L-​egoiżmu jistaʼ jwassal għall-​preġudizzju. Xi ħadd egoist ikun minfuħ bih innifsu. Iqis lilu nnifsu superjuri u jiġġudika lin-​nies li huma differenti minnu bħala inferjuri. Kulħadd jistaʼ jaqaʼ f’din in-​nassa. L-​Encyclopædia Britannica tgħid: “Il-​biċċa l-​kbira tan-​nies iħossu li l-​ħajja, l-​ikel, l-​ilbies, id-​drawwiet, it-​twemmin, il-​valuri, u affarijiet oħra tagħhom, huma superjuri għal dawk taʼ gruppi oħra.” Kif nistgħu nevitaw dan il-​mod żbaljat taʼ kif naħsbu?

‘B’umiltà qisu lill-​oħrajn superjuri għalikom.’—FILIPPIN 2:3.

Xi jfisser? Biex nevitaw kburija żejda, aħna għandna bżonn nitgħallmu nkunu umli. L-​umiltà tgħinna nagħrfu li f’ċerti affarijiet, oħrajn huma aħjar minna. L-​ebda grupp taʼ nies m’għandu l-​kwalitajiet u l-​abbiltajiet tajbin kollha.

Ikkunsidra l-​eżempju taʼ Stefan. Hu trabba f’pajjiż Komunist imma għeleb is-​sentimenti taʼ preġudizzju kontra nies minn pajjiżi li ma kinux Komunisti. Hu jgħid: “Jien nemmen  li hu importanti li tqis lil oħrajn superjuri għalik biex tkun tistaʼ tirreżisti l-​preġudizzju. Jien ma nafx kollox. Nistaʼ nitgħallem xi ħaġa mingħand kulħadd.”

Ipprova kun realistiku u ammetti li inti tiżbalja. Agħraf li oħrajn jistgħu jagħmlu xi affarijiet aħjar minnek. Taħsibx li n-​nies kollha minn grupp partikolari għandhom l-​istess affarijiet li jdejquk.

Minflok ma taħseb b’mod negattiv dwar persuna minn grupp partikolari taʼ nies, saqsi lilek innifsek:

• ‘Huma l-​kwalitajiet li ma nħobbx f’dik il-​persuna verament ħżiena, jew sempliċiment huma differenti?’

• ‘Din il-​persuna se ssibli difetti?’

• ‘Din il-​persuna fiex inhi iktar kapaċi minni?’

Jekk twieġeb dawn il-​mistoqsijiet b’mod onest, inti se tkun tistaʼ mhux biss tegħleb kull preġudizzju li għandek imma wkoll tistaʼ ssib affarijiet x’tammira f’dik il-​persuna.