Tlen kiijkuilok Mateo 7:1-29
-
KEMA TLAMACHTIK IPAN SE TEPETL (1-27)
-
“Ayokmo xiteijilnamikikaj” (1-6)
-
Nojua xitlajtlantokaj, xijtemojtokaj uan xikaltajtakanijtokaj (7-11)
-
Tlen techpaleuis kuali ma timouikakaj ininuaya sekinok (12)
-
Nopa puerta tlen pitsaktsi (13, 14)
-
“Inkinixmatisej ika tlen kichiuaj” (15-23)
-
Kali tlen kiketskej ipan tetl uan kali tlen kiketskej xalixko (24-27)
-
-
Maseualmej mosentlachiliaj kema kitlakakiliaj Jesús (28, 29)
7 ”Ayokmo xiteijilnamikikaj, kiampa nojkia amo inmechijilnamikisej.
2 Pampa kej inkinijilnamikisej sekinok, nojkia kiampa inmechijilnamikisej, uan tlen inkinchiuilisej sekinok, nojkia kiampa inmechchiuilisej.*
3 ¿Kenke tijtlachilia nopa tejtli tlen moikni kipia ipan iixteyol, uan amo tijtlachilia nopa viga* tlen tijpixtok ipan moixteyol?
4 ¿Uan kenijkatsa uelis tikiljuis moikni ‘xinechkaua ma nimitskixtili nopa tejtli ipan moixteyol’, tlaj ta tijpia se viga ipan moixteyol?
5 ¡Tijpia ome moxayak! Achtoui ximokixtili nopa viga tlen tijpia ipan moixteyol, kiampa kuali tikitas kenijkatsa tijkixtilis nopa tejtli tlen moikni kipixtok ipan iixteyol.
6 ”Amo xikinmakakaj chichimej tlamantli tlen iaxka Dios.* Nojkia amo xikinmakakaj pitsomej piltetsitsij tlen pajpatiyo, pampa uelis ipan mokejketsasej, mokueptiuetsisej uan inmechkokosej.
7 ”Nojua xitlajtlantokaj uan inmechmakasej, nojua xijtemojtokaj uan inkipantisej, nojua xikaltajtakanijtokaj uan inmechkaltlaposej.
8 Pampa nochi katli tlajtlanij kiseliaj, uan nochi katli kitemouaj kipantiaj, uan nochi katli kaltajtakaniaj kinkaltlapouaj.
9 Tlaj inmokone inmechtlajtlania se pantsi, ¿inkimakaskiaj se tetl?
10 Uan tlaj inmechtlajtlania se michij, ¿inkimakaskiaj se kouatl?*
11 Yeka, tlaj inmojuantij maske intlajtlakolejkej inkinmakaj kuajkuali regalos inmokoneuaj, ¡inmoTata katli itstok iluikak nojua más kinmakas tlamantli tlen kuali katli kitlajtlaniaj!
12 ”Yeka, xikinchiuilikaj sekinok nochi tlen inmechpaktiskia ma inmechchiuilikaj. Kena, ya ni tlen kiijtoua nopa Tlanauatili uan tlen kiijkuilojkej Teokamanalouanij.*
13 ”Xikalakikaj ipan nopa puerta tlen pitsaktsi.* Pampa nopa puerta uan nopa ojtli tlen patlauak teuika kampa mikilistli,* uan tlauel miakej kalakij nopaya;
14 pero nopa puerta tlen pitsaktsi uan nopa ojtli tlen amo patlauak, teuika kampa nemilistli, uan nopaya amo miakej kalakij.
15 ”Ximomokuitlauikaj ika teokamanalouanij* katli san tlakajkayauaj, pampa inijuantij mochiuaj kej pilborregojtsitsij, pero ipan ininyolo elij kej lobos katli mosisiniaj.
16 Inkinixmatisej ika tlen kichiuaj.* Ipan se xiuitl tlen uitstso amo kitekij uvas o higos, ¿axke?
17 Nojkia, se kuali kuauitl temaka kuali itlajka, uan se kuauitl tlen palantok amo temaka kuali itlajka.
18 Se kuali kuauitl amo ueli temaka itlajka tlen amo kuali, uan se kuauitl tlen palantok amo ueli temaka kuali itlajka.
19 Nochi kuauitl tlen amo temaka kuali itlajka, kitsontekij uan kitlatiaj.
20 Yeka, nopa maseualmej inkinixmatisej ika tlen kichiuaj.
21 ”Amo nochi katli nechiljuiaj ‘noTeko, noTeko’ kalakisej ipan nopa Tlanauatijkayotl tlen eltok iluikak. San kalakisej katli kichiuaj tlen kineki noTata katli itstok iluikak.
22 Ipan nopa tonali miakej nechiljuisej: ‘NoTeko, noTeko, ¿amo tikamanaltikej kej teokamanalouanij ika motoka uan ika motoka tikinkixtijkej amo kuali ajakamej* uan ika motoka tijchijkej miak milagros?’.
23 Uajka na nikiniljuis: ‘¡Na amo kema niinmechixmatki! ¡Xinechtlalkauikaj, inmojuantij katli inkiixpanoj tlanauatili!’.
24 ”Uajka, katli kitlakakilia tlen nikijtojtok uan kichiua, elis kej nopa tlakatl katli tlalnamiki katli kiketski ichaj ipan tetl.
25 Tlauel uetski atl, tlaueyixki,* chikauak tlaajakak uan kitsouitejki nopa kali..., pero nopa kali amo uelonki pampa kitsinpeualtijkej ipan tetl.
26 Pero katli kitlakakilia tlen nikijtojtok uan amo kichiua, elis kej nopa tlakatl katli uiuitik* uan kiketski ichaj xalixko.
27 Tlauel uetski atl, tlaueyixki, chikauak tlaajakak uan kitsouitejki nopa kali..., uan nopa kali uelonki. Uan tlamixolejki”.
28 Kema Jesús tlanki kiijtoua nochi ni tlamantli, nopa miakej maseualmej mosentlachilijkej kema kikajkej kenijkatsa tlamachtiyaya,
29 pampa kinmachtiyaya kej se akajya katli kipia tlanauatili uan amo kej ininescribas.*
Tlen ijkuilijtok tlatsintla
^ O “ika tlen inkintlamachiuilisej sekinok, inijuantij nojkia kiampa inmechtlamachiuilisej”.
^ O “apechtli”.
^ Kanajya kiijtouaj “toTeotsij”.
^ Kanajya kiijtouaj “okuili”.
^ Kiijtosneki nochi tlen eltok ipan iTlajkuilol Dios ika Hebreo.
^ Kanajya kiijtouaj “tsokopiltik”, “tsotsokojtsi”.
^ Ika griego “kampa tetsontlamiltiaj”.
^ O “profetas”.
^ Ika griego “inintlajka”.
^ O “demonios”.
^ Kanajya kiijtouaj “tlatemik”.
^ O “amo tlalnamiki”.
