Nopa achtoui carta tlen kintitlanilijkej Cristo itokilijkauaj tlen Corinto 1:1-31
1 Na niPablo, katli nechtekimakakej ma nieli iapóstol Cristo Jesús pampa Dios* kiampa nechtekimakak, iuaya toikni Sóstenes
2 tijtlajkuiljuiliaj itlanechikol Dios tlen eltok ipan Corinto, inmojuantij katli inmechtlapejpenijkej kej Cristo itokilijkauaj. Inmojuantij inmechnotskej para inelisej intlatsejtseloltikej ininuaya katli tlaneltokaj ipan* itoka toTeko Jesucristo uan ejeliuis* itstokej. Ya eli ininTeko uan nojkia toTeko:
3 ToTata Dios uan toTeko Jesucristo ma kipiakaj ueyi ininyolo ika inmojuantij* uan ma inmechpaleuikaj kuali ximouikakaj ininuaya.
4 Nochipa nijtlaskamatilia noDios pampa kinextijtok ueyi iyolo ika inmojuantij* pampa inelij itokilijkauaj Cristo Jesús.
5 Pampa ipan ya, Dios tlauel inmechteochijtok ipan nochi tlamantli, uan kichijtok xiuelikaj kuali intepouilisej itlajtol uan kichijtok nochi kuali xijkuamachilikaj,
6 sanse kej nopa tlajtoli tlen inmechmatiltijkej tlen Cristo kuali moneljuayotijtok ipan inmoyolo,
7 yeka amo inmechpoloua yon se tlamantli kema nojua inkichiaj toTeko Jesucristo ma kinexti itetikayo.
8 Dios nojkia kichiuas nochipa xiitstokaj intemachmej para amo aka uelis inmechtlateljuis ika yon se tlamantli hasta ipan nopa tonali kema ualas toTeko Jesucristo.
9 Dios eli temachtli. Ya inmechnotski para xiitstokaj sansejko iuaya iKone, toTeko Jesucristo.
10 Noikniuaj, nama niinmechtlajtlania ipan itoka toTeko Jesucristo para nochi xikijtokaj sanse tlamantli uan amo ximoxelokaj, más kuali xijpiakaj sanse inmotlalnamikilis uan ximoiljuikaj sanse tlamantli.
11 Niinmechiljuia ni pampa se keskij katli itstokej ichaj Cloe nechmatiltijkej para inmokualaniaj, noikniuaj.
12 Nikijtoua ni pampa sejse tlen inmojuantij inkiijtojtinemij: “Na niitokilijka Pablo”, “Na niitokilijka Apolos”, “Na niitokilijka Cefas”,* “Uan na niitokilijka Cristo”.
13 ¿Inmoiljuiaj para Cristo moxelojtok? Pablo amo kimiktijkej ipan se kuauitl para inmechpaleuis, ¿axke? ¿O inmechatsonpoliuiltijkej ipan itoka Pablo?
14 Nijtlaskamatilia Dios pampa amo nikatsonpoliuiltik yon se tlen inmojuantij, san Crispo uan Gayo nikinatsonpoliuiltik,
15 pampa kiampa amo aka uelis kiijtos inmechatsonpoliuiltijkej ipan notoka.
16 Kena, nojkia nikinatsonpoliuiltik katli itstokej ichaj Estéfanas. San inijuantij nikilnamiki nikinatsonpoliuiltik.
17 Cristo amo nechtitlanki para niteatsonpoliuiltis, ya nechtitlanki para ma nitematilti nopa kuali tlamachtili, pero amo kej kamanaltij ixtlamatinij, kiampa amo nijchiuas ma eli san tlapik nopa kuauitl kampa kitlaijiyouiltijkej* Cristo.
18 Katli kintsontlamiltisej kiitaj kej se uiuiyotl nopa tlamachtili tlen nopa kuauitl kampa kitlaijiyouiltijkej* Cristo, pero tojuantij katli techmakixtiaj, tikitaj nopa tlamachtili tlen titematiltiaj kinextia itetikayo Dios.
