1. Apostel Pauluba mati gere tsâ ǀhaohâb hui-aogu xa?

 ǀHAOHÂB hui-aogu ge ǂhâǂhâsa sîsen-e ǀhaohâb ǃnâ ra dī. Apostel Paulub ge nē ǂgomǂgomsa ǃgâsaga gere ǃgôaǃgâ. Aiǁgause, Filipis ǃnâ hâ Xristeǁînab ge sîǂkhanisa xoaba, ob ge ǃgōsase ǀhaohâb hui-aoga ǀhaohâb ǃûi-aogu ǀkha ge tawede.—Fil. 1:1.

2. Luis ti ǀon hâ ǃgâsaba mati ra tsâ ǁîb di ǁgaumâis xa ǀhaohâb hui-aose?

² Nēsi gu ga ǂkham tamas ka io kaira xawe gu ge ǂgui ǁāǁnâsa ǃgâsaga kai ǃgâiaǂgaoba ra hōǃâ, ǀhaohâb hui-aogu ase ǃoabasa. Aiǁgause Devani ge ge 18 kurixa i ǀhaohâb hui-aob aseb ge ǁgaumâihe o. Xawe Luisi ge 50 kurixab ges khaoǃgâ ǀgui ǀhaohâb hui-aob ase ge ǁgaumâihe. ǁÎba mati ra tsâ ǀhaohâb hui-aose ǃoabasa? ǁÎb ge ra mî: “Kaise ta ge ra ǃgâiaǂgao ti ǃgâsana ǀhaohâb ǃnâ nēti ī ǀgaub ǃnâ sîsenbasa. ǁÎn ge ǀnamma ge ǁgaute. Nēsi ta ge tita tsîna ti ǀnamma ǁîna a ǁgau ǁkhā.” ǂGui ǀhaohâb hui-aogu ge ǁnāti ra tsâ.

3. Mâ dîde da nî ǃhoaǃgao?

³ ǁĀǁnâsa ǃgâsats ga tsits ga noxoba ǀhaohâb hui-aob ase ǃoaba tama i, ots ǁnā-e sīǃnâ ǁkhāts a xū-i ase mîmâi ǁkhā? Tae-e a ǂkhâǃnâ tsi ǁkhā its ǁnāsa dī? Elobmîsa mâ ǂgaoǀkhāde ra mā ǀhaohâb hui-aob ǃaroma? Nē ǁkhāǁkhāǃâs ǃna da ge nē dîdi di ǃereamde nî ǃhoaǃgao.  Xawe ǂgurose, hā re î da ǃhoaǃgao ǀhaohâb hui-aob mâǃnoa sîsena ra dīsa.

ǀHAOHÂB HUI-AOBA TAENA RA DĪ?

4. ǀHaohâb hui-aoba taena ra dī? (Ai-īsiba mû re.)

⁴ ǀHaohâb hui-aob ge ǁāǁnâsa ǃgâsab hîna ǃanu gagab xa ra ǁgaumâihe ba, îb ǀhaohâb ǃûi-aoga ǂgui ǂhâǂhâsa xūn ǀkha hui ǀhaohâb ǃnâ. ǀNî hâ ǀhaohâb hui-aogu ge ra kōǃgâ ǃgâsan ǂâuna ǂkhanina ūhâsa aoǁnâ sîsenni ǃaroma tsî aoǁnâ ain nî ǃkhaigu tsîna ra kōǃgâ. Tsî ǀnîgu ge sala ǃanus tsî dī-unus ǀkha ra hui. ǀNî ǀhaohâb hui-aogu ge ǃgâsana ǀhaodi tawa ǃgôa tsî ra ǁgau mâpan sī nî ǂnûsa. Tsî ǀnî gu ge musiki tsî vidion tsîna ǀhaodi tawa ra ǀhuru. ǃNāsa sîsenni ǀhaohâb hui-aogu ra dī i ge ǃoman ǀkha ra dīhe. Xawe ǂhâǂhâsa as ge ǀhaohâb hui-aogu ge Jehovaba a ǀnam khoega tsî ǁîb di ǁgaragu ǃoagu ra ûi. ǁÎgu di ǃgâsana gu ge kaise a ǀnam. (Mat. 22:​37-39) ǁĀǁnâsa ǃgâsaba tae-e a dī ǁkhā îb ǀhaohâb hui-aose ǁgaumâihe?

