हो. बायबलमध्ये “नेतृत्व करणारा” मसीहा म्हणजेच “जगाचा तारणकर्ता” याच्याबद्दल पुष्कळ भविष्यवाण्या करण्यात आल्या होत्या. पृथ्वीवर असताना येशूने यांपैकी बऱ्‍याच भविष्यवाण्या पूर्ण केल्या. (दानीएल ९:​२५; १ योहान ४:​१४) इतकंच काय, तर मृत्यूनंतरही येशूने मसीहाबद्दच्या भविष्यवाण्या पूर्ण केल्या.​—स्तोत्र ११०:१; प्रेषितांची कार्यं २:​३४-​३६.

•  “मसीहा” म्हणजे काय?

•  मसीहाबद्दलच्या भविष्यवाण्या एकापेक्षा जास्त व्यक्‍तींनी पूर्ण करणं शक्य होतं का?

•  मसीहा अजून यायचाय, असं म्हणता येईल का?

•  बायबलमध्ये मसीहाबद्दलच्या एकूण किती भविष्यवाण्या आहेत?

•  येशूने पूर्ण केलेल्या मसीहाबद्दलच्या काही भविष्यवाण्या

 मसीहा हा शब्द मशीआक  या हिब्रू शब्दातून आला आहे. ग्रीक भाषेत त्याचा समानार्थी शब्द ख्रिस्तोस  असा आहे, ज्यापासून ख्रिस्त हा शब्द आला आहे. मसीहा आणि ख्रिस्त या दोन्ही शब्दांचा अर्थ अभिषिक्‍त असा होतो. त्यामुळे “येशू ख्रिस्त” याचा अर्थ, “येशू जो अभिषिक्‍त आहे” किंवा “येशू जो मसीहा आहे” असा होतो.

 बायबलच्या काळात, सहसा डोक्यावर तेल ओतून एखाद्या व्यक्‍तीला अभिषिक्‍त केलं जायचं. यावरून दिसायचं की त्या व्यक्‍तीला खास अधिकाराच्या पदावर नियुक्‍त करण्यात आलंय. (लेवीय ८:​१२; १ शमुवेल १६:१३) त्याच प्रकारे, देवाने येशूला एका खास अधिकाराच्या पदावर म्हणजेच मसीहा म्हणून नियुक्‍त केलं. (प्रेषितांची कार्यं २:​३६) इथे फरक फक्‍त एवढाच होता की देवाने तेलाने नाही, तर पवित्र शक्‍तीने येशूचा अभिषेक केला.​—मत्तय ३:​१६.

 नाही. जसं बोटांच्या ठशांवरून फक्‍त एकाच व्यक्‍तीची ओळख पटवून दिली जाऊ शकते. तसंच, बायबलच्या भविष्यवाण्यांवरून फक्‍त एकाच मसीहाची किंवा ख्रिस्ताची ओळख पटते. असं असलं तरी बायबल आपल्याला इशारा देतं, “खोटे ख्रिस्त आणि खोटे संदेष्टे उठतील आणि लोकांना, इतकंच काय तर निवडलेल्या लोकांनाही फसवण्यासाठी मोठमोठी चिन्हं आणि चमत्कार करतील.”​—मत्तय २४:२४.

 नाही. बायबलमध्ये अशी भविष्यवाणी करण्यात आली होती की मसीहा इस्राएलच्या दावीद राजाचा वंशज असेल. (स्तोत्र ८९:​३, ४) पण ज्यात दावीदच्या घराण्याची नोंद होती, त्या यहुदी वंशावळी आज आपल्याजवळ नाहीत. कारण, इ.स. ७० मध्ये रोमी लोकांनी जेव्हा यरुशलेमवरती कब्जा मिळवला होता, तेव्हा या वंशावळी नष्ट झाल्या. a तेव्हापासून कोणालाही हे सिद्ध करणं शक्य झालेलं नाही की तो दावीदच्या राजघराण्याचा आहे. पण येशूच्या काळात मात्र त्या वंशावळी उपलब्ध होत्या. त्यामुळे जर तो खरंच दावीदच्या वंशाचा नसता, तर ही गोष्ट कोणीही सहज सिद्ध करून दाखवू शकलं असतं. पण कोणीही, अगदी त्याच्या शत्रूंनींही असं केलं नाही.​—मत्तय २२:४१-​४६.

 मसीहाबद्दलच्या भविष्यवाण्यांचा नेमका आकडा सांगता येणार नाही. कारण या भविष्यवाण्या मोजायची पद्धत वेगवेगळी असू शकते. उदाहरणार्थ, यशया ५३:२-७ मधल्या अहवालात मसीहाबद्दल बऱ्‍याच गोष्टी सांगण्यात आल्या आहेत. काही जण या संपूर्ण अहवालाला एकच भविष्यवाणी म्हणून मोजतील; तर इतर जण कदाचित त्यात सांगितलेल्या प्रत्येक गोष्टीला एक वेगळी भविष्यवाणी म्हणून मोजतील.