၁၂၉ ကြိမ်မြောက် ဂိလဒ်ကျောင်းဆင်းပွဲ

“ဒီနေ့ဟာ သင်တို့အတွက် ပျော်ရွှင်ရတဲ့ နေ့တစ်နေ့ပါ”

ဂိလဒ်ကင်းမျှော်စင်သမ္မာကျမ်းစာကျောင်းရဲ့ ၁၂၉ ကြိမ်မြောက် ကျောင်းဆင်းပွဲကို ၂၀၁၀၊ စက်တင်ဘာလ ၁၁ ရက်နေ့မှာ ကျင်းပခဲ့တာ ပရိသတ် ၈,၀၀၀ နီးပါး တက်ရောက်ခဲ့ကြပါတယ်။ ယေဟောဝါသက်သေတွေရဲ့ အုပ်ချုပ်ရေးအဖွဲ့ဝင် ညီအစ်ကို ဆမ်မြူအယ်လ်ဟာ့ဒ်က ကျောင်းသားတွေကို “ဒီနေ့ဟာ သင်တို့အတွက် ပျော်ရွှင်ရတဲ့ နေ့တစ်နေ့ပါ။ သင်တို့နဲ့အတူ ဒီနေရာမှာ ရှိနေရတဲ့အတွက် ကျွန်ုပ်တို့လည်း ဝမ်းသာပါတယ်” ဆိုပြီး ပြောခဲ့တယ်။

“ကြားတတ်သောနား”

ညီအစ်ကိုဟာ့ဒ်ဟာ သမ္မာကျမ်းစာကို အာရုံစိုက်ခြင်းအားဖြင့် “ကြားတတ်သောနား” ကို ကောင်းကောင်း အသုံးပြုပါဆိုတဲ့ ခရစ်ယာန်အားလုံးရဲ့လိုအပ်ချက်ကို ဆွေးနွေးပြောဆိုပြီး အစီအစဉ်ကို စတင်လိုက်တယ်။ (သု. ၂၀:၁၂) “ပြီးခဲ့တဲ့ လအနည်းငယ်က သင်တို့ဟာ ယေဟောဝါဘုရားသခင်ရဲ့ စကားတော်ကို နားထောင်ခဲ့ကြပြီး ဆက်ပြီးတော့လည်း နားထောင်သွားကြပါလိမ့်မယ်” လို့ ကျောင်းဆင်းတွေကို ပြောခဲ့တယ်။

အသစ်စက်စက် ခရစ်ယာန်သာသနာပြုတွေဟာ ဘယ်လိုပညာရှိရှိ နားထောင်နိုင်သလဲ။ “ဘုရားသခင့်စကားတော်ကို အသေအချာ အာရုံစိုက်ခြင်းအားဖြင့် ဖြစ်ပါတယ်။ ဒီအကြောင်းကို ဒီနေ့အစီအစဉ်တစ်လျှောက်လုံးမှာ ကြားသိရပါလိမ့်မယ်။ အဲဒါက သင်တို့ကို လာမယ့်နှစ်တွေမှာ ခရစ်ယာန်သာသနာပြုတွေအဖြစ် လုပ်ဆောင်ဖို့အတွက် ကြိုတင်ပြင်ဆင်ပေးပါလိမ့်မယ်” လို့ညီအစ်ကို ဟာ့ဒ်က ပြောသွားတယ်။

“ယေဟောဝါဘုရားသခင်ကို စိတ်နှလုံးအကြွင်းမဲ့ ယုံကြည်ကိုးစားပါ”

အုပ်ချုပ်ရေးအဖွဲ့ဝင် ဂဲရစ်တ်လော့ရှ်က ကျောင်းဆင်းတွေအတွက် လှုံ့ဆော်မှုဖြစ်စေတဲ့ အကြောင်းအရာကို တင်ဆက်ဟောပြောသွားပါတယ်။ ယေဟောဝါဘုရားသခင်ကို ယုံကြည်ကိုးစားခဲ့ကြတဲ့ ရှေးခေတ်နဲ့အခုခေတ်က ဘုရားသခင့်လူမျိုးတွေရဲ့ ဖြစ်ရပ်အတော်များများကို ညီအစ်ကိုက အသေးစိတ်ပြန်ပြောပြခဲ့တယ်။

