အရင်းနှီးဆုံး နှောင်ကြိုး​တစ်ခု​အကြောင်း စဉ်းစား​ကြည့်ပါ။ အဲဒါက​တော့ ချွတ်စွပ်​တူတဲ့ အမြွှာတွေပဲ။ သူတို့​ကြားမှာ အထူး​နှောင်ကြိုး​တစ်ခု ရှိတယ်။ တချို့​အမြွှာတွေ​ဆိုရင် “ပြောချင်တာ​ကို ရှင်းပြ​စ​ရာ​မလို​ဘဲ အတိအကျ နားလည်​ကြတယ်” လို့ အမြွှာ​လေ့လာရေး​ဗဟိုဌာန​ရဲ့ ဒါရိုက်တာလည်း​ဖြစ်၊ ကိုယ်တိုင်လည်း အမြွှာ​ဖြစ်တဲ့ နန်စီ စီ​ဂဲ ပြောတယ်။ “တစ်ယောက်​အကြောင်း တစ်ယောက် အကုန်​သိတယ်” လို့ အမြွှာ​ညီအစ်မ​တစ်ယောက် ပြောတယ်။

ဒါ ဘာကြောင့် ထူးခြား​သလဲ။ ပတ်ဝန်းကျင်​နဲ့ မိဘ​ထိန်းကျောင်းမှု​ကြောင့် အမူအကျင့် ဆင်တူတာမျိုး​ရှိပေမဲ့ အထူးသဖြင့် အမြွှာတွေရဲ့ မျိုးရိုး​ဗီဇ ဖွဲ့စည်း​ပုံ တူ​ကြ​လို့​ပဲ​ဆိုတာကို လေ့လာမှု​တွေ​က ဖော်ပြတယ်။

သုံးသပ်​ကြည့်ပါ– ဒီ​အံ့ဖွယ်​မျိုးရိုး​ဗီဇ​ကို ဖန်ဆင်းတဲ့အရှင်​ဟာ ကျွန်တော်တို့ တစ်ယောက်ချင်း​ရဲ့ ဖွဲ့စည်း​တည်ဆောက်ပုံ​ကို ကောင်းကောင်း​နားလည်တာ သေချာ​ပါတယ်။ ‘ကျွန်တော့်ကို မိခင်ရဲ့​ဝမ်း​ထဲမှာ ကာရံ​ထား​ပေးတယ်။ မိခင်ရဲ့​ဝမ်း​ထဲမှာ ပုံသွင်း​တဲ့အခါ ကျွန်တော့်​အရိုးတွေကို ကိုယ်တော်​မြင်​ပါတယ်။ ကျွန်တော် သန္ဓေသားလောင်း​အရွယ်မှာ​တောင် မြင်တယ်။ အင်္ဂါ​အစိတ်အပိုင်းလေးတွေ​ကို စာစောင်​ထဲမှာ တစ်ခု​မကျန် ရေးမှတ်​ထားတယ်’ လို့ ဆာလံကျမ်း​ရေးသူ ဒါဝိဒ် ပြောတယ်။ (ဆာလံ ၁၃၉:၁၃၊ ၁၅၊ ၁၆) ဘုရား​တစ်ပါးတည်းသာ ကျွန်တော်တို့ရဲ့ မျိုးရိုး​ဗီဇ ဖွဲ့စည်း​ပုံကို သိတယ်။ ကျွန်တော်တို့ရဲ့ စရိုက်တွေကို ပြောင်းလဲ​စေတဲ့ ဘဝ​အတွေ့အကြုံတွေ​ကိုလည်း အပြည့်အဝ နားလည်တယ်။ ဒီ​အချက်​က ကျွန်တော်တို့​အကြောင်း ဘုရား အတွင်းကျကျ နားလည်​မှန်း စိတ်ချ​စေတယ်။

“အို ယေဟောဝါ၊ ကိုယ်တော်​က ကျွန်တော့်ကို အသေအချာ စစ်ဆေးတယ်။ ကျွန်တော့်ကို သိတယ်။ ကျွန်တော်​ထိုင်တာ၊ ထ​တာတွေကို သိတယ်။ ကျွန်တော် ဘာတွေ​တွေး​နေမှန်း အဝေးက​နေ သိမြင်​တယ်။ ယေဟောဝါ​ဘုရား၊ ကျွန်တော် စကား​တစ်ခွန်း​မှ မ​ဟ​ခင် ကိုယ်တော် သိ​နှင့်​နေတယ်” လို့ ဒါဝိဒ် ပြောခဲ့တယ်။ (ဆာလံ ၁၃၉:၁၊ ၂၊ ၄) ယေဟောဝါ​ဘုရား​ဟာ ကျွန်တော်တို့ရဲ့ ရင်တွင်း​ခံစားချက်တွေ​နဲ့ “တွေးတော​ကြံစည်သမျှ​ကို သိမြင်​တယ်။” (၁ ရာဇဝင်ချုပ် ၂၈:၉။ ၁ ရှမွေလ ၁၆:၆၊ ၇) အဲဒီ​ကျမ်းချက်တွေ​က ဘုရား​အကြောင်း ဘာ​ဖော်ပြသလဲ။

