1-3. Pietru x’kien ra f’jum li fih seħħew ħafna affarijiet, u x’tip taʼ lejl kien qed jesperjenza?

PIETRU beda jgħarrex fis-​swidija tal-​lejl hu u jitħabat bil-​moqdief f’idejh. Kien hemm bħal daqsxejn taʼ dija li kien qed jara fuq ix-​xefaq min-​naħa tal-​Lvant. Tgħid kienet sinjal li sa fl-​aħħar kien beda jbexbex? Ħass qtugħ taʼ laħam f’dahru u fi spallejh għax kien ilu sigħat sħaħ jaqdef. Ir-​riħ li kien qanfidlu xagħru kollu kien qalleb l-​ilmijiet tal-​Baħar tal-​Galilija. Il-​mewġ beda jħabbat b’kemm kellu saħħa mal-​pruwa tad-​dgħajsa tas-​sajd, u b’hekk ir-​raxx kiesaħ xarrbu għasra. Iżda hu kompla jaqdef.

² Lura fuq ix-​xatt, Pietru u sħabu kienu ħallew lil Ġesù waħdu. Dakinhar kienu raw lil Ġesù jitmaʼ folla taʼ eluf taʼ nies bil-​ġuħ bi ftit ħobż u ħut. Ir-​reazzjoni tan-​nies kienet li jipprovaw jagħmlu lil Ġesù sultan, iżda hu ma riedx jiċċappas mal-​politika. Hu ried ukoll jgħallem lis-​segwaċi tiegħu biex ma jinvolvux ruħhom fil-​politika. Beda jevita l-​folol u jħeġġeġ lid-​dixxipli tiegħu jitilgħu fuq id-​dgħajsa u jerħulha għan-​naħa l-​oħra tax-​xatt sakemm hu jitlaʼ fuq il-​muntanja waħdu biex jitlob.—Mk. 6:35-​45; aqra Ġwanni 6:14-​17.

³ Kien kważi qamar kwinta u l-​lejl kien daħal sew xħin id-​dixxipli ħarġu bid-​dgħajsa; issa l-​qamar kien qed jgħib bil-​mod il-​mod fix-​xefaq fuq in-​naħa tal-​Lvant. Xorta waħda kien irnexxielhom jivvjaġġaw ftit kilometri biss. Minħabba dak il-​qdif kollu, ir-​riħ ivenven bla heda, u l-​mewġ, kien diffiċli li jitħaddtu bejniethom. Wisq probabbli, Pietru kien mitluf fi ħsibijietu.

4. Pietru għala hu eżempju tajjeb għalina x’nimitaw?

⁴ Kemm ħsibijiet! Kienu għaddew iktar minn sentejn, li matulhom seħħew ħafna affarijiet, mindu Pietru kien iltaqaʼ maʼ  Ġesù taʼ Nazaret għall-​ewwel darba. Kien tgħallem ħafna affarijiet imma xorta kien għad fadallu ħafna x’jitgħallem. Peress li kien lest li jagħmel dan—li jissielet kontra ostakli bħalma huma d-​dubji u l-​biżaʼ—hu sar eżempju li jispikka għalina x’nimitaw. Ejja naraw għala.

5, 6. Pietru x’tip taʼ ħajja kien jgħix?

⁵ Pietru qatt ma kien se jinsa l-​jum li fih iltaqaʼ maʼ Ġesù. Ħuh Indrì kien tah l-​aħbar mill-​isbaħ: “Sibna ’l-​Messija.” B’dan il-​kliem, ħajjet Pietru bdiet tinbidel. Qatt iktar ma kellha terġaʼ tkun l-​istess.—Ġw. 1:41.

