẽneg n zab ne ziri tũudmã, t’a Sʋɩtãan pa tõog n gɩdg rẽ ye.—Mat. 12:25, 26.
B NA N ZABA NE WẼNNAAM NIN-BUIIDÃ
8. A Goog sẽn yit Magoogã zabrã yaa bõe?
8 Babilon-kãsengã sãoong poore, Wẽnnaam bɛɛbã na n geta a nin-buiidã wa neb sẽn “zĩ ne laafɩ tẽns sẽn ka tar lals” pʋsẽ. (Eze. 38:11, 14) Bõe n na n paam nin-kãensã sẽn ket n tũud a Zeova tɩ b get-b wa neb sẽn pa tar sõngrã? Wẽnnaam Gomdã yeelame tɩ “buud wʋsg” neb n na n yik n zab ne-ba, n bool zab-kãng t’a Goog sẽn yit Magoogã zabre. (Karm-y Ezekɩɛll 38:2, 15, 16.) Zab-kãngã segd n kẽesa tõnd rabeem bɩ?
9. a) Bõe n pak kiris-nebã n yɩɩda? b) Bõe la d tõe n maan n paas d tẽebã pãnga?
9 Baa d sẽn mi t’a Goog na n zaba ne Wẽnnaam nin-buiidã, d pa maand yɩɩr wʋsg ye. Sẽn pak-d n yɩɩdã yaa a Zeova yʋʋrã paam waoogre, la tɩ b bãng tɩ yaa yẽ n segd n yɩ yĩngr la tẽng naaba, pa tõnd fãagrã n pak-d ye. Sɩd me, Biibl-dãmb nins b sẽn gʋls ne hebre wã pʋsẽ, a Zeova yeela a Ezekɩɛll sebrã pʋgẽ sẽn yɩɩd noor 60 woto: “Yãmb na n bãngame tɩ mam yaa a Zeova.” (Eze. 6:7, MN) Gom-kãngã wilgdame t’a Zeova na n kɩtame t’a yʋʋrã paam waoogr dũniyã gill zugu. D yãgdame n na n yã rẽ sẽn na n pids to-to wã. Sẽn paase, d kɩsa sɩd t’a Zeova “miime tɩ fãag nin-sõamyã makr pʋgẽ.” (2 Pɩɛ. 2:9) La nananda, d segd n maana d sẽn tõe fãa n paasd d tẽebã pãnga, n tõog n sakd Wẽnnaam baa d zu-loeesã sẽn yaa to-to. Wãn to la d tõe n maan dẽ? Yaa d sẽn na n pʋʋsdẽ, n zãmsd Wẽnnaam Gomdã la d bʋgsd a goamã zugu, la d moond Rĩungã koɛɛgã. D sã n maand woto, d na n maneg n kɩsa sɩd tɩ d na n wa paama vɩɩm sẽn kõn sa wã, tɩ d tẽebã yɩ wa ‘baar’ sẽn ka vigsdi.—Heb. 6:19; Yɩɩl 25:21.
NA N WA YƖƖ TƖLAE TƖ DŨNIYÃ NEBÃ BÃNG A ZEOVA
10, 11. Bõe n na n kɩt tɩ Armagedõ sɩnge, la bõe n na n maan wakat kãnga?
10 B sã n wa na n zab ne a Zeova nin-buiidã, bõe n na n maane? A Zeova na n tũnuga ne a Zezi la tãp-biis sẽn be saasẽ, n zab n sõng a nin-buiidã. (Wil. 19:11-16) Rẽ la “Wẽnnaam Sẽn-tõe-fãa da-kãsengã zabr” b sẽn boond tɩ Armagedõ wã.—Wil. 16:14, 16.
11 A Zeova goma zab-kãng yelle, n yeel woto: “Mam na n kɩtame tɩ toog buud fãa yɛɛs [a] Goog t’a nebã fãa kʋ taaba.” Dẽnd a Sʋɩtãan poorẽ dãmb na n yɛɛsame n pa mi b sẽn maandga, n wẽneg n kʋ taaba. La a Sʋɩtãan mengã na n paama toogo. A Zeova yeelame t’a na n kɩtame tɩ “sa-kẽeng ne sapɩlem la bugum ne kidbr ni [a Goog] ne a tãp-biisã la buud wʋsg nins sẽn be ne yẽ wã zutu.” (Eze. 38:21, 22) Rẽ na n waa ne bõe?
