MASKE poliuiyaya miak xiuitl nopa israeleuanij kalakiskiaj Canaán, Jehová ipa kiiljuijtoya Abraham kinmakaskia nopa tlali ichampoyouaj. Uajka kema Josué pejki kinyakana, nechka moaxkatiskiaj nopa Tlali katli toTeotsij Kinmakaskia.

ToTeotsij kiijtok monekiyaya kintsontlamiltisej nopa canaáneuanij, pampa tlauel mosisiniyayaj uan tlemach tlachiuayayaj. Uajka, kinnauatik israeleuanij ma kintsontlamiltikaj nochi altepemej tlen Canaán.

Kema ayamo kalakiyayaj, Josué kintitlanki omej ma tlachiatij Canaán. Inijuantij asitoj altepetl Jericó uan mokajkej ichaj se siuatl tlen itoka Rahab. Maske kimatiyaya inijuantij eliyayaj israeleuanij, kinkajki ma mokauakaj ichaj uan kinmanauik. ¿Kenke? Pampa kikaktoya tlen Jehová kichijki kema kinmakixtik itekipanojkauaj yeka nojkia pejki kineltoka. Rahab kichijki ma nopa omej ma kiiljuikaj amo mikiskiaj ya uan ichampoyouaj kema moaxkatiskiaj nopa altepetl.

Teipa, israeleuanij kalakitoj Canaán uan kintlateuiltitoj jericóeuanij. Jehová kichijki ma ueloni tepamitl tlen kinmanauijtoya, uajka kitsontlamiltijkej nopa altepetl, san Rahab uan ichampoyouaj momanauijkej. Kej nopa pejki tlauilankayotl katli uejkajki chikuasej xiuitl, kampa Josué uan itlapaleuijkauaj moaxkatijkej uejueyi Tlali katli toTeotsij Kinmakaskia. Teipa, israeleuanij moxeljuilijkej nopa tlali katli moaxkatijkej.

Se tonali, kema nechka mikiskia Josué, kinnechikok nochi. Kinilnamikilik kenijkatsa toTeotsij kinmanauijtoya uan kiniljuik ma amo kema kikauakaj toTeotsij. Maske kiniljuik ni, kema mijki Josué uan iuampoyouaj, israeleuanij kikajkej Jehová uan pejkej kinueyichiuaj teotsitsij katli amo melauakej. Ipan 300 xiuitl katli panotiajki, amo nochipa kineltokakej toTeotsij itlanauatiljuaj. Uan kema kiixpanouayayaj, Jehová kichiuayaya ma kintlateuiltikaj filisteaeuanij o sekinok ininkualankaitakauaj. Uan nochipa kema kitlajtlaniyayaj toTeotsij ma kinpaleui kitlaliyaya se temakixtijketl. Kintlalik 12 temakixtianij, katli kintokaxtiyayaj tetlajtolsenkauanij.

Ipan Biblia eltok se pilamochtsi katli kipoua kenijkatsa panotiajki nopa xiuitl, peua kiijtoua tlen kipanok tetlajtolsenkajketl Otoniel uan tlami ika nopa tetlajtolsenkajketl Sansón, katli eltoya tlauel tetik. Katli kipoua nopa kuajkualtsi pilamochtsi Jueces kipanextia se tlamachtili tlen tlauel moneki: tlaj tijneltokaj Jehová, techteochiuas; uan tlaj amo, titlaijiyouisej.

(Mokixtijtok ipan Josué, Jueces uan Levítico 18:24, 25.)