Nopa carta tlen kintitlanilijkej hebreos 5:1-14
5 Kema se tlakatl kitlapejpeniaj kej sumo sacerdote, kitekimakaj para ma kinpaleui maseualmej kema kiueyichiuaj Dios,* para temaktilis ofrendas* uan tlapialmej por inintlajtlakoljuaj.
2 Ya uelis kintlasojtlas katli amo tleno kimatij uan yeka mokuapolouaj, pampa ya nojkia eli tlajtlakole,
3 uan yeka moneki temaktilis ofrendas por itlajtlakoljuaj sanse kej kichiua ika inintlajtlakoljuaj maseualmej.
4 Yon se tlakatl amo uelis iselti motekitlalis, san kiselia nopa tekitl kema Dios kitekitlalia, sanse kej kichijki ika Aarón.
5 Nojkia, Cristo amo mouejkapantlalik iselti para motekitlalis kej sumo sacerdote, elki Dios katli kiuejkapantlalik uan kiiljuik: “Ta tinokone; nama nimochijtok motata”.
6 Nojkia pano kej kiijtoua sejkanok* ipan iTlajkuilol Dios: “Ta tieli sacerdote para nochipa sanse kej elki Melquisedec”.
7 Kema Cristo itstoya ipan Tlaltipaktli, chikauak kitlajtlaniyaya hasta kitsajtsiliyaya uan chokayaya para kiiljuis ma kipaleui katli ueliskia kimakixtis* tlen mikilistli; uan kimakasiyaya Dios, yeka ya kitlakakilik.
8 Maske eliyaya ikone, ika tlen kiijiyouik kiyekok kenijkatsa kineltokas Dios.
9 Uan kema ya kichijtoya nochi tlen kinauatijkej, kitekimakakej para ma kinmakixti para nochipa nochi katli kineltokaj,
10 pampa Dios kitekitlalik kej sumo sacerdote sanse kej elki Melquisedec.
11 Nojua onka miak tlamantli tlen uelis tikijtosej tlen Cristo, pero tijmatij ouij tikixtomasej pampa inmojuantij amo nima inkikuamachiliaj.
12 Pampa maske nama ya kinamikiskia inelisej intlamachtianij, sampa moneki se akajya ma inmechmachti tlen achtoui inkiyekojkej ipan itlajtol Dios. Sampa kejuak moneki ma inmechmakakaj leche uan amo tlakualistli.
13 Uan katli nojua motlamaka ika leche amo kiixmati itlajtol Dios tlen techmachtia tlen xitlauak, pampa nojua eli se konetl.
14 Pero tlakualistli eli para maseualmej katli kipiaj tetik inintlaneltokilis,* katli miakpa kitekiuijtokej inintlalnamikilis uan kimachtijtokej para kiitas tlake kuali uan tlake amo kuali.
Tlen ijkuilijtok tlatsintla
^ Kanajya kiijtouaj “toTeotsij”.
^ Kanajya kiijtouaj “tlakajkaualistli”.
^ Kanajya kiijtouaj “oksejko”, “sejkoyok”.
^ O “kimanauis”.
^ O “kuali tlaneltokaj”.