5. ǃGâsaba mati ǀhaohâb hui-aob ase ǁgaumâihes ǃoagu a sîsen ǁkhā?

⁵ Elobmîs ge ra mîba da tae-i ǂgaoǀkhān hâsa ǀhaohâb hui-aob ǃaroma. (1Tim. 3:​8-10, 12, 13) ǀHaohâb hui-aob asets ga nauna hui ǂgao, o nē ǂgaoǀkhādi xa ǁkhāǁkhāsen tsî ǃgarise sîsen re îts nē ǀgauga omkhâi. Xawe ǂgurose dîsen re, ‘tae-i ǃaroma ta ǀhaohâb hui-aob ase ra ǃoaba ǂgao?’

TAE-I ǃAROMATS RA ǀHAOHÂB HUI-AO KAI ǂGAO?

6. Tae-e nî ǁgari tsi ǃgâsana huisa? (Mateub 20:​28, tsoatsoas ai hâ ai-īsiba mû re.)

⁶ Jesub ǃgâi aiǁgaus xa ǂâi re, ǁîb ge hoa xūna ǁîb ǁGûb tsî khoen tsînab a ǀnam amaga gere dī. ǁNā ǀnammi ge ge ǁgaribi îb ǃgarise sîsen tsî khoen xa ra kōǁnâhe sîsenan tsîna dī. (Khomai re Mateub 20:28 sa; Jhn. 13:​5, 14, 15) ǀNammi xa go ga ǂkhâǃnâhe, ob ge Jehovaba nî ǀkhae go tsî nî hui go ǀhaohâb hui-aob ase ǁgaumâihesa.—1Kor. 16:14; 1Pet. 5:5.

7. Khoen xa koahes ǃaroma ǀhaohâb hui-ao kai ǂgaosa tae-i ǃaroma ǂhanu tama?

⁷ ǃHūbaib khoen ge ǁnā hîna ǁîn a ǂhâǂhâsa ti ra ǂâin xa a ǃgâibahe. Xawe Jehovab ǃoaba-aon ge ǁnāti ī tama. ǃGâsab hîna Jesub nau khoena ǀnam khami a ǀnammi ge ǁîb ǃgâsana gaoǂam ǂgao tide,  tamas ka io naun xa ǂhâǂhâsab a ti mûhe ǂgao tide. ǃGâsab ga nau khoen xab a ǂhâǂhâsa ti hâ ǂâiǀgauba ūhâ tsîb ga ǁgaumâihe o ǀhaohâb hui-aob ase, ob ge ǃgamǃgamsenxa sîsenana dī ǂgao tide. ǁÎb ge nî ǂâi kaiseb a ǂhâǂhâsa ti ǀnî sîsengu ǃaroma. (Jhn. 10:12) Jehovab ge ǁîb a ǂhâǂhâsa ti ra ǂâi ǃgâsab ra dī xūna tātsēs tsîna ǀkhae tide.—1Kor. 10:​24, 33; 13:​4, 5.

8. Jesuba ǁîb apostelga mâǃnôa ǁnamasa ge mā?

⁸ ǀNî ǁaegu ai gu ge Jesub ǀkha ge ǀgū ǀhōsagusisa ūhâ i ǃgâsagu tsîna ǀnî ǁgaumâite gere ǂhâba. Xawe gu ge ǃgâi tama ǂâiǀgauba ge ūhâ i. ǂÂi re Jakobub tsî Johaneb tsîkha ge dī xū-i xa. ǁÎkha ge Jesuba ge ǂgan îkha ǀō-aisa ǁgaumâisa ǁîb Gaosib ǃnâ hō. Jesub ge ge koakha tama hâ i, nē ǀō-aisa mâǃkharos ǂhâba kha geres ǃaroma. Hoa 12 apostelgab ge ge mîba: “Sago xu ga ǂgaeǂgui-ao ǂgaob hoab ge nî hoan di ǃoaba-ao kai. Tsî ǂguro ǂgaots ka ots ge nî hoan di khobo kai.” (Mrk. 10:​35-37, 43, 44) ǃGâsagu hîna ǃgâi ǂkhâǃnâsa ūhâ gu nauna huisa, gu ge ǀhaohâba ǂgui ǃkharagagu ǀgaun ai nî hui.—1Tes. 2:8.

