နောက်ဆုံးကာလမှာ ကူးစက်မြန် ကပ်ရောဂါတွေ ဖြစ်မယ်လို့ ကျမ်းစာ ကြိုဟောတယ်။ (လုကာ ၂၁:၁၁) ဒါပေမဲ့ ဒီကပ်ရောဂါတွေက လူတွေကို ဘုရားသခင် ဒဏ်ခတ်တာ မဟုတ်ပါဘူး။ တကယ်တော့ ဘုရားသခင့် နိုင်ငံတော်က ကပ်ရောဂါတွေအပါအဝင် ကျန်းမာရေးပြဿနာမှန်သမျှကို ဖယ်ရှားပေးပါတော့မယ်။

•  ကျမ်းစာမှာ ကပ်ရောဂါတွေအကြောင်း ကြိုဟောသလား

•  ဘုရားသခင်က လူတွေကို အဖျားအနာ၊ ရောဂါတွေနဲ့ ဒဏ်ခတ်သလား

•  ဒီနေ့ခေတ် ကပ်ရောဂါတွေက ဘုရားသခင် ဒဏ်ခတ်တာလား

•  ကပ်ရောဂါတွေ ပြီးဆုံးပါ့ဦးမလား

•  အဖျားအနာအကြောင်း ဖော်ပြတဲ့ ကျမ်းပိုဒ်များ

 COVID-19၊ အေအိုင်ဒီအက်စ်၊ စပိန်တုပ်ကွေးစတဲ့ ကပ်ရောဂါတွေအကြောင်း ကျမ်းစာမှာ သတ်သတ်မှတ်မှတ် ကြိုမဟောပါဘူး။ ဒါပေမဲ့ “ကပ်ရောဂါဘေးတွေ” ဖြစ်လာမယ်လို့တော့ ကြိုပြောထားတယ်။ (လုကာ ၂၁:၁၁။ ဗျာဒိတ် ၆:၈) ဒါတွေဟာ “နောက်ဆုံးကာလ” လက္ခဏာတွေ ဖြစ်တယ်။ “လောကစနစ် နိဂုံးပိုင်း” ရောက်နေပြီဆိုတဲ့ နိမိတ်လည်း ဖြစ်တယ်။—၂ တိမောသေ ၃:၁။ မဿဲ ၂၄:၃။

 ဘုရားသခင်က လူတွေကို အဖျားအနာ၊ ရောဂါတွေနဲ့ ဒဏ်ခတ်တဲ့ ဖြစ်ရပ်တချို့အကြောင်း ကျမ်းစာမှာ ပါတယ်။ ဥပမာ၊ လူတချို့ကို အနာကြီးရောဂါ စွဲစေတယ်။ (တောလည်ရာ ၁၂:၁-၁၆။ ၂ ဘုရင်များ ၅:၂၀-၂၇။ ၂ ရာဇဝင်ချုပ် ၂၆:၁၆-၂၁) ဒါပေမဲ့ ဒီဘေးဒဏ်ဟာ အပြစ်မဲ့သူတွေကို မထိခိုက်ဘူး။ ဘုရားသခင်ကို ပြောင်ပြောင်တင်းတင်း ဆန့်ကျင်ပုန်ကန်တဲ့ တစ်ဦးတစ်ယောက်အပေါ်မှာပဲ ကျရောက်တဲ့ တရားစီရင်ချက်တွေ ဖြစ်တယ်။

 မဟုတ်ပါဘူး။ ဘုရားသခင်က လူတွေကို ကပ်ရောဂါတွေ၊ အဖျားအနာတွေနဲ့ ဒဏ်ခတ်တယ်လို့ ပြောတဲ့သူတွေ ရှိတယ်။ ကျမ်းစာကတော့ အဲဒီလို မဆိုထားဘူး။ ဘာကြောင့်လဲ။

 အကြောင်းရင်းတစ်ခုကတော့ ရှေးခေတ်နဲ့ ဒီနေ့ခေတ်မှာ ဘုရားသခင်ကို ဝတ်ပြုကိုးကွယ်သူတွေ ဖျားနာကြတယ်။ ဥပမာ၊ သစ္စာရှိသူ တိမောသေမှာ “မကြာခဏ ခံစားနေရတဲ့ အဖျားအနာ” ရှိခဲ့တယ်။ (၁ တိမောသေ ၅:၂၃) ဒါဟာ ဘုရား ဒဏ်ခတ်တာလို့ ကျမ်းစာမှာ မဖော်ပြထားဘူး။ ဒီနေ့ခေတ်မှာလည်း ဘုရားသခင်ကို သစ္စာရှိသူတွေ ဖျားနာကြတယ်၊ ရောဂါကူးစက်ခံရကြတယ်။ ဒါကလည်း မရှိသင့်အချိန်၊ မရှိသင့်တဲ့နေရာမှာ သူတို့ ရောက်နေကြလို့ပါ။—ဒေသနာ ၉:၁၁။

 ဒါ့အပြင် လူဆိုးတွေကို ဘုရားသခင် ပြစ်ဒဏ်ပေးမယ့်အချိန် မရောက်သေးဘူးလို့ ကျမ်းစာက ဆိုတယ်။ တကယ်တော့ “ကယ်တင်ရာနေ့ရက်” မှာ ကျွန်တော်တို့ အသက်ရှင်နေကြတာပါ။ (၂ ကောရိန္သု ၆:၂) ဘုရားသခင်က လူအားလုံးကို ကယ်တင်ခြင်း ရစေချင်တယ်။ ဒါကြောင့် မိမိနဲ့ ရင်းနှီးအောင် ကြိုးစားပါလို့ လူတွေကို ဖိတ်ခေါ်နေတယ်။ ဖိတ်ခေါ်တဲ့နည်းတစ်နည်းက ကမ္ဘာတစ်ဝန်း “နိုင်ငံတော်သတင်းကောင်း” ဟောပြောခြင်းအားဖြင့်ပါပဲ။—မဿဲ ၂၄:၁၄။

 ပြီးဆုံးပါတော့မယ်။ မကြာခင် တစ်ယောက်မှ ဖျားနာရတော့မှာ မဟုတ်ဘူးလို့ ကျမ်းစာမှာ ကြိုဟောတယ်။ ဘုရားသခင်ရဲ့ နိုင်ငံတော် အုပ်ချုပ်မှုအောက်မှာ အဖျားအနာ ရောဂါမှန်သမျှ မရှိတော့အောင် လုပ်ပေးပါတော့မယ်။ (ဟေရှာယ ၃၃:၂၄။ ၃၅:၅၊ ၆) ဆင်းရဲဒုက္ခ၊ နာကျင်ခြင်း၊ သေခြင်းတွေကို ဖယ်ရှားပေးတော့မယ်။ (ဗျာဒိတ် ၂၁:၄) သေဆုံးသူတွေကို အသက်ပြန်ရှင်စေမယ်။ ပြီးပြည့်စုံတဲ့ အခြေအနေမှာ ကမ္ဘာပေါ် ဒေါင်ဒေါင်မြည် ကျန်းမာလာကြမယ်။—ဆာလံ ၃၇:၂၉။ တမန်တော် ၂၄:၁၅။

 ဗျာဒိတ် ၆:၈။ “ကြည့်လိုက်တော့ မြင်းမွဲတစ်စီးကို မြင်ရတယ်။ မြင်းစီးသူရဲနာမည်က သေမင်းလို့ ခေါ်တယ်။ သင်္ချိုင်းလည်း သူ့နောက်ကနေ ကပ်လိုက်လာတယ်။ သူတို့က . . . လူတွေကို . . . ကပ်ရောဂါဘေးနဲ့ သတ်နိုင်တဲ့ အခွင့်အာဏာ ရထားတယ်။”

 အဓိပ္ပာယ်။ ဗျာဒိတ်ကျမ်းမှာပါတဲ့ မြင်းစီးသူရဲ လေးဦးအကြောင်း ကြိုဟောချက်က ကျွန်တော်တို့ခေတ်မှာ ကပ်ရောဂါတွေ ဖြစ်လာမယ်ဆိုတာ ဖော်ပြတယ်။