အဲဒီလိုပဲ၊ “ခရစ်ယာန်သာသနာပြုတွေဟာ ရရှိထားတဲ့ တာဝန်တွေနဲ့ပတ်သက်ပြီး ယုံကြည်ကိုးစားမှု တင်ပြဖို့လိုတယ်။ ဥပမာ၊ ‘ဘာသာစကားအသစ်ကို ငါသင်ယူနိုင်ပါ့မလား။ ယဉ်ကျေးမှုအသစ်နဲ့ အလိုက်အထိုက် နေတတ်ပါ့မလား။ အိမ်ကိုလွမ်းတဲ့ဒဏ် ခံနိုင်ပါ့မလား’ ဆိုပြီး သင်တို့ တွေးမိမယ်” လို့ညီအစ်ကိုက ပြောသွားတယ်။ အဖြေက ဘာလဲ။ “ယေဟောဝါဘုရားသခင်ကို ယုံကြည်ကိုးစားပါ” လို့ညီအစ်ကိုလော့ရှ်က ကျောင်းဆင်းတွေကို အားပေးတိုက်တွန်းသွားတယ်။

‘ထာဝရဘုရားသခင်ကို ကြောက်ရွံ့ခြင်းသည် အားကြီးသောကိုးစားရာအခွင့်ကို ဖြစ်စေတတ်၏’ ဆိုတဲ့ သု. ၁၄:၂၆ ကိုလည်း ညီအစ်ကိုလော့ရှ်က ဖတ်ပြသွားတယ်။ နည်းအမျိုးမျိုးနဲ့ရရှိနေတဲ့ ဘုရားသခင့်ကောင်းချီးတွေကို ကျွန်ုပ်တို့ အလေးအနက် စဉ်းစားဆင်ခြင်မယ်ဆိုရင် ဘုရားသခင်ကို ယုံကြည်ကိုးစားမှုက ပိုပြီးတိုးများလာပါလိမ့်မယ်။

ဘုရားသခင်ကို ယုံကြည်ကိုးစားသူဟာ ‘ရေရှိသောအရပ်၌စိုက်၍ မြစ်နားမှာ အမြစ်ဖြာသဖြင့် ပူသောအရှိန်ရောက်ကြောင်းကိုမသိ၊ အရွက်မညှိုးနွမ်းတတ်သော အပင်နှင့်တူ၏’ လို့ကျမ်းစာမှာ ဖော်ပြထားပါတယ်။—ယေရမိ ၁၇:၇၊ ၈။

သင်ခန်းစာက ရှင်းရှင်းလေးပါ။ “ရှေ့လျှောက် ဘာတွေပဲ ကြုံရကြုံရ ယေဟောဝါဘုရားသခင်ကို ယုံကြည်ကိုးစားဖို့လိုပါတယ်” လို့ ညီအစ်ကိုလော့ရှ်က ပြောသွားတယ်။

“သစ္စာတည်ကြည်တဲ့ ကောင်းကင်တမန်တွေကို တုပပါ”

ဒါက အုပ်ချုပ်ရေးအဖွဲ့ဝင် စတီဗင် လက်တ် ဟောပြောတဲ့ အကြောင်းအရာဖြစ်ပါတယ်။ ကောင်းကင်တမန်တွေဟာ ကျွန်ုပ်တို့အတွက် စံနမူနာကောင်းပါပဲ။ “သူတို့နဲ့ပတ်သက်တဲ့ ကျမ်းစာဖော်ပြချက်တိုင်းဟာ အတုယူထိုက်ပါတယ်” လို့ညီအစ်ကိုလက်တ်က ပြောပြတယ်။ အဲဒီနောက် ကျွန်ုပ်တို့တုပသင့်တဲ့ သစ္စာတည်ကြည်တဲ့ ကောင်းကင်တမန်တွေရဲ့ ထူးခြားချက်လေးချက်ကို ညီအစ်ကိုက ခွဲခြားဖော်ပြပေးသွားတယ်။ အဲဒီအချက်လေးချက်ကတော့ ခံနိုင်ရည်၊ နှိမ့်ချမှု၊ ကူညီပေးမှုနဲ့ တည်ကြည်မှုတို့ဖြစ်တယ်။

