ကိစ္စရပ်များကို ဘုရားသခင့်ရှုထောင့်မှ ရှုမြင်လော့
ကိစ္စရပ်များကို ဘုရားသခင့်ရှုထောင့်မှ ရှုမြင်လော့
၂၀၀၂၊ စက်တင်ဘာ ၁၄ ရက်နေ့သည် ယူ.အက်စ်.အေ. နယူးယောက်မြို့တွင် ပူနွေးပြီး နေသာသောနေ့တစ်နေ့ဖြစ်၏။ ထိုနေ့၌ နိုင်ငံအရပ်ရပ်မှ ရောက်ရှိလာကြသူ ၆,၅၂၁ ဦးသည် ထိုဒေသရှိ ယေဟောဝါသက်သေများ၏ ပက်တာစင်ပညာပေးဌာနနှင့် အခြားအဆောက်အဦနှစ်ခုတွင် တွေ့ဆုံခဲ့ကြသည်။ ထိုလူစုသည် ၁၁၃ ကြိမ်မြောက် ကင်းမျှော်စင် သမ္မာကျမ်းစာ ဂိလဒ်ကျောင်းဆင်းပွဲကို ရှုစားရန် ရောက်ရှိလာကြ၏။ ထိုကျောင်းသားများသည် ၁၄ နိုင်ငံမှဖြစ်ကြပြီး သူတို့တာဝန်ကျမည့် ၁၉ နိုင်ငံတွင် ခရစ်ယာန်သာသနာပြုကြရန် ငါးလသင်တန်း တက်ခဲ့ကြသည်။
အသက် ၉၈ နှစ်နီးပါးရှိပြီး ယေဟောဝါသက်သေများ၏ အုပ်ချုပ်ရေးအဖွဲ့ဝင်ဖြစ်သော ကယ်ရီဘာဘာသည် အစီအစဉ်သဘာပတိအဖြစ် လုပ်ဆောင်ခဲ့သည်။ ခရစ်ယာန်သာသနာပြုလုပ်ငန်းအတွက် ထောင်နှင့်ချီသူတို့ကို ပြင်ဆင်ပေးခဲ့သော ဂိလဒ်ကျောင်း၏ အနှစ် ၆၀ နီးပါး အမွေအနှစ်ကို သူအာရုံစိုက်စေခဲ့သည်။ ညီအစ်ကိုဘာဘာက ဤသို့ဆိုခဲ့သည်– “ဒီသင်တန်းကြောင့် ကြီးမြတ်တဲ့အကျိုးရလဒ်တွေရခဲ့တယ်ဆိုတာ ပုံကြီးချဲ့ပြောနေတာမဟုတ်ပါဘူး။ ပြောရရင် သင်တန်းတက်ခဲ့တဲ့ ဒီသာသနာပြုတွေရဲ့အကူအညီကြောင့် ကမ္ဘာတစ်ဝန်းက ထောင်နဲ့ချီစိတ်နှိမ့်ချသူတွေ ယေဟောဝါထံ သူတို့ရဲ့ဘဝကို ဆက်ကပ်အပ်နှံပြီး စစ်မှန်တဲ့ဝတ်ပြုရေးနဲ့ မြင့်မြတ်တဲ့လုပ်ငန်းမှာ ပါဝင်လာခဲ့ကြတယ်။”
ဂိလဒ်ကျောင်းမတက်မီကတည်းက ကျောင်းသားများသည် သူတို့၏ခရစ်ယာန်ဓမ္မအမှုကို တိုးချဲ့လိုကြောင်း တင်ပြခဲ့ကြသည်။ ဇနီးမောင်နှံတစ်စုံသည် ကနေဒါနိုင်ငံ၊ မိမိတို့ဒေသရှိ တရုတ်လူမျိုးစုကြီးကိုကူညီပေးရန် မဲန်ဒရင်ဘာသာစကားကို တစ်နှစ်ကျော် ကြိုးစားသင်ယူခဲ့ကြသည်။ အခြားဇနီးမောင်နှံတစ်စုံသည် သူတို့ဘာသာ အယ်လ်ဘေးနီးယန်းစကားကို စလေ့လာခဲ့ကြပြီး အယ်လ်ဘေးနီးယားနိုင်ငံရှိ တဖြည်းဖြည်းတိုးများလာသော ကျမ်းစာစိတ်ဝင်စားသူများကို ကူညီပေးရန် ထိုနိုင်ငံသို့ ပြောင်းရွှေ့သွားကြသည်။ သင်တန်းသားအချို့မှာမူ ဘုရားသခင့်စကားတော် သွန်သင်သူများ အထူးလိုအပ်လျက်ရှိသော နေရာများတွင် သွားရောက်အမှုဆောင်ရန် ပြောင်းရွှေ့ခဲ့ကြသူများဖြစ်သည်၊ သူတို့သည် ဟန်ဂေရီ၊ ဂွာတီမာလာနှင့် ဒိုမီနီကန်ပြည်သူ့သမ္မတနိုင်ငံတို့မှ ဂိလဒ်သို့ ရောက်ရှိလာခဲ့ကြ၏။
ယခု သူတို့တာဝန်ကျရာ အာဖရိက၊ အရှေ့ဥရောပ၊ ဗဟိုနှင့်တောင်အမေရိကနှင့် အရှေ့ဖျားဒေသများသို့ မထွက်ခွာမီ သူတို့ပြုလုပ်လေသမျှ ဘုရားသခင်၏ဘုန်းတော်အတွက်ဖြစ်စေရန် အားပေးတိုက်တွန်းခံခဲ့ရ၏။
ကိစ္စရပ်များကို ဘုရားသခင့်ရှုထောင့်မှ ရှုမြင်လော့
ညီအစ်ကိုဘာဘာသည် အဖွင့်စကားများပြောဆိုပြီးနောက် ယူနိုက်တက်စတိတ်ဌာနခွဲကော်မတီအဖွဲ့ဝင်ဖြစ်သူ မက်ခ်စ်ဝဲလ် လွိုက်ကို မိတ်ဆက်ပေးခဲ့သည်။ “ကိစ္စရပ်အားလုံးကို ဘုရားသခင့်ရှုထောင့်မှ ရှုမြင်လော့” ဟူသောအဓိကအချက်ကို သူပေါ်လွင်စေခဲ့သည်။ ညီအစ်ကိုလွိုက်သည် ဒါဝိဒ်နှင့် ဘုရားသခင့်သားတော် ယေရှုတို့၏ ပုံနမူနာများကို အာရုံစိုက်စေခဲ့၏။ (၁ ဓမ္မရာဇဝင် ၂၄:၆; ၂၆:၁၁; လုကာ ၂၂:၄၂) ကျမ်းစာကို ငါးလကြာလေ့လာပြီးဖြစ်၍ ကိစ္စရပ်များကို ဘုရားသခင့်ရှုထောင့်မှ ရှုမြင်ရန် လေ့ကျင့်ပေးခံခဲ့သည်ဟု ကျောင်းသားများကို သတိရစေပြီးနောက် ဟောပြောသူက ဤသို့မေးခဲ့သည်– “သင်တို့တာဝန်ကျတဲ့နေရာသစ်မှာ လူတွေနဲ့ ကျမ်းစာသင်အံမှုပြုတဲ့အခါ ကိစ္စရပ်တွေကို ဘုရားသခင့်ရှုထောင့်ကနေ ဆင်ခြင်သုံးသပ်တတ်ဖို့ သူတို့ကို ကူညီပေးမလား။” တခြားသူကို လမ်းညွှန်ပေးသည့်အခါ ကျောင်းသားများကို သူဤသို့အကြံပြုခဲ့သည်– “‘ကျွန်တော့်ရှုထောင့်အရ ကျွန်တော် ဒီလိုထင်တယ်’ လို့မပြောပါနဲ့၊ . . . အဲ့ဒီအစား ဘုရားသခင် ဘယ်လိုရှုမြင်တယ်ဆိုတာကို သူတို့နားလည်အောင် ကူညီပေးပါ။ အဲ့ဒီလိုလုပ်မယ်ဆိုရင် သင်ဟာ တာဝန်ကျတဲ့နေရာမှာ သင်,ပေါင်းသင်းတဲ့သူတွေအတွက် တကယ့်ကိုကောင်းချီးဖြစ်လိမ့်မယ်။”
