X’aktarx li int tieħu pjaċir meta xi ħadd jagħtik aħbar tajba. U tabilħaqq hemm aħbar tajba għalik u għall-​maħbubin tiegħek.

Din l-​aħbar tajba tinsab fil-​Bibbja, ktieb li l-​Ħallieq tal-​univers, Alla Ġeħova, ħa ħsieb li jinkiteb bosta snin ilu. F’dan il-​ktieb se niffokaw fuq erbaʼ kotba tal-​Bibbja li fihom aħbar tajba ferm għalina lkoll. Huma msemmijin għall-​irġiel li Alla uża biex jiktbuhom—Mattew, Marku, Luqa, u Ġwanni.

Ħafna jirreferu għal dawn l-​erbaʼ rakkonti bħala l-​erbaʼ Evanġelji. L-​erbgħa li huma jirrakkontaw l-​evanġelju, jew l-​aħbar tajba, dwar Ġesù—li hu l-​mezz taʼ salvazzjoni li pprovda Alla. Bħala s-​Sultan tas-​Saltna t’Alla fis-​smewwiet, Ġesù se jġib barkiet dejjiema għal dawk kollha li jeżerċitaw il-​fidi fih.—Marku 10:17, 30; 13:13.

Int forsi ġieli ħsibt dwar għala Alla nebbaħ li jinkitbu erbaʼ rakkonti dwar il-​ħajja taʼ Ġesù u t-​tagħlim tiegħu.

Hemm diversi benefiċċji mill-​fatt li għandna dawn ir-​rakkonti separati dwar dak li Ġesù qal u għamel. Biex nagħtu eżempju, immaġina li hemm erbat irġiel weqfin ħdejn għalliem famuż. Ir-​raġel li qiegħed quddiem l-​għalliem jaħdem f’uffiċċju tat-​taxxi. Ir-​raġel li hemm fuq in-​naħa tal-​lemin hu tabib. Dak li qed jismaʼ fuq in-​naħa tax-​xellug hu sajjied u ħabib tal-​qalb tal-​għalliem. U r-​rabaʼ raġel, li qiegħed fuq wara, hu iżgħar mill-​oħrajn. Dawn l-​erbgħa huma rġiel onesti u jinteressawhom affarijiet differenti. Barra minn hekk, ma jiffokawx kollha fuq l-​istess affarijiet. Jekk kull wieħed minnhom jikteb rakkont dwar dak li l-​għalliem qal u għamel, l-​erbaʼ rakkonti x’aktarx ikun fihom dettalji jew ġrajjiet differenti. Billi nikkunsidraw l-​erbaʼ rakkonti, waqt li nżommu f’moħħna l-​ħarsa jew l-​iskop taʼ kull kittieb, inkunu nistgħu niksbu stampa ċara taʼ dak li l-​għalliem qal u għamel. Dan l-​eżempju juri kif nistgħu nibbenefikaw mill-​fatt li għandna erbaʼ rakkonti separati tal-​ħajja tal-​Għalliem il-​Kbir, Ġesù.

 Biex inkomplu bl-​eżempju, ir-​raġel li jiġbor it-​taxxi jrid imiss qalb dawk li għandhom trobbija Lhudija, u allura juża ċertu tagħlim jew ġrajjiet bl-​iskop li jgħin lil dan il-​grupp partikulari. It-​tabib jiffoka fuq il-​fejqan tal-​morda u tal-​immankati, allura jħalli barra ċerti affarijiet li semma r-​raġel li jiġbor it-​taxxi jew inkella ma jsemmihomx fl-​istess ordni. Il-​ħabib tal-​qalb jenfasizza s-​sentimenti u l-​kwalitajiet tal-​għalliem. Ir-​rakkont tar-​raġel iżgħar mhuwiex twil daqs l-​oħrajn. Minkejja dan, ir-​rakkonti kollha huma eżatti. Dan juri tajjeb li l-​fatt li għandna erbaʼ rakkonti tal-​ħajja taʼ Ġesù jkabbar il-​fehma tagħna tal-​attivitajiet, it-​tagħlim, u l-​personalità tiegħu.

