Tlen kiijkuilok Marcos 15:1-47
15 Kema tlaneski, nopa sacerdotes katli kipiayayaj tlanauatili, katli kinyakanayayaj judíos uan escribas,* kiijtosneki nochi katli eliyayaj Tekichiuanij katli kipiaj más Tlanauatili,* mosentilijkej para kiitasej tlake kichiuaskiaj; kema ya kiilpitoyaj Jesús, kiuikakej uan kimaktilitoj Pilato.
2 Uan Pilato kitlatsintokik: “¿Ta tiinintlanauatijka judíos?”. Jesús kinankilik: “Kena, ta tikijtoua”.
3 Pero nopa sacerdotes katli kipiayayaj tlanauatili kiteljuiyayaj ika miak tlamantli.
4 Uajka Pilato sampa kitlatsintokik. Kiiljuik: “¿Amo tleno titlanankilia? ¿Amo tijkaki nochi tlen ika mitstlateljuiaj?”.
5 Pero Jesús ayokmo tleno kinankilik, uan nopa kichijki ma mosentlachili Pilato.
6 Ipan sejse iljuitl, Pilato momajtoya kikixtia se katli tsaktoya, katli maseualmej kiijtoskiaj.
7 Ipan nopa tonali, tsaktoya se tlakatl katli motokaxtiyaya Barrabás, katli kitsaktoyaj ininuaya katli temiktijtoyaj kema kinijixnamijkej tekichiuanij.
8 Uajka nopa miakej maseualmej monechkauijkej, uan pejkej kitlajtlaniaj Pilato ma kichiua tlen inijuantij kinekiyayaj, kej ipa kichijtoya.
9 Ya kinnankilik: “¿Inkinekij ma nijkaua ma yaui inintlanauatijka judíos?”.
10 Pampa Pilato kiitayaya nopa sacerdotes katli kipiayayaj tlanauatili kitemaktilijtoyaj pampa kikualankaitayayaj.*
11 Pero nopa sacerdotes katli kipiayayaj tlanauatili kinchiualtijkej nopa miakej maseualmej ma kiijtokaj kinekiyayaj ma kikixtikaj Barrabás.
12 Pilato sampa kiniljuik: “Uajka, ¿tlake nijchiuilis ni tlakatl, katli inmojuantij inkiiljuiaj inintlanauatijka judíos?”.
13 Inijuantij sampa chikauak kiijtojkej: “¡Xijkuapilo ipan kuauitl!”.
14 Uan Pilato kiniljuiyaya: “¿Kenke? ¿Tlake tlamantli tlen amo kuali kichijtok?”. Pero inijuantij nojua más chikauak kiijtouayayaj: “¡Xijkuapilo ipan kuauitl!”.
15 Uajka Pilato kikajki ma yaui Barrabás pampa kinekiyaya kichiuas tlen maseualmej kinekiyayaj. Uan kema tlanauatik ma kiuitekikaj Jesús, kitemaktilik ma kikuapilokaj ipan kuauitl.
16 Uajka, nopa soldados kiuikakej Jesús ipan nopa kalixpamitl tlen eltoya ichaj gobernador, uan kinsentilijkej nochi soldados.
17 Kiyoyontijkej ika yoyomitl moradojtik,* kixinepalojkej se uitscorona uan kitlalilijkej.
18 Uan pejkej kikuatsajtsiliaj: “¡Timitstlajpalouaj, tiinintlanauatijka judíos!”.
19 Nojkia, kimakiliyayaj ipan itsonteko ika se akatl uan kichajchayayaj.* Motlankuaketsayayaj uan mouijtsomayayaj* iixpa.
20 Kema tlankej kipinajtiaj, kikixtilijkej nopa yoyomitl moradojtik uan sampa kikentijkej iyoyo. Uan teipa kikixtijkej para kilavosminatij ipan kuauitl.
21 Nopaya panotiauiyaya se tlakatl katli yajtoya mila, motokaxtiyaya Simón, katli euayaya Cirene, eliyaya inintata Alejandro uan Rufo, uan kichiualtijkej ma kiuika nopa kuauitl kampa kimiktiskiaj* Jesús.
22 Uan kiuikakej Jesús kampa kitokaxtiaj Gólgota, tlen kiijtosneki Mijkatsontekomitl.
23 Nopaya kinejkej kimakasej vino tlamaneloli ika mirra,* pero ya amo kinejki kiis.*
24 Uan kilavosminkej ipan kuauitl, uan mauiltijkej ika piltetsitsij* para moxexeljuilisej iyoyo uan kiitasej tlake yoyomitl mokauiliskiaj.