နောက်ဆက်ဟောပြောသူမှာ အုပ်ချုပ်ရေးအဖွဲ့ဝင် ဂဲရစ်တ် လော့ရှ်ဖြစ်သည်။ “ငါသည် သင့်ဘက်မှာရှိ” ဟူသောအဓိကအချက်ကို ဟောပြောပြီး ယေဟောဝါ၏တည်ကြည်သောကျေးကျွန်များကို “ငါသည် သင့်ဘက်မှာရှိ၏” ဟူ၍ ကိုယ်တော်မိန့်ဆိုခဲ့သည့် အချိန်အခါများစွာကို သူအာရုံစိုက်စေခဲ့၏။ (ကမ္ဘာဦး ၂၆:၂၃၊ ၂၄; ၂၈:၁၅; ယောရှု ၁:၅; ယေရမိ ၁:၇၊ ၈) ကျွန်ုပ်တို့ခေတ်တွင် ကျွန်ုပ်တို့တည်ကြည်ကြမည်ဆိုလျှင် ယေဟောဝါကို အလားတူယုံကြည်စိတ်ချမှု ရှိနိုင်ကြသည်။ ညီအစ်ကိုလော့ရှ်က ဤသို့ထောက်ပြခဲ့သည်– “ကျမ်းစာသင်ချင်တဲ့သူတွေကို ရှာတွေ့နိုင်ပါ့မလားလို့ စိုးရိမ်နေသလား။ ‘ငါသည် သင့်ဘက်မှာရှိ၏’ လို့ယေဟောဝါပြောခဲ့တာ သတိရပါ။ ငွေအလုံအလောက်ရှိပါ့မလားလို့ စိုးရိမ်နေသလား။ ယေဟောဝါက ‘ငါသည် သင့်ကိုမစွန့်၊ သင့်ကိုအလျှင်းပစ်၍မထား’ လို့ပြောထားတယ်။” (ဟေဗြဲ ၁၃:၅) ယေရှုသည် တပည့်ဖြစ်စေခြင်းလုပ်ငန်းတွင် မိမိ၏တည်ကြည်သောနောက်လိုက်များနှင့် အတူရှိမည်ဟု ကတိပြုခဲ့သည်ကိုလည်း ကျောင်းသားများအား သတိပေးရင်း ဟောပြောချက်ကို ညီအစ်ကိုလော့ရှ်နိဂုံးချုပ်ခဲ့သည်။—မဿဲ ၂၈:၂၀။
ဂိလဒ်သင်တန်းပို့ချသူ လောရဲန့်စ် ဘိုဝင်န် ဟောပြောချက်၏ အဓိကအချက်မှာ “စမ်းသပ်မှုကြား သင်,လုံခြုံမှုရှိမည်လော” ဖြစ်သည်။ ဧဒင်ဥယျာဉ်တွင် ပေါ်ပေါက်ခဲ့သော အရေးကိစ္စကြောင့် ယေဟောဝါအား အကြွင်းမဲ့ဆည်းကပ်ကိုးကွယ်လိုသူအားလုံးသည် အခက်အခဲများ၊ တစ်ခါတစ်ရံ ပြင်းထန်သောစမ်းသပ်မှုများ ကြုံတွေ့ခဲ့ရ၏ဟု သူဖော်ပြသည်။ ယေဟောဝါကို လုံးလုံးလျားလျား မှီခိုအားထားခြင်း၊ သားတော်၏နာခံမှုကို ပြီးပြည့်စုံစေရန် ယေဟောဝါခွင့်ပြုခဲ့သည့် ပြင်းထန်သောစမ်းသပ်မှုများကို လက်ခံခဲ့ခြင်းဖြင့် စစ်မှန်သောလုံခြုံမှုရှိခဲ့သူ ယေရှု၏ပုံသက်သေကိုအတုယူကြရန် ကျောင်းဆင်းများကို