Nopa achtoui carta tlen kintitlanilijkej Cristo itokilijkauaj tlen Corinto 10:1-33
-
Tlen uejkajkia kinpanok israeleuanij techmachtia uan techpaleuia (1-13)
-
“Amo kema xikinueyichiuakaj dioses uan tlaixkopinkayomej” (14-22)
-
Imesa Jehová uan ininmesa amo kuali ajakamej (21)
-
-
Uelis tijchiuasej tlen tijnekij uan amo ma tikinyolkokokaj sekinok (23-33)
-
“Xijchiuakaj nochi para inkiuejkapantlalisej Dios” (31)
-
10 Nama, noikniuaj, nijneki xijmatikaj para totatauaj katli uejkajkia itstoyaj nejnenkej itantitla* nopa mixtli, nochi kiixkotonkej mar,
2 nochi kinatsonpoliuiltijkej kej itokilijkauaj Moisés kema itstoyaj itantitla nopa mixtli uan kema kiixkotonkej nopa mar,
3 nochi kikuajkej sanse tlakualistli tlen Dios* kinmakak
4 uan nochi kiikej* sanse atl tlen Dios kinmakak. Miakpa kiikej atl tlen nopa ueyi tetl tlen eltoya ininnechka. Nopa tetl ualayaya tlen Dios uan kiixnextik Cristo.
5 Pero, miakej amo kichijkej tlen Dios kipaktiyaya, yeka mijkej ipan uaktok tlali.
6 Uajka, tlen panok techpaleuia amo ma tijnekikaj tijchiuasej tlamantli tlen amo kuali, sanse kej inijuantij kichijkej.
7 Nojkia, amo ma tikinueyichiuakaj nopa dioses kej kichijkej se keskij tlen inijuantij, sanse kej ijkuilijtok: “Nopa maseualmej tlakuajkej uan tlaikej, teipa moketskej para moyolpakiltisej”.
8 Nojkia, amo ma tiauilnemikaj,* kej se keskij tlen inijuantij auilnenkej,* yeka san ipan se tonal mijkej 23 mil maseualmej.
9 Nojkia amo xijchiuakaj se tlamantli* para inkiitasej tlaj Jehová* kipia iyolo, kej se keskij tlen inijuantij kichijkej, uan mijkej pampa kouamej* kinkuajkej.*
10 Nojkia amo ma titetlaijiljuikaj, kej se keski tlen inijuantij kichijkej, uan se iángel Dios kinmiktik.
11 Kena, ni tlamantli kinpanok para techmachtis, uan moijkuilok para techpaleuis tojuantij, katli tiitstokej ipan ni tonali kema tlamis tlen mochijtok ipan Tlaltipaktli.*
12 Yeka, katli moiljuia kuali ijkatok, ma momokuitlaui para amo uetsis.
13 Kema inkiixnamikij se tlamantli tlen kichiua xijnekikaj xitlajtlakolchiuakaj, amo inkiixnamikij se tlamantli tlen maseualmej amo kiixnamiktokej. Pero Dios eli temachtli ika tlen kiijtoua, uan ya amo kikauas nopa kuesoli tlen inkiixnamiktokej ma uejkaua hasta ayokmo uelis inkiijiyouisej. Uajka, ya nojkia inmechpaleuis para uelis inkiijiyouisej tlen inkiixnamiktokej.
14 Yeka, noikniuaj katli niinmechiknelia, amo kema xikinueyichiuakaj dioses uan tlaixkopinkayomej.
15 Niinmechnojnotsa kej maseualmej katli tlalnamikij. Xikitakaj inmojuantij tlaj nelia tlen nikijtoua o amo.
16 Kema tikij nopa copa tlen ika titetlaskamatij, timopaleuiaj ika ieso Cristo, ¿axke? Kema tijkuaj nopa pantsi tlen tijtlapanaj, timopaleuiaj ika itlakayo Cristo, ¿axke?
