Ximoiljui ni: kema Julia motlachilia ipan se teskatl, moita tlauel tomauak. Ya moiljuia: “Moneki nojua nitemos pampa tlauel nitomauak”. Maske kiampa moiljuia, itatauaj uan iuampoyouaj kiiljuiaj tlauel pitsaktsi kej se kuapipitstli.

Julia moiljuijtok tlake uelis kichiuas uan kiampa temos se ome kilos. Moiljuia amo tlakuas se keski tonali maske tlauel mayantos...

Tlaj nojkia tijyolmatiskia kej Julia, ¿tlake tijchiuaskia?

Amo kenijki tlaj ta tijneki kuali tinesis. Biblia kiijtoua se keskij maseualmej tlauel kuali nesiyayaj, kej Sara, Raquel, Abigail, José uan David. Uan kiijtoua se ichpokatl tlen motokaxtiyaya Abisag “nelia eliyaya se ichpokatl yejyektsi” (1 Rey. 1:4).

Miakej telpokamej uan ichpokamej tlauel motekipachouaj pampa moiljuiaj amo kuali nesij. Ni uelis kichiuas ma kinpano tlen tlauel amo kuali. Ximoiljui ni:

• Kema kintlajtlanijkej kenijkatsa moitayayaj ichpokamej katli kiijtouayayaj tomauakej, 58% kiijtojkej kena tomauakej maske san 17% kena eliyayaj tomauakej.

• Nojkia kintlajtlanijkej siuamej katli amo tomauakej kenijkatsa moitayayaj, uan 45% moiljuiyayaj kena tomauakej.

• Se keskij ichpokamej katli tlauel motekipachouaj pampa moiljuiaj motomauaj, teipa kipiaj nopa kokolistli anorexia. Katli kipiaj ni kokolistli uelis mikisej pampa ayokmo tlakuaj.

 Tlaj timoiljuia peua tijpia anorexia o tijchiua miak tlamantli pampa amo tijneki timotomauas, xikiljui se akajya ma mitspaleui. Xikiniljui motatauaj o seyok katli uelis mitspaleuis. Biblia kiijtoua: “Se tlen tokualuampo temachtli techiknelia nochipa. Kema onka tlaouijkayotl techpaleuia keja eliskia se toikni” (Prov. 17:17).

Tlen tijpiaj ipan toyolo o nopa kuajkuali tlamantli tlen tijnextiaj, ya nopa kichiua kuali ma techitakaj. Xikita tlake kiijtoua Biblia tlen David ikone:

“Absalón eliyaya nelia yejyektsi uan ipan nochi tlali Israel axmopantiyaya seyok keja ya. [...] Axtleno tlen axkuali kipixki; senkistok kuali nochi itlakayo” (2 Sam. 14:25).

Maske eliyaya yejyektsi, tlauel moueyimatiyaya, kinekiyaya moaxkatis tlen amo iaxka uan tlakajkayauayaya. Biblia amo kiijtoua kuajkuali tlamantli tlen Absalón; kiijtoua tlauel tekajkayauayaya uan temiktiyaya pampa tlauel tekualankaitayaya.

Yeka Biblia techtlajtolmaka:

“Keja se tlakatl tlen mokentia iyoyo tlen yankuik, [ximokentikaj] inmonemilis tlen yankuik” (Col. 3:10).

“Amo ximokuesokaj kenijkatsa inmoxiljuisej, [...] más kuali xijtemokaj se inmoyejyejka tlen eltok ipan inmoyolo” (1 Ped. 3:3, 4).

Maske amo kenijki tlaj tijneki kuali tinesis, tlauel moneki tijchiuas kampeka tijnextis kuajkuali tlamantli ipan monemilis. Teipa, maseualmej tlauel kipatiitasej nopa tlamantli tlen tijnextis uan amo kej tinesi. Se ichpokatl tlen itoka Phylicia kiijtoua: “Tlaj tlauel tipilyejyektsi, sekinok nima kuali mitsitasej. Maske tipilyejyektsi, maseualmej mitsilnamikisej pampa tijnextia kuajkuali tlamantli uan amo pampa tipilyejyektsi”.

¿Tikualani kema tikita kenijkatsa tinesi?

¿Ipa timoiljuijtok ayokmo titlakuas o tijkuas san se keski tlamantli san pampa tijneki kuali tinesis?

¿Tlake tlamantli mitspaktiskia tijpatlas? (Xijtlapejpeni nochi tlen tijpatlaskia).

• MOIXTEYOL

• MOYAKATSOL

• MOTSONKAL

• MOTLAKAYO

• MOIXAYAK

• MOUEXKA

Tlaj tijtlapejpenik “kena” ipan nopa ome achtoui tlajtlanili uan tijtlapejpenik kipano eyi tlamantli tlen tijnekiskia tijpatlas, kualtiaskia timoiljuis ni: uelis sekinok amo mitsitaj kej ta timoita uan amo moiljuiaj tlaj amo kuali tinesi. Tlaj amo timomokuitlauis, nojkia peuas tlauel mitstekipachos kej tinesi (1 Sam. 16:7).