အားပေးခဲ့သည်။ (ဟေဗြဲ ၅:၈၊ ၉) အပူချိန်တကယ့်အနေတော်ဖြင့် အညစ်အကြေးချွတ်သော ရွှေသန့်စင်သူနှင့် ယေဟောဝါကို နှိုင်းယှဉ်နိုင်၏။ စမ်းသပ်ခံပြီးသော ယုံကြည်ခြင်းသည် သန့်စင်ထားသောရွှေထက် လုံခြုံစိတ်ချမှု ပိုရှိစေသည်။ အဘယ်ကြောင့်နည်း။ “စမ်းသပ်ခံပြီးတဲ့ ယုံကြည်ခြင်းက ဘယ်အခက်အခဲကိုမဆို ခံရပ်နိုင်စေတဲ့အပြင် ‘အဆုံးတိုင်အောင်’ လည်းခံရပ်စေနိုင်တယ်” ဟုညီအစ်ကိုဘိုဝင်န်က ပြောခဲ့သည်။—မဿဲ ၂၄:၁၃။
သင်တန်းပို့ချသူနောက်တစ်ဦး မာ့ခ် နူမဲရ်က “သင်သည် မျက်နှာရမည်လော” ဟုမေးခဲ့သည်။ သူ၏အဓိကအကြောင်းသည် “ထာဝရဘုရားရှေ့၊ လူတို့ရှေ့၌ မျက်နှာရ” သူရှမွေလကို ဖော်ပြသည့် ၁ ဓမ္မရာဇဝင် ၂:၂၆ ပါစကားများကို အခြေပြု၏။ ရှမွေလ၏ပုံသက်သေကို ဆင်ခြင်သုံးသပ်ပြီးနောက် အာဖရိကနိုင်ငံတွင် ဆယ်နှစ်ကျော်သာသနာပြုခဲ့သော ညီအစ်ကိုနူမဲရ်က “ဘုရားသခင်ပေးတဲ့အလုပ်ကို တည်တည်ကြည်ကြည် လုပ်ကိုင်မယ်ဆိုရင် သင်တို့လည်း ဘုရားသခင့်ရှေ့မျက်နှာရလိမ့်မယ်။ သင်တို့ကို အဖိုးမဖြတ်နိုင်တဲ့ ခရစ်ယာန်သာသနာပြုတာဝန် ကိုယ်တော်ပေးအပ်ထားတယ်” ဟုပြောခဲ့သည်။ ထို့နောက် သူတို့ကျရာတာဝန်များကို ဘုရားသခင်ယုံကြည်အပ်နှံထားသော တာဝန်တစ်ခုအဖြစ် ရှုမြင်ကြရန်နှင့် တာဝန်ကျေပွန်ကြဖို့ ဘုရားသခင်စဉ်းစားတွေးခေါ်သကဲ့သို့ စဉ်းစားကြရန် သင်တန်းဆင်းများကို ညီအစ်ကိုနူမဲရ် တိုက်တွန်းခဲ့သည်။
ကျောင်းသားများသည် ကျောင်းကာလအတွင်း စနေ၊ တနင်္ဂနွေနေ့များတွင် သမ္မာကျမ်းစာမှ “ဘုရားသခင်၏အံ့ဖွယ်သောအမှုတို့ကို” ဒေသခံတို့အား ပြောပြခွင့်ရရှိခဲ့ကြသည်။ (တမန်တော် ၂:၁၁) အမှန်ဆိုရလျှင် သူတို့သည် အဆိုပါအကြောင်းအရာများကို ဘာသာစကားဆယ်မျိုးဖြင့် ပြောပြနိုင်ကြ၏။ ဂိလဒ်သင်တန်းပို့ချသူ နောက်တစ်ဦး ဝေါလ်လေးစ် လစ်ဗာရန်စ်သည် “‘ဘုရားသခင်၏အံ့ဖွယ်သောအမှုတို့က’ လူတို့ကို လှုံ့ဆော်ပေး” အဓိကအကြောင်းအရာအောက်တွင် တွေ့ကြုံမှုများဖော်ပြကြသည့် ကျောင်းသားတစ်စုကို