Tlen kiijkuilok Lucas 13:1-35
-
Timoyolkuepasej o techtsontlamiltisej (1-5)
-
Neskayotl tlen nopa higokuauitl tlen amo tlaki (6-9)
-
Kichikaua ipan sábado se siuatl katli kuitlapanuijkoltik (10-17)
-
Neskayotl tlen iyol mostaza uan levadura (18-21)
-
Tijchiuasej kampeka tikalakisej ipan puerta tlen pitsaktsi (22-30)
-
Herodes, “nopa kayochi” (31-33)
-
Jesús kiyolkokoua tlen kipanos Jerusalén (34, 35)
13 Ipan nopa tonali, se keskij katli nopaya itstoyaj kipouilijkej Jesús para Pilato kinmiktijtoya se keskij galileaeuanij katli kimaktiliyayaj Dios* se keskij tlapialmej.
2 Kema Jesús kikajki nopa, kiniljuik: “¿Inmoiljuiaj nopa galileaeuanij kinpanok nopa pampa eliyayaj más tlajtlakolejkej que nochi sekinok galileaeuanij?
3 Na niinmechiljuia amo. Uan tlaj amo inmoyolkuepaj, nochi inmojuantij nojkia inmechtsontlamiltisej.
4 O nopa 18 katli mijkej kema nopa uejkapantik kali tlen Siloam uetski ininixko,* ¿inmoiljuiaj eliyayaj más tlajtlakolejkej que nopa sekinok katli itstokej ipan Jerusalén?
5 Na niinmechiljuia amo. Uan tlaj amo inmoyolkuepaj, nochi inmojuantij nojkia inmechtsontlamiltisej sanse kej inijuantij”.
6 Uajka kiniljuik ni neskayotl: “Se tlakatl katli kipixtoya se higokuauitl kampa kitoktoya uvas, yajki kitemoto itlajka, pero amo tleno kipantik.
7 Teipa kiiljuik nopa tlakatl katli kimokuitlauiyaya kampa kitoktoya uvas: ‘Xikita, nijuika eyi xiuitl nikitstinemi tlaj kipia itlajka ni higokuauitl, pero amo tleno nijpantijtok. ¡Xijtsonteki! Pampa san tlapik nikaj toktok’.
8 Ya kinankilik: ‘Noteko, xijkaua ma ijkato seyok xiuitl, nijtlapoxonilis yaualtik uan nijtemilis tlapialkuitlatl.*
9 Tlaj teipa tlakis, kualtitok; pero tlaj amo, tijtsontekis’”.
10 Se sábado, Jesús tlamachtiyaya kampa tlaueyichiuayayaj judíos.
11 Nopaya itstoya se siuatl katli se amo kuali ajakatl* kikokolismakatoya 18 xiuitl. Tlauel kuitlapanuijkolijtoya uan amo ueliyaya moxitlaua.
12 Kema Jesús kiitak, kinechkauik uan kiiljuik: “Aui, ya timochikajki”.
13 Kitlalik imax ipani, uan nimantsi moxitlajki uan pejki kiueyichiua Dios.
14 Kema katli tlayakanayaya kampa tlaueyichiuaj judíos kiitak nopa, amo kipaktik pampa Jesús techikajtoya ipan sábado, uan kiniljuik nopa maseualmej: “Onka chikuasej tonali para titekitisej; uajka xiualakaj para inmechchikauasej ipan nopa tonali, uan amo ipan sábado”.
15 ToTeko kinankilik: “Inkipiaj ome inmoxayak, ¿amo inkitojtomaj inmotoro o inmoburro kampa tlakua uan inkiuikaj ma atliti ipan sábado?
16 Uajka, ni siuatl katli eli ikone Abrahán uan katli Satanás kiilpitoya* 18 xiuitl, ¿amo kinamikiyaya ma kichikauakaj maske eliyaya sábado?”.
17 Kema Jesús kiijtok nopa, ikualankaitakauaj pejkej pinauaj; pero nopa miakej maseualmej tlauel yolpajkej kema kiitakej nopa uejueyi tlamantli tlen kichiuayaya.
18 Uan nojua kiniljuik: “¿Kej tlake eli iTlanauatijkayo Dios uan ika tlake uelis nikixnextis?
19 Eli kej se iyol mostaza, tlen se tlakatl kikuik uan kitojki ipan itlal. Nopa xinachtli moskaltik uan mochijki se kuauitl, uan totomej motepasoltijkej ipan imakuayo”.
