Nopa achtoui carta tlen kintitlanilijkej Cristo itokilijkauaj tlen Tesalónica 2:1-20
2 Noikniuaj, inmojuantij kuali inkimatij kema tiinmechpaxalojkej amo elki san tlapik.
2 Kej ya inkimatij, titlaijiyouijkej uan techchiuilijkej tlen amo kuali ipan altepetl Filipos, pero toDios* techpaleuik, yeka amo timajmajkej tiinmechmatiltisej nopa kuali tlamachtili tlen Dios, maske maseualmej tlauel kualaniyayaj.*
3 Pampa tlen tiinmechiljuiaj amo kisa ipan se istlakatili, uan amo tiinmechiljuiaj para tiinmechchiuilisej tlen amo kuali o para tiinmechkajkayauasej,
4 amo, Dios kuali techita uan techtekimakatok para titematiltisej nopa kuali tlamachtili, yeka amo tikijtouaj se tlamantli para tikinyolpakiltisej maseualmej, tikamanaltij para tijyolpakiltisej Dios, katli kiita tlen eltok ipan toyolo.
5 Kena, inmojuantij inkimatij amo kema tiinmechnojnotskej ika yejyektsitsij tlajtoli uan amo san titlachiuayayaj tiyolkualmej para xitechmakakaj tlen tijnekij. ¡Dios kiitstok nopa!
6 Nojkia amo tijtemolijtokej ma techuejkapantlalikaj maseualmej, yon inmojuantij yon sekinok, maske ueliskia tiinmechtlajtlanisej tomij pampa tielij Cristo iapóstoles.
7 Amo, tojuantij tiinmechchiuilijkej tlen kuali, kej kema se tenaj kinchichitia uan kinmokuitlauia* ikoneuaj ika tlaiknelili.
8 Tojuantij tlauel tiinmechiknelijkej, yeka timosentlalijtoyaj amo san tiinmechmatiltisej nopa kuali tlamachtili tlen Dios, nojkia hasta timikiskiaj por inmojuantij pampa tlauel tiinmechikneliaj.
9 Noikniuaj, inmojuantij temachtli inkiilnamikij kenijkatsa chikauak titekitikej uan amo timosiajketsayayaj. Kema tiinmechmatiltijkej nopa kuali tlamachtili tlen Dios, titekitikej tonaya uan tlayoua para amo tleno tiinmechtlajtlanisej.
10 Kena, kema tiitstoyaj inmouaya, amo kema titetlauelkajkej, tijchijkej tlen xitlauak uan amo tijchijkej yon se tlamantli tlen amo kuali, inmojuantij intlaneltokanij uan nojkia Dios inkiitstokej nopa.
11 Kuali inkimatij para tojuantij tiinmechtlajtolmakayayaj, tiinmechyolchikauayayaj uan tiinmechmachtiyayaj sejse tlen inmojuantij sanse kej se tetaj kichiua ika ikoneuaj,
12 para nojua ximonejnemiltikaj kej kinamiki kichiuasej katli kitekipanouaj Dios, katli inmechnotsa para inkalakisej ipan iTlanauatijkayo uan para inmechuejkapantlalis.
13 Yeka tojuantij nojkia ajachika* tijtlaskamatiliaj Dios, pampa kema inmojuantij inkiselijkej itlajtol Dios tlen tojuantij tiinmechiljuijkej, amo inkiselijkej kej inintlajtol maseualmej, inkiselijkej kej tlen nelnelia eli, kej itlajtol Dios, tlen nojkia tekititok ipan inmojuantij, katli intlaneltokaj.
14 Noikniuaj, inmojuantij inkichijkej kej nopa tlanechikolmej tlen iaxka Dios katli itstokej iuaya Cristo Jesús ipan Judea, pampa inmojuantij inmechtlaijiyouiltiaj katli euaj ipan inmoaltepe sanse kej judíos nojkia kintlaijiyouiltijkej toikniuaj.
15 Nopa judíos kimiktijkej toTeko Jesús uan teokamanalouanij,* uan techtlaijiyouiltijkej tojuantij. Nojkia amo kichiuaj tlen Dios kipaktia, uan tlen kichiuaj amo aka kipaleuia,
16 pampa amo techkauaj ma tikinmachtikaj katli amo elij judíos para uelis momakixtisej. Kiampa inijuantij nochipa kimiakiliaj inintlajtlakoljuaj. Pero ikualankayo Dios nama ya kinasitok.
17 Noikniuaj, kema monejki tiinmechkauasej* se keski tonali, amo tiitstoyaj inmouaya pero nojua tiinmechilnamikiyayaj, uan pampa tlauel tijnekiyayaj tiinmechitasej, tijchijkej kampeka kiampa tijchiuasej.
18 Yeka tijnekiyayaj tiasej tiinmechpaxalotij. Kena, na Pablo nijchijki kampeka nias hasta ome uelta uan amo san sempatsi, pero Satanás techojtsakuilik.
19 Pampa, ¿tlake tlamantli tijchiaj tijselisej, tlake kichiua ma tiyolpakikaj o tlake elis tocorona tlen techpakilismakas iixpa toTeko Jesús kema ya mokuepas? ¿Amo inelij inmojuantij?
20 Kena, inmojuantij inkichiuaj ma techuejkapantlalikaj uan inkichiuaj ma tiyolpakikaj.
Tlen ijkuilijtok tlatsintla
^ Kanajya kiijtouaj “toTeotsij”.
^ O uelis “maske tikixnamikiyayaj miak tlaouijkayotl”.
^ O “kinkuaalaxoua”.
^ Kanajya kiijtouaj “ijiksa”.
^ O “profetas”.
^ O “kema techuejkatlalijkej tlen inmojuantij”.
