Nopa carta tlen kintitlanilijkej hebreos 10:1-39
-
Amo tepaleuia kema temaktiliaj tlapialmej (1-4)
-
“Nopa Tlanauatili eli kej se ekauili” (1)
-
-
“Cristo san temakak se ofrenda para nochipa” (5-18)
-
“Se ojtli tlen yankuik uan yoltok” (19-25)
-
“Amo ma tijkauakaj timonechikosej” (24, 25)
-
-
Tlauel amo kuali tlaj ya tijmajtokej tlen melauak uan nojua tijnekij tijchiuasej se tlajtlakoli (26-31)
-
Moneki timotemachisej ipan Dios uan titlaneltokasej para uelis tikijiyouisej (32-39)
10 Pampa nopa Tlanauatili eli kej se ekauili* tlen nopa kuali tlamantli tlen teipa ualas, pero amo nelnelia eli nopa. Yeka ika nopa tlapialmej tlen temaktiliaj sejse xiuitl amo kema uelis* kinkixtilis tlajtlakoli katli monechkauiaj kampa Dios.*
2 Tlaj amo kiampa eliskia, ¿monektoskia nojua ma temaktilikaj tlapialmej? Amo, pampa katli kichiuaj nopa tekitl tlen ika kiueyichiuaj Dios mochijtoskiaj tlapajpaktikej uan inintlalnamikilis ayokmo kinyolkokoskia pampa tlajtlakolejkej.
3 Pero amo, sejse xiuitl kiilnamikij inintlajtlakoljuaj ika nopa tlapialmej tlen temaktiliaj,
4 pampa inineso torojmej uan chivojmej amo uelis kiixpolos tlajtlakoli.
5 Yeka kema Cristo ualajki ipan Tlaltipaktli, kiiljuik Dios: “‘Amo tijnejki ma mitsmaktilikaj tlapialmej yon ofrendas,* pero tinechsenkauilik se notlakayo.
6 Amo mitspaktik nopa ofrendas tlatlatili yon nopa ofrendas tlen ika kiixtsakuaj tlajtlakoli’.
7 Uajka nikijtok: ‘NoDios, xikita, niualajtok para nijchiuas tlen ta tijneki (ipan nopa amamimili ijkuilijtok tlen na)’”.
8 Achtoui kiijtoua: “Amo tijnejki yon mitspaktik ma mitsmaktilikaj tlapialmej yon ofrendas, yon ofrendas tlatlatili yon ofrendas tlen ika kiixtsakuaj tlajtlakoli”, tlen eli tlamantli tlen temaktiliaj kej kiijtoua nopa Tlanauatili.
9 Uan teipa kiijtoua: “Xikita, niualajtok para nijchiuas tlen ta tijneki”. Ya kiixpoloua tlen achtouia eltoya para kitlalis nopa seyok tlamantli.
10 Yeka, pampa Dios kiampa kinejki, tojuantij timochijtokej titlatsejtseloltikej ika itlakayo Jesucristo, katli motemaktilik san sempatsi uan para nochipa.
11 Nojkia, nochi sacerdotes mojmostla yauij kampa kinmelaua para kichiuasej nopa tekitl tlen ika kiueyichiuasej Dios uan para miakpa temaktilisej nopa tlapialmej tlen ipa temaktiliaj tlen amo kema uelij senkistok kitlamiixpolouaj tlajtlakoli.
12 Pero Cristo san temakak se ofrenda para nochipa tlen ika kiixpolok tlajtlakoli uan moseuik ika imanejmak Dios,
13 uan desde nopa tonali mochixtok ma kintlalikaj ikualankaitakauaj kej pilbancojtsi kampa kitlalis iikxi.
14 Pampa san ika setsi ofrenda tlen temaktilik, kintlamikixtilijtok tlajtlakoli para nochipa katli Dios kiniyokatlalia.*
15 Uan ichikaualis Dios* nojkia techmatiltia para temachtli nopa tlamantli, pampa achtoui kiijtok:
16 “‘Ya ni elis nopa tlajtolsenkaualistli* tlen nijchiuas ininuaya kema ya panotos nopa tonali’, kiijtoua Jehová.* ‘Nijtlalis notlanauatiljuaj ipan ininyolo uan nikijkuilos ipan inintlalnamikilis’”.
17 Teipa kiijtoua: “Uan ayokmo kema nikilnamikis inintlajtlakoljuaj yon nopa amo kuali tlamantli* tlen kichijkej”.
18 Uajka kema ya kintlapojpoljuijkej, ayokmo moneki se ofrenda por inintlajtlakoljuaj.
19 Yeka noikniuaj, pampa timotemachiaj tijtekiuisej nopa ojtli tlen techpaleuia tikalakisej kampa tlatsejtseloltik ika Jesús ieso,
20 se ojtli tlen yankuik uan yoltok, tlen yaya kitlapok para tojuantij kema kiixkotonki nopa cortina, tlen kiijtosneki itlakayo,
21 uan pampa tijpiaj se ueyi sacerdote katli tlayakana ipan ichaj Dios,
22 ma timonechkauikaj ika nochi toyolo uan kuali ma titlaneltokakaj, pampa toyolo mopajpajki para ayokmo techyolkokos totlalnamikilis uan totlakayo kipajpajkej ika atl tlen tsalantik.
