XI ĦADD li jħossu ħuta barra mill-​ilma hu xi ħadd li oħrajn ma jaċċettawhx bħala parti mill-​grupp tagħhom. Għandu mnejn ikollu kulur tal-​ġilda jew nazzjonalità differenti jew jitkellem u jaġixxi b’mod differenti. Int ġieli tħossok ħuta barra mill-​ilma?— a

Ejja nitkellmu dwar raġel li ħassu hekk. Kien jismu Mefiboset. Ejja nitgħallmu min kien u għala ħassu ħuta barra mill-​ilma. Jekk int ġieli tħossok hekk, tistaʼ titgħallem ħafna minn Mefiboset.

Mefiboset kien bin Ġonatan, il-​ħabib għażiż taʼ David. Qabel ma miet fil-​gwerra, Ġonatan qal lil David: ‘Kun qalbek tajba maʼ wliedi.’ David sar sultan. Snin wara ftakar fil-​kliem taʼ Ġonatan, u Mefiboset kien għadu ħaj. Meta kien żgħir, kellu inċident ikrah. Bilkemm setaʼ jimxi għall-​kumplament taʼ ħajtu. Tistaʼ tara għala forsi ħassu ħuta barra mill-​ilma?—

David ried juri qalb tajba maʼ bin Ġonatan. Allura David għamel arranġamenti biex Mefiboset ikollu dar ħdejn tiegħu f’Ġerusalemm, u dejjem kellu post merfugħ għalih mal-​mejda taʼ David. Ir-​raġel Siba, flimkien maʼ wliedu subien u l-​qaddejja tiegħu, ngħata lil Mefiboset biex ikun il-​qaddej tiegħu. David verament onora lil bin Ġonatan! Taf x’ġara mbagħad?—

David inqalagħlu l-​inkwiet f’daru. Absalom, wieħed mit-​tfal taʼ David, dar kontrih u pprova jkun sultan. David kellu jaħrab biex  isalva ħajtu. Mefiboset xtaq imur maʼ David meta ħafna oħrajn marru. Dawn il-​ħbieb taʼ David kien jafu li hu kien is-​sultan bi dritt. Imma Mefiboset ma setax imur għax bilkemm setaʼ jimxi.

Imbagħad Siba qal lil David li Mefiboset ma marx magħhom għax fir-​realtà ried ikun sultan hu. David emmen din il-​gidba! Allura ta lil Siba l-​proprjetà kollha taʼ Mefiboset. David ma damx ma rebaħ il-​gwerra kontra Absalom u mar lura Ġerusalemm. Issa David semaʼ n-​naħa taʼ Mefiboset. David iddeċieda li Mefiboset u Siba għandhom jaqsmu l-​proprjetà. X’taħseb li għamel Mefiboset?—

Ma gergirx li d-​deċiżjoni taʼ David ma kinitx ġusta. Mefiboset kien jaf li s-​sultan kellu bżonn il-​paċi sabiex ikun jistaʼ jagħmel xogħlu sew. Allura qal li Siba setaʼ jżomm il-​proprjetà kollha. Dak li verament kien importanti għal Mefiboset kien li David, il-​qaddej taʼ Ġeħova, kien lura Ġerusalemm bħala s-​sultan.

Mefiboset sofra ħafna. Spiss ħassu ħuta barra mill-​ilma. Imma Ġeħova ħabbu u ħa ħsiebu. X’nistgħu nitgħallmu minn dan?— Anki meta nagħmlu t-​tajjeb, xi wħud jistgħu jigdbu dwarna. Ġesù qal: “Jekk id-​dinja tobgħodkom, tafu li lili bagħditni qabel ma bagħdet lilkom.” In-​nies saħansitra qatlu lil Ġesù! Nistgħu nkunu ċerti li jekk nagħmlu s-​sewwa, l-​Alla l-​veru, Ġeħova, se jħobbna—u Ibnu, Ġesù, se jħobbna wkoll.