Hechos (Tlen apóstoles kichijkej) 20:1-38
20 Kema nopa maseualmej moyoltlalijkej, Pablo tlanauatik ma kinnotsatij Jesús itokilijkauaj. Kinyolchikajki uan kinnauatijtejki,* teipa kistejki uan yajki Macedonia.
2 Kema ya panotoya ipan sejse tlen nopa tlali uan ya kinyolchikajtoya Jesús itokilijkauaj katli itstoyaj nopaya, yajki Grecia.
3 Nopaya mokajki eyi metstli, pero kema nechka yaskia ipan barco para Siria, judíos moiljuijkej kenijkatsa kimiktisej, yeka sampa tlakuepilik ika tlali Macedonia.
4 Uan iuaya yajkej Sópater ikone Pirro katli eua Berea, Aristarco uan Segundo katli euaj Tesalónica, Gayo katli eua Derbe, Timoteo, uan nojkia Tíquico uan Trófimo katli euaj tlali Asia.
5 Inijuantij tlayakankej uan techchiatoj Troas.
6 Kema ya panotoya nopa Iljuitl tlen Pantsi tlen Amo Kipia Levadura,* tojuantij tiajkej ipan barco para Filipos uan kema panok makuili tonali, timopantitoj Troas. Nopaya timokajkej chikome tonali.
7 Ipan nopa achtoui tonali tlen nopa semana, kema timosentilijtoyaj para titlakuasej, Pablo pejki kinkamanaljuia katli nopaya mosentilijtoyaj, pampa ualmostla* kisteuaskia. Uejkajki tlamachtia hasta tlajkoyoual,
8 uan yeka kitlalijtoyaj miak tlauili ipan nopa cuarto kampa timosentilijtoyaj, tlen eltoya uejkapa.
9 Se telpokatl katli itoka Eutico, moseuijtoya ventanajteno uan kitlanki kochistli kema Pablo tlamachtiyaya, yeka mokuatepexiuik desde eyi piso, uan kema kitlananatoj, ya miktoya.
10 Pero Pablo temok, motlankuaketski uan kinajnauajki. Uan kiijtok: “Amo ximomajmatikaj, amo miktok”.
11 Teipa tlejkok, kitlajkoitak nopa pantsi uan pejki tlakua. Nojua uejkajki kinkamanaljuia hasta kema tlaneski, uan teipa kistejki.
12 Uajka kiuikakej nopa telpokatl uan tlauel yolpaktoyaj pampa moyolkuitoya.
13 Tojuantij titlejkokej ipan barco uan tiajkej Asón, kampa tijkuitikisaskiaj Pablo. Ya techiljuik kiampa ma tijchiuakaj pampa kinekiyaya ikxinejnemis hasta nopaya.
14 Uajka, kema techasito ipan altepetl Asón, tijtlejkoltijkej ipan barco uan tiajkej Mitilene.
15 Ualmostla tikistejkej nopaya uan timoketstikisatoj iixmelak Quíos. Ika ualmostla timoketskej se kentsi ipan Samos, uan ipan seyok tonali tiasitoj Mileto.
16 Pablo amo kinejki panos Éfeso pampa amo kinekiyaya uejkauas ipan tlali Asia. Moijisiuiltiyaya pampa kinekiyaya asiti Jerusalén, tlaj ueliskia, ipan Iljuitl tlen Pentecostés.
17 Kema tiitstoyaj Mileto, tlatitlanki ma kinnotsatij ueuejtlakamej tlen tlanechikoli tlen Éfeso.
18 Kema mopantijkej iuaya, kiniljuik: “Inmojuantij kuali inkimatij kenijkatsa nimonejnemiltijtok kema niitstoya inmouaya, desde nopa achtoui tonali kema niasiko ipan tlali Asia.
19 Nieli kej se tlatekipanojketl uan amo nimoueyimajtok kema nijtekipanojtok toTeko, uan nijtoyajtok miak noixayo uan tlauel nitlaijiyouijtok pampa judíos kinektokej nechmiktisej.
20 Maske kiampa panok, amo nimajmajki niinmechiljuis nochi tlen ueliskia inmechpaleuis, nitlamachtik kampa itstokej miakej uan kajkalpa.