ကောင်းကင်တမန်တစ်ပါးဟာ ‘ပါးရှားနိုင်ငံစောင့် စာတန့်တမန်’ ရဲ့ တားဆီးခြင်းကို ၂၁ ရက်ကြာတဲ့အထိ ခံခဲ့ရတယ်လို့ ကျမ်းစာ မှာ ဖော်ပြထားတယ်။ (ဒံယေလ ၁၀:၁၃၊ သမ္မာ) အဲဒီကောင်းကင်တမန်ဟာ ခံနိုင်ရည်ကို တင်ပြသွားခဲ့တယ်။ ခရစ်ယာန်တွေလည်း ‘စာတန်ရဲ့တမန်များနှင့် ဆိုင်ပြိုင်တိုက်လှန်နေကြ’ ရတယ်လို့ ညီအစ်ကိုလက်တ်က ထောက်ပြသွားတယ်။ (ဧဖက် ၆:၁၂) “ကိုယ်ရရှိထားတဲ့တာဝန်ကို ဆက်လုပ်ဆောင်သွားဖို့ ပြင်းပြင်းထန်ထန် ကြိုးစားကြပါ” ဆိုပြီး ကျောင်းဆင်းတွေကို ညီအစ်ကိုက ပြောသွားပါတယ်။

ကောင်းကင်တမန်တစ်ပါးကို ရှံဆုန်ရဲ့ဖခင် မာနော်က သူ့နာမည်မေးတဲ့အခါ ပြောပြဖို့ ငြင်းဆိုခဲ့တယ်။ အဲဒီကောင်းကင်တမန်ဟာ နှိမ့်ချမှုကို တင်ပြသွားခဲ့တယ်။ (တရားသူကြီး ၁၃:၁၇၊ ၁၈) ကျောင်းဆင်းတွေကို ညီအစ်ကိုလက်တ်က ဒီလိုပြောကြားသွားတယ်– “တစ်ဦးတစ်ယောက်က သင်တို့ရဲ့ စွမ်းရည်တွေနဲ့ပတ်သက်ပြီး ချီးမွမ်းဖို့ ကြိုးစားတဲ့အခါ ကိုယ့်အပေါ် အာရုံမစိုက်စေဘဲ ယေဟောဝါဘုရားသခင်နဲ့ ကိုယ်တော့်အဖွဲ့အစည်းကိုပဲ အာရုံစိုက်စေပါ။”—၁ ကောရိန္သု ၄:၇။

ယေရှု မသေဆုံးခင် ဂေသရှေမန်ဥယျာဉ်မှာ ရှိနေတုန်း “ကောင်းကင်တမန်တစ်ပါး ထင်ရှားလာပြီး ကိုယ်တော့်ကို အားပေး” ခဲ့တယ်။ (လုကာ ၂၂:၄၃) အဲဒီကောင်းကင်တမန်ဟာ ကူညီမစမှုကို တင်ပြခဲ့တယ်။ “ကိုယ်ရရှိထားတဲ့ တာဝန်နဲ့ပတ်သက်ပြီး အမှန်တကယ် လိုအပ်ရာတွေကို ဆုတောင်းသုံးသပ်ကာ ဘုရားသခင့်အကူအညီနဲ့ လူတွေရဲ့လိုအပ်ရာတွေကို ဖြည့်ဆည်းပေးဖို့ ကြိုးစားပါ” ဆိုပြီး ညီအစ်ကိုလက်တ်က ပြောကြားသွားတယ်။

