Nopa ompa carta tlen kintitlanilijkej Cristo itokilijkauaj tlen Corinto 8:1-24
8 Noikniuaj, nama tijnekij xijmatikaj kenijkatsa Dios* kinextijtok ueyi iyolo ika toikniuaj* katli itstokej ipan tlanechikolmej tlen Macedonia.
2 Kema kiixnamijkej se ueyi tlaouijkayotl uan tlauel tlaijiyouijkej, inijuantij temakakej ika miak pakilistli tlen kipixtoyaj maske amo kipiayayaj miak tlamantli.
3 Pampa uelis nikijtos para nelia temakakej nochi tlen uelkej temakaj uan hasta temakakej nojua más miak tlamantli,
4 uan ininseltitsitsij techtlajtlaniyayaj ika nochi ininyolo ma tikinkauilikaj temakasej se tlenijki para kinpaleuisej toikniuaj katli Dios kiniyokatlalijtok.*
5 Uan inijuantij kichijkej hasta tlen amo timoiljuijtoyaj, pampa achtoui mosentlalijkej kitekipanosej toTeko uan nojkia techpaleuiaj tojuantij pampa kiitakej ya nopa kinektoya Dios.
6 Yeka tikiljuijkej Tito ma kitlamisentiliti tlen intemakaskiaj ika nochi inmoyolo, pampa ya ipa pejtoya kichiua nopa tekitl kampa inmojuantij.
7 Nijmati para nochi tlen inkichiuaj nelia tlauel kuali. Tlauel intlaneltokaj, tlauel kuali kej* inkamanaltij, inkimatij miak tlamantli, inkichiuaj se tlenijki ika nochi inmoyolo uan tlauel inteikneliaj sanse kej tojuantij tiinmechikneliaj. Uajka nojkia xitemakakaj tlen inkipiaj ika nochi inmoyolo.
8 Ika ni amo niinmechnauatia xijchiuakaj se tlamantli, san niinmechiljuia para xikitakaj kenijkatsa sekinok temakaj tlen kipiaj ika nochi ininyolo uan nojkia para nikitas tlaj nelia inteikneliaj.
9 Pampa inmojuantij inkimatij kenijkatsa toTeko Jesucristo kinextik ueyi iyolo ika nochi maseualmej:* ya kipiayaya nochi, pero kikajtejki nochi por inmojuantij, kiampa inmojuantij ueliskia inkipiasej miak tlamantli ika tlen yaya kikajtejki.
10 Niinmechiljuia tlen nimoiljuia. Nopa inmechpaleuis, pampa ya kipia se xiuitl inkipeualtijkej ni tekitl uan hasta nojkia inkinextijkej tlauel inkinekiyayaj inkichiuasej.
11 Yeka xijtlamiltikaj nopa tekitl tlen inkipeualtijkej, uan kiampa tlen inuelisej intemakasej, kinextis inkichiuaj ika nochi inmoyolo.
12 Pampa kema se akajya temaka se tlenijki ika nochi iyolo, nopa tlauel kiyolpaktia Dios, pampa ya kineki ma temaka tlen kipia uan amo ma temaka tlen amo kipia.
13 Uan amo nijneki inmojuantij ouij xijmatikaj inkichiuasej nopa uan sekinok amo.
14 San nijneki xitlapaleuikaj para amo aka ma kipolo se tlenijki. Kiampa tlen inmojuantij más inkipiaj kinpaleuis katli amo kinaxilia, uan nojkia tlen inijuantij más kipiaj inmechpaleuis ika tlen inmechpoloua, uan kiampa nochi inkipiasej sanse tlamantli.
15 Sanse kej ijkuilijtok: “Katli kipiayaya miak amo tleno mokauik, uan katli kipiayaya kentsi amo tleno kipolok”.
16 Tijtlaskamatiliaj Dios pampa kichijki Tito ma motekipacho ika inmojuantij sanse kej tojuantij techtekipachoua tlen inmechpano.
17 Ya amo san kichijtok tlen tikiljuijkej, nojkia tlauel kinekiyaya kichiuas tlen tijnauatijkej, yeka ika ipakilis yas inmechpaxaloti.
18 Nojkia, iuaya Tito tijtitlanij nopa toikni katli nochi tlanechikoli kuali kamanaltij tlen ya pampa tekiti para kimoyauas nopa kuali tlamachtili.
19 Uan amo san ya nopa; ipan tlanechikoli nojkia kitekimakakej para ma yaui touaya tijxexelotij tlen intemakakej ika nochi inmoyolo, para inkiuejkapantlalisej toTeko uan para tijnextisej nelia techpaktia titlapaleuisej.
20 Kiampa amo aka uelis techijilnamikis pampa amo kuali tijxexelouaj tlen intemakakej ika nochi inmoyolo.
21 Pampa ‘tijchiuaj kampeka para amo titlakajkayauasej ika nochi tlen tijchiuaj iixpa Jehová* uan nojkia ininixpa maseualmej’.
22 Nojkia, ininuaya tijtitlanij seyok toikni, katli miakpa tikitstokej kenijkatsa tekiti uan ipan miak tlamantli kinextijtok kipaktia kuali kichiuas iteki. Pero nama nojua más kuali kichiuas iteki pampa tlauel motemachia ipan inmojuantij.
23 Tlaj se akajya amo motemachia ipan Tito, xijmatikaj para sansejko titekitij uan eli se tlapaleuijketl katli tlatekipanoua para inmechpaleuis. O tlaj se akajya amo motemachia ipan toikniuaj, xijmatikaj inijuantij elij apóstoles tlen tlanechikoli uan kiuejkapantlaliaj Cristo.
24 Uajka, xijnextikaj nelia inkinikneliaj uan nojkia xikinnextilikaj nochi tlanechikoli kenke kuali tikamanaltij tlen inmojuantij.
Tlen ijkuilijtok tlatsintla
^ Kanajya kiijtouaj “toTeotsij”.
^ O “kinmakatok tlateochiualistli tlen amo kinamiki tijselisej”.
^ O “tlatsejtseloltikej”.
^ O “tlauel inyajatij”.
^ O “temakak tlateochiualistli tlen amo kinamiki tijselisej”.