TAE-E A HUI TSI ǁKHĀ ÎTS ǃGÂSANA HUIS TURABA ŪHÂ?

9. Matits nauna huis ti turaba a ǀgaiǀgai ǁkhā?

⁹ Ama as ge Jehovabats ǀnamsa tsîts nauna ra hui ǂgaosa. Xawets ge ǀnîsi turaba ūhâ tama hâ ǀhaohâb hui-aob ra dī sîsen-e dīsa. Tae-e a hui tsi ǁkhā îts nē sîsen-e dī ǂgao? ǂÂi re matikōsets nî ǃgâiaǂgaosa sa ǃgâsana huisa. Jesub ge ge mî: ‘Mās ge ǃkhōǃoas ǃgâ-ai ǀkhaesa.’ (ǃNǃkh. 20:35) Jesub ge mîb gere xū-e gere dī. ǁÎb ge kai ǃgâiaǂgaoba gere hōǃâ naunab gere hui amaga tsî sats tsîn ge ǁnā-e a dī ǁkhā.

10. Jesuba mati ge ǁgau ǂkhîb asa nauna huis ǃnâ-ū? (Markub 6:​31-34)

¹⁰ Aiǁgau-i xa ǂâi re Jesub ge ǂkhî-i sa nauna huis ǃaroma. (Khomai re Markub 6:​31-34 sa.) ǀGui tsē gu ge Jesub tsî ǁîb di apostelgu tsîna ge tsau hâ-i. ǃNōsa ǃkhai-e ǃoa gu ge ge garu ī, i gu sī sâ. Xawe i ge kai ǂnubis khoena ǁîgu aiǃâ ǁnāpa ge sī, Jesub xa ra ǁkhāǁkhāhe ǂgaose. Hî-î, tib ge ga mî hâ ǁîb tsî ǁîb apostelgu tsîn ge sâ tsî gu nî ǂû ǁae-i tsîna ūhâ tama hâ-i amaga. Tamas ka iob ge Jesuba ǁnā kai ǂnubis khoena ga sîbē hâ, ǀgui tamas ka io ǀgam Elobmîs amanab ge ǁîn ǀkha ǀgoragu toas khaoǃgâ. Xawe ǀnammi xab ge ǁgarihe amagab ge ǁîna ǂgui xūna ge ǁkhāǁkhā tsoatsoa. Tsîb ge ge aiǃgû ǁîna ǁkhāǁkhāsa “ǃuitsoatsoa” i ges kōse. (Mrk. 6:35) ǁÎnab ge ge ǁkhāǁkhā ‘kaiseb ge ǁîna ǀkhom amaga.’ ǁÎnab ge gere ǁkhāǁkhā ǂgao, kaiseb a ǀnam ni amaga. Nauna huis ge Jesuba kai ǂkhîba gere mā.