စာတန်ရဲ့ပုန်ကန်မှုထဲ ပါသွားတဲ့ ကောင်းကင်တမန်တွေက အနည်းစုပဲဖြစ်တဲ့အတွက် အများစုက တည်ကြည်မှုကို အကောင်းဆုံး တင်ပြသွားကြတယ်လို့ ပြောနိုင်ပါတယ်။—ဗျာ. ၁၂:၄။

“တည်ကြည်တဲ့ ကောင်းကင်တမန်တွေလိုပဲ စာတန်ကို ခုခံတွန်းလှန်ကြပါ။ အဲဒါဆိုရင် သူ ထွက်ပြေးသွားလိမ့်မယ်” လို့ ညီအစ်ကို လက်တ်က ကျောင်းဆင်းတွေကို အားပေးသွားပါတယ်။—ယာကုပ် ၄:၇။

အစီအစဉ်မှ ပေါ်လွင်ချက်သုံးခု

“ယေဟောဝါဘုရားသခင်ကို သင့်နှလုံးရဲ့ကျောက် အမြဲဖြစ်စေပါ။” စိတ်ဝင်စားစရာကောင်းတဲ့ ဒီအကြောင်းအရာကို အမေရိကန်ဌာနခွဲကော်မတီဝင် ဂယ်ရီဘရိုက ဆာလံ ၇၃:၂၆ [သမ္မာ] ကိုအခြေခံပြီး တင်ဆက်သွားတယ်။ ဘုရားသခင်ကို မှီခိုအားထားဖို့လိုတယ်ဆိုတာ အသိအမှတ်ပြုဖို့ အဲဒီဟောပြောချက်က ကျောင်းဆင်းတွေကို အထောက်အကူပြုခဲ့တယ်။ ယေဟောဝါဘုရားသခင်ဟာ ဘယ်လိုသဘောနဲ့ ကျောက်နဲ့တူရတာလဲ။ “လေတိုက်တဲ့အခါ စာရွက်လွင့်မသွားအောင် ကျောက်တုံးတစ်တုံးနဲ့ ဖိထားနိုင်တယ်။ အဲဒီလိုပဲ၊ ဘုရားသခင်မှာ တည်ငြိမ်စေနိုင်တဲ့ အစွမ်းတန်ခိုးရှိတဲ့အတွက် သင့်နှလုံးကို ကာကွယ်စောင့်ရှောက်ပေးနိုင်ပါတယ်” ဆိုပြီး ညီအစ်ကို ဘရိုက ဖော်ပြသွားတယ်။ ခံနိုင်ရည်နဲ့ပတ်သက်တဲ့ စမ်းသပ်မှုတွေ ကျွန်ုပ်တို့ရင်ဆိုင်ရတဲ့အခါ နှလုံးရဲ့လှည့်စားခြင်းကို ခံရနိုင်တယ်။ (ယေရမိ ၁၇:၉) အသစ်သော ရာသီဥတု၊ အသစ်သော အစားအစာ၊ အသစ်သော ခရစ်ယာန်သာသနာပြုတွေနဲ့ အတူနေထိုင်ရခြင်းက တာဝန်ကနေရပ်နားဖို့ သွေးဆောင်ခံရနိုင်တယ်။ “ရွေးချယ်စရာတွေကို သုံးသပ်ပြီး ဆုံးဖြတ်ချက်တွေချရမယ့် အခြေအနေတွေနဲ့ သင် ရင်ဆိုင်ရလိမ့်မယ်။ ဘုရားသခင်နှစ်သက်လက်ခံမယ့် လမ်းစဉ်ကို သင် ရွေးချယ်မလား။ ရွေးချယ်မယ်ဆိုရင် ဘုရားသခင်ဟာ သင့်နှလုံးရဲ့ကျောက် ဖြစ်လာပါလိမ့်မယ်။ သင့်ကို ကိုယ်တော် လမ်းပြပါလိမ့်မယ်” ဆိုပြီး ညီအစ်ကိုဘရိုက ပြောပြသွားတယ်။

