Maske katli mosenkajtokej tlauel yolpakij kema kipiaj achtoui ininkone, nojkia kintekipachoua pampa amo kimatij kenijkatsa kimokuitlauisej. Tikitas kenijkatsa tlauel moneki miak tonali tijmokuitlauis se pilkonetsi. Uan pampa amo kuali tikochis o amo kuali tijyolmatis, kichiuas ximokualani iuaya mosiua o moueue. Uajka inomej moneki inkiitasej kenijkatsa uelis inkimokuitlauisej inmopilkone, ni inmechpaleuis kuali ximouikakaj. ¿Kenijkatsa uelis inmechpaleuis tlen Biblia tetlajtolmaka?

TLEN KIIJTOUA BIBLIA: “Se tlen teiknelia kipia iyolo ininuaya sekinok uan kinchiuilia tlen kuali [...]. Axitskuinti uan axyolkentsi” (1 Corintios 13:4, 5). Uelis pampa amo kema tijpixtoya se pilkonetsi, nama san tijneki ya tijmokuitlauijtos. Ni uelis kichiuas moueue ma moiljui tijtlauelkajtok, yeka nojkia moneki tikitas tlake kipoloua. Uelis tikiljuis ika tlaiknelili tijneki ma itsto mouaya uan tijpatiita pampa mitspaleuia tijmokuitlauis mopilkone.

“Xijtlakakilikaj intlakamej[,] xiitstokaj ika kuali ininuaya inmosiuajuaj.” (1 Pedro 3:7.) Tlaj titetata, xijmajto nama mosiua kitekiuis miak tonali uan uelis siauis pampa kimokuitlauis inmopilkone, yeka kemantika uelis moyolkokos uan motekipachos. Nojkia kemantika kualanis mouaya, yeka moneki xijpia moyolo, pampa tlauel kuali tlaj se tlakatl “kipias iyolo uan axkualanis” (Proverbios 16:32). Uajka xijnexti kuali titlalnamiki uan xijmaka mosiua tlen kipoloua (Proverbios 14:29).

TLEN UELISKIA TIJCHIUAS:

• Tlakatl: Maske tlayoua, xijpaleui mosiua ma kimokuitlaui inmopilkone. Amo tlauel ximotekiui, kiampa uelis tiitstos ininuaya mosiua uan mopilkone

• Siuatl: Kema moueue kinekis mitspaleuis ika mopilkone, xijkaua ma mitspaleui. Tlaj amo kuali kichiua, amo xijpinaualti, moneki tijnextilis ika tlaiknelili kenijkatsa uelis kichiuas

TLEN KIIJTOUA BIBLIA: “Nopa omej mochiuasej san se inintlakayo” (Génesis 2:24). Maske nama inkipiaj se inmopilkone, amo xikilkaua ta uan mosiua inmochijtokej ‘san se inmotlakayo’. Yeka xijchiuakaj kampeka nochipa kuali inmouikasej.

Xijtlaskamatili moueue pampa mitspaleuia. Tlaj tijtlaskamatilis kejuak eliskia “se pajtli” tlen teyolchikaua (Proverbios 12:18). Xikiljui mosiua tlauel tikiknelia, tijpatiita uan tijtlaskamatilia pampa kinpaleuia mochampoyouaj (Proverbios 31:10, 28).

“Axaka ma kitemo tlen kuali para ya iselti, [ma kichiua] tlen kinpaleuis sekinok.” (1 Corintios 10:24.) Nochipa xijchiua tlen kipaleuis mosiua o moueue uan xijpatiita tlen kichiua. Nochipa ximonojnotsakaj uan ximotlakakilikaj. Uan tlaj mosiua o moueue kinekis ximotekakaj sansejko, amo xikiljui amo tijneki. Moneki tijmajtos tlake kipoloua mosiua o moueue. Biblia kiijtoua: “Sejse inmojuantij amo xijtsakuili monamik kema kineki itstos mouaya” (1 Corintios 7:3-5). Uajka, moneki ximonojnotsakaj tlen ni tlamantli. Tlaj tijkuamachilis tlen kipoloua mosiua o moueue uan tijpias moyolo, mitspaleuis kuali ximouikakaj.

TLEN UELISKIA TIJCHIUAS:

• Xijkaua tonali kema tiitstos moselti iuaya mosiua o moueue

• Xijnextikaj nelia inmoikneliaj ika se keski tlamantli, uelis inmotlajkuiljuilisej o inmomakasej se tlenijki

TLEN KIIJTOUA BIBLIA: “Kema tikonetsi tieliyaya, tijmatiyaya nopa Tlajkuiloli tlen tlatsejtseloltik. [...] Uan iTlajtol toTeko mitstlalnamiktijtok uan mitsnextilijtok kejatsa uelki timomakixtik” (2 Timoteo 3:15). Kuali ximoiljui kenijkatsa tijmachtis mopilkone. Xijmajto inijuantij tlauel tlalnamikij, pampa kema mopilkone ayamo tlakatiyaya, kikakiyaya kema tijnojnotsayaya uan kimatiyaya tlen tijyolmati. Kema tlakatis, xijpouili tlen tlamachtia Biblia, pampa maske amo kikuamachilia kichiuas ma kipakti tlapouas kema moskaltis.

Amo ximoiljui san tlapik tijmachtis tlen toTeotsij pampa nojua pilkonetsi. Ximomaijto iuaya (Deuteronomio 11:19). Kema inmauiltisej, xikiljui tlen toTeotsij kichijtok (Salmo 78:3, 4). Tlaj kema moskaltijtias kiitas kenijkatsa tlauel tikiknelia Jehová, ya nojkia kiiknelis.

TLEN UELISKIA TIJCHIUAS:

• Xikiljui toTeotsij ma mitspaleui kuali tijmachtis mopilkone

• Miakpa xikiljui mopilkone tlamachtili tlen tlauel ipati uan kej nopa nimantsi kitsontekontlalis