Tita ge kaise kurus ǃnâ ǃgâiǃgâibasensa ti ǂkhamsisa xu ūhâ. Ti ǀaokhoen tsîn ge kaise ǃgarob ǃnâ ǀgaisa ǃgâiǃgâibasensa ūhâ. Tsî ǂkhari ǃāgu hîna sida ra hâba hâgu Jyväskylä Sentral Finland ǃnâ. Tita ge kaise xamarina a ǀnam. ǂKham ta ge i o. O ta ge mâ ari-i tsî ǀhôa-i hoa-i. Hîna ta gere mû-e gere ǁamǂgā ǂgao. Kaikhâi ta ra khami ta ge khoen ge xamarina gere hâ-ū. ǀGaub xa ǃgâibahe tama ge i. Tsî ta ge xamarina ra kēǃgâ ǀapeǂhomîsa ge ǁhao tsoatsoa.

Sida ge xamarin ǂhanuba gere ǃkhamba. ǂKhanina da ge gere ǀgoraǂui. Tsî strasigu ǃnâ gere mâmâ ǁîn ǀkha. Storan tsî xamarina ǀaena ra ôaǃnâ ǃkhain ais tsîna da ge gere mâ. Sida ge xamarina ra kōǃgâ ǀasa ǀapeǂhumisa ge ǁkhowa-am. Sida ge ǁkhā da an hoana ge dī. Sida sîsen-e aiǃgû khais ǀkha. ǂHanub ǀkha da ge hoaǁae ǃgomsina ge ūhâ i. Tita ge ge ǃkhōhe tsî ǁnâuǃâǃkhaiba ǃoa ge ī ūhe.

Xamarin xa ta ge gere ǂâiǃhansen. Tsî ǃhūbaib ai hâ ǃgomsin xas tsîna. ǁAe i khaoǃâ ta ge ǂgui ǀapeǂhumidi ǃnâ ge ǃâ. Amnesty International tsî Greenpeacesa ǃkhōǂgā hâse. Tita ge ti hoa ǀgaib ǀkha ǁîn xūn ǃnâ gere hui. ǀGâsa khoen, ǃâ khoen tsî ǁkhāǁkhāsensa ūhâ tama khoena ta ge gere mâǁkhaeba.

Mûǃgâ ta ge ge xū-e ta a dawa ǁoasa, nē ǃhūbaib ǃnâ. ǀApeǂhumidi ge gere dītsâ ǂkhariro ǃgomsina dī-unusa. Xawen ge ǃgomsina, on gere kai o, gere kai. Nēs ge gere ǁgau ǂkhabadīb ge ǃhūbaiba gere ǀoasa. Tsî khoena nēsa xa ǁae tamasa. Tita ge gere ǂkhabuǂâi.

Tsūse ta ge gere tsâ. Hui o ta ge i amaga. Tsî ta ge Elob tsî Elobmîs xa ge ǂâi tsoatsoa. Aiǃâ ta ge Elobmîsa Jehovab ǃoaba-aon ǀkha gere ǁkhāǁkhāsen. Nē khoena ta ge gere ǃgôaǃgâ ǁîn di ǃgâisib hîna gere ǀgaudeb ǃgao. Tsî ǁîn ge tita ǃnâ ūhâ i ǃgâiǃgâibasens ǃgao. Xawe ta ge tita ti ûiba dī-unus ǀkha noxoba ge ǂhanu tama hâ i. Nē ǃnāsa i ge xūna ge ǀkhara i.

Tita ge ti Elobmîsa ūǂui tsî ge khomai tsoatsoa. Nēs ge tita ge ǀgaiǀgai. Tita ge ǂgui blaga ge mû. ǁKhāǁkhā gere ga mati da ǃgâi ǀgaub ǃnâ xamarin ǀkha nî hâsa. Aiǁgauses ge ǂKhoamîdi 12:10 sa ra mî ‘ǂHanu-ai khoen ge xamarin ana ra kōǃgâ.’ (Good News Translation) Tita ge ge mûǂan Elob, nē ǃhūbaib di ǃgomsina ǃaroma tamasa. Sida ǃgomsin ge ǂgui ǀguisa ra hî. Tsî ǂgui khoen Elob di daoǁgaude sao tama amaga. Tita ge kaise ǂgaob ai ge tsâǀkhāhe. ǁKhāǁkhāsen ta ge o, Jehovab ǀnami tsî ǁîb ǃnūǃnâxasib tsîn xa.​—Psalmdi 103:8-14.