⁶ Pietru kien jgħix f’Kafarnahum, belt fuq ix-​xatt tat-​Tramuntana taʼ għadira tal-​ilma ħelu li jisimha l-​Baħar tal-​Galilija. Hu u Indrì kellhom negozju tas-​sajd bi sħab maʼ Ġakbu u Ġwanni, ulied Żebedew. Flimkien maʼ Pietru u martu kienu jgħixu wkoll il-​kunjata tiegħu u ħuh, Indrì. Sabiex imantni lil din il-​familja permezz tas-​sajd żgur li kien jeħtieġ xogħol iebes, enerġija, u abbiltajiet prattiċi. Nistgħu nimmaġinaw il-​bosta ljieli twal taʼ ħidma—l-​irġiel jitfgħu x-​xbieki kbar bejn żewġ dgħajjes u jtellgħu abbord kwalunkwe ħuta li jaqbdu mill-​għadira. Nistgħu nġibu quddiem għajnejna wkoll ġranet sħaħ taʼ xogħol iebes hekk kif il-​ħut jibda jintgħażel u jinbiegħ, u x-​xbieki jiġu msewwijin u mnaddfin.

7. Pietru x’semaʼ dwar Ġesù, u din l-​aħbar għala kienet eċċitanti?

⁷ Il-​Bibbja tgħidilna li Indrì kien dixxiplu taʼ Ġwanni l-​Għammied. Pietru żgur li ta widen b’interess kbir għar-​rapporti taʼ ħuh dwar il-​messaġġ taʼ Ġwanni. Darba minnhom, Indrì ra lil Ġwanni jipponta lejn Ġesù taʼ Nazaret u jgħid: “Ara, il-​Ħaruf t’Alla!” Minnufih, Indrì sar segwaċi taʼ Ġesù u b’ħerqa qal lil Pietru b’din l-​aħbar eċċitanti: Il-​Messija kien wasal! (Ġw. 1:35-​40) Wara r-​ribelljoni fl-​Għeden madwar 4,000 sena qabel, Alla Ġeħova kien wiegħed li se jiġi individwu speċjali biex jipprovdi tama vera għall-​umanità. (Ġen. 3:15) Indrì kien iltaqaʼ proprju maʼ dan l-​individwu li kellu jsalva lill-​umanità—il-​Messija nnifsu! Anki Pietru mar jiġri jiltaqaʼ maʼ Ġesù.

8. X’kien ifisser l-​isem li Ġesù ta lil Pietru, u xi wħud għala għadhom jiddubitaw dwar din l-​għażla tal-​isem?

⁸ Sa dakinhar, Pietru kien magħruf bl-​isem taʼ Xmun, jew Simegħon. Imma Ġesù ħares lejh u qal: “‘Int Xmun bin Ġwanni; int tissejjaħ Kefa’ (isem li bil-​Grieg hu tradott Pietru).” (Ġw. 1:42) “Kefa” huwa nom li jfisser “ġebla,” jew “blata.” Bla dubju, il-​kliem taʼ Ġesù kien profetiku. Hu bassar li Pietru kellu jsir bħal  blata—influwenza stabbli, soda, u taʼ min joqgħod fuqha fost is-​segwaċi taʼ Kristu. Pietru hekk kien iqis lilu nnifsu? Ma tantx. Anki xi wħud illum li jaqraw ir-​rakkonti tal-​Evanġelju ma jaħsbux li Pietru kien stabbli u taʼ min joqgħod fuqu. Xi wħud qalu li l-​karattru tiegħu, bħalma hu deskritt fil-​Bibbja, jidher li ma kienx stabbli jew kostanti—kien qisu pinnur.

9. Ġeħova u Ibnu lejn xiex iħarsu, u għala taħseb li għandna nafdaw fil-​ħarsa tagħhom?

⁹ Pietru kellu n-​nuqqasijiet tiegħu wkoll. Ġesù kien konxju taʼ dan. Imma Ġesù, bħal Missieru, Ġeħova, kien dejjem ifittex it-​tajjeb fin-​nies. Ġesù ra ħafna potenzjal f’Pietru u Hu pprova jgħinu juri dawn il-​kwalitajiet bl-​aqwa mod possibbli. Ġeħova u Ibnu jfittxu t-​tajjeb fina llum ukoll. Jistaʼ jkun li nsibuha bi tqila biex nemmnu li huma jistgħu jsibu ħafna kwalitajiet tajbin fina. Madankollu, jeħtieġ li nafdaw fil-​ħarsa tagħhom u nagħtu prova li aħna lesti li niġu mħarrġin u magħġunin, bħalma kien Pietru.—Aqra l-​1 Ġwanni 3:19, 20.