12. Na n wa yɩɩ tɩlae tɩ dũniyã neb bãng ãnda?
12 Dũniyã nebã na n bãngame tɩ yaa a Zeova n kõ noor tɩ b sãam-ba. Rẽnd tõe t’a Sʋɩtãan poorẽ dãmbã na n maana wa Ezipt nebã. B sẽn babs Israyɛll nebã mog-miuugã pʋgẽ wã, b wa n yeela woto: “Zusoabã zabda ne tõnd n sõngd bãmba.” (Yik. 14:25) Na n wa yɩɩ tɩlae tɩ b bãng a Zeova. (Karm-y Ezekɩɛll 38:23.) Yel-kãensã sɩngr kolgame bɩ?
DŨNI GILL PÃN-SOAAD A TO PA NA N LE WA YE
13. Bõe la d bãng bõn-naandg ning a Daniɛll sẽn yã wã babg a nu soabã zugu?
13 Bãngr-gomd b sẽn togs a Daniɛll sebrã pʋgẽ n sõngd-d tɩ d bãng tɩ to-kãsengã kolgame. Bãngr-gom-kãng pʋgẽ, a Daniɛll bilga bõn-naandg sẽn wõnd ninsaala, b sẽn maan ne sãnem, wanzuri, zũud la kutu. (Dan. 2:28, 31-33) Bõn-naandgã babsã makda dũni gill pãn-soaadba. Yaa pãn-soaadb sẽn dɩ naam Wẽnnaam nin-buiidã zug pĩnd wẽndẽ la rũndã-rũndã. Yaa Babilon, Meed la Pɛrse, Gɛrɛse, Rom n paas pãn-soaad a to sẽn yaa yaoolem soaba, n dɩt naam tõnd wakatã. A Daniɛll bãngr-gomdã sõngame tɩ d bãng tɩ yaa bõn-naandgã naoã la a nao-bi wã n makd yaoolem pãn-soaadã. Dũni gill pipi zabrã sasa, Gãrãnd Bertayn la Etazĩni yõga zood sẽn tar pãnga. Bõn-naandg ning a Daniɛll sẽn yã wã babg a nu soabã makda Gãrãnd Bertayn la Etazĩni sẽn naag taab n yaa dũni gill pãn-soaadã. Yaa naoã la bõn-naandgã yaoolem babgo. Woto wilgdame tɩ pãn-soaad a to pa na n ledg Gãrãnd Bertayn la Etazĩni ye. Naoã la nao-bi wã maana ne kut la yagdo, tɩ makd Gãrãnd Bertayn la Etazĩni pãngã sẽn pa waoogã.
14. Armagedõ na n sɩngame n mik tɩ yaa pãn-soaad bʋg n dɩt naam?
14 Bãngr-gomdã pʋgẽ, b maka Wẽnnaam Rĩungã b sẽn lugl saasẽ yʋʋmd 1914 ne kugr sẽn yi tãng zugu. Tãngã makda a Zeova naam sẽn ka to wã. Masã, kugrã vũudame n wat n na n wẽ bõn-naandgã naoã. Yaa Armagedõ la a na n beds bõn-naandgã naoã, t’a tõrã fãa sãame. (Karm-y Daniɛll 2:44, 45.) Dẽnd Armagedõ na n sɩngame n mik tɩ yaa Gãrãnd Bertayn la Etazĩni n ket n yaa dũni gill pãn-soaada. D sã n paam n yã bãngr-gom-kãngã pidsgu, d sũy na n yɩɩ noog wʋsgo. * La bõe la a Zeova na n maan a Sʋɩtãana?
BÕE N NA N PAAM WẼNNAAM BƐ-KÃSENGÃ?
15. Armagedõ poore, bõe n na n paam a Sʋɩtãan ne a zĩn-dãmbã?
15 Pipi, a Sʋɩtãan na n yãa a dũniyã tõr sãoongo. Rẽ poore, a mengã pa na n põs ye. Tʋm-tʋmd a Zã wilga bũmb a sẽn yã. (Karm-y Wilgr 20:1-3.) A bilgame t’a Zezi Kirist sẽn yaa malɛk ning sẽn “tar bog-zulungã kʋɩlen-biigã” na n yõka a Sʋɩtãan ne a zĩn-dãmbã, n lob bog-zulungã pʋgẽ tɩ b pa be yʋʋm tusri. (Luk 8:30, 31; 1 Zã 3:8) Rẽ la bãngr-gomd ning sẽn wilg tɩ yagengã na n pogla waafã zugã pipi pidsgu. *—Sɩng. 3:15.
