A Zeezi keta Peere. A nan sõsã ne nebã, n yeel-b tɩ “dẽenem dãmb wʋsg n na n lebg yaoolem dãmba, tɩ yaoolem dãmb wʋsg lebg dẽenem rãmba.” (Matye 19:30) A rɩka makr n na n sõng nebã tɩ b wʋm a gomdã võor sõma.

Ad a sẽn yeele: “Arzãn [“saasẽ,” MN] soolem wẽnda wa yir soab sẽn yi yibeoog pĩnd n na n dɩgs tʋmtʋmdb tɩ b tɩ tʋm a reezẽ tɩɩs pʋʋgẽ. B sara ne taab tɩ daar a yembr tʋʋmd na n yɩɩ deniye a yembre, t’a kɩt tɩ b kẽng a reezẽ tɩɩs pʋʋgẽ wã. A yii sõ-bɩɩmd wakate, n yãnd neb sẽn be raagẽ wã n ka maand bũmb ye, n yeel-ba: ‘Yãmb me kẽng n tɩ tʋm m reezẽ tɩɩs pʋʋgẽ wã, tɩ m na n kõ-y-la yaood sẽn zemse.’ Nin-kãens kẽngame. Dẽ, a leb n yii wĩnto-sʋka, la wẽn-kaoore n leb n maan a woto bala. Wĩndg sẽn dabd lʋɩɩse, a leb n yiime n yãnd neb sẽn yas be, n sok-ba: ‘Bõe tɩ yãmb be ka daarã tõr n ka maand bũmbu?’ Bãmb leokame: ‘Yaa tɩ ned ba a yembr ka rɩk tõnd tʋʋmd ye.’ Yẽnda yeel-b lame yaa: ‘Bɩ yãmb me kẽng mam reezẽ tɩɩs pʋʋgẽ wã.’ ”—Matye 20:1-7.

Sẽn da kelgd-b a Zeezi wã sẽn wʋm t’a gomd “arzãn soolem” la “yir soab” yellã, tõe tɩ b tagsa Wẽnnaam a Zeova yelle. Gʋls-sõamyã pʋgẽ, b maka Israyɛll nin-buiidã ne reezẽ tɩɩs pʋʋg a Zeova sẽn so. (Yɩɩn-sõamyã 80:9, 10; Ezayi 5:3, 4) Ned ning fãa sẽn be tõogã kaool pʋgẽ, yaa wa a Zeova rɩk-a lame t’a yaa reezẽ tɩɩs pʋʋgã tʋm-tʋmda. La a Zeezi ra pa gomd bũmb sẽn zoe n loog yell ye. A ra bilgda bũmb sẽn da maand yẽ wakatẽ wã.

Yaa tũudmã taoor dãmba, wala makre Fariizẽ-rãmbã n da segd n tʋm Wẽnnaam tʋʋmdã wakat fãa. Makrã pʋgẽ, bãmb la tʋm-tʋmdb nins pʋʋgã soab sẽn yi n bool yibeoog pĩndã, n sar n na n deeg deniye a yembr sẽn yaa daar a yembr tʋʋmd yaoodã.

Maan-kʋʋdbã ne tũudmã taoor dãmb a taabã ra geta nin-buiidã wa neb sẽn pa tʋmd Wẽnnaam tʋʋmdã wakat fãa. Makrã pʋgẽ, yaa nin-buiidã la pʋʋgã soab sẽn yi n bool “sõ-bɩɩmd wakate,” la wĩnto-sʋka, ne wĩn-kaoore, n paas wĩndgã sẽn wa n dabd lʋɩɩsã. Sõ-bɩɩmd wakatã yaa yibeoog wakat a 9, tɩ wĩndg lʋɩɩs wakatã yaa zaabr wakat a 5.