What Does the Bible Really Teach? ǂKhanis ǃgâb ai hâ xūna ta ge ge xoaǂgā. ǀGam ǃgamme hâ khoera ge ti daos dawa ge ǀkhī. Tsî Elobmîsa ǁkhāǁkhā tesa ge ǂgande. Tsî ta ge nēsa ge ūǃoa. Tita ge ǀhaode ge hâ ǃnâ tsoatsoa. Elobmîs amab ge ti ǂgaoba ǃgamse ge tsâǀkhā.

Gangans Elobmîs ǃgao. Tita ge ǂgui ǀkharaǀkharasena ge dī ǁkhā i. Tsî ǂgaeǀû tsi kaise ge āǀû. Ti tanisen ǀgaub tsî ǃhoaǀgaub tsîna ta ge ge dawa. Tsî ti tanisen ǀgaub ǂhanub ǃoa-ai ta ge ūhâ iba ta ge ge dawa. (Romeǁîn 13:1) Ti ǂgui ǁgai ǁnaediga ta ge ǀû. ǂGīǂgōsisa xū ta ge ge ūdawasen.

Kaise ge ǃgombade i xū-i ge xamarina kōǃgâs ǀapeǂhumisa xu ǂoasa. Nēs ge ge supu tama hâ i. ǂGuro ta ge gere ǂâi nē ǀapeǂhumisa ta ra gāxaǃnâ ti. ǁÎsa xu ta ga ǂoa o. Tita ge ge ǃgoaǃgâ tsoatsoa, Elob gaosib ǀguib, a ama ǃâubasen nē ǃhūbaib aisa. Tsî ta ge ti ǀgaib hoa ǀkha nē gaosiba ge ǂkhâǃnâ. Nau khoena ǁîb xa ǁkhāǁkhās ǀkha.​—Mateub 6:33.

Ti sîsengu ǃnâ ta ge khoena gere ǀgora.​—ǁÎna tsū tamas kai o, o a ǃgâisa. Tsî ta ge hoaǁae ǁnān hîna ǃgâi tamana gere mâǃoa. Xawe gangans Elobmîs ǃgao nēsisa ta ge khoena ǃhui tama hâ. Nēsi ta ge ǀnamxaǃnâsiba hoa khoen ǃoagu ra ǁgau. (Mateub 5:44) Hoa ǀgaugu ǃnâ ta ge ǀnama ra ǁgau. ǁÎna Elob gaosib xa aoǁnâbas ǃnâ-ū. Tita ge a ǂkhî mûsa matib nē khoexaǃnâsiba. ǂKhîb tsî ǃgâiaǂgaoba khoena ra māsa. ǃÂubasensa ǃkhōǂgā hâse.

Tita ge ǂkhîba ge hō xūna Jehovab ǃomgu ǃnâ māsa. Tita ge ge ǂgom ǁîb a kuru-aosa. Tsîb ǁîba tātsē mā-am tidesa xamarin. Tsî khoen tsîn ǁgaise nî hâ ūhesa, ǀamosib kose. ǁÎb ge mā-am tide sida īxa ǃhūbaib nî dīkākāhesa. ǁÎb di mîmâis Gaosib dis ǃnâ-ūb ge ǀase nē ǃhūbaiba nî dī-unu. (Jesajab 11:1-9) Nēs ge kai ǂkhîb ǀguiba ge mā te tama hâ i, amaba ǂansa. Xawe naun tsîna huisa in Elob ǃnâ ǂgom. Nēsisa ta ge ǃhūbaiba ta nî dawas xa ǂâi tama hâ.