16. A Sʋɩtãan sã n wa be “bog-zulungã” pʋgẽ, bõe la a pa na n le tõog n maane?
16 “Bog-zulung” ning pʋgẽ b sẽn na n lob a Sʋɩtãan ne a zĩn-dãmbã yaa bõe? A makda zĩig ned baa a ye sẽn pa tõe n ta, sã n pa a Zeova la malɛk ning sẽn “tar bog-zulungã kʋɩlen-biigã” bala. A Sʋɩtãan sã n wa be be, a pa na n le maan baa fʋɩ. Wakat kãnga, a pa na n le tõog n “belg nebã sẽn be soolem toɛy-toɛyã yɛs ye.” Rẽnd a Sʋɩtãan sẽn maand wa “gɩgemd sẽn kelemdã” na n sĩndame.—1 Pɩɛ. 5:8.
YƐL SẼN NA N ZĨND TƖ LAAFƖ YAOOL N WA
17, 18. a) Bõe yell la d gom sõs-kãngã pʋgẽ? b) Yel-kãens loogr poore, vɩɩmã na n yɩɩ wãn-wãna?
17 Ka la bilfu, yel-kãsems n na n maane. D gũuda bãngr-gomdã sẽn yeel tɩ b na n wa gomda “laafɩ la yĩn-maasem” yellã pidsgu. Dẽ poore, d na n yãa Babilon-kãsengã sãoongo, a Goog sẽn yit Magoogã zabrã, la Armagedõ. Sẽn paase, b na n loba a Sʋɩtãan ne a zĩn-dãmbã bog-zulungẽ wã. Yel-kãensã poore, wẽng buud fãa pa na n le zĩnd ye. Kiristã naam sẽn na n kaoos yʋʋm tusrã sasa, vɩɩmã na n yɩɩ toor fasɩ. D na n maana sũ-noogo, laafɩ wã sẽn na n yɩ wʋsgã yĩnga.—Yɩɩl 37:10, 11.
18 Yel-kãsems a nu nins yell d sẽn gom sõs-kãngã pʋgẽ wã sẽn yãk b toogo, yɛl a taab me n wate, tɩ d segd n gũ. Sõsg ning sẽn pʋgdã na n goma rẽ yelle.
[Tẽngr not rãmbã]
^ sull 6 Ges-y La Révélation : le grand dénouement est proche ! sebrã neng 251-258.
^ sull 14 Daniɛll 2:44 soabã sẽn yeel tɩ Rĩungã ‘na n wãa soolem kãens fãa wã,’ yaa soolem nins bõn-naandgã sẽn makdã yell la a gomda. La bãngr-gomd a to n yeel tɩ zĩn-dãmb n ‘saagd dũniyã tɛk fãa nanambs nengẽ,’ n tigsd bãmb tɩ b na n “wa Wẽnnaam Sẽn-tõe-fãa da-kãsengã zabre.” (Wil. 16:14; 19:19-21) Dẽnd Armagedõ, pa bõn-naandgã babsã sẽn makd soolem ninsã bal n na n sãam ye. Yaa ninsaalbã goosneema-rãmbã fãa.
^ sull 15 Waafã zugã yaoolem poglgã na n yɩɩ yʋʋm tusrã loogr poore, wakat ning b sẽn na n lob a Sʋɩtãan ne a zĩn-dãmbã “bugum mogr sẽn dɩt kidbr pʋgẽ” wã.—Wil. 20:7-10; Mat. 25:41.
[Zãmsgã sogsgã]
[Zĩ-gũbri/Foto rãmba seb-neng a 9]
YƐL A NU SẼN NAN WATE:
1 B na n wa mooname tɩ “laafɩ la yĩn-maasem” wa-yã
2 Nanambsã na n zaba ne “Babilon-kãsengã” n sãam-a
3 B na n zaba ne a Zeova nin-buiidã
4 Armagedõ zabrã
5 Kiristã na n loba a Sʋɩtãan ne a zĩn-dãmbã bog-zulungẽ wã
