ကျွန်ုပ်တို့၏စာရှုသူများထံမှ
ကျွန်ုပ်တို့၏စာရှုသူများထံမှ
အိမ်ထောင်အစီအစဉ်သည် မုန်တိုင်းဒဏ်ခံနိုင်မည်လော (ဇူလိုင် ၂၀၀၆) ကျွန်တော်က နိုးလော့! မဂ္ဂဇင်းကို ပုံမှန်ဖတ်ရှုသူတစ်ဦးပါ။ ကျွန်တော်ဟာ ကက်သလစ်ဘာသာဝင်တစ်ဦး ဖြစ်ပေမဲ့ သင်တို့ရဲ့မဂ္ဂဇင်းက သိပ်စိတ်ဝင်စားစရာကောင်းပြီး ပညာလည်းပေးတယ်ဆိုတာ တွေ့ရတယ်။ ဒါပေမဲ့ “၁၉၈၃ ခုနှစ်တွင် ထိုချာ့ခ်ျသည် လက်ထပ်စာချုပ်ပါ စည်းမျဉ်းများကို ပြင်လိုက်ရာ ကွာရှင်းရန် ပိုလွယ်ကူလာသည်” ဆိုတဲ့ သင်တို့ရဲ့ဖော်ပြချက်ကို ကျွန်တော်သဘောမတူဘူး။
ဂျေ.ဗွီ.အမ်.၊ ဇမ်ဘီယာ
“နိုးလော့!” ပြန်ကြားချက်– ၁၉၈၃ ခုနှစ်မှ ကျင့်ဝတ်ဥပဒေလုပ်ထုံးအပြောင်းအလဲများကို ကျွန်ုပ်တို့ရည်ညွှန်းခြင်းဖြစ်သည်။ ဤအပြောင်းအလဲ၏ အကျိုးသက်ရောက်မှုသည် အထူးသဖြင့် အမေရိကန်တွင် ပိုသိသာသည်။ ရိုမန်ကက်သလစ်ဂိုဏ်းအုပ် မာ့ခ် အေ. ပီဗာရူနက်စ်၏အဆိုအရ ၁၉၆၈ ခုနှစ်တွင် အမေရိကန်၌ အိမ်ထောင်ပြတ်စဲမှု ၃၃၈ ခုကိုသာ သဘောတူခွင့်ပြုခဲ့သည်။ သို့သော် ၁၉၉၀ ပြည့်နှစ်တွင် ထိုအရေအတွက်မှာ ၆၂,၈၂၄ သို့တစ်ဟုန်ထိုး မြင့်တက်သွားသည်။ အဘယ်ကြောင့် ထိုသို့ မြင့်တက်သွားရသနည်း။
ကျင့်ဝတ်ဥပဒေရှေ့နေ အက်ဒဝပ် ပီတာစ်က ဤသို့ပြောသည်– “လွန်ခဲ့သည့် အနှစ် ၃၀ ကျော်အတွင်း အချို့ ကျင့်ဝတ်လုပ်ထုံးလုပ်နည်းများမှာ အလွန်ပင် ကြီးကြီးကျယ်ကျယ်ပြောင်းလဲခဲ့သည်။ အပြောင်းအလဲများကြောင့် အိမ်ထောင်ပြတ်စဲခွင့် လျှောက်ထားရန်နှင့် ယင်းလျှောက်ထားချက် အတည်ပြုခံရရန်တို့မှာ ပို၍လွယ်ကူလာသည်။” ကျင့်ဝတ်အပြောင်းအလဲများစွာကို ကိုးကား၍ ပီတာစ်က ဤသို့ဆက်ပြောခဲ့သည်– “ကျင့်ဝတ်လုပ်ထုံးလုပ်နည်းဥပဒေတွင် ရိုမန်အပြောင်းအလဲတစ်ခုစီကြောင့် အိမ်ထောင်ပြတ်စဲကြောင်း ကြေညာခြင်းများ အကြီးအကျယ်တိုးများလာသည်ကို မငြင်းဆိုနိုင်ချေ။” သူတို့၏ရည်ရွယ်ချက် မည်သို့ပင်ရှိပါစေ ကျင့်ဝတ်အပြောင်းအလဲများ၏ တိုက်ရိုက်အကျိုးဆက်မှာ—အနည်းဆုံးတော့ အမေရိကန်နိုင်ငံတွင် —“နိုးလော့!” ဖော်ပြခဲ့သကဲ့သို့ “[ချာ့ခ်ျ] ကြောင့် ကွာရှင်းရန် ပို၍လွယ်ကူလာသည်။”