19 Pampa ijkuilijtok: “Nijtlamiltis inintlalnamikilis ixtlamatinij uan amo nijchiuas cuenta tlen moiljuiaj katli tlauel momachtijtokej”.
20 ¿Kanke itstok katli tlauel ixtlamati? ¿Kanke itstok nopa escriba?* ¿Kanke itstok katli kuali kimati kenijkatsa mokamaijixnamikis ininuaya sekinok ipan ni tonali?* ¿Inmoiljuiaj Dios amo kichijtok ma eli san tlapik nopa tlalnamikilistli tlen kipiaj maseualmej?
21 Pampa Dios ika itlalnamikilis amo kinkauilik maseualmej ma kiixmatikaj ika nopa tlalnamikilistli tlen kipiaj, yaya kuali kiitak kinmakixtis katli tlaneltokaj ipan nopa tlamachtili tlen sekinok kiitak kej se uiuiyotl.
22 Pampa judíos kinekij kiitasej milagros* uan griegos kinekij ixtlamatisej.
23 Pero tojuantij titematiltiaj para Cristo kimiktijkej ipan se kuauitl, se tlamantli tlen judíos amo kuali kiitaj uan katli amo elij judíos kiitaj kej se uiuiyotl.
24 Pero katli Dios kinnotstok, maske elij judíos o griegos, kiitaj ipan Cristo monextia itetikayo uan itlalnamikilis Dios.
25 Pampa nopa tlamantli tlen iaxka Dios tlen maseualmej kinitaj kej se uiuiyotl, más tlalnamikij que maseualmej, uan nopa tlamantli tlen iaxka Dios tlen maseualmej kinitaj amo tetikej, elij más tetikej que maseualmej.
26 Noikniuaj, xikitakaj kenijkatsa inelij inmojuantij, katli Dios inmechnotstok: amo initstokej inmiakej katli maseualmej inmechitaj kej ixtlamatinij yon miakej katli inkipiaj tlanauatili yon miakej katli inmochampoyouaj* tlauel kintlepanitaj.
27 Pero Dios kintlapejpenik nopa tlamantli tlen maseualmej kinitaj kej se uiuiyotl para kinpinaualtis katli ixtlamatij. Dios kintlapejpenik tlamantli tlen maseualmej kinitaj amo tetikej para kinpinaualtis katli kipiaj chikaualistli.
28 Uan Dios kintlapejpenik nopa tlamantli tlen maseualmej kinitaj amo tleno elij uan nopa tlamantli tlen amo aka kichiua cuenta, nochi tlen amo tleno ininpati, para kinixpolos nopa tlamantli tlen kena kipiaj ininpati,
29 kiampa amo aka uelis moueyimatis iixpa Dios.
30 Pampa Dios inmechpaleuik xiitstokaj sansejko iuaya Cristo Jesús, katli technextilia Dios tlauel tlalnamiki, kinextia Dios kichiua tlen xitlauak, kichiua ma tielikaj titlatsejtseloltikej* uan tlaxtlajki para techmakixtis.
31 Kiampa panos sanse kej ijkuilijtok: “Katli moueyimati,* ma moueyimati pampa kiixmati Jehová”.*
Tlen ijkuilijtok tlatsintla
^ Kanajya kiijtouaj “toTeotsij”.
^ Ika griego “kitsajtsiliaj”.
^ Kanajya kiijtouaj “kampa ueli”.
^ O “ma inmechmakakaj tlateochiualistli tlen amo kinamiki tijselisej”.
^ O “inmechmakatok tlateochiualistli tlen amo kinamiki tijselisej”.
^ Nojkia kitokaxtiyayaj Pedro.
^ Xikita kuauitl kampa tetlaijiyouiltiaj.
^ Xikita kuauitl kampa tetlaijiyouiltiaj.
^ Ika griego “tlaneskayotl”.
^ O “inmofamilia”.
^ O “titlapajpaktikej”.
^ Kanajya kiijtouaj “motlepanita”.
