Tlen kiijkuilok Juan 8:12-59
8 12 Uajka Jesús sampa kinkamanaljuik. Kiijtok: “Na nieli kej se tlauili tlen kintlauilia maseualmej. Katli nechtokilis amo kema nemis ipan tsintlayouilotl, ya kipias nopa tlauili tlen temaka nemilistli”.
13 Uan nopa fariseos* kiiljuijkej: “San tikamanalti kuali tlen ta, yeka tlen tikijtoua amo eli melauak”.*
14 Jesús kinnankilik: “Maske nikamanalti kuali tlen na, tlen nikijtoua eli melauak, pampa na nijmati kanke niualajki uan kanke nia. Pero inmojuantij amo inkimatij kanke niualajki yon kanke nia.
15 Inmojuantij intetlajtolsenkauaj kej kichiuaj maseualmej; na amo aka nijtlajtolsenkaua.
16 Uan tlaj nitetlajtolsenkauaskia, nijchiuaskia kej kinamiki, pampa amo noselti niitstok, noTata katli nechualtitlanki itstok nouaya.
17 Nojkia, ipan inmoTlanauatil ijkuilijtok: ‘Tlen kiijtouaj omej maseualmej eli melauak’.
18 Na nikamanalti kuali tlen na, uan noTata katli nechualtitlanki nojkia kamanalti kuali tlen na”.
19 Uajka kitlatsintokijkej: “¿Kanke itstok moTata?”. Uan Jesús kinnankilik: “Inmojuantij amo innechixmatij yon inkiixmatij noTata. Tlaj innechixmatiskiaj, nojkia inkiixmatiskiaj noTata”.
20 Kiijtok ni tlamantli kema tlamachtiyaya ipan teokali uan itstoya nechka kampa pilcajontsitsij kampa kitemayayaj tomij. Pero amo aka kiitskik pampa ayamo asiyaya ihora.
21 Uajka sampa kiniljuik: “Na nias, uan inmojuantij innechtemosej, pero inmikisej ipan inmotlajtlakol. Kampa na nia, inmojuantij amo uelis inyasej”.
22 Nopa judíos pejkej kiijtouaj: “¿Uelis momiktis? Pampa kiijtoua ‘Kampa na nia, inmojuantij amo uelis inyasej’”.
23 Uajka Jesús kiijtok: “Inmojuantij ineuaj nikaj tlatsintla; na nieua ne uejkapa. Inmojuantij ineuaj ipan ni Tlaltipaktli, pero na amo.
24 Yeka niinmechiljuik ‘Inmikisej ipan inmotlajtlakoljuaj’. Pampa tlaj amo inkineltokaj na nieli katli nikijtoua, inmikisej ipan inmotlajtlakoljuaj”.
25 Uajka pejkej kitlatsintokiaj: “¿Uan ta ajkia tieli?”. Jesús kinnankilik: “San nimotonalpolos tlaj niinmechiljuis.
26 Nijpia miak tlamantli tlen moneki nikijtos tlen inmojuantij uan onka miak tlamantli tlen moneki nijxitlauas. Katli nechualtitlanki kiijtoua tlen melauak, uan na nikijtoua ipan Tlaltipaktli sanse tlamantli tlen nijkajki kiijtoua”.
27 Pero inijuantij amo kikuamachilijkej kamanaltiyaya tlen toTata.
28 Uajka Jesús kiijtok: “Kema inkitlananasej* katli eli iKone se Maseuali,* inkimatisej na nieli katli nikijtoua, uan amo nijchiua yon se tlamantli noselti, san nikijtoua tlen noTata nechmachtik.
29 Uan katli nechtitlanki itstok nouaya; amo nechkajtok noselti, pampa na nochipa nijchiua tlen ya kipaktia”.
30 Kema kiijtouayaya ni tlamantli, miakej tlaneltokakej ipan ya.
31 Uajka Jesús kiniljuik nopa judíos katli kineltokatoyaj: “Tlaj nochipa inkineltokaj notlajtol, nelnelia inelij notokilijkauaj;
32 inkimatisej tlen melauak, uan tlen melauak inmechtojtomas”.
33 Inijuantij kinankilijkej: “Tielij iteipaixuiuaj Abrahán, uan amo kema techkojtok se akajya para ma tijtekipanokaj. ¿Kenke tikijtoua ‘Inmechtojtomasej’?”.
34 Jesús kinnankilik: “Nelia niinmechiljuia, nochi katli tlajtlakolchiuaj kitekipanouaj tlajtlakoli.
35 Nojkia, se katli kikouaj kej tlatekipanojketl amo mokaua nochipa ipan ichaj iteko; pero ikone kena mokaua para nochipa.