“သင့်ခြေထောက် ရေပေါ်ချလောက်တဲ့အထိ သင့်မှာ ယုံကြည်ခြင်းရှိပါသလား။” ဂိလဒ်သင်တန်းနည်းပြ ဆမ်ရော်ဘာစဲန်က ယောရှုအခန်းကြီး ၃ ကိုအခြေခံပြီး အကြောင်းအရာကို ဟောပြောတင်ဆက်သွားတယ်။ သန်းနဲ့ချီတဲ့ အစ္စရေးလူတွေဟာ ဂျော်ဒန်မြစ်ကို ရေတက်နေချိန်မှာ ဘယ်လိုဖြတ်ကူးကြမလဲ။ ‘ဂျော်ဒန်မြစ်၌ ရပ်နေ’ ကြဖို့ ယဇ်ပုရောဟိတ်တွေကို အမိန့်ပေးပါဆိုပြီး ယောရှုကို ဘုရားသခင် မိန့်မှာခဲ့တယ်။ ပြီးရင် ဒီလိုလည်း ကတိပေးခဲ့တယ်– ‘ယဇ်ပုရောဟိတ်ခြေဖဝါးတို့သည် ဂျော်ဒန်မြစ်ရေကိုနင်းသော ခဏချင်းတွင် မြစ်ညာရေသည်ပြတ်၍ ပုံ့ပုံ့ကြွလျက်နေလိမ့်မည်။’ (ယောရှု ၃:၈၊ ၁၃) ညီအစ်ကိုရော်ဘာစဲန်က ကျောင်းဆင်းတွေကို ဒီလိုပြောသွားတယ်– “ဂျော်ဒန်မြစ်က အစ္စရေးလူတွေ ကောင်းချီးမရအောင် ရှေ့ကနေ ကာဆီးထားသလိုမျိုး သင့်ဘဝမှာလည်း ကောင်းချီးမရစေနိုင်တဲ့ အတားအဆီးတွေနဲ့ ရင်ဆိုင်ရပါလိမ့်မယ်။” ဥပမာ၊ ခရစ်ယာန်သာသနာပြုချင်းတွေနဲ့ သင့်သင့်မြတ်မြတ်ဖြစ်ဖို့ အခက်အခဲတွေ ရှိနိုင်ပါတယ်။ ဘယ်လိုဖြေရှင်းနိုင်ပါသလဲ။ “အလုပ်ကိုပဲ အာရုံစိုက်ပါ။ လုပ်ဖော်ဆောင်ဖက်တွေအပေါ် အာရုံမစိုက်ပါနဲ့။” ညီအစ်ကို ရော်ဘာစဲန်က ကျောင်းဆင်းတွေကို အခုလို အားပေးသွားတယ်– “သင်တို့ရဲ့ ခြေထောက်တွေကို ရေပေါ်ချဖို့ ယုံကြည်ခြင်းတင်ပြမယ်ဆိုရင် သင်တို့ရဲ့ ခရစ်ယာန်သာသနာပြုဘဝမှာ ‘ဂျော်ဒန်မြစ်’ လိုမျိုး အတားအဆီးတွေကို ကျော်ဖြတ်နိုင်အောင် ဘုရားသခင် ကူညီပေးပါလိမ့်မယ်။”