23 Amo ma tijkaxanilikaj titematiltisej ininixpa sekinok nopa tlamantli tlen tijchiaj tijselisej uan amo ma timoiljuijtokaj tlaj kena moaxitis o amo, pampa katli kitenkajki nopa tlamantli eli temachtli.
24 Uan kuali ma timoiljuikaj kenijkatsa timopaleuisej* se ika seyok para timoyololinisej tijnextisej tlaiknelili uan tijchiuasej tlen kuali,
25 uan amo ma tijkauakaj timonechikosej kej se keskij katli kiampa momajtokej kichiuaj. Más kuali ma timoyolchikauakaj se ika seyok, uan más pampa tikitaj monechkauia nopa tonali.
26 Pampa tlaj ya tijmajtokej nopa tlamachtili tlen melauak uan nojua tijnekij tijchiuasej se tlajtlakoli, ayokmo onka yon se tlamantli tlen uelis temaktilisej para ma techtlapojpoljuikaj totlajtlakoljuaj.
27 San uelis tijchiasej ika miak majmajtli ma techtlatsakuiltikaj uan tijchiasej ikualankayo Dios tlen eli kej se tlitl tlen kintlamitlatis katli kiijixnamikij.
28 Nochi katli kiixpanoj iTlanauatil Moisés kinmiktiaj ika tlen kiijtouaj omej o eyij testigos uan amo kintlasojtlaj.
29 Uajka, tlaj se akajya mokejketstok ipan iKone Dios, amo kipatiitstok nopa estli tlen ika mochijki se tlajtolsenkaualistli uan tlen ika Dios kichiua tlatsejtseloltik, uan kiixpanotok uan kiuejkamajkajtok ichikaualis Dios tlen ika ya kinextia ueyi iyolo ika nochi maseualmej,* ¿amo inmoiljuiaj más kinamiki ma kitlatsakuiltikaj?
30 Pampa tikixmatij katli kiijtok: “Na nimomakuepas; na nikinkuepilis tlen kinamiki kiselisej”. Uan nojkia: “Jehová* kitlajtolsenkauas ialtepe”.
31 Nelia tlauel temajmati tiuetsis imako Dios katli yoltok.
32 Pero ajachika* xikilnamikikaj nopa tonali tlen ya panok, kema ya inkiselijtoyaj nopa tlauili uan inkiixnamijkej miak tlaouijkayotl maske tlauel intlaijiyouiyayaj.
33 Kemantika inmechuikayayaj ininixpa maseualmej para inmechtlaijiljuisej uan inmechtlatsakuiltisej,* uan kemantika initstoyaj ininuaya katli kej nopa kinchiuiliyayaj.
34 Pampa inmojuantij inkinextijkej inkintlasojtlaj katli kintsaktoyaj uan ika pakilistli inkinejkej ma inmechkuilikaj tlen inkipixtoyaj, pampa inkimatij inmechaxkatisej tlen más kuali uan uejkauas para nochipa.
35 Yeka, amo ximajmauikaj inkamanaltisej, pampa inkiselisej se kuali tlaxtlauili.
36 Pampa inmojuantij moneki inkiijiyouisej nochi, kiampa kema ya inkichijtosej tlen Dios kineki, inkiselisej tlen ya kitenkajtok.
37 Pampa san “ika se kentsi tonali”, “asiki katli uala, uan amo uejkauas”.
38 “Pero notlatekipanojka katli kichiua tlen xitlauak itstos pampa tlaneltoka”, uan “tlaj moikankuepas,* na amo kuali nikitas”.
39 Pero tojuantij amo tielij kej katli moikankuepaj uan yeka kintsontlamiltiaj, tielij kej katli tlaneltokaj uan kimanauiaj ininnemilis.
Tlen ijkuilijtok tlatsintla
^ Kanajya kiijtouaj “akauilotl”.
^ O uelis “maseualmej amo kema uelisej”.
^ Kanajya kiijtouaj “toTeotsij”.
^ Kanajya kiijtouaj “tlakajkaualistli”.
^ O “katli mochiuaj tlatsejtseloltikej”.
^ O “espíritu santo”.
^ O “nopa kamanali”.
^ Ika griego “tlamantli tlen ika kiijixnamikij tlanauatili”.
^ O “ma timotekipachokaj”.
^ O “tlen ika temaka tlateochiualistli tlen amo kinamiki tijselisej”.
^ Kanajya kiijtouaj “ijiksa”.
^ O “inmechtlaijiyouiltisej”.
^ O “motsinkixtis”.