11. Jesuba mâ ǀgaub ǃnâ khoena gere hui? (Ai-īsiba mû re.)

¹¹ Jesub ge ǃnāsa-e ge dī ǁnā kai ǂnubis khoena ǁkhāǁkhāsa. ǁÎn di sorosi ǂhâsigab ge ge kōǃgâ. Buruburuxa ǀgaub aib ge ǂû-e ge mā nî tsî ǁîb di ǁkhāǁkhāsabega ge ǂgan, î gu nē ǂûna ǀgoraǂui. (Mrk. 6:41) Nēs ǃnâ-ūb ge ǁîb ǁkhāǁkhāsabega ge ǁkhāǁkhā, mati gu nauna nî hui ǀgausa. ǁÎgu tsînab ge ge ǁgau nēti ī sîsengu ǀhaohâb hui-aogu xa ra dīhe gu tsîn a ǂhâǂhâsa ǃkhaisa. ǂÂis ǀguisa dī re mati gu ge apostelga ǂkhî isa, buruburuxa ǀgaub aib ge Jesuba khoena ǂûmasa, “mâ ǀguiǀguibe khoe-i hoa-i ge ǂû tsî ǂâu” hâse a ǁâs kōse. (Mrk. 6:42) Nēs ge a ǀgui aiǁgau Jesub ge mati ǁîb ǂhâsiga naun di gu aiǃâ a mâi ǀgausa. Jesub ge ǃhūbaib aib ge hâ i  o, ǁîb ûi kurib hoaba nau khoena gere hui. (Mat. 4:23; 8:16) Jesub ge kaise ge ǂkhî i nau khoena ǁkhāǁkhā tsî ǁîn di ǂhâsiga kōǃgâsa. Sats tsîn ge ǀhaohâb hui-aob ase kai ǂkhîba hōǃâ ǁkhā māsenxasets ga nauna hui o.

12. Tae-i ǃaroma da tā nî ǂâi ǁkhāsiga da ūhâ tama hâsa ǀhaohâb ǃnâ ǁgaumâide hōsa?

¹² Sats ga mâǂoa ra ǁkhāsibats ūhâ tama ti ga ǂâi, o tā ǂkhabuǂâi re. Ama as ge sats ǀnî hâ ǀgaugu tamas ka io ǁkhāsiga ūhâsa ǀhaohâba huis ǃnâts a sîsenū ǁkhā ga. ǂÂi re Paulub ge tae-e a mîsa 1 Korinteǁîn 12:​12-30 ǃnâ tsî Jehovaba ǂgan re îb huitsi îts mû nēs mati ra tsâǀkhā tsisa. Paulub mîdi ge ra ǃgāsa kai sats nau ǃoaba-aon Jehovab din khami ǀō-aisa tsî ǂhâhe hâsa ǀhaohâb ǃnâ. Nēsits ga ǀnî hâ ǀgaugu ai a sîsen îts ǀhaohâb hui-aob ase ǃoabasa sīǃnâ xawe tā ǂkhabuǂâi. Nēsi dī ǁkhāts ana dī, Jehovaba ǃoaba tsî sa ǃgâsana huisa. ǂÂis ǃnâ ūhâ re, ǀhaohâb ûi-aogu satsa ǂâis ǃnâ ni ūhâ tsî dī ǁkhāts a ǁgaumâide nî mā tsisa.—Rom. 12:​4-8.

13. ǁGaumâihe ra aogu di ǂgaoǀkhādi xa i tae-e a ama?

¹³ Sao ra xū-i xa ǂâi re, ǃnāsa ǂgaoǀkhādi Elobmîs ǃnâ ǀhaohâb hui-aogu nî ūhâse ra mîhen ge ǀgaugu hînan hoa Xristeǁîna nî ūhâ ga. Hoa Xristeǁîn ge Jehovaba ǀgū, naun ǀkha xūna ǀgoragus ǃnâ ǃgâiaǂgao tsî Jehovaba ra ǂkhîǂkhî ǀgaub ǃnâ nî ûi. ǁNās ge ra ǂâibasen ǀnaits go ǃnāsa ǀgaugu ǀhaohâb hui-aob ase ǁgaumâihes di ga a omkhâi ǃkhaisa. ǃGâsaba tae-e nî dī îb ǀhaohâb hui-aob ase ǃoaba?

TAE-ETS NÎ DĪ ITS ǀHAOHÂB HUI-AOB ASE ǃOABA?

14. ‘ǃGâi aiǁgausa’ tae-e ra ǂâibasen? (1 Timoteub 3:​8-10, 12)