10. Pietru x’għandu mnejn ra b’għajnejh stess, iżda lejn xiex reġaʼ lura?

¹⁰ X’aktarx li Pietru akkumpanja lil Ġesù fl-​ippritkar li segwa wara. B’hekk, setaʼ forsi jara lil Ġesù jwettaq l-​ewwel miraklu tiegħu, dak li jibdel l-​ilma f’inbid fit-​tieġ taʼ Kana. Iktar importanti minn hekk, kien semaʼ l-​messaġġ meraviljuż u mimli tama taʼ Ġesù dwar is-​Saltna t’Alla. Xorta waħda, minkejja l-​affarijiet sbieħ li semaʼ u ra, Pietru ma baqax jivvjaġġa maʼ Ġesù u reġaʼ lura għax-​xogħol tas-​sajd tiegħu. Iżda xi xhur wara, Pietru reġaʼ ltaqaʼ maʼ Ġesù—u did-​darba Ġesù stiednu jqattaʼ ħafna mill-​ħin tiegħu jipprietka miegħu.

11, 12. (a) Pietru x’tip taʼ lejl taʼ ħidma għadda? (b) Hu u jismaʼ lil Ġesù jgħallem, Pietru x’setaʼ kien għaddej minn moħħu?

¹¹ Pietru kien għadu kif għadda lejl skuraġġanti taʼ ħidma. Għal darba wara l-​oħra, is-​sajjieda kienu niżżlu x-​xbieki tagħhom iżda kienu tellgħuhom vojta. Pietru żgur li uża l-​esperjenza u s-​sengħa tiegħu biex isib il-​ħut billi pprova jistad f’diversi nħawi tal-​għadira biex jara fejn il-​ħut ikun qed imiss. Bla dubju, kien hemm drabi meta, bħal ħafna sajjieda oħrajn, xtaq li setaʼ jgħarrex fis-​swidija tal-​baħar biex isib xi ġliba ħut jew biex b’xi mod iġiegħel il-​ħut jidħol ġox-​xbieki tiegħu. M’għandniex xi ngħidu, dawn il-​ħsibijiet setgħu biss iżidulu l-​frustrazzjoni. Dan ma kienx sempliċi sfog jew passatemp għal Pietru; in-​nies kienu jiddependu minnu biex jaqbad il-​ħut. Fl-​aħħar wasal ix-​xatt b’idu f’idu.  Ix-​xbieki riedu jiġu mnaddfin. Għalhekk, kien medhi jnaddaf ix-​xbieki xħin wasal Ġesù.

¹² Folla nies kienet qed tross fuq Ġesù u tixtarr b’ħerqa kull kelma li jlissen. Peress li kien hemm ċorma nies, Ġesù telaʼ fuq id-​dgħajsa taʼ Pietru u talbu jaqlaʼ ftit ’il barra mill-​art. B’leħen ċar li jwassal, Ġesù beda jgħallem lill-​folla. Pietru ta widen b’attenzjoni kbira, sewwasew bħalma għamlu dawk li kienu fuq ix-​xatt. Hu qatt ma kien jixbaʼ jismaʼ lil Ġesù jiżviluppa t-​tema prinċipali tal-​ippritkar tiegħu—is-​Saltna t’Alla. Xi privileġġ li tgħin lill-​Kristu jxerred dan il-​messaġġ taʼ tama madwar l-​art kollha! Imma kienet din xi ħaġa realistika? Pietru kif kien se jmantni lil familtu? Forsi Pietru reġaʼ ħaseb dwar il-​lejl twil li kien għadu kif għadda u li ma renda ebda frott.—Lq. 5:1-​3.