လူတွေ့မေးမြန်းခဲ့၏။ သူက “ပင်တေကုတ္တေပွဲနေ့တုန်းက အထက်ခန်းမမှာရှိနေတဲ့သူတွေကို ‘ဘုရားသခင်၏အံ့ဖွယ်သောအမှု’ တွေပြောဆိုကြဖို့ ဝိညာဉ်တော်က လှုံ့ဆော်ပေးခဲ့တယ်။ အခုလည်း ဘုရားသခင်ရဲ့တည်ကြည်တဲ့ကျေးကျွန်တွေအားလုံးကို အဲ့ဒီဝိညာဉ်တော်ကပဲ လှုံ့ဆော်ပေးနေတယ်” ဟုဖော်ပြခဲ့သည်။ အချို့ဆိုလျှင် လူမြောက်မြားစွာကို သက်သေခံရန် ဘာသာစကားအသစ်များကို သင်ယူဖို့ စေ့ဆော်ခံခဲ့ကြရသည်။
ကိစ္စရပ်များကို ဘုရားသခင့်ရှုထောင့်မှ ရှုမြင်ရန် လက်တွေ့ကျအကြံဉာဏ်
အဖွင့်ဟောပြောချက်များပြီးနောက် ယူနိုက်တက်စတိတ်ဌာနခွဲအမှုထမ်းဝင်များဖြစ်ကြသည့် ဂယ်ရီ ဘရိုနှင့် ဝီလျံ ယန်တို့သည် ယခု ခရစ်ယာန်သာသနာပြုများရှိသည့် နိုင်ငံများမှ ဌာနခွဲကော်မတီဝင်အသီးသီးအပြင် သာသနာပြုလုပ်ငန်းတွင် ၄၁ နှစ်အမှုဆောင်ခဲ့သော ဇနီးမောင်နှံကို လူတွေ့မေးမြန်းခဲ့၏။ ဖော်ပြချက်တစ်ခုမှာ “ရှိတာလေးနဲ့ ရောင့်ရဲတတ်သူတွေက ကြာရှည်နေနိုင်ကြတယ်။ တိုင်းတစ်ပါးမှာ ရောက်နေရတဲ့အကြောင်းရင်းကို သူတို့အာရုံစိုက်ကြတယ်။ သတင်းကောင်းဟောပြောဖို့နဲ့ ယေဟောဝါကို လူတွေသိလာရအောင် ကူညီပေးဖို့ သူတို့ရောက်နေကြတာကို အသိအမှတ်ပြုကြတယ်။”
အုပ်ချုပ်ရေးအဖွဲ့ဝင် နောက်တစ်ဦးဖြစ်သည့် ဒေးဗစ် စပလန်က “သင်သည် အဝေးရောက်နေသည်မဟုတ်!” ဟူသောဟောပြောချက်ဖြင့် အစီအစဉ်ကို နိဂုံးချုပ်ခဲ့သည်။ ယခု ကျောင်းဆင်း ၄၆ ဦးကို ကမ္ဘာတစ်ဝန်းရှိ နိုင်ငံများစွာသို့ စေလွှတ်တော့မည်ဖြစ်ရာ သူအဘယ်အရာကို ဆိုလိုသနည်း။ သူဤသို့ရှင်းပြခဲ့သည်– “ကမ္ဘာရဲ့ဘယ်နေရာဒေသကိုပဲ ရောက်ရောက်၊ သင်တို့ဟာ တည်ကြည်နေသရွေ့ ဘုရားသခင့်အိမ်တော်မှာ အမြဲရှိနေကြပါလိမ့်မယ်။” မှန်ပါသည်၊ တည်ကြည်သောခရစ်ယာန်အားလုံးသည် ကိုယ်ခန္ဓာအရ မည်သည့်နေရာ၊ မည်သည့်နိုင်ငံတွင်ရှိနေပါစေ ယေရှုနှစ်ခြင်းခံခဲ့ချိန် ပထမရာစုနှစ်၌ စတည်ရှိလာသည့် ဘုရားသခင့်မဟာဝိညာဉ်ရေးဗိမာန် သို့မဟုတ် အိမ်တော်၏ တစ်စိတ်တစ်ပိုင်းတွင် အမှုထမ်းဆောင်နေကြပါသည်။ (ဟေဗြဲ ၉:၉) ယေဟောဝါသည် ကမ္ဘာပေါ်ရှိ တည်ကြည်သော ကျေးကျွန်အားလုံး၏အနီးတွင် ရှိနေသည်ကို သိရှိရခြင်းသည် ကျောင်းဆင်းပွဲတက်ရောက်သူများအတွက် အမှန်ပင်စိတ်ချမ်းမြေ့စရာပါတကား! ယေရှု ကမ္ဘာပေါ်ရှိစဉ်က ကိုယ်တော်ကို ယေဟောဝါစိတ်ဝင်စားတော်မူသကဲ့သို့ ကျွန်ုပ်တို့သည် မည်သည့်နေရာတွင်ရှိနေပါစေ ကျွန်ုပ်တို့အားလုံးကိုလည်းကောင်း၊ ကိုယ်တော့်အတွက် ကျွန်ုပ်တို့ပြုလေသမျှကိုလည်းကောင်း ကိုယ်တော်စိတ်ဝင်စားတော်မူ၏။ ထို့ကြောင့် ဝတ်ပြုကိုးကွယ်မှုကိစ္စရပ်များတွင် ကျွန်ုပ်တို့သည် အချင်းချင်းနှင့်ဖြစ်စေ၊ ယေဟောဝါနှင့်ယေရှုတို့နှင့်ဖြစ်စေ ဘယ်တော့မျှ ဝေးကွာနေသည်မဟုတ်ချေ။
ကမ္ဘာတစ်ဝန်းမှရရှိသော နှုတ်ခွန်းဆက်လွှာများကို ဖတ်ပြခြင်း၊ တာဝန်ကျရာနေရာများကို ကြေညာခြင်းနှင့် ဂိလဒ်ကျောင်း၌ သွန်သင်လေ့ကျင့်ခံရသမျှကို ကျေးဇူးတင်ကြောင်း သင်တန်းသားများ၏စာကို ဖတ်ပြခြင်းပြီးနောက် သဘာပတိသည် အစီအစဉ်တစ်ခုလုံးကို အောင်မြင်စွာ နိဂုံးချုပ်လိုက်သည်။ သူက ကောင်းမှုများကို ဆက်ပြုလုပ်သွားကြရန်နှင့် ယေဟောဝါ၏လုပ်ငန်းတော်တွင် ပျော်ရွှင်ကြရန် ခရစ်ယာန်သာသနာပြုအသစ်များကို အားပေးတိုက်တွန်းခဲ့သည်။—ဖိလိပ္ပိ ၃:၁။
[စာမျက်နှာ ၂၃ ပါ လေးထောင့်ကွက်]
သင်တန်းဆိုင်ရာအချက်အလက်များ
ကိုယ်စားပြုနိုင်ငံအရေအတွက်– ၁၄
တာဝန်ပေးအပ်ခံရသည့် နိုင်ငံအရေအတွက်– ၁၉
ကျောင်းသား/သူအရေအတွက်– ၄၆
ပျမ်းမျှအသက်– ၃၅.၀
ပျမ်းမျှအမှန်တရားသက်တမ်း– ၁၇.၂
ပျမ်းမျှအချိန်ပြည့်အမှုဆောင် သက်တမ်း– ၁၃.၇
[စာမျက်နှာ ၂၄ ပါ ရုပ်ပုံ]
ဂိလဒ်ကင်းမျှော်စင်ကျမ်းစာကျောင်း၏ ၁၁၃ ကြိမ်မြောက်သင်တန်း
အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။
(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.