¹⁴ Hā re î da 1 Timoteub 3:​8-10, 12 sa ǃhoaǃgao, ǁnāpa i ge ǂgaoǀkhāde hâ. (Khomai re.) ǀHaohâb hui-aob ge nî ‘ǃgâi aiǁgau.’ ǁNā mîs ge “ǃgâi aiǁgaus” tamas ka io “ǃereamsa ūhâ khoe-i.” Tamas ka io “khoe-i xa nî ǃgôahe ǀgaub ǃnâ nî tanisen ǁkhā” ti ra ǂâibasen. Nēs ge ǂâibasen tama hâ, âi ǁoa tamats ga iots ǁkhoaxa ǁaeba ūhâ tidesa. (Aoǁn. 3:​1, 4) Nēs ge ra ǂâibasen its ǃgarise sîsen tsî sa ǃereamde dīǀoaǀoa. ǁGaumâihets hâ sîsen-ets ga hoaǁae dī toa tsî ǁnāsa ǃgâi ǀgaub ǃnâ dī, on ge ǀhaohâb ǃnâ hâ ǃgâsana nî ǂan, satsan a ǂgomǃgâ ǁkhā ǃkhaisa tsîn ge ǃgôasiba nî ūhâba tsi.

15. “ǀGamnamxa tide” tsî ‘mariǃgunuxa tides’ tsîna tae-e ra ǂâibasen?

 ¹⁵ “ǀGamnamxa tide” ti hâ mîs ge ra ǂâibasen, ǂgomǃgâhe ǁkhāts ge nî. Mîts ra xū-ets ge nî dī tsîts ge nauna ǂhumiba tama hâ. (ǂKhm. 3:32) ‘Mariǃgunuxa tides’ ge ra ǂâibasen, ǂhauǃnâts ge nî nau khoen ǀkhats ga ǂharugu o, mari ǁkhōgats ra sîsenū ǀgaub ǃnâ. Sa ǀhōsanats ge ǀhaohâb ǃnâ marihets nî hō amaga ǀgui sîsenū tide.

16. (a) ‘ǀGaisa ǂauxûi-ā-ao’ sa tae-e ra ǂâibasen? (b)‘ǃAnu ǃgâiǂâisa’ tae-e ra ǂâibasen?

¹⁶ ‘ǀGaisa ǂauxûi-ā-aos’ ge ra ǂâibasen kaisets xûi-e ā tamasa. Tamas ka iots kaise ra ā khoe-i ase ǂansa tamasa. ‘ǃAnu ǃgâiǂâis’ ge ra ǂâibasen Jehovab ǁgaragu ǃoaguts ra ûi ti. ǀOasa kurusats ūhâ tama xawets ge ǃgâi ǀhōsagusisa Jehovab ǀkha nî ūhâ tsî ǁnās ge ama ǂkhîba nî mā tsi.

17. ‘ǁÎgu ǀgaub tsî ǁkhāsib nî ǃâitsâhese’ ti hâ mîsa tae-e ra ǂâibasen? (1 Timoteub 3:​10, ai-īsiba mû re.)

¹⁷ ‘ǁÎgu ǀgaub tsî ǁkhāsib nî ǃâitsâhese’ ti hâ mîs ge ra ǂâibasen, ǀhaohâb ǃûi-aogu ǀnai mû hâsa sa ǃereamdets ǃgâise ra dīǀoaǀoasa. Tsî gu a ǂgomǃgâtsi ǁkhā ǃkhaisa. ǁNā-amaga ǀhaohâb ǃûi-aogu ga ǁgaumâihe mā tsi, o ǁîgu daoǁgaus tsî ǀapeǂhomis ra mātsi daoǁgausa sao-ai re. Hoaǁae dītsâ re î ǁnâuǃā tae-ets nî dīsa tsîts mâǁae māhets hâ ǁgaumâisa nî dī toasa. Māhets hâ sîsen-ets ga ǃgâise tsî ǁkhoaǂgaosib ǀkha dī, on ge ǀhaohâb ǃnâ ǃgâsana nî mû ǃereamsa ūhâ khoe kaits rasa. ǀHaohâb ǃûi-aogo, ǁāǁnâhe ǃgâsaga ǁkhāǁkhā re. (Khomai re 1 Timoteub 3:10 sa.) Sadu ǀhaohâb ǃnâ i ǂkham ǃgâsaga hâ? ǁÎga a ǃgâi aiǁgau aitsâma Elobmîsa ôaǃnâs tawa i ga hā o tsî gu ǃgâise ǀhaodi ǃaroma ra aiǂhomisen? ǀHaodi tawa ǃeream tsî gu aoǁnâ sîsenni ǃnâ ra ǁhao? Nēna gu ga dī, o ǁîga dī ǁkhā gu a ǁgaumâide ǁîgu kurigu ǃoagu mā re. Nē ǀgaub ǃnâ gu ge ǂkham ǃgâsaga nî ǁgau ǃereamsa gu tani ǁkhāsa. Tsî gu ge ǂkhamsis ǃnâ ǀhaohâb hui-aogu ase a ǁgaumâihe ǁkhā.