36 Yeka, tlaj iKone Dios inmechtojtomas, nelnelia inmajkajtosej.
37 Na nijmati inelij iteipaixuiuaj Abrahán; pero inkinekij innechmiktisej pampa amo inkiseliaj tlen nitlamachtia.
38 Na nikijtoua tlen nikitak kema niitstoya iuaya noTata, pero inmojuantij inkichiuaj tlen inkikakij kiijtoua inmotata”.
39 Inijuantij kiiljuijkej: “Totata eli Abrahán”. Jesús kiniljuik: “Tlaj ineliskiaj ikoneuaj Abrahán, inkichiuaskiaj sanse kej ya kichijki.
40 Pero na, katli niinmechiljuijtok tlen melauak tlen nijkajki kiijtok Dios,* inkinekij innechmiktisej. Abrahán amo kiampa kichijki.
41 Inmojuantij inkichiuaj sanse kej inmotata kichiua”. Uan inijuantij kinankilijkej: “Tojuantij amo tielij tiikoneuaj* tlen seyok tetaj;* tijpiaj san se toTata, Dios”.
42 Jesús kinnankilik: “Tlaj Dios eliskia inmotata, inmojuantij innechikneliskiaj, pampa Dios nechualtitlanki, yeka nikaj niitstok. Amo niualajki san pampa na nijnejki, niualajki pampa ya nechualtitlanki.
43 ¿Kenke amo inkikuamachiliaj tlen nikijtoua? Pampa amo inkinekij inkikakisej notlajtol.*
44 Inmojuantij inelij ikoneuaj inmotata Diablo, uan inkinekij inkichiuasej tlen ya kineki. Kema pejki kiijixnamiki Dios, mochijki se temiktijketl. Kitlauelkajki tlen melauak pampa tlen melauak amo eltok ipan iyolo. Kema kiijtoua se istlakatili, kamanalti kej ya eli, pampa eli se istlakatiketl uan nochi istlakatili peua ipan ya.
45 Pero na amo innechneltokaj, pampa niinmechiljuia tlen melauak.
46 ¿Ajkia tlen inmojuantij uelis kinextis nijchijtok se tlajtlakoli? Tlaj nikijtoua tlen melauak, ¿kenke amo innechneltokaj?
47 Katli elij ikoneuaj Dios kikakij tlen Dios kiijtoua. Yeka inmojuantij amo inkitlakakiliaj: pampa amo inelij ikoneuaj Dios”.
48 Kema judíos kikajkej nopa, kiiljuijkej: “Nelia tlen tikijtouayayaj ‘Tieli se samariaejketl uan tijpia se amo kuali ajakatl’”.*
49 Jesús kinnankilik: “Na amo nijpia yon se amo kuali ajakatl. Na nijtlepanita noTata, uan inmojuantij amo innechtlepanitaj.
50 Pero na amo nijtemojtinemi ma nechuejkapantlalikaj; eli Dios katli kineki ma nechuejkapantlalikaj, uan ya kiijtoua ajkia kinamiki kiuejkapantlalisej.
51 Nelia niinmechiljuia, tlaj se akajya kineltoka tlen nikijtoua, amo kema mikis”.
52 Nopa judíos kiiljuijkej: “Nama kuali tijmatij tijpia se amo kuali ajakatl. Abrahán mijki uan nojkia teokamanalouanij,* pero ta tikijtoua ‘Tlaj se akajya kineltoka tlen nikijtoua, amo kema mikis’.
53 ¿Tieli más ueyi que totata Abrahán, katli mijki? Teokamanalouanij nojkia mijkej. ¿Ajkia timoiljuia tieli?”.
54 Jesús kinnankilik: “Tlaj noselti nimouejkapantlaliskia, noueyitilis san tlapik eliskia. Katli nechuejkapantlalia eli noTata, katli inmojuantij inkiijtouaj eli inmoDios.
55 Pero inmojuantij amo inkiixmatij, na kena nikixmati, uan tlaj nikijtoskia amo nikixmati, niistlakatiskia kej inmojuantij. Pero kena nikixmati uan nijneltoka tlen kiijtoua.
56 Inmotata Abrahán tlauel yolpakiyaya kema moiljuiyaya kiitaskia nopa tonali kema niualaskia, uan kiitak uan yolpajki”.
57 Uajka judíos kiiljuijkej: “Ayamo tijpia yon 50 xiuitl, ¿uan tikitstok Abrahán?”.
58 Jesús kiniljuik: “Nelnelia niinmechiljuia, kema Abrahán ayamo tlakatiyaya, na ipa niitstoya”.
59 Uajka kitlanankej tetl para kimajkauilisej Jesús, pero ya motlatik* uan kiski tlen teokali.
Tlen ijkuilijtok tlatsintla
^ O “ipati”.
^ Kineki kiijtos kimiktisej ipan se kuauitl.
^ Xikita katli eli iKone se Maseuali.
^ Kanajya kiijtouaj “toTeotsij”.
^ O “tiichtakakonemej”.
^ Ika griego “amo titlakatkej tlen auilnemilistli”. Ika griego pornéia. Xikita auilnemilistli.
^ Kanajya kiijtouaj “nokamanal”.
^ O “demonio”.
^ O “profetas”.
^ Kanajya kiijtouaj “miyanki”.