“သင်တို့ရဲ့အကြံအစည်တွေကို အတည်ဖြစ်စေပါ။” ဒီအကြောင်းအရာကို ဂိလဒ်သင်တန်းပို့ချသူ ဝီလျံ ဆဲမြူရယ်စန်က တင်ဆက်သွားပါတယ်။ သူ့ရဲ့ဟောပြောချက်က ‘ကိုယ်ပြုသောအမှု တို့ကို ထာဝရဘုရားသခင်၌ အပ်လော့။ သို့ပြုလျှင် သင်၏အကြံအစည်တို့သည် တည်ကြလိမ့်မည်’ ဆိုတဲ့ သု. ၁၆:၃ ကို အခြေခံထားတာပါ။ ကျောင်းဆင်းတွေကို ညီအစ်ကို ဆဲမြူရယ်စန်က ဒီလိုမေးခဲ့တယ်– “ကိုယ့်ရဲ့အမှုကို ဘုရားသခင်ဆီ မအပ်ဘဲနဲ့ သင့်ရဲ့အကြံအစည်တွေ တည်မှာမဟုတ်ဘူးလို့ အဲဒီကျမ်းချက်က ဆိုလိုတာလား။” မဟုတ်ဘူးဆိုတာကို သု. ၁၆:၁ မှာ ဒီလိုဖော်ပြထားတယ်– “စိတ်နှလုံးအကြံအစည်တို့သည် လူနှင့်ဆိုင်ကြ၏။” ညီအစ်ကို ဆဲမြူရယ်စန်က ဒီလိုပြောသွားပါတယ်– “သင်တို့မှာ မှန်ကန်တဲ့ စိတ်နှလုံးအကြံအစည်တွေရှိလာအောင် ယေဟောဝါဘုရားသခင်က အံ့ဖွယ်နည်းနဲ့ လုပ်ပေးမှာမဟုတ်ဘူး။ အဲဒါအစား သင်တို့ကိုယ်တိုင် ကြိုးစားရမယ်။ လေ့လာမှုပြုမယ်၊ ဆုတောင်းမယ်၊ ဒေသန္တရဌာနခွဲရုံးနဲ့ အနီးကပ်ပူးပေါင်းဆောင်ရွက်မယ်ဆိုရင် သင်တို့မှာ မှန်ကန်တဲ့ စိတ်နှလုံးအကြံအစည်တွေ ရှိလာမှာဖြစ်ပြီး ယေဟောဝါဘုရားသခင်ကလည်း သင်တို့ရဲ့အကြံအစည်တွေကို တည်စေပါလိမ့်မယ်။”

တွေ့ကြုံမှုများနဲ့ လူတွေ့မေးမြန်းခန်းများ

သင်တန်းကာလအတွင်း ဂိလဒ်သင်တန်းသားတွေဟာ ယေဟောဝါသက်သေတွေရဲ့ ဒေသန္တရအသင်းတော်တွေနဲ့ပူးပေါင်းပြီး ဟောပြောခြင်းလုပ်ငန်းမှာ ပါဝင်ခဲ့ကြပါတယ်။ ဂိလဒ်သင်တန်းပို့ချသူတစ်ဦးဖြစ်တဲ့ မာ့ခ်နူမာရ်က ကျောင်းသားအတော်များများကို သူတို့ရဲ့တွေ့ ကြုံမှုတွေ ပြောပြဖို့ လူတွေ့မေးမြန်းခဲ့တယ်။ ရပ်ကွက်မှာရှိတဲ့ စိတ်ရိုးဖြောင့်တဲ့သူတွေကို ရှာတွေ့နိုင်ဖို့ ဆုတောင်းခြင်းကဏ္ဍက ဘယ်လိုပါဝင်ပတ်သက်တယ်ဆိုတဲ့ အချက်ဟာ တွေ့ကြုံမှုတွေထဲမှာ အထူးသဖြင့် ပေါ်လွင်နေတယ်။

ဥပမာ၊ မောင်နှံတစ်စုံဟာ အမြန်ပြင် စားသောက်ဆိုင်တစ်ဆိုင်မှာ ရှိနေကြတယ်။ သူတို့ တိတ်တိတ်လေး ဆုတောင်းနေတာကို အလုပ်သမားတစ်ယောက်က တွေ့သွားတယ်။ ပြီးတော့ သူတို့ဆီသွားပြီး ယေဟောဝါသက်သေတွေ ဟုတ်မဟုတ် မေးမြန်းခဲ့တယ်။ ဟုတ်နေတဲ့အခါ အဲဒီအလုပ်သမားက သူဟာ သက်သေခံအဖြစ် ကြီးပြင်းလာခဲ့ပေမဲ့ ယုံကြည်ခြင်းအားနည်းခဲ့တယ်လို့ ရှင်းပြတယ်။ သူဟာ ရာဇဝတ်မှုတောင် ကျူးလွန်ခဲ့တဲ့အတွက် ထောင်ကျခဲ့ဖူးတယ်။ အခု သူ ယေဟောဝါဆီ ပြန်လှည့်လာချင်နေတယ်။ စားသောက်ဆိုင်ထဲကို မောင်နှံစုံ မဝင်လာခင်က သူ့ဘဝကို တည့်မတ်ပေးဖို့ ဘုရားသခင်ဆီ သူ ဆုတောင်းခဲ့တယ်လို့ အဲဒီအလုပ်သမားက ဆက်ပြောပြတယ်။ သူ့ရဲ့ဆုတောင်းချက် နားညောင်းခံခဲ့ရပါတယ်။

