Elobmîs gere ra mî, Midiaǁîn ge Joseba Egipteb ǃoa ī ūs khaoǃgâb ge Jakobi tsî ǁîb omaris ǁanin hoana Egipteb ǃoa ge doe Kanaanǃhūba xu. ǁÎn ge Gosenǃhūb ǃnâ ge sī hâ, Nylǃāb ǀgūse. (Gen. 47:1, 6) “On ge Israeli ôana ǂûǂûxaǃnâ tsî ǃnāǂamsase ge ǂguiǂguisen tsî îbe ge ǀgaisa.” On ge Egipteǁîna ge ǃao tsoatsoa tsî ǁîna ǃgān ase ge sîsen kai.​—Eks. 1:7-14.

Elobmîs ǃnâ ǂgom tama hâ khoen ge ra mî: Nē ǃnaeǃkhais ge ama ī tama hâ di. ǁGauǁgaun ge hâ Semmiǁîn * ge ǃgāse Egipteb ǃnâ ûi hâ isa.

Aiǁgause, ǃkharu ge ǃnaeǃkhaide ra ôaǃnâ khoe-i ge Egipteb ǃnâ ǃhūb ǃnāga, khoen gere hâ ǃkhaiba ge hō. ǃGôahesab John Bimsoni ge ra mî, 20 xa ǃnāsa ǁgauǁgaudi ge hâ, Semmiǁîn gere Egipteb ǃnâ hâ ǃkhaigu xa. James K. Hoffmeieri hîna Egipteb ǃnaeǃkhaidi ôaǃnâ-aob ge ra mî: “1800sa xu 1540ǁî kuri Jesub ǃhūbaib ai nî hās aiǃân ge Semmi gowaba gere ǃhoa khoena ge ǃgâibahe i, huriǂoas Asiab disa xu Egipteb ǃoa īsa.” ǁÎb ge ǀaro tsî ra mî: “Nēs ge gao-aogu ǁaeb hîna Genesis ǃnâ a xoasas ǁaeb ǃnâ gere ī.”

ǀNî hâ ǁgauǁgaudi tsîn ge suides Egipteb dis ǃnâ ra hōhe. ǀOrokamǁaeb ǂkhanis ge khoen ǀonde ge ǃkhōǂgā hâ i, ǃgān hîna gaosi ommi ǃnâ suides Egipteb ǃnâ gere sîsenna. Nē ǀondi ge 40s xa ǃnāsa Semmiǁîna ge ǃkhōǂgā hâ i. Nē ǃgān ge sâi-aon, ǃomgu ǀkha ra sîsen ǃgān tsî saran di lan tsîna gere kuru. Ôaǃnâ-aob Hoffmeieri gere ra mî: “ǁAubexa 40 Semmiǁîn ge ǀgui oms khoena gere sîsenba, suides Egipteb dis ǃnâ. Nēb ge ǀō-aisase ge ǂgui i ǃgôaba.”

ǀNî hâ ôaǃnâ-aob David Rohli ge ra mî, nē ǃgān ǀondi tsîn ge “Elobmîs ǃnâ a xoamâisa.” Aiǁgause, Isaskari, Aseri, tsî Sifrasi, nēn ge ǁnā ǀondi ǀguina. (Eks. 1:3, 4, 15) “Nē ǁgauǁgaudi ge ge ama ī, Israelǁaes ge ǃgān ase gere sîsensa,” dib ge Rohla ra ǀam kai.

ǃGôahesab Bimsoni ge ra mî: “Elobmîs ge ǁaposase ra ǁgau ǃgāsis ge Egipteb ǃnâ hâ īsa.”