21 Uan kuali* nikinixtomilik nochi judíos uan griegos monekiyaya ma moyolkuepakaj, ma kiueyichiuakaj* Dios* uan ma tlaneltokakaj ipan toTeko Jesús.
22 Pero nama ichikaualis Dios* kichiua ma nia Jerusalén, maske amo nijmati tlake nechpanos nopaya,
23 pero ipan sejse altepetl kampa nipanotia, ichikaualis Dios miakpa nechmatiltia nechtsakuasej uan nechtlaijiyouiltisej.
24 Pero amo nijmakasi nimikis, pampa nijneki nijtlamiltis tlen moneki nijchiuas* uan nojkia nijtlamiltis nopa tekitl tlen toTeko Jesús nechmakatok. Nopa tekitl eli senkistok nitematiltis nopa kuali tlamachtili kampa kinextia Dios kipia ueyi iyolo.*
25 ”Pero nama nijmati ayokmo sampa nechitas yon se tlen inmojuantij katli niinmechmatiltik iTlanauatijkayo Dios.
26 Yeka niinmechnotski, pampa nijneki xijmatikaj ayokmo notlajtlakol tlaj se akajya mikis,
27 pampa amo nimajmajki niinmechiljuis nochi tlen Dios kiijtojtok kichiuas.
28 Ximomokuitlauikaj uan xikinmokuitlauikaj nochi ipilborregojuaj Dios, kej kichiua se tlapialmokuitlauijketl, pampa ichikaualis Dios inmechtekimakatok kej tlayakananij* para inkinmokuitlauisej katli itstokej ipan itlanechikol, katli ya kinkojki ika iKone ieso.
29 Nijmati kema ayokmo niitstos inmouaya, kalakisej kampa inmojuantij katli elisej kej lobos katli tlauel mosisiniaj uan amo kiniknelisej ipilborregojuaj Dios,
30 uan ipan tlanechikoli kisasej tlakamej katli ayokmo kiijtosej nochi tlen melauak, pampa kinekisej kinkajkayauasej itokilijkauaj Jesús para ma kintokilikaj inijuantij.
31 ”Yeka, kuali xitlachixtokaj uan xikilnamikikaj para eyi xiuitl tonaya uan youali, niinmechtlalnamiktik sejse tlen inmojuantij uan hasta nichokayaya.
32 Uan nama niinmechkaua imako Dios uan ipan itlajtol kampa kiijtoua Dios kinextia ueyi iyolo,* nopa inmechpaleuis kuali xitlaneltokakaj uan inmechmakas tlen ya inmechtenkauilijtok, inmojuantij katli inmechtlapejpenijtok.
33 Amo nikixtokatok plata yon oro yon iyoyo se akajya.
34 Inmojuantij kuali inkimatij ika nomax nitekititok para nijpias tlen moneki para na uan katli nemij nouaya.
35 Ipan nochi tlamantli niinmechnextilijtok moneki chikauak intekitisej para inkinpaleuisej katli moneki ma kinpaleuikaj uan nojkia moneki inkiilnamikisej tlen kiijtok toTeko Jesús: ‘Más tiyolpakis kema titemakas se tlenijki uan amo kej kema tijselis’”.
36 Kema tlanki kamanalti, motlankuaketski ininuaya uan momaijtok.*
37 Uajka nochi pejkej chokaj, kinajnauajkej Pablo uan kitsoponijkej ika miak tlaiknelili,
38 pampa tlauel motekipachouayayaj, uan más pampa kiniljuijtoya ayokmo kiitaskiaj. Teipa, yajkej iuaya hasta kampa barco.
Tlen ijkuilijtok tlatsintla
^ Kanajya kiijtouaj “kinmakajki”.
^ Kanajya kiijtouaj “Tlasonejkayotl”.
^ Kanajya kiijtouaj “mostlaijki”, “kema toniliskia”.
^ O “senkistok”.
^ O “ma mokuepakaj ika”.
^ Kanajya kiijtouaj “toTeotsij”.
^ O “espíritu santo”.
^ Ika griego “nitlamis nimotlalos”.
^ O “temaka tlateochiualistli tlen amo kinamiki tijselisej”.
^ O “katli tlamokuitlauiaj uan temanauiaj”.
^ O “temaka tlateochiualistli tlen amo kinamiki tijselisej”.
^ Kanajya kiijtouaj “motlatlajtik”.
