Sinagogega mâ ǁaeba xū ra ǃhui?

“SINAGOGEB” di hâ mîs ge Grikegowab ǃnâ “ǀhao” tamas ka io “ǀguiba ǀhaos” ti ra ǂâibasen. Nēs ge a ǃgâi ǂâibasen nē mîs ǃaroma khoen ge ī ge ǁaegu ǃnâ ǁnāpa ǁkhāǁkhāhes tsî ǃoabas ǃaroma Jodeǁîn ǀhaohâgu ǃnâ gere ǀhao amaga. Hebregowab ge ǃgāsa ǁguiǃā-e nē mîs ǃaroma mā tama hâ xawe i ge Xristeǁî Grikegowab ǃnâ a ǃgāsa nēs ge ǂgurokam ǁaegu ǃnâ gere sîsen-ūhe amaga.

ǂGui ǀgapi ǁkhāǁkhāsa khoen ge ra mî sinagogegu ge Jodeǁîn Babilons ǃkhōsis ǃnâ hâ hîna ge tsoatsoa di. Encyclopaedia Judaicas [mîdi ǂkhanis] ge ra mî: “ǃHūsaben hîna ge tempelgu ǃnâ mā-amsa tama hâ in tsî ǃgomsina gere hōǃân ge nēpa ǁaeba xū ǁaeb ǀkha sâtsēs ai ǀhao tsî xoasa ǀguiba nēpa gere khomai.” ǃKhōsisa xūn ge ǂoaxa o, on ge Jodeǁîna noxoba nēpa ǀgores tsî xoade khomais tsîn ǃgao gere ǀhao, ǁîn ge sīn gere ǃkhai i hoa i tawa nē ǀgaub ǀkha gere aiǃgû.

Sinagogegu ge ge ǀō-aisa ǃkhai kai ǂguro ǁaeb Jodeǁîn ǃoabas ǃgao tsî Mediterranean huriba xu ǁaegub aiǂoas dib ǃhūsaben ǃaromas tsîna tsî Israeli ǃnâ. “Sinagogegu ge ǁkhāǁkhās, ǂûǀhaodi, ǁnâuǃgâ ǃkhaib, marina ǀhaoǀhoas tsî ǁanǂgāsaben ǀhaodi tsîn ǃgao gere sîsen-ūhe tib ge ǀgapi ǁkhāǁkhā-aob hebreǁî ǀgapi ǁkhāǁkhā ǃkhaib Jerusalems ǃnâ hâs tiba ge mî.” ǀAro tsîb ge ra mî: “ǃOabas ǃâgu ge kaise ge ǂhâǂhâsa ī.” Nēs ǃaroma-i ge buruburuxa tama hâ Jesub ge hoaǁae sinagogegu tawa ge hâ i ǀhaode gere ǁhaoǃnâsa. (Markub 1:21; 6:2; Lukab 4:16) Nēpab ge ǁkhāǁkhā tsî ǁnān hîna ge nēpa gere ǀhaona gere ǂkhâǃnâ. Nē aiǁgaudi Xristeǁîn dide gere saoseb ge apostel Pauluba ǃnāsase sinagogegu ǃnâ gere aoǁnâ. ǁNān hîna ge gagasi xūn ǃnâ ǃgâiǃgâibasensa ūhâ-in ge nēs xa sinagogega ǃoa gere ǂgae-e tsîb ge Pauluba ǃā-i ǃnâb ga ǂgâ o, o ǂgurose sinagogega ǃoa aoǁnâs ǃgao gere ī.​—ǃNaeǃkhaidi 17:1, 2; 18:4.