KEMA tlauel uetski atl ya panotoya se 350 xiuitl. Abraham itstoya Ur, kampa onkayaya miak tomi, nama ni altepetl eltok ipan se ueyi altepetl tlen kitokaxtiaj Irak. Ya se tlakatl tlaneltokaketl, asiskia se tonali kema monekiskia kinextis tlaj nelia motemachia ipan toTeotsij. Ma tikitakaj tlake panok.

Jehová kiiljuik ma kisa tlen Ur kampa tlakatki uan ma yaui altepetl: Canaán. Ya nima kineltokak uan kistejki. Yajki uejka iuaya isiua Sara, imachkone Lot uan nochi ichampoyouaj. Kema ya itstoyaj Canaán, san kampa ueli mochantijtinemiyayaj ika yoyomitl. Jehová kichijki se tlajtolsenkaualistli iuaya Abraham. Pampa ya kineltokayaya, kiiljuik kinteochiuaskia nochi katli itstoskiaj ipan Tlaltipaktli, ikoneuaj kichiuaskiaj se ueyi altepetl uan moaxkatiskiaj Canaán.

Abraham uan Lot kinpixkej miakej ichkatlapialmej uan uakaxmej. Abraham kipaktiyaya temakas tlen kipixtoya, yeka kikajki ma imachkone kitlapejpeni kanke kinekiyaya kinpixtos itlapialjuaj. Lot kitlapejpenik se tlali tlen eltoya nechka ueyatl Jordán, kampa kuali tlaeliyaya, uan mochantito nechka altepetl Sodoma. Katli nopaya euayayaj tlemach tlachiuayayaj uan yeka kiixpanoyayaj Jehová ika inintlajtlakol.

Kema Abraham ayokmo itstoya iuaya Lot, Jehová kiiljuik kinpiaskia ikoneuaj kej sitlalimej ininmiaka. Abraham kineltokayaya Jehová, maske Sara amo ueliyaya konepia. Kema kipixtoya 99 xiuitl uan Sara nechka 90, toTeotsij kiiljuik kipiaskiaj se ininkone. Uan kej nopa panok: Sara kipixki se konetl katli kitokaxtijkej Isaac. Maske Abraham kinpixki sekinok ikoneuaj, nopa Temakixtijketl katli toTeotsij kiijtok ne Edén, eliskia se tlen Isaac ichampoyouaj.

Kema panoyaya nopa, Lot nojua itstoya ininuaya ichampoyouaj ne Sodoma. Ya amo monejnemiltik kej tlachiuayayaj sekinok, pampa kipixtoya kuali iyolo. Yeka, kema Jehová kiijtok kitsontlamiltis Sodoma, achtoui kintitlanki se omej iluikaeuanij ma kimatiltitij Lot. Kinnauatijkej ma cholokaj uan ma amo aka moikankuepa. Uajka, toTeotsij kichijki ma tepeui tlitl uan azufre tlen iluikak, nopa kinmiktijtiajki katli tlauel amo kualmej tlen itstoyaj Sodoma uan no katli itstoyaj altepetl Gomorra. Lot uan omej iichpokauaj momanauijkej. Isiua moikankuepki, uelis pampa kitekipachouayaya tlen kikajtejki. Yeka mijki pampa amo tlaneltokak.

(Mokixtijtok ipan Génesis 11:10–19:38.)