¿TECHPALEUIS tlaj tijkauasej Jehová ma technauati? Tijmatisej, tlaj timomachtisej tlen techtlajtolmaka ipan iTlajtol. ¿Nelia kuali tepaleuiaj? ¿Techpaleuis kuali timonejnemiltisej? Ipan Proverbios, tlanauatijketl Salomón kinechikok miak tlajtoli tlen uelis techpaleuis ipan nochi tonemilis. Ma tikitakaj se ome.

Ma timotemachikaj ipan toTeotsij. Tlaj tijnekij kuali timouikasej iuaya Jehová, tlauel moneki timotemachisej ipan ya. Salomón kiijtok: “Ximotemachi ipan toTeko ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak” (Proverbios 3:5, 6). ¿Kenijkatsa tijnextiaj timotemachiaj ipan toTeotsij? Kema tijkauaj ma techyakana uan tijneltokaj tlen technauatia. Tlaj kej nopa tijchiuaj, tijnextisej se kuali tlamantli ipan tonemilis: tijyolpakiltisej toTata katli itstok iluikak uan tijnextisej nopa Diablo san se istlakatiketl (Proverbios 27:11).

Ma kuali timouikakaj iuaya sekinok. Nama, tlauel moneki toTeotsij ma kinyakana tochampoyouaj. ToTeotsij kitlajtolmaka teueue: “Ximopakilismaka miak ika nopa siuatl tlen timokuilik kema tieliyaya titelpokatl”, kej nopa kiiljuia ma amo kema kikaua isiua (Proverbios 5:18-20). Proverbios, capítulo 31, kinextilia tesiua tlake moneki kichiuas uan kiampa ma kitlepanitakaj uan ma kuali kiitakaj, iueue uan ikoneuaj. Nojkia konemej kintlajtolmaka ma kinneltokakaj inintatauaj (Proverbios 6:20). Ni pilamochtsi no kinextia tlauel ipati timouampojchiuasej ininuaya sekinok, uan techiljuia tlaj timouejkachiuaj, timochiuasej tiitskuimej (Proverbios 18:1). Maske moneki tikinpiasej kuali touampoyouaj, moneki kuali tikintlapejpenisej uan ma amo timomatikaj ininuaya katli uelis techkuapolosej (Proverbios 13:20; 17:17).

Ma kuali timonejnemiltikaj. Tlen Proverbios tetlajtolmaka tlauel ipati pampa kichiua ma kuali tiitstokaj uan techpaleuia tijkauasej amo kuali tlalnamikilistli, ma amo timoiuintikaj, tikitasej nochi kuali tlen tijchiuaj uan no ma kuali titekitikaj (Proverbios 6:6; 14:30; 20:1). Techiljuia tlaj tijneltokaj tlen toTeotsij amo tlanauatia uelis techpanos tlen amo kuali (Proverbios 14:12). Nojkia techtlajtolmaka ma tijmokuitlauikaj toyolo —o tlen tijyolmatij—, pampa nopaya kisa ‘tlen tijchiuaj ipan toyolisʼ (Proverbios 4:23).

Tlauel miakej kinpaleuijtok tlen tetlajtolmaka ni pilamochtsi ma kuali monejnemiltikaj, yeka kiitstokej tlauel kuali tlaj tijkauasej ma technauati Jehová.

(Mokixtijtok ipan pilamochtsi Proverbios.)