Tlen kiijkuilok Santiago 5:1-20
-
Tlen kiniljuiaj katli tlatominpiaj (1-6)
-
Dios kinteochiua katli kipiaj ininyolo uan kiijiyouiaj se tlaouijkayotl (7-11)
-
Kema inkiijtosej “kena”, uajka ma eli kena (12)
-
Tlamaijtoli tlen kichiuaj katli tlaneltokaj nelnelia tlauel tepaleuia (13-18)
-
Moneki tijpaleuisej ma mokuepa se katli tlajtlakolchijtok (19, 20)
5 Nama xitlakakikaj inmojuantij, katli intlatominpiaj; xichokakaj uan xitsajtsikaj* pampa nechka inmechpanos tlen amo kuali.
2 Tlen inkipixtokej ya palantok uan nopa pilokuiltsitsij* ya kikuajkuajtokej inmoyoyo.
3 Inmooro uan inmoplata ya moxixtok, uan nopa kinextis para inmokuapolojtokej uan kikuas inmonakayo. Nochi tlen inkisentilijtokej elis kej se tlitl ipan itlamia tonali.
4 Xikitakaj, nopa pixkanij katli tekititokej ipan inmomil nojua kuatsajtsitokej pampa amo inkintlaxtlauijtokej, uan Jehová* katli kinyakana iángeles kikaktok kenijkatsa nopa pixkanij kuatsajtsij para ma kinpaleuikaj.
5 Ipan Tlaltipaktli inmojuantij inkipixtokej miak tlamantli tlen pajpatiyo uan san inkichijtokej nochi tlen inmechyolpakiltia