Tũudmã taoor dãmb ra geta neb nins sẽn tũud a Zeezi wã wa “neb kãab-wẽng sẽn be b zutu.” (Zã 7:49) B vɩɩmã tõr la bala, sãnda yɩɩ zĩm-yõgdba, tɩ kẽer da tʋmd nus-tʋʋm a taaba. Yʋʋmd 29 wã baasgẽ, “reezẽ tɩɩs pʋʋgã soab” tʋma a Zeezi t’a wa bool nin-kãensã b sẽn pa nandã, tɩ b lebg Kirisã karen-biis n tʋm Wẽnnaam tʋʋmdã. Bãmb la a Zeezi sẽn bool tɩ “yaoolem dãmba,” rat n yeel tɩ sẽn sɩng-b tʋʋmdã wĩndgã sẽn wa n dabd lʋɩɩsã.

A Zeezi baasa a makrã, n wilg bũmb ning sẽn maan tʋʋmdã sigb poore. A yeela woto: “Zĩ-sobd sẽn ta, reezẽ tɩɩs pʋʋgã soab yeela ned ning sẽn get-a yẽnda tʋʋmã yellã yaa: ‘Bool tʋmtʋmdbã n yao ned kam fãa a yaoodo, sɩng ne yaoolem dãmbã n tɩ baas ne dẽenem dãmbã.’ Neb nins sẽn wa-b wĩndgã lʋɩɩs wakatã kolgame tɩ b kõ ned kam fãa deniye a yembre. Dẽenem dãmbã n yaool waoongo, n tẽed tɩ bãmb na n deeg n yɩɩda neb a taabã. La a kõo bãmb ned fãa deniye a yembre. B sẽn deeg deniye a yembr-yembrã, b yẽgma ne yirã soab n yeele: ‘Sẽn wa-b yaoolmã tʋma lɛɛr a yembr tãa, tɩ tõnd tʋm daarã tõr n nams ne tʋʋlgã, tɩ yãmb kõ bãmb yaood a yembr ne tõndo.’ La a leoka b nin-yend n yeele: ‘M zoa, mam ka zãmb foom ye. Tõnd dag n ka sar ne taab deniye a yembr tɩ fo sak sɩda? Dẽ wã, deeg f ligd n looge. Maam n dat n kõ yaoolem soabã wa foom. Dẽ yĩnga, mam ka tar noor tɩ maan m sẽn dat ne m sẽn so wã bɩ? Bɩ fo getame tɩ mam maan-neerã ka sõama?’ Woto, yaoolem dãmbã na n yɩɩ dẽenem dãmba, tɩ dẽenem dãmbã yɩ yaoolem dãmba.”—Matye 20:8-16.

Tõe tɩ karen-biisã ra sokda b mens a Zeezi gomdã sẽn dat n yɛɛlga. Bõe n na n maan tɩ zʋɩf tũudmã taoor dãmb sẽn tagsd tɩ b yaa “dẽenem dãmbã” wa lebg “yaoolem dãmba”? La na n maana wãn t’a Zeezi karen-biisã wa lebg “dẽenem dãmba”?

Fariizẽ-rãmbã ra geta a Zeezi karen-biisã wa “yaoolem dãmba.” La b na n lebga “dẽenem dãmb” n deeg b yaoodo. A Zeezi kũumã poore, Wẽnnaam ledga Israyɛll buudã ne bu-paall b sẽn boond tɩ “Wẽnnaam Israyɛllã.” (Galat-dãmbã 6:16; Matye 23:38) A Zãmbatiis sẽn da yeel tɩ neb n na n paam lisg vʋʋsem sõng pʋgẽ wã, a ra gomda nin-kãensã yelle. Neb nins sẽn da yaa “yaoolem dãmbã” n na n yɩ pipi n deeg lisg vʋʋsem sõng pʋgẽ. B ra na n paamame n lebg a Zeezi kaset rãmb hal n kɩs a kaset “tɩ ta dũniyã tɛk fãa.” (Tʋʋmã 1:5, 8; Matye 3:11) Karen-biisã sã n tõog n wʋm a Zeezi goamã võor sõma, na n sõng-b lame tɩ b segl b mense, n miẽ bal tɩ tũudmã taoor dãmb sẽn lebg “yaoolem dãmbã” na n kisg-b lame.