17 San onka se pantsi, yeka maske timiakej, tielij kejuak san setsi totlakayo, pampa nochi tijkuaj san nopa setsi pantsi.
18 Xikitakaj tlen kichiuaj israeleuanij. Kema kikuaj tlen temakaj ipan tlaixpamitl, ¿amo eliskia kejuak tlakuaj iuaya Dios?
19 Uajka, ¿tlake nijneki nikijtos? ¿Kipia ipati se dios uan kipia ipati nopa tlamantli tlen kimaktilijtokej se dios?
20 Amo. Nijneki nikijtos para tlen maseualmej temakaj kej ofrenda,* kinmaktiliaj amo kuali ajakamej* uan amo Dios; na amo nijneki ximouikakaj ininuaya nopa amo kuali ajakamej.
21 Amo uelis inkiisej icopa Jehová* uan inincopa amo kuali ajakamej. Nojkia amo uelis intlakuasej ipan “imesa Jehová”* uan ipan ininmesa amo kuali ajakamej.
22 ¿O ‘tijnekij tijkualankamakasej Jehová’?* Tojuantij amo más titetikej que ya, ¿axke?
23 Uelis tijchiuasej nochi tlen tijnekij, pero amo nochi tepaleuia. Uelis tijchiuasej nochi tlen tijnekij, pero amo nochi teyolchikaua.
24 Amo aka ma kichiua san tlen ya kipaleuis, ma kichiua tlen kinpaleuis sekinok.
25 Xijkuakaj nochi nakatl tlen kinamakaj uan amo xitlatsintokakaj kanke kikuikej nopa nakatl para amo ma inmechyolkoko inmotlalnamikilis,
26 pampa “Jehová* iaxka Tlaltipaktli uan nochi tlen nopaya onka”.
27 Tlaj se akajya katli amo tlaneltoka inmechtlaneui xitlakuatij uan inmojuantij inkinekij inyasej, xijkuakaj nochi tlen inmechmakasej uan amo xitlatsintokakaj kanke kikuikej, para amo ma inmechyolkoko inmotlalnamikilis.
28 Pero tlaj se akajya inmechiljuia: “Ni nakatl kinmaktilijkej dioses”, uajka amo xijkuakaj para amo inkiyolkokosej katli inmechiljuik nopa, uan kiampa amo aka kiyolkokos itlalnamikilis.
29 Amo nijneki nikijtos ta motlalnamikilis, nijneki nikijtos itlalnamikilis nopa maseuali. Maske na uelis nijtlapejpenis tlen na nijnekis nijchiuas, amo nijneki nijchiuas nopa, kiampa yon se akajya kiyolkokos itlalnamikilis.
30 Tlaj nitlakua uan nijtlaskamatilia Dios tlen nijkua, ¿kinamikiskia ma nijkua tlaj nopa kichiuaskia sekinok ma nechtlaijiljuikaj?
31 Yeka, tlaj intlakuaj, inkiij se tlenijki o inkichiuaj sekinok tlamantli, xijchiuakaj nochi para inkiuejkapantlalisej Dios.
32 Amo xijchiuakaj ma moyolkokokaj judíos, griegos uan katli itstokej ipan itlanechikol Dios,
33 sanse kej na amo nijchiua san tlen na nechpaleuis, nijchiua tlen sekinok kinpaleuis, kena, nijchiua nochi ni tlamantli para nikinyolpakiltis nochi maseualmej uan kiampa uelis momakixtisej.*
Tlen ijkuilijtok tlatsintla
^ O “tlatsintla nopa”, “itsala”.
^ Kanajya kiijtouaj “toTeotsij”.
^ Kanajya kiijtouaj “kiijikej”.
^ Xikita auilnemilistli.
^ Xikita auilnemilistli.
^ Kanajya kiijtouaj “kintsakanijkej”.
^ Kanajya kiijtouaj “okuilimej”.
^ O “amo xijyejyekokaj”.
^ Kanajya kiijtouaj “tlakajkaualistli”.
^ O “demonios”.
^ O “momanauisej”.