13, 14. Ġesù liema miraklu wettaq għal Pietru, u Pietru kif irreaġixxa?

¹³ Meta spiċċa jitkellem, Ġesù qal lil Pietru: “Oħroġ ’il barra fejn hu fond, u itfgħu x-​xbieki tagħkom ħa taqbdu qabda ħut.” Pietru kien mimli dubji. Hu qal: “Mgħallem, għamilna lejl sħiħ nitħabtu u ma qbadna xejn, imma għall-​kelma tiegħek se nitfaʼ x-​xbieki.” Pietru kien għadu kif ħasel ix-​xbieki. Żgur li l-​aħħar ħaġa li kellu aptit jagħmel kienet li jerġaʼ jitfagħhom—speċjalment issa li l-​ħut lanqas biss kien se jmiss! Xorta waħda, hu għamel kif qallu u forsi għamel sinjal lil sħabu li kienu f’dgħajsa oħra biex isegwuhom.—Lq. 5:4, 5.

¹⁴ Pietru ħass toqol mhux mistenni hu u jtellaʼ x-​xbieki. Ġab għajnejh wara widnejh. Beda jiġbed b’iktar saħħa u ma damx ma setaʼ jara qabda kbira taʼ ħut jissara fix-​xbieki! Bħal donnu qabdu ferħ taʼ ġenn u għamel sinjal lill-​irġiel fid-​dgħajsa l-​oħra biex jiġu jagħtuh daqqa t’id. Xħin għamlu hekk, kien ovvju li dgħajsa waħda ma setgħetx tesaʼ dan il-​ħut kollu. Imlew iż-​żewġ dgħajjes, iżda kien hemm wisq—id-​dgħajsa bdiet tegħreq minħabba l-​piż tqil. Pietru baqaʼ skantat. Hu kien ra l-​qawwa taʼ Kristu fl-​azzjoni qabel, imma dan l-​eżempju kien taʼ benefiċċju għalih u għal familtu. Kuntrarju għal Pietru, Ġesù kellu s-​setgħa li saħansitra jġiegħel li l-​ħut jidħol fix-​xbieki! Pietru beda jħossu beżgħan. Niżel għarkopptejh u qal: “Tbiegħed minni, għax jien raġel midneb, Mulej.” Kif setaʼ qatt ikun jistħoqqlu li jissieħeb maʼ Wieħed li kellu l-​awtorità minn Alla biex juża din is-​setgħa b’dan il-​mod?—Aqra Luqa 5:6-​9.

15. Ġesù kif għallem lil Pietru li d-​dubji u l-​beżgħat tiegħu kienu bla bażi?

 ¹⁵ Bil-​ħlewwa, Ġesù qal: “Tibqax beżgħan. Minn issa ’l quddiem tibda taqbad nies ħajjin.” (Lq. 5:10, 11) Dan ma kienx il-​ħin li jiddubita jew jibżaʼ. Id-​dubji taʼ Pietru dwar kwistjonijiet prattiċi bħalma huma s-​sajd ma kellhomx bażi; il-​beżgħat tiegħu dwar id-​difetti u n-​nuqqas t’abbiltajiet li kellu kienu bla bażi wkoll. Ġesù kellu biċċa xogħol kbira x’jagħmel, ministeru li kien se jeffettwa l-​futur tal-​umanità. Hu kien jaqdi lil Alla li “jaħfer bil-​kbir.” (Is. 55:7) Ġeħova kien se jieħu ħsieb il-​bżonnijiet taʼ Pietru, kemm fiżiċi u kemm spiritwali.—Mt. 6:33.