“ယေဟောဝါဘုရားသခင် ကောင်းမြတ်ကြောင်းကို မြည်းစမ်း၍ သိမှတ်ပါ” ဆိုတဲ့ခေါင်းစဉ်ကို အသုံးပြုပြီး စာပေးစာယူဌာနက ညီအစ်ကို ရူဒီ ဟာတဲလ်က မိုဇမ်ဘစ်နိုင်ငံက ညီအစ်ကို ရစ်ခ်ျဝေး၊ ချီလီနိုင်ငံက ဂျေစန် ရိဒ်နဲ့ နီပေါနိုင်ငံက ချီချီအီတို့ကို လူတွေ့မေးမြန်းခဲ့ပါတယ်။ သူတို့သုံးယောက်စလုံးဟာ ဂိလဒ်ကျောင်းသားဟောင်းတွေပါ။ ခရစ်ယာန်သာသနာပြုအသစ်တွေအနေနဲ့ ရင်ဆိုင်ခဲ့ရတဲ့ ဘာသာစကားအသစ်သင်ယူခြင်း၊ ယဉ်ကျေးမှုအသစ်နဲ့အလိုက်သင့်နေထိုင်ခြင်း၊ အိမ်ကိုလွမ်းခြင်းစတဲ့ စိန်ခေါ်ချက်တချို့ကို ပွင့်ပွင့်လင်းလင်း ပြောပြသွားကြတယ်။ “ကျွန်တော်တို့အတွက် အကူအညီဖြစ်စေခဲ့တဲ့ အရာတစ်ခုကတော့ အသင်းတော်အသစ်မှာ မြန်နိုင်သမျှမြန်မြန် မိတ်ဆွေဖွဲ့ခြင်းပါ။ အသင်းတော်နဲ့ ရင်းရင်းနှီးနှီးနေလေ အိမ်ကိုလွမ်းတဲ့စိတ်ပျောက်ဖို့ လွယ်ကူလေပဲ” ဆိုပြီး ညီအစ်ကို ချီချီအီက ပြောပြတယ်။

ကျောင်းသူကျောင်းသား ၅၆ ယောက်စလုံး ကျောင်းဆင်းလက်မှတ်တွေ လက်ခံရယူပြီးတဲ့နောက် ကျောင်းဆင်းတစ်ယောက်က အားလုံးကိုယ်စား ကျေးဇူးတင်လွှာဖတ်ပြတယ်။ အုပ်ချုပ်ရေးအဖွဲ့နဲ့ပတ်သက်ပြီး စာထဲမှာ အခုလို တစ်စိတ်တစ်ပိုင်း ဖော်ပြထားတယ်– “သင်တို့ရဲ့ မေတ္တာပါပါ မမောနိုင်မပန်းနိုင် ပေးဆပ်မှု၊ သင်ရိုးညွှန်းတမ်းတွေ ပြင်ဆင်ပေးမှု၊ သင်တန်းချိန်မှာ လာရောက်လည်ပတ်ပြီး ကောင်းမွန်တဲ့ ကျမ်းစာသွန်သင်ချက်တွေ ပေးသွားတာကို ကျွန်ုပ်တို့ ကျောင်းဆင်းတွေအနေနဲ့ ကိုယ်တိုင်ကိုယ်ကျ တွေ့မြင်ခဲ့ရပါတယ်။ သင်တို့ရဲ့ မေတ္တာကို ခံစားခဲ့ရတဲ့အတွက် ကျွန်ုပ်တို့ တာဝန်ကျတဲ့နေရာကို ရောက်တဲ့အခါ မေတ္တာ၊ စိတ်ရှည်မှု၊ နှိမ့်ချမှုနဲ့ ပုဂ္ဂိုလ်ရေးစိတ်ဝင်စားမှုဆိုတဲ့ သင်တို့ရဲ့ အရည်အသွေးကောင်းတွေကို တုပဖို့ အစွမ်းကုန်ကြိုးစားသွားပါမယ်။”

