Neb wʋsg sã n karem Biiblã, b tõe n tagsame tɩ Sʋɩtãanã yaa wẽngã sẽn be ned fãa sũurẽ wã. La yaa sɩd bɩ? Sã n yaa woto la Biiblã yeta, bõe yĩng t’a kibay kẽer wilgdẽ tɩ Sʋɩtãanã goma ne a Zezi Kirist, la baa ne Wẽnnaam sẽn yaa pãng sẽn ka to soabã? D ges kibay a yiibu.

A Zezi sẽn wa n sɩng a koɛɛgã moonegã, Sʋɩtãanã mak-a-la naoor a tãabo. Pipi, yɩɩ kom sẽn wa n tar a Zezi. A Sʋɩtãan makame n na n kɩt t’a tũnug ne tõog ning Wẽnnaam sẽn kõ-a wã n pids a mengã raabã. Rẽ poore, a makame n na n kɩt t’a Zezi maan bũmb tɩ nebã kils-a, tɩ yaool n da tõe n tũ ne a yõore. Sẽn na n baase, a yeela a Zezi t’a sã n sak n wõgemd n waoog yẽ vugr bala, a na n kõ-a-la dũniyã soolem fãa ne b naam. Naoor a tãabã fãa, a Zezi togsa Wẽnnaam sebrã sẽn yete, n puk a Sʋɩtãan sɩlmã.—Matɩe 4:1-11; Luk 4:1-13.

Yaa ãnd la a Zezi sẽn gom ne wã? Yaa wẽng sẽn da be a Zezi sũurẽ wã bɩ? Biiblã yetame t’a Zezi ‘paama makr ne bũmb fãa wa tõndo, la a ka maan yel-wẽn baa bilf ye.’ (Hebre dãmba 4:15) Biiblã leb n yetame t’a ‘ka tol n maan yel-wẽnde, la ziri goam ka tol n yi a noorẽ ye.’ (1 Pɩɛɛr 2:22)  A Zezi pa tall yel-wẽnd ye. A saka Wẽnnaam wakat fãa. A zɩ n bas tɩ sẽn yaa wẽng kẽ a sũurẽ ye. Dẽnd yaa vẽeneg t’a Zezi ra pa gomd ne wẽng sẽn be yẽ sũurẽ wã, la a sẽn da gomd ne a soabã me beeme.

Bũmb a taab n be a Sʋɩtãan ne a Zezi sõs-kãngã pʋgẽ, n wilgdẽ t’a Sʋɩtãan sɩd beeme.

• Tẽeg-y t’a Sʋɩtãan yeela a Zezi t’a sã n wõgemd n waoog yẽ, a na n kõ-a-la dũniyã soolem fãa naam. (Matɩe 4:8, 9) Sã n mik t’a Sʋɩtãan ka be, dẽnd a gomdã ka tar neng ye. Sẽn paase, a Sʋɩtãan gomdã sẽn wilgd tɩ yaa yẽ n so dũniyã soolem fãa naamã, a Zezi pa bao n na n kɩɩs ye.

• A Sʋɩtãan sɩlmã sẽn pa tõog a Zezi wã, ‘a loogame n bas-a, n dat t’a sã n le paam weer nindaar bɩ a le mak-a.’ (Luk 4:13) Woto wã, d tõe n yeel t’a Sʋɩtãan yaa wẽng sẽn be ned sũurẽ sɩda? Pa vẽeneg tɩ yaa wẽnem soab sẽn maand a sẽn tõe fãa n na n belg nebã sɩda?

• Sʋɩtãanã sẽn loog n bas a Zezi wã, ‘malɛk-rãmb waa a nengẽ n wa sõng-a.’ (Matɩe 4:11) Sẽn mik tɩ malɛgsã sẽn wa n keng a Zezi raood la b sõng-a wã sɩd beeme wã, dẽnd d tõe n yeelame me t’a Sʋɩtãan beeme, la t’a yaa malɛka, tɩ nif pa tõe n yã-a ye.

Masã, d ges kibar a yiib-n-soabã. Yaa wẽn-sakd a Zoob kibarã. B wilgame t’a Sʋɩtãan goma ne Wẽnnaam naoor a yiibu. Naoor a yiibã fãa, Wẽnnaam pẽga a Zoob a sẽn sakd yẽ wã yĩnga. A Sʋɩtãan yeela Wẽnnaam t’a Zoob sakrã yaa a meng nafr yĩnga, rat n yeel tɩ yaa wa tek-teke, tɩ Wẽnnaam kogend a Zoob la a ningd-a barka, t’a Zoob me sakd Wẽnnaam. Yaa wa a rat n yeelame tɩ Wẽnnaam ka mi a Zoob sõma n ta yẽ ye. A Zeova basame t’a Sʋɩtãan kɩt t’a Zoob paoongã sa, t’a kambã fãa ki, tɩ bãag me yõk-a. * Wa n lebga vẽeneg t’a Zeova sẽn da yeelã yaa sɩda, la t’a Sʋɩtãan yaa ziri yagda. Wẽnnaam ninga a Zoob barka, a sakrã yĩnga.—Zoob 1:6-12; 2:1-7.