25 Eliyaya nechka las nueve ika ijnalok* kema kilavosminkej ipan kuauitl.
26 Nopa tlajkuiloli kampa nesiyaya kenke kimiktijkej, kiijtouayaya: “Inintlanauatijka judíos”.
27 Nojkia, inechka kinkuapilojkej omej tlachtekinij, se ika imanejmak uan se ika imaarraves.*
28 *
29 Uan katli nopaya panoyayaj kipinajtiyayaj. Motsonojoliniyayaj uan kiijtouayayaj: “¡Ya nopa kuali! Ta, katli tijueloniskia teokali, uan ipan eyi tonali sampa tijketsaskia,
30 xitemo ipan nopa kuauitl uan ximomakixti”.*
31 Nopa sacerdotes katli kipiayayaj tlanauatili uan escribas nojkia pejkej kipinajtiaj. Uan kiijtouayayaj: “¡Kinmakixtik sekinok, pero ya amo ueli momakixtia!
32 Cristo, katli eli tlanauatijketl tlen Israel, ma temo namantsi ipan ne kuauitl. Kema tikitasej, tijneltokasej”. Uan hasta katli kinkuapilojtoyaj inakastla ipan nopa kuauitl, kitlaijiljuiyayaj.
33 Kema nechka eliskia tlajkotona,* tlatlayouixki ipan nopa tlali uan kiampa mokajki hasta nechka las tres* ika tiotlak.
34 Uan las tres* ika tiotlak, Jesús chikauak kuatsajtsik: “Éli, Éli, ¿láma sabakhtháni?”, tlen kiijtosneki, “NoDios, noDios, ¿kenke tinechtlauelkajtok?”.
35 Kema se keskij katli itstoyaj nechka kikajkej tlen kiijtok, pejkej kiijtouaj: “¡Xijkakikaj, kinotsa Elías!”.
36 Uajka se akajya motlalojtejki, kiapachok se tlamantli tlen tsotsoltik ipan vino tlen xokok, kitlalik ipan se akatl uan kinechkauiltik para ma kii. Kiijtouayaya: “¡Xijkauakaj! Tikitasej tlaj ualas Elías kitemouiki”.
37 Jesús chikauak kuatsajtsik, uan mijki.
38 Uan nopa cortina tlen eltoya ipan teokali tlajkotsayantejki tlen uejkapa hasta tlatsintla.
39 Uan kema inintlayakanka soldados* katli ijkatoya iixpa Jesús, kiitak nochi tlen panok kema mijki, kiijtok: “Ni tlakatl nelia eliyaya iKone Dios”.*
40 Nojkia, itstoyaj nopaya se keskij siuamej katli ika uejka tlachixtoyaj. Nopaya itstoyaj María Magdalena, María ininnana Santiago katli más Telpokatl* uan Josés, uan Salomé.
41 Ni siuamej kitokiliyayaj uan kipaleuiyayaj kema itstoya Galilea. Nojkia nopaya itstoyaj miakej siuamej katli ixtlejkotoyaj iuaya hasta Jerusalén.
42 Ya nechka tlayouaskia uan eliyaya nopa tonali kema tlachijchiuayayaj, ni kiijtosneki ika ualmostla* eliskia sábado,
43 uajka José katli euayaya Arimatea, se tlen nopa Tekichiuanij katli kipiayayaj más Tlanauatili,* katli tlauel kitlepanitayayaj uan nojkia kichiayaya iTlanauatijkayo Dios, mosemakak kiitato Pilato, uan kitlajtlanik itlakayo Jesús.
44 Pero Pilato kinekiyaya kimatis tlaj Jesús ya miktoya, yeka tlanauatik ma kinotsatij katli kinyakanayaya soldados uan kitlatsintokik.
45 Kema nopa tlayakanketl kiiljuik kena ya miktoya, uajka kikauilik José ma kiuika itlakayo Jesús.
46 José kikojki se yoyomitl tlen lino tlen kuali tlachijchiuali uan kitemouik itlakayo Jesús. Teipa kipijki ika nopa yoyomitl uan kitlalik ipan se mijkaostotl tlen kikoyonijtoya ipan tetl. Uan kimimilok se tetl tlen ika kitsajki nopa mijkaostotl.
47 Pero María Magdalena uan María inana Josés mokajkej kitlachilijtokej kampa kitlalijkej itlakayo.
Tlen ijkuilijtok tlatsintla
^ O “kikokoliyayaj”.
^ Se yoyomitl tlen patiyo uan nelchichiltik.
^ Kanajya kiijtouaj “kichijchayayaj”.
^ Kanajya kiijtouaj “mopachouayayaj”.
^ Xikita kuauitl kampa tetlaijiyouiltiaj.
^ Se tlamantli tlen kichiua se akajya ma sepouia o ma tsonuiuitia.
^ Kanajya kiijtouaj “kiijis”.
^ Xikita mauiltisej ika piltetsitsij.
^ Ika griego “expa hora”.
^ Kanajya kiijtouaj “imaopoch”.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ O “ximomanaui”.
^ Ika griego “chikuasempa hora”.
^ Ika griego “chiknajpa hora”.
^ Ika griego “chiknajpa hora”.
^ O “centurión”. Katli kinyakanayaya 100 soldados tlen Roma.
^ Kanajya kiijtouaj “toTeotsij”.
^ O “katli Más Echkapantsi”.
^ Kanajya kiijtouaj “mostlaijki”, “kema toniliskia”.