[စာမျက်နှာ ၂၈ ပါအကျဉ်းဖော်ပြချက်]

‘တစ်ဦးတစ်ယောက်က သင်တို့ကို ချီးမွမ်းဖို့ကြိုးစားတဲ့အခါ ကိုယ့်အပေါ် အာရုံမစိုက်စေပါနဲ့’

[စာမျက်နှာ ၂၉ ပါအကျဉ်းဖော်ပြချက်]

‘သင့်ဘဝမှာ ဂျော်ဒန်မြစ်လိုမျိုး အတားအဆီးတွေနဲ့ ရင်ဆိုင်ရလိမ့်မယ်’

 [စာမျက်နှာ ၃၁ ပါဇယားနှင့်မြေပုံ]

သင်တန်းဆိုင်ရာ အချက်အလက်များ

ကိုယ်စားပြုနိုင်ငံပေါင်း ၉

ကျောင်းသား/သူပေါင်း ၅၆

စုံတွဲ ၂၈

ပျမ်းမျှ အသက် ၃၃.၀

ပျမ်းမျှ နှစ်ခြင်းခံပြီးသက်တမ်း ၁၇.၉

ပျမ်းမျှ အချိန်ပြည့်အမှုဆောင် ၁၃.၃ သက်တမ်း

[မြေပုံ]

(ကားချပ်အပြည့်အစုံများကို စာစောင်တွင်ကြည့်ပါ)

ကျောင်းသားများ တာဝန်ခန့်အပ်ခံရတဲ့ နိုင်ငံပေါင်း ၂၅ နိုင်ငံက အောက်ပါအတိုင်း ဖြစ်ပါတယ်

ခရစ်ယာန်သာသနာပြု တာဝန်ခန့်အပ်ချက်များ

ဘိုလီးဗီးယား

ဘော့စ်ဝါးနား

ဘူလ်ဂေးရီးယား

ကွန်ဂို (ကင်ရှာဆာ)

ကုတ်ဒ်အဗွား

ဂမ်ဘီယာ

ဂျာမနီ

အိန္ဒိယ

အင်ဒိုနီးရှား

ကင်ညာ

လိုင်ဘေးရီးယား

မက်ဆီဒိုးနီးယား

မာဒါဂက်စကာ

မလေးရှား

မိုဇမ်ဘစ်

ပနားမား

ပီရူး

ပိုလန်

ရိုမေးနီးယား

ဆားဘီးယား

စီအဲရာလေယွန်

ဆွာဇီလန်

တန်ဇန်းနီးယား

ယူဂန္ဓာ

ဇင်ဘာဘွေ

[စာမျက်နှာ ၃၀ ပါရုပ်ပုံ]

ဂိလဒ်ကျောင်းသားများက ဟောပြောခြင်းလုပ်ငန်း အတွေ့အကြုံကို ပြန်လည်သရုပ်ပြနေ

[စာမျက်နှာ ၃၁ ပါရုပ်ပုံ]

ဂိလဒ်ကင်းမျှော်စင် သမ္မာကျမ်းစာကျောင်း၏ ၁၂၉ ကြိမ်မြောက် ကျောင်းဆင်းပွဲ

အောက်ပါစာရင်းမှာ အတန်းတွေကို ရှေ့တန်းမှ နောက်တန်းကိုရေတွက်ပြီး နာမည်တွေကို လက်ဝဲမှ လက်ယာဘက်ကို စီထားပါတယ်။

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.