BIIBLÃ SẼN YETE: “Wakat watame tɩ fãa sẽn be yaad pʋsẽ na n wʋm [a Zeezi] koɛɛg n yi.”—Zã 5:28, 29, Wẽnnaam Sebre, 1983.

A Zeezi sẽn yeel woto wã, a wilgame tɩ yẽ naamã sasa, sẽn be-b yaadẽ wã na n yiime. A Fernando, rao ning yell d sẽn gom sɩngrẽ wã yeela woto: “Mam sẽn wa n karem Zã 5:28, 29 pipi wã, linga maam wʋsgo. Kɩtame tɩ m bãng tɩ manegr n wate, tɩ m sã n tagsd beoog-daarã yell me bɩ m sũur noomẽ.”

Pĩnd wẽndẽ, wẽn-sakd a Zoob ra kɩsa sɩd t’a sã n ki, Wẽnnaam na n wa vʋʋg-a lame. Daar a ye, a soka woto: “Ned sã n ki, a tõe n le vʋʋgame bɩ?” Rẽ poore, a wilgame t’a kɩsa sɩd tɩ kũum tõe n vʋʋgame, la t’a na n paa yaoogẽ wã, n gũ wakat ning Wẽnnaam sẽn na n bool yẽ wã. A yeela Wẽnnaam woto: “Yãmb sã n bool maam, mam na n sakame.”—Zoob 14:14, 15, Wẽnnaam Sebre, 1983.

A Lazaar tão a Mart ra miime tɩ kũum na n vʋʋgame. A Lazaar kũumã poore, a Zeezi yeel-a-la woto: “Fo tão wã na n vʋʋgame.” T’a Mart leoke: “Mam miime t’a na n vʋʋga vʋʋgrã wakate, yaoolem daarã.” Rẽ poore, a Zeezi yeel-a lame: “Yaa maam la vʋʋgre, la vɩɩm. Ned ning fãa sẽn tẽed maam baa a sã n kii, a na paam vɩɩm.” (Zã 11:23-25) Rẽ poor bilfu, a Zeezi vʋʋga a Lazaare. Kiba-kãngã wilgdame tɩ bõn-kãseng n wate. Neb wʋsg n na n vʋʋg dũniyã gill zugu. Mams-y n ges-y rẽ sẽn na n yɩ to-to.

BIIBLÃ SẼN YETE: Wẽnnaam Gomdã wilgame t’a Zeezi vʋʋgrã yɩɩ toor fasɩ ne neb a nii wã sẽn vʋʋg tɩ Biiblã gomd b yellã. Neb a nii wã vʋʋgame n le vɩɩmd tẽngã zugu. La Biiblã goma a Zeezi vʋʋgrã yelle, n yeel woto: “A Zeezi Kiris zɛk n bee . . . Wẽnnaam dɩtgo.” (1 Pɩyɛɛr 3:21, 22) Neb a taab me n na n vʋʋg n kẽnga saasẽ wa a Zeezi bɩ? Sẽn deng a Zeezi kũumã, a yeela a tʋm-tʋmdbã daar a yembr woto: “Mam sã n kẽng n tɩ segl zĩig yãmb yĩnga, mam na n lebg n waa n peega yãmba, tɩ maam sẽn be zĩig ningã, bɩ yãmb me zĩnd be.”—Zã 14:3.

Kiris kẽnga saasẽ, n tɩ segl zĩig sẽn na yɩl t’a karen-biis kẽer wa. Sẽn na n kẽng-b saasẽ wã sõor  na n yɩɩ neb 144000. (Vẽnegre 14:1, 3) La bõe la sẽn na n pʋgl-b a Zeezi n kẽng saasẽ wã na n tɩ maane?

B na n tɩ tʋma wʋsgo. Biiblã yeela woto: “Neb nins sẽn naag n paam dẽenem vʋʋgrã tara bark la sõmblem. Kũum a yiib soabã ka tar b tʋʋmd ye. Bãmb na n yɩɩ Wẽnnaam ne Kirisã maan-kʋʋdba, la b na n dɩɩ naam ne Kirisã yʋʋm tusri.” (Vẽnegre 20:6) Sẽn na n vʋʋg-b n kẽng saasẽ wã na n yɩɩ rĩm-dãmb la maan-kʋʋdb ne Kirisã, n soog tẽngã.

BIIBLÃ SẼN YETE: Gʋlsg Sõamyã wilgame tɩ daar a ye, tʋm-tʋmd a Poll goma neb taoore, n yeel woto: “Mam tara saagr ne Wẽnnaam, saagr ning nin-kãensã me sẽn tarã, tɩ nin-tɩrsã la sẽn pa-b tɩrsã me vʋʋgr na n zĩndame.”—Tʋʋmã 24:15, MN.

A Poll sẽn bool b rãmb tɩ “nin-tɩrsã” yaa ãnd dãmba? Ad b sʋkã nin-yende. Wẽn-sakd a Dãniyɛll sẽn wa n kolg kũumã, Wẽnnaam kɩtame tɩ b yeel-a woto: “Fo na n paama vʋʋsgo, n yik n deeg f keoor yaoolem daarã.” (Dãniyɛll 12:13) A Dãniyɛll na n yikame n deeg a keoorã yɛɛnẽ? Biiblã yeelame: “Nin-tɩrs na n sooga tẽngã, la b na n paa beenẽ wakat sẽn kõn sa.” (Yɩɩn-sõamyã 37:29) Sẽn paase, a Zeezi yeela woto: “Bark bee sũ-maasem dãmbã zutu, bala b na n sooga dũniyã.” (Matye 5:5) A Dãniyɛlle, n paas pagb la rap sẽn tũ Wẽnnaam n na n vʋʋge, n vɩɩmd tẽng zug wakat sẽn kõn sa.

La ãnd dãmb la a Poll sẽn bool tɩ “sẽn pa-b tɩrsã”? Neb milyaar-dãmb n ki, tɩ wʋsgã pa paam n bãng Biiblã sẽn yetã n tũ ye. B sã n wa vʋʋge, b na n paam n bao n bãnga a Zeova * la a Zeezi, n tõog n wilg tɩ b nong-b lame. (Zã 17:3) Wakat kãnga, neb nins fãa sẽn na n sak n tũ Wẽnnaamã na n vɩɩmda wakat sẽn kõn sa, wa a Zeova.

BIIBLÃ SẼN YETE: Wẽnnaam “na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãang wall yãbre, wall toog kõn leb n zĩnd ye, bala, dẽenem bũmba fãa loogame.” (Vẽnegre 21:4) Nebã “na n mee rot n zĩnd b pʋse. B na n sela tɩɩs n dɩ b biisi.”—Ezayi 65:21.

Gom-kãensã sã n wa pidsi, tɩ y be ne y neb nins sẽn vʋʋgã, y sũur kõn yɩ noog sɩda? La sokr n kete: ‘Bõe n kɩt tɩ y tõe n kɩs sɩd tɩ sẽn ki-bã na n vʋʋgame?’