ဖန်ဆင်းရှင်တစ်ပါးရှိ၏လော (စက်တင်ဘာ ၂၀၀၆) ဒီအထူးထုတ် နိုးလော့! ဟာ အလွန်ပဲ ကောင်းမွန်လှပါတယ်။ တင်ပြထားတဲ့ ကျိုးကြောင်းဆင်ခြင်ပုံတွေက ရိုးရှင်းပြီး ထိရောက်တယ်။ ဆင်ခြင်တုံတရားနဲ့လည်းညီပြီး ယုတ္တိရှိလှပါတယ်။ မဂ္ဂဇင်းတစ်အုပ်လုံးက အဓိကအကြောင်းတစ်ခုတည်းကိုပဲ ရှုထောင့်အမျိုးမျိုးကနေ တင်ပြထားတဲ့ပုံစံကိုလည်း အလွန်နှစ်သက်တယ်။
အေ. ဘီ.၊ စပိန်
ထူးခြားကောင်းမွန်ပြီး ဆွဲဆောင်မှုရှိတဲ့ မဂ္ဂဇင်းအတွက် ကျေးဇူး တင်ပါတယ်။ ကျိုးကြောင်းဆင်ခြင်နည်းအမျိုးမျိုးနဲ့ ဥပမာအဖုံဖုံက ယေဟောဝါကို ဂုဏ်တင်ပါတယ်။ ကိုယ်တော်ဟာ ဒီလိုနည်းနဲ့ ချီးမွမ်း ခံထိုက်ပါတယ်။
အာရ်. ဘီ.၊ ဆွစ်ဇလန်
ဖန်ဆင်းခြင်းကိုထောက်ခံတဲ့ ဆွဲဆောင်မှုရှိပြီး ရိုးရှင်းလှတဲ့ အထောက်အထားတွေကို ကျွန်တော်ယုံကြည်တယ်။ သိပ္ပံပညာမှာ မရှိမဖြစ်လိုအပ်တဲ့ အသေးစိတ်တိကျမှန်ကန်မှုတွေကိုသုံးပြီး အငြင်းမပွားဘဲ ဆင့်ကဲအယူဝါဒရဲ့ လိမ်ညာမှုတွေကို ဖော်ထုတ် ခဲ့တယ်။
အယ်လ်. ဂျီ.၊ ပြင်သစ်
ရိုမာ—ဝမ်းသာဝမ်းနည်းဖြစ်ရသော အနှစ်တစ်ထောင် (အောက်တိုဘာ ၂၀၀၆ [အင်္ဂလိပ်]) ရိုမာတွေကို ကျွန်မ အမြဲပဲ ချစ်ခင်ကြင်နာတယ်။ ဝမ်းနည်းစရာက သူတို့ဟာ လူတွေရဲ့မလိုမုန်းထားစိတ်ကြောင့် အမြဲဆန့်ကျင်ခံရတယ်။ သင်တို့ရဲ့ဆောင်းပါးက လူတွေအတွက် စဉ်းစားစရာဖြစ်စေမယ်ဆိုတာ သေချာပါတယ်။ ယေဟောဝါဟာ မျက်နှာမလိုက်လို့ ကိုယ်တော့်ကို ဝတ်ပြုသူတွေရဲ့အလယ်မှာ ရိုမာတွေရှိနေတာကို သိရခြင်းက အလွန်စိတ်သက်သာရာ ရစေပါတယ်။
ဘီ. ဘီ.၊ ပြင်သစ်
ကျွန်မတို့က ရိုမာလူမျိုးတွေပါ။ ကျွန်မရဲ့အဖေက ယေဟောဝါ သက်သေတစ်ယောက်မဟုတ်သေးလို့ သူ ဒါကိုသိပ်မဖတ်ချင်ဘူး။ ဒါပေမဲ့ ဒီမဂ္ဂဇင်းကို သူလိုချင်ခဲ့ပြီး အခု သူ့စားပွဲပေါ်မှာ ဒီမဂ္ဂဇင်းကိုတင်ထားတယ်။
အေ. ဂျီ.၊ ဖင်လန်