20 Sampa kiniljuik: “¿Ika tlake uelis nikixnextis iTlanauatijkayo Dios?
21 Eli kej levadura* tlen se siuatl kikuik uan kimanelok ika eyi uejueyi tlatlamachiuali* harina. Teipa nochi harina mosonejki”.
22 Kema yauiyaya Jerusalén, panotiauiyaya ipan nochi altepemej uan pilaltepetsitsij, uan tlamachtijtiajki.
23 Uajka se tlakatl kitlatsintokik: “NoTeko, ¿amo miakej momanauiaj?”. Ya kiniljuik:
24 “Xijchiuakaj ueyi kampeka para inkalakisej ipan nopa puerta tlen pitsaktsi,* pampa niinmechiljuia miakej kinekisej kalakisej pero amo uelisej.
25 Kema katli iaxka nopa kali moketsas uan kaltsakuas ika llave, inmojuantij inmokauasej inijkatokej kalixpa, inkaltajtakanijtosej uan inkiijtosej: ‘¡ToTeko, xitechkaltlapo!’. Pero ya inmechnankilis: ‘Na amo nijmati kanke ineuaj’.
26 Uajka peuas inkiijtosej: ‘Titlakuajkej moixpa, uan titlamachtik ipan ueyi ojtli tlen toaltepe’.
27 Pero ya inmechiljuis: ‘Amo nijmati kanke ineuaj. ¡Xinechtlalkauikaj, nochi inmojuantij katli inkichiuaj tlen amo kuali!’.
28 Nopaya inmochokilisej uan intlankochueuechokasej* kema inkiitasej Abrahán, Isaac, Jacob uan nochi teokamanalouanij* itstokej ipan iTlanauatijkayo Dios pero inmojuantij inmechkixtijtokej kalixpa.
29 Nojkia, ualasej maseualmej tlen kampa kisa Tonati uan kampa onkalaki, uan ika norte uan ika sur, uan moseuisej kampa mesa ipan iTlanauatijkayo Dios.
30 Xijkakikaj ni: itstokej se keskij katli yauij tlatepotsko* uan teipa tlayakanasej, uan itstokej sekinok katli tlayakanaj uan teipa mokauasej hasta tlatepotsko”.
31 Ipan nopa tlalochtli,* se keskij fariseos* ualajkej uan kiiljuijkej: “Xia sejkanok,* pampa Herodes kineki mitsmiktis”.
32 Uan ya kinnankilik: “Xiakaj uan xikiljuitij nopa kayochi:* ‘Xikita, nama uan mostla nikinkixtis amo kuali ajakamej uan nikinchikauas maseualmej, uan uiptla nitlamis’.
33 Pero moneki nijchijtos noteki nama, mostla uan uiptla. Uan moneki niajtias pampa se teokamanalojketl amo uelis kimiktisej sejkanok, san ipan Jerusalén.
34 Jerusalén, Jerusalén, katli kinmiktia teokamanalouanij uan kintepachoua* katli kintitlanij nopaya..., ¡miakpa nijnejki nikinsentilis mokoneuaj kej se tenanpiyo kinsentilia ipilkoneuaj ieltlapaltsala! Pero inmojuantij amo inkinejkej.
35 ¡Xikitakaj! Dios kitlauelkauas ni teokali* uan inmechkauilijteuas. Niinmechiljuia, inmojuantij ayokmo innechitasej hasta kema inkiijtosej ‘¡Tlateochiuali katli uala ipan itoka Jehová!’”.*
Tlen ijkuilijtok tlatsintla
^ Kanajya kiijtouaj “toTeotsij”.
^ O “uelonki uan kinpechik”.
^ O “abono”.
^ O “demonio”.
^ O “kitlaijiyouiltijtoya”.
^ Kanajya kiijtouaj “tlasonejkayotl”.
^ Kanajya kiijtouaj “tlayejyekoli”. Ika griego “tlatlamachiuali sea”. Se sea kipiayaya 7,33 litros.
^ Kanajya kiijtouaj “tsokopiltik”, “tsotsokojtsi”.
^ Kiampa kichiuasej pampa tlauel kualantosej uan amo kimatisej tlake kichiuasej.
^ O “profetas”.
^ Kanajya kiijtouaj “tlaika”.
^ Kanajya kiijtouaj “tlatoktsi”.
^ Kanajya kiijtouaj “oksejko”, “sejkoyok”.
^ Kanajya kiijtouaj “zorro”.
^ Kanajya kiijtouaj “kinmotla ika tetl”.
^ Ika griego “inmochaj”.