D tõe n yeelame t’a Zeova ra gomda ne wẽng sẽn be yẽ meng sũurẽ sɩda? Biiblã yetame: “Wẽnnaam soɛyã zemsa zãnga.” (2 Sãmwɛll 22:31) B leb n yetame: “Sõngo, sõngo, Zu-soab a Wẽnnaam Sẽn-tõe-fãa wã yaa sõngo.” (Wilgri 4:8) Gom-bil ning sẽn yaa “sõngã” võor yaa yɩlemde, sẽn zãr ne wẽnga, sẽn welg toore. Dẽnd a Zeova zemsa zãnga, n pa maand wẽng ye. Bũmb sẽn yaa wẽng ka be a sũurẽ ye.

Kẽer na n yeelame t’a Zoob pa ned sẽn sɩd zĩndi, la tɩ Biiblã sẽn yeel t’a Sʋɩtãan sõsa ne Wẽnnaamã yaa kibar bala. La yaa sɩd bɩ? Biiblã vɛrse kẽer n wilgd t’a Zoob sɩd zĩndame. Wala makre, Zak 5:7-11 wã pʋgẽ, b goma a Zoob yelle, sẽn na yɩl n keng kiris-nebã raood tɩ b tõog toogo, la b tẽeg t’a Zeova keooda neb nins sẽn tõogd toogã. La sã n da mik t’a Zoob pa zĩndi, tɩ b sẽn yeel tɩ Sʋɩtãanã nams-a lame wã me yaa kibar bala, rẽ yĩnga saglgã ra na n talla pãng kiris-nebã zug sɩda? Ezekɩɛll 14:14, 20 pʋgẽ me, b sõdga a Zoob ne a Nowe la a Daniɛll, n yeel tɩ b yaa nin-tɩrse. Wa a Nowe la a Daniɛlle, a Zoob me yɩɩ ned sẽn sɩd zĩndi, hal t’a tẽebã tall pãnga. A Zoob sã n zĩndame, dẽnd yaa vẽeneg t’a soab ning sẽn nams-a wã me sɩd beeme.

Biiblã wilgda vẽeneg t’a Sʋɩtãan beeme, la t’a yaa malɛg-wẽnga. Tõe tɩ y sok woto: ‘Rũndã-rũndã, a tõe n maana maam ne m zakã rãmb wẽng bɩ?’

D rɩk makr wa bi-bees sull sẽn na n tiig n kẽ yãmb sakã. Yaa vẽeneg tɩ wẽnemã na n paama pãnga, tɩ bãan le kae ye. A buud n sɩd maane. B riga a Sʋɩtãan ne a zĩn-dãmbã tɩ b sig tẽngã zugu. Zĩn-dãmbã me yaa malɛgs sẽn kɩɩs Wẽnnaam. Rẽ waa ne bõe? Ges-y yɛl nins sẽn maand yãmb tẽngẽ wã la zãmaan-zẽmsã.

• Baa ne nebã sẽn modgd sẽn na yɩl tɩ tʋʋm-yoodã la wẽnemã boogã, yel-kãensã tara paasg bala.

• Reem la filim nins sẽn wilgd zĩn-dãmb yɛlã tara paasgo, baa sẽn pa noom roagdb wʋsgã.

•   Baa ne b sẽn modgd sẽn na yɩl tɩ nebã ra sãam pemsmã ne tẽn-gãongã la weoogã, yel-kãngã ket n tara kengr bala.

• Ãdem-biisã vɩɩm tara sãoong bal n dabda, tɩ wõnd pãens rãmb n be kɛɛng n pirsd nebã tɩ b tʋmd tʋʋm sẽn na n dɩ-ba.

Biiblã wilgda sẽn yaa a soab n be yel-kãensã poorẽ. Ad b sẽn yete: “B riga dargõ-kãsengã sẽn yaa wag-kʋdr sẽn boond tɩ diabl la Sʋɩtãanã, sẽn belgd dũniyã fãa wã. B riga yẽnda t’a kẽng dũniyã zugu, la b riga yẽ malɛk-rãmbã me tɩ b tũ yẽnda. . . . Toog bee ne neb nins sẽn be dũniyã zug la ko-kãsengã pʋgẽ wã. Tɩ bõe, Sʋɩtãanã sigame n wa yãmb nengẽ, la a sũ-puugrã yaa kãsenga, a sẽn bãng t’a wakat yaa bilfã yĩnga.” (Wilgri 12:9, 12) Neb wʋsg bʋgsa gom-kãngã zugu, n bãng t’a Sʋɩtãan yaa malɛg-wẽnga, la tɩ yaa yẽ n kɩt tɩ dũniyã pid ne zu-loeesã.

Tõe tɩ y sokda y meng y sẽn na n maan to-to n paam koglgo. Sã n yaa rẽ y bee bʋʋm. Sõsg ning sẽn pʋgdã wilgda bũmb kẽer y sẽn tõe n maane.