Xi nies għandhom mnejn jitkellmu dwar ‘l-​Evanġelju taʼ Mattew’ jew ‘l-​Evanġelju taʼ Ġwanni.’ Ma jkunux qed jiżbaljaw meta jgħidu hekk, għax kull evanġelju fih “aħbar tajba dwar Ġesù Kristu.” (Marku 1:1) Madankollu, f’sens akbar, hemm biss evanġelju wieħed, jew aħbar tajba waħda, dwar Ġesù—disponibbli għalina f’erbaʼ rakkonti.

Ħafna studenti tal-​Kelma t’Alla qabblu maʼ xulxin il-​ġrajjiet u l-​fatti li nsibu f’​Mattew, Marku, Luqa, u Ġwanni u sabu li hemm qbil bejniethom. Madwar is-​sena 170 WK, il-​kittieb Sirjan Tatian stinka biex jagħmel dan. Hu rrikonoxxa li dawn l-​erbaʼ kotba huma eżatti u mnebbħin, u kiteb id-​Diatessaron, rakkont wieħed li fih hemm miġbura l-​ħajja u l-​ministeru taʼ Ġesù.

Dan il-​ktieb bit-​titlu Ġesù—It-​Triq, il-​Verità, u l-​Ħajja jagħmel xi ħaġa simili imma hu iktar eżatt u dettaljat. Dan hu possibbli għax issa nifhmu aħjar it-​twettiq taʼ ħafna mill-​profeziji u t-​tixbihat taʼ Ġesù. Din il-​fehma tiċċara dak li qal u għamel, kif ukoll l-​ordni li bihom seħħew l-​affarijiet. Barra minn hekk, skoperti arkeoloġiċi tefgħu dawl fuq ċerti dettalji u fuq il-​ħarsa tal-​kittieba. M’għandniex xi ngħidu, ħadd ma jistaʼ jgħid bl-​eżatt b’liema ordni seħħet kull ġrajja. Imma dan il-​ktieb jippreżenta dak li hu raġunevoli u li jagħmel sens.

Hekk kif tieħu pjaċir taqra dan il-​ktieb, ipprova żomm f’moħħok il-​messaġġ prinċipali għalik u għall-​maħbubin tiegħek. Ftakar li Ġesù Kristu nnifsu qal lill-​appostlu Tumas: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.”—Ġwanni 14:6.

Dan il-​ktieb, Ġesù—It-​Triq, il-​Verità, u l-​Ħajja, se jgħinek tapprezza kif Ġesù ċertament hu “t-​triq.” Permezz tiegħu biss huwa possibbli li nkellmu lil Alla Ġeħova fit-​talb. Barra minn hekk, hu grazzi għal Ġesù li aħna nistgħu nerġgħu nitħabbu m’Alla. (Ġwanni 16:23; Rumani 5:8) Għalhekk, huwa permezz taʼ Ġesù biss li jistaʼ jkollna relazzjoni approvata m’Alla.

Ġesù hu “l-​verità.” Hu tkellem u għex fi qbil mal-​verità. Ukoll, hu wettaq bosta profeziji, li “saru Iva permezz tiegħu.” (2 Korintin 1:20; Ġwanni 1:14) Dawn il-​profeziji jgħinuna nifhmu l-​irwol prinċipali tiegħu fit-​twettiq tal-​iskop t’Alla.—Rivelazzjoni 19:10.

U Ġesù Kristu hu “l-​ħajja.” Permezz tal-​fidwa, meta offra l-​ħajja u d-​demm perfett tiegħu, hu għamilha possibbli għalina li niksbu “l-​ħajja vera,” jiġifieri, il-​“ħajja taʼ dejjem.” (1 Timotju 6:12, 19; Efesin 1:7; 1 Ġwanni 1:7) Anki għal miljuni taʼ nies li mietu se juri li hu “l-​ħajja” għax dawn se jiġu mqajmin mill-​mewt u ħa jkollhom il-​prospett li jgħixu f’Ġenna tal-​art għal dejjem.—Ġwanni 5:28, 29.

Ilkoll kemm aħna neħtieġu nifhmu u ngħożżu l-​irwol taʼ Ġesù fl-​iskop t’Alla. Jalla tieħu gost titgħallem iktar dwar Ġesù—“it-​triq, il-​verità, u l-​ħajja.”