16. Pietru, Ġakbu, u Ġwanni kif irreaġixxew għall-​istedina taʼ Ġesù, u għala kienet l-​aqwa deċiżjoni li setgħu jieħdu?

¹⁶ Pietru minnufih obda lil Ġesù, bħalma għamlu Ġakbu u Ġwanni. “Daħħlu d-​dgħajjes lura lejn l-​art, u abbandunaw kollox  u marru warajh.” (Lq. 5:11) Pietru kellu fidi f’Ġesù u fil-​Wieħed li bagħtu. Kienet l-​aqwa deċiżjoni li setaʼ jieħu. Il-​Kristjani llum li jegħlbu d-​dubji u l-​beżgħat tagħhom sabiex jaqdu lil Alla qed juru l-​fidi bl-​istess mod. Ġeħova dejjem jieħu ħsieb dawk li jafdaw fih.—Salm 22:4, 5.

17. Pietru kellu liema memorji tas-​sentejn mindu kien iltaqaʼ maʼ Ġesù?

¹⁷ Madwar sentejn wara li ltaqaʼ maʼ Ġesù, Pietru qattaʼ lejl sħiħ jaqdef fir-​riħ fuq il-​Baħar tal-​Galilija, bħalma ssemma fil-​bidu taʼ dan il-​kapitlu. Naturalment, ma nistgħux inkunu nafu x’kien għaddej minn moħħu. Kemm kellu ħsibijiet fuq moħħu! Ġesù kien fejjaq lill-​kunjata taʼ Pietru. Kien ta l-​Prietka taʼ fuq il-​Muntanja. Għal darba wara l-​oħra, permezz tat-​tagħlim u x-​xogħlijiet importanti tiegħu, hu wera li kien il-​Magħżul taʼ Ġeħova, il-​Messija. Hekk kif gerbu x-​xhur, Pietru kien tgħallem jikkontrolla l-​beżgħat u d-​dubji tiegħu. Ġesù kien saħansitra għażel lil Pietru biex ikun wieħed mit-​12-​il appostlu! Xorta waħda, Pietru malajr kien se jsir jaf li xorta kellu beżgħat u dubji.

18, 19. (a) Iddeskrivi x’ra Pietru fuq il-​Baħar tal-​Galilija. (b) Ġesù kif qatagħlu xewqtu lil Pietru?

¹⁸ Matul ir-​rabaʼ għassa taʼ dak il-​lejl, jew f’xi ħin bejn it-​tlieta taʼ filgħodu u tlugħ ix-​xemx, f’salt wieħed Pietru waqaf jaqdef u qam bilqiegħda dritt. Hemmhekk—fuq il-​mewġ—kien hemm xi ħaġa tiċċaqlaq! Tgħid kien ir-​raxx tal-​mewġ fid-​dawl tal-​qamar? Le, kienet xi ħaġa solida u dritta ’l fuq. Kien raġel! Iva, raġel miexi fuq wiċċ il-​baħar! Hekk kif ir-​raġel resaq eqreb, kien donnu bħallikieku kien se jibqaʼ għaddej minn ħdejn id-​dgħajsa tagħhom. Imwerwrin, id-​dixxipli ħasbu li kienet xi tip taʼ dehra. Ir-​raġel tkellem: “Agħmlu kuraġġ, hu jien; tibżgħux.” Kien Ġesù!—Mt. 14:25-​28.

¹⁹ Pietru wieġbu: “Mulej, jekk inhu int, ordnali niġi ħdejk fuq l-​ilma.” L-​ewwel reazzjoni tiegħu kienet waħda taʼ kuraġġ. Mimli eċċitament malli ra dan il-​miraklu uniku, Pietru ried ikompli jsaħħaħ il-​fidi tiegħu. Ried jesperjenza dan personalment. B’qalb tajba, Ġesù qal lil Pietru biex jersaq lejh. Pietru xxabbat mal-​ġenb tad-​dgħajsa u niżel fil-​baħar immewweġ. Immaġina kif ħassu Pietru meta ħass saqajh fis-​sod u mbagħad qam bilwieqfa fuq l-​ilma. Min jaf kif baqaʼ mistagħġeb hekk kif beda jersaq lejn Ġesù. Madankollu, malajr kellu reazzjoni oħra.—Aqra Mattew 14:29.