18. “ǂNao-ose” ti hâ mîsa tae-e ra ǂâibasen?

¹⁸ “ǂNao-ose” ti hâ mîs ge ra ǂâibasen, khoe-i xare-i tsū xū-i ǃaroma ǂgā-am tsi tama hâsa. Ama as ge Xristeǁîn nî ǂhumi ǂgā-amhesa. Khoen ge Jesuba ge ǂhumi ǂgā-am tsîb ge ge mî, ǁîb saosaben tsîn nî ǂhumi ǂgā-amhe ǃkhaisa. (Jhn. 15:20) Xawets ga Jesub ge dī khami ǃgâise tanisen,  ots ge ǃgâi ǀonsa ǀhaohâb ǃnâ nî ūhâ.—Mat. 11:19.

19. “ǀGui taras di ao” tis Elobmîsa ra mî, os ǁnāsa tae-e ra ǂâibasen?

¹⁹ “ǀGui taras di ao.” ǃGammeb ga, ob ge Jehovab ǂhunumâ ǁgaragu ǃgammeb di ga nî sao, ǁnāb ge ǀgui-aob tsî ǀgui taras diba. (Mat. 19:​3-9) Xristeǁî-aob ge tātsē ǀgai tide. (Heb. 13:4) Xawe i ge ǃnāsa-e ǃkhōǂgā hâ. Nēs tsîn ge ra ǂâibasen, hoaǁaeb nî ǁîb taras ǃoagu ǂgomǂgomsasa. Tsîb ge ǀnî hâ tarekhoedi ǀkha ǁâǁâsen tide.—Job 31:1.

20. ǃGâsaba mati ‘ǃgâi ǀgaub’ ǃnâ ǁîb omarisa ra kōǃgâ?

²⁰ “ǁÎ-i ǀgôan tsî omarisa ǂhanuse nî ǂgaeǂgui ǁkhā.” Omaris danats ga, ots ge sa ǃereamsa nî tani. Hoaǁae omaris ǃoabasa ūhâ. Sa taras tsî ǀgôan ǀkha hoaǁae aoǁnâ sîsenni ǃnâ ǁhao re. (Efe. 6:4) ǁÎb omarisa ra kōǃgâ khoeb ge ra ǁgau, ǀhaohâbab nî kōǃgâ ǁkhā ǃkhaisa.—ǀGopeǀnō re 1 Timoteub 3:5.

21. ǀHaohâb hui-aob asets ga noxopa ǃoaba tama i ots tae-e nî dī?

²¹ ǃGâsago noxopa go ga ǀhaohâb ǃûi-aob ase ǃoaba tama, o nē ǁkhāǁkhāǃâsa ǃgaoǃgâxase khomai tsî Jehovaba ǃoa ǀgore re. ǀHaohâb hui-aob ǃaroma hâ ǂgaoǀkhāde ǁkhāǁkhāsen tsî ǃgarise sîsen i nē ǂgaoǀkhāde sīǃnâ. Jehovab tsî sa ǃgâsan tsînats matikōse a ǀnam ǀgaub xa ǂâiǃgâ re. Sa ǃgâsanats ūba hâ ǀnammi ai ǀaro tsî ǂâiǃgâ tae-i ǃaromats ǁîna ra hui ǂgaosa. (1Pet. 4:​8, 10) ǃGarise sîsen i ǀhaohâb hui-aob ase ǁgaumâihe, ots ge kai ǃgâiaǂgaoba nî hōǃâ, sa ǃgâsanats ǀhaohâb ǃnâ ra hui khami. Ab Jehovaba sa dītsâdi hoade ǀkhae ǃgarisets ra sîsen hîna, its ǀhaohâb hui-aob ase ǁgaumâihe.—Fil. 2:13.