SEBRÃ GOM-ZUG SÕSGÃ | BÕE LA BIIBLÃ YET SƖGAARÃ YŨUB WƐƐNGẼ?
Dũni gill zu-loɛɛga
Sɩgaarã kʋʋdame.
Yʋʋmd 1900 n tãag yʋʋmd 2000 wã, a kʋʋ neb milyõ koabga.
Yʋʋmd fãa, a kʋʋda na maan neb milyõ a yoobe.
Segõnd a yoob fãa, a kʋʋda nin-yende.
La yɛlã ket n tara zẽnebo.
Bãngdbã yetame tɩ yɛlã sã n pa toeeme, ka la yʋʋmd 2030 wã, sɩgaarã sẽn kʋʋd neb nins yʋʋmd fãa wã na n yɩɩga milyõ a 8. B yetame me tɩ yʋʋmd 2100 sẽn wat n ta tɩ sɩgaarã sẽn kʋ b rãmb sõor na n taa milyaar a ye.
Pa sɩga-yũudbã bal la sɩgaarã namsd ye. Sɩga-yũud kũum sãamda a zakã rãmb sũyã, la wat ne ligd yiisgu. Sẽn paase, yʋʋmd fãa, neb tus kobs-yoob sẽn pa yũud sɩgaar n kiida, b sẽn vɩ ne neb sẽn yũud sɩgaar yĩnga. Tẽns wʋsg pʋsẽ, sɩgaarã yũub namsda nebã fãa. Bala, kɩtdame tɩ tɩbsgã ligd paasdẽ.
Bãag sã n kẽ tẽnga, logtoɛɛmbã modgdame n na n paam a tɩɩm. La nebã fãa mii sɩgaarã sẽn wat ne zu-loees ninsã tɩɩm. A Margaret Chan sẽn yaa Nasiõzĩni wã siglg ning sẽn get laafɩ wã yellã taoor soabã yeela woto: “Sɩgaarã sẽn wat ne zu-loees ninsã yaa ninsaalbã sababo. Rẽnd tẽnsã taoor dãmb la nin-buiidã sã n data, b tõe n menesa zu-loe-kãense.”
Tẽns nins sẽn modgd n dat tɩ b nebã boog sɩgaarã yũubã sõor yɩɩda pĩndã. Wala makre, yʋʋmd 2012 sa-sik kiuugã, na maan tẽns 175 n zems taaba, n tik nug n wilg tɩ b na n modgame tɩ sɩgaarã yũub booge. La yʋʋmd fãa, sɩga-maandbã yiisda milyaar-dãmb n maand piblisite-rãmb n dat tɩ neb wʋsg kẽ sɩgaarã yũubu. Tẽns nins sẽn pa sãoã pʋsẽ, yaa pagbã la kom-bɩɩsã la b paamd n yɩɩda. Sẽn paase, neb milyaar a ye la sɩgaarã zoe n yõke, tɩ sɩgaarã basg sẽn yaa toogã kɩt tɩ sẽn kiid-bã sõor na n kell n yɩ wʋsgo. Yɛlã sã n pa toeeme, ka la yʋʋm 40, sẽn kiid-bã sõor na n paasa wʋsgo.
Piblisite wã kɩtame tɩ neb wʋsg sɩng sɩgaarã yũub n da tẽed tɩ b na n wa basame, n wa mik tɩ yõk-b lame. Yɩɩ woto ne a Naoko. A sɩnga sɩgaarã yũub t’a paoodẽ. A gesa neb b sẽn wilgd televiziõ wã pʋgẽ, filim-dãmbã la piblisite-rãmbã pʋsẽ n tẽed t’a sã n dɩk b togs-n-taare, b na n get-a-la wa nin-kãsenga. A Naoko ba wã ne a ma wã fãa yũu sɩgaar tɩ fulfuudã kãnsɛɛr kʋ-ba. A ra mi rẽ la a ket n yũuda, hal baa a sẽn wa n tar kamb a yiibã. Ad a sẽn yeele: “Mam da yɛɛsda fulfuudã kãnsɛɛrã, la sɩgaarã bug-zõos sẽn tõe n maan m kambã bũmb ningã. Baasgo, m da pa tõe n bas sɩgaarã yũub ye. M da tagsdame tɩ m pa na n tol n tõog n bas ye.”
La a Naoko basa sɩgaarã. Bũmb ning sẽn sõng-a wã sõnga neb milyõ-rãmb tɩ b pa yũ sɩgaare, wall sõng-b tɩ b base. Bõn-kãng yaa bõe? Karm-y sõsg ning sẽn pʋgdã tɩ y na bãnge.