ဘုရားဆီ ဆုတောင်းတဲ့အခါ ကိုယ့်​အတွေး၊ ခံစားချက်​အားလုံးကို ထုတ်ပြော​ချင်​မှ ပြောမှာ ဖြစ်ပေမဲ့ ကိုယ်​လုပ်သမျှကို​သာမက ဘာကြောင့် လုပ်တယ်​ဆိုတာကို ဘုရား နားလည်တယ်။ ကိုယ့်​ကန့်သတ်ချက်တွေကြောင့် ဆန္ဒရှိ​သလော​က် ကောင်းမှု မ​လုပ်နိုင်​ရင်တောင် ဘာ​ကောင်းမှုတွေ လုပ်ချင်​တယ်​ဆိုတာ ဘုရား နားလည်တယ်။ ဘုရားက ကျွန်တော်တို့ရဲ့ စိတ်ထဲ မေတ္တာ ထည့်သွင်း​ပေး​ထားလို့ မေတ္တာ​အတွေးတွေကို မြင်တွေ့​ချင်တယ်။—၁ ယောဟန် ၄:၇-၁၀။

 ယုံကြည်​စိတ်ချ​စေတဲ့ ကျမ်းချက်များ

• “ယေဟောဝါ​က ဖြောင့်မတ်​သူတွေကို ကြည့်ရှု​နေတယ်။ သူတို့ တိုးလျှိုး​အသနားခံတာကို နားထောင်​နေတယ်။”—၁ ပေတရု ၃:၁၂။

• “မင်းကို ငါ​ထိုးထွင်းဉာဏ် ရှိစေမယ်၊ သွား​သင့်တဲ့​လမ်း​ကို ညွှန်ပြ​ပေးမယ်။ မပြတ်​ကြည့်ရှု​ပြီး အကြံဉာဏ်​ပေးမယ်” လို့ ဘုရား ကတိ​ပေးတယ်။ —ဆာလံ ၃၂:၈။

ကိုယ့်​အခြေအနေ၊ ခံစားချက်တွေကို ဘုရား နားလည်​ကြောင်း သိထားခြင်းက အခက်အခဲတွေကို ရင်ဆိုင်​နိုင်ဖို့ ကူညီပေး​သလား။ နိုင်ဂျီးရီးယား​နိုင်ငံက အဲ​နာ​အကြောင်း သုံးသပ်​ကြည့်ပါ။ “ကိုယ့်ရဲ့ ဘဝ​အခြေအနေ​ဆိုး​ကြောင့် အသက်ရှင်​နေလို့ ထူး​ပါ့မလား​ဆိုပြီး စဉ်းစားမိ​တယ်။ ကျွန်မဟာ ဦးနှောက်​အရည်များ​တဲ့ ရောဂါ​ကြောင့် ဆေးရုံတက်​နေ​သူ သမီးကို စောင့်ရှောက်​နေရတဲ့ မုဆိုး​မပါ။ ကိုယ်တိုင်လည်း ရင်​သား​ကင်ဆာ ဖြစ်နေပြီး ခွဲစိတ်ကုသ၊ ကင်ဆာ​ဆေး​သွင်း​ပြီး ဓာတ်​ရောင်ခြည်​နဲ့ ကုသ​ခဲ့​ရတယ်။ မကျန်းမာတဲ့ သမီး​နဲ့အတူ တစ်ချိန်​တည်း ဆေးရုံတက်​ရလို့ အတော်​ဒုက္ခရောက်​ခဲ့​ရတယ်။”

ရင်ဆိုင်​ဖြေရှင်းဖို့ အဲနာကို ဘာက ကူညီ​ပေးခဲ့သလဲ။ “ဖိလိပ္ပိ ၄:၆၊ ၇ လို ကျမ်းချက်တွေကို ပြန်​စဉ်းစား​တယ်။ အဲဒီမှာ ‘လူ့ဉာဏ်​နဲ့​မမီနိုင်တဲ့ ဘုရားသခင့်​ငြိမ်သက်ခြင်းက စိတ်နှလုံး​နဲ့ ဉာဏ်ရည်ဉာဏ်စွမ်းကို စောင့်ရှောက်​ပေးလိမ့်မယ်’ လို့ ပြောထားတယ်။ အဲဒီ​ကျမ်းချက်ကို စဉ်းစားမိ​တိုင်း ကိုယ့်ကိုယ်ကိုယ် နားလည်တာထက် ယေဟောဝါ ပိုနားလည်တယ်​ဆိုတဲ့ အသိစိတ်ကြောင့် ဘုရားနဲ့ ပို​ရင်းနှီး​လာတယ်။ အသင်းတော်က ညီအစ်ကို/မတွေဆီ​က​လ​ည်း အားပေးမှု ရတယ်။

“ရောဂါ မ​ပျောက်​သေး​ပေ​မဲ့ အခြေအနေ​ကောင်း​လာ​ပါပြီ။ ကျွန်မတို့​ဘေးမှာ ယေဟောဝါ ရှိနေလို့ အခက်အခဲတွေ ကြုံရတဲ့​အခါ အပျက်သဘောတွေ သိပ်​မရှိတော့ဘူး။ ‘ခံနိုင်ရည်ရှိသူတွေကို ပျော်ရွှင်​ချမ်းမြေ့​သူတွေ​လို့ ယူမှတ်တယ်။ ခင်ဗျားတို့​က ယောဘရဲ့ ခံနိုင်ရည်အကြောင်း ကြားဖူး​သလို သူ့ကို ယေဟောဝါ ကောင်းချီး​ပေးခဲ့တာကိုလည်း သိထားကြတာ​ပဲ။ ယေဟောဝါဟာ အလွန်​ချစ်ခင်​စာနာ​ပြီး ကရုဏာ​ကြီးတယ်’ လို့ ယာကုပ် ၅:၁၁ မှာ အာမခံ​ထားတယ်။” ယောဘရဲ့ အခြေအနေကို ယေဟောဝါ အပြည့်အဝ နားလည်​ပေး​သလို ကျွန်တော်တို့ ကြုံနေ​ရတဲ့ ဘယ်​အခက်အခဲ​ကို​မဆို ဘုရား နားလည်​ကြောင်း စိတ်ချ​နိုင်ပါတယ်။