IT-8 TAQSIMA
Il-Poplu taʼ Israel Jidħol f’Kangħan
Ġożwè jmexxi lil Israel biex jirbħu l-art taʼ Kangħan. Ġeħova jagħti l-qawwa lill-imħallfin biex jeħilsu lill-poplu tiegħu mill-moħqrija
SEKLI qabel Israel daħal f’Kangħan, Ġeħova wiegħed dik l-art lid-dixxendenti t’Abraham. Issa taħt it-tmexxija taʼ Ġożwè, l-Israelin kienu qorbu biex jieħdu l-Art Imwiegħda f’idejhom.
Alla kien iġġudika lill-Kangħanin bħala li jistħoqqilhom il-qerda. Huma kienu mlew l-art bi prattiki sesswali mill-iktar degradanti kif ukoll b’tixrid taʼ demm bla ħniena. Għalhekk, il-bliet Kangħanin mirbuħin mill-Israelin kellhom jinqerdu għalkollox.
Madankollu, qabel ma daħlu fl-art, Ġożwè bagħat żewġ spiji, li qagħdu fil-belt taʼ Ġeriko għand mara jisimha Raħab. Hi laqgħet lill-ispiji f’darha u pproteġiethom avolja kienet taf li kienu Israelin. Raħab kellha fidi fl-Alla tal-Israelin għax kienet semgħet bl-atti taʼ salvazzjoni li Ġeħova wettaq għan-nom tal-poplu tiegħu. Hi ġiegħlet lill-ispiji jaħilfulha li hi u n-nies taʼ darha jitħallew ħajjin.
Iktar tard, meta l-Israelin daħlu f’Kangħan u ġew biex jiġġieldu kontra Ġeriko, Ġeħova b’miraklu ġarraf is-swar taʼ Ġeriko. Is-suldati taʼ Ġożwè daħlu u qerdu l-belt, imma ħallew lil Raħab u lill-familja tagħha ħajjin. Imbagħad, f’kampanja militari li saret b’ħeffa kbira u li damet sitt snin, Ġożwè rebaħ partijiet kbar mill-Art Imwiegħda. Wara dan, l-art tqassmet lit-tribujiet taʼ Israel.
Lejn l-aħħar tas-servizz twil tiegħu lil Alla, Ġożwè sejjaħ lin-nies biex jinġemgħu flimkien. Hu rriveda magħhom x’kien għamel Ġeħova maʼ missirijiethom u ħeġġiġhom biex jaqdu lil Ġeħova. Imma wara li mietu Ġożwè u dawk li kienu qdew miegħu, l-Israelin telqu lil Ġeħova biex jaqdu allat foloz. Għal xi 300 sena, il-ġens m’obdiex il-liġijiet taʼ Ġeħova b’mod konsistenti. Matul dan iż-żmien, Ġeħova ħalla lill-Israelin jinħaqru mill-għedewwa tagħhom, fosthom il-Filistin. Imma meta l-Israelin kienu jsejħu lil Ġeħova għall-għajnuna, hu kien iqajmilhom l-imħallfin—b’kollox 12—biex isalvawhom.
Il-perijodu tal-Imħallfin deskritt fil-ktieb tal-Imħallfin beda b’Għotnijel u spiċċa b’Sansun, li kien l-iktar bniedem b’saħħtu fiżikament li qatt għex. Il-verità bażika li tidher darba wara l-oħra fir-rakkont eċċitanti mniżżel fil-ktieb tal-Bibbja tal-Imħallfin hija din: L-ubbidjenza lejn Ġeħova ġġib il-barkiet, imma d-diżubbidjenza ġġib il-gwaj.
—Ibbażat fuq Ġożwè; Imħallfin; Levitiku 18:24, 25.