20. (a) Pietru b’liema mod ma baqax jiffoka, u dan għal xiex wassal? (b) Ġesù liema lezzjoni għallmu lil Pietru?

²⁰ Pietru kellu bżonn jibqaʼ jiffoka fuq Ġesù. Kien Ġesù, bis-​setgħa taʼ Ġeħova, li kien qed iżomm lil Pietru fuq il-​baħar  kollu mewġ minħabba r-​riħ. U Ġesù kien qed jagħmel dan għax kien jaf li Pietru kellu fidi fih. Imma Pietru aljena rasu. Naqraw: “X’ħin ra r-​riefnu beda jibżaʼ.” Pietru beda jħares lejn dak il-​mewġ kollu jħabbat mad-​dgħajsa u jtajjar ir-​raxx u r-​ragħwa mar-​riħ. Tatu rasu. X’aktarx li qagħad jimmaġina lilu nnifsu jegħreq f’dik l-​għadira. Hekk kif il-​biżaʼ tiegħu beda jiżdied, il-​fidi tiegħu bdiet tmajna. Ir-​raġel li kien ngħata l-​isem taʼ Blata għax kien wera kemm jistaʼ jkun sod, beda jegħreq f’kemm ilna ngħidu minħabba l-​fidi dgħajfa tiegħu. Pietru kien għawwiem tajjeb imma issa ma kienx qed jistrieħ fuq din l-​abbiltà. Hu għajjat: “Mulej, salvani!” Ġesù qabdu minn idu u ġibdu ’l fuq. Imbagħad, waqt li kien għadu f’wiċċ l-​ilma, lil Pietru enfasizzalu din il-​lezzjoni importanti: “Int taʼ fidi żgħira, għala ddubitajt?”—Mt. 14:30, 31.

21. Id-​dubji għala huma taʼ periklu, u kif nistgħu nissieltu kontrihom?

²¹ “Għala ddubitajt?”—kemm kienet mistoqsija xierqa! Id-​dubju jistaʼ jkun forza qawwija u distruttiva. Jekk inċedu għad-​dubji tistaʼ tiddgħajfilna l-​fidi, u b’hekk negħrqu spiritwalment. Jeħtieġ nikkontrollaw id-​dubji tagħna! Kif? Billi nibqgħu ffokati fuq dak li hu importanti. Jekk moħħna joqgħod iberren fuq dak li jbeżżagħna, jiskuraġġina, u jaljenana minn Ġeħova u Ibnu, se naraw li d-​dubji tagħna se jiżdiedu. Jekk niffokaw fuq Ġeħova u Ibnu, fuq dak li għamlu, qed jagħmlu, u se jagħmlu għal dawk li jħobbuhom, se nkunu nistgħu nikkontrollaw kwalunkwe dubju li jistaʼ jkun taʼ dannu għall-​fidi tagħna.

22. Il-​fidi taʼ Pietru għala hi taʼ min jimitaha?

²² Hekk kif Pietru mexa wara Ġesù lura fid-​dgħajsa, hu ra t-​temp ikrah ibatti. Waqgħet ħemda kbira fuq il-​Baħar tal-​Galilija. Pietru ngħaqad maʼ sħabu d-​dixxipli f’li jiddikjara: “Int tassew l-​Iben t’Alla.” (Mt. 14:33) Hekk kif bdiet tielgħa x-​xemx fuq l-​għadira, Pietru ħassu grat ferm. Kien tgħallem ma jħallix il-​biżaʼ tiegħu jġiegħlu jiddubita f’Ġeħova u Ġesù. M’għandniex xi ngħidu, kellu jagħmel ħafna bidliet qabel ma sar il-​Kristjan sod daqs il-​blat li bassar Ġesù. Imma hu kien determinat li jibqaʼ jipprova, u jibqaʼ jagħmel avvanz. Għandek int din id-​determinazzjoni? Se tara li l-​fidi taʼ Pietru hi taʼ min jimitaha.