ǂÂi re sao ra-i xa: Julias ga mûsenǃnâxūs ǃnâ kōsen o, os ge kaub ǀguiba ra mû. ǁÎs ge ra mîbasen “ǂgabaǂgabasen ta ge nî”—xawe ǁîs ǁgûra tsî ǀhōsan tsîn ge ǁîsa ra mîba “ǀgâb khamis a ǂgabasa” ti.

Julias ge ra ǂâi is “2, 27 kiloxramgu” kōse ǂgabaǂgabasensa. ǁÎs ra dīs ge ǀgam tamas ka io ǃnāsa tsēde ǂû-i ose hâsa . . .

Tare-ets ga dī hâ Julias ǁharodi ǃnats ga hâhâ o?

ǁGai tama i ge hâ sa soros tamas ka io mûsents ta ǀgaub xa ǂâisa. Elobmîs tsîn ge sats mati sorosise nî mûsen ǀgaub xa ra ǃhoa. ǁNās ge taradi tsî aogu tsîna ǃkhoǂgā hâ aiǁgause Saras, Raxels, Abigails Joseb tsî Davib. Elobmîs ge taras Abisags xas tsîna ra ǃhoa ǁîs ge “kaise” ge îxa i.—1 Gao-aogu 1:4.

Xawe nētsē i ge ǃnāsa ǂkhamkhoena ǁîn ta mûsen ǀgaub xa ra ǂâiǂhansen. Tsî nēs ge ǃgomsina ra ǃaroma. ǂÂi re nēn xa:

• Ôaǃnâ sîsenni ge ra ǁgau 58 persenti ǀgôadi ge kausadi a ti ra mî, xawe i 17 persent ti ǀgôadi ǀguide kau hâ hîna.

• ǀNî hâ ôaǃnâ sîsenni ge ra ǁgau 45 persenti kaikhoedi ǂgabasa di a hîna kausa di a di ra mî di.

• ǀNî ǂkhamkhoen hîna gere ǂgabaǂgabasen ǂgaon ge ǁkhōǁkhōsa ǀaeba ge hōǃâ. Anorexias [khoe-i hîna ǂû-e ǂû ǂgao tama hâ-i] ti ra ǂgaihesa—ǂû ǀgauba ra ǀoroǀorosa.

 Sats ga ǀnîsi anorexias tamas ka io ǀnî hâ ǂû ǀorosasib ǀaeba ga ra hōǃâ o, toxoba huiba ôa re. Tsoatsoas ǃnâ sa ǁgûn tamas ka io ǂgomǃnâts hâ khoe-e mîba re. Elobmîs ge ra mî: “Khoexakhoeb ge mâ ǁaeb hoab ai ǀnam hâ, tsî ǃgâsab ra ǂōǂōsib ǃnâ ǃnae.”—ǂKhoamîdi 17:17.

Sa ǂūb ge amabes ǃnâ ra îxa kai tsi tamas ka io ra ǁgaisi kai tsi. ǂÂi re gao-aob Davib di ǀgôab Absalommi xa. Elobmîs ge ǁîb xa ra mî:

“Tsî ǀnî khoeb, Absalommi khami a îxab xareb ge Israeli hoab ǃnâ ge ǀkhai i. . . . ǂkhôa-i xare-e ǁîb ǃnâ hâ tama ge hâ i.”—2 Samueli 14:25.

Xawe i ge ǀgapiǀgapisens, kaiǂgaoxasib tsî gāxaǃnâxasib tsîna Absalommi ǂgaob ǃnâ ge hâ i! Elobmîs ge ǁnā-amaga Absalommi xa ǃgâi xūna mî tama hâ. Xawe ǁîb a taotaosa, ǂgomǃgâoǃnâ tsî ǃgam-aob hîna ǃhuib xa ǀoa-e hâb di ra mî.

Elobmîs ge ǃgâi ǃaromasa ūhâ sao ra ǀapemādes ta mā da ǃkhais ǃaroma:

“Î du ǀasa khoeba ana.”—Koloseǁîn 3:10.

“Îs saso tanisensa tā ǃaugab di . . . , îs ǂganǃgâsa khoeb ǂgaob dib ǃnâ mâ.” —1 Petrub 3:3, 4.

Tsū tama i ge hâ îxase mûsen ǂgaosa, xawe kaise a ǂhâǂhâsa i ge ǃgâi ǂūba ūhâsa. Hānîǁae i ge kaise nî ǃgâi koahesa ǂūga ūhâsa hîna nî dīga în khoena sats xa ǃgâibahe. ǀGaisa tamas ka io îxa sorosa ūhâs xa! “Îxasis ge ǃhaese ra mûǂanhe,” dis ge Nadia di ǀon hâ ǀgôasa ra mî. “Xawe sats a tae ǃnôa khoes tsî sa ǃgâi ǂūgu tsînan ge khoena ǀhapese nî ǂâihō.”

Tsûaǂgaots ta mûsents ta ǀgaub xa?

Îxaîxasens xa ǂâi îs ta, aiǁgause sa ais tsî soros tsîna dī-unus tamas ka io, ǀorose ǂû îs ta îs kaise îxase mûsen?

Tare-es nî ǀkharaǀkhara sa īsib xa ǁkhāsibas ga ūhâ o? (Sîsenǂuiba nî ūhâ tits ra ǂâi-e ǁhûi re.)

• GAXUSIB

• KAUB TSÎ ǂGABASIB

• ǀÛN

• SOROS KURUSA ǀGAUB

• AIS

• KHŌB ÎSIB

Sa ǃereams nî î di hâs ga o, ǂguro ǀgam dî ra ai tsîts ga sao ra ǃnonaǁî dîs ǃnâ ǃnonas xa ǃnāsase ga ra ǁhûi o, o ǂâis ǃnâ ūhâ re: Khoen sasa, sas ta mûsen khami mû tama hâsa. Kaise i ge a supu dī-unusen ǂgaosa tsî ǂâiǂhansensa sa īsib xa.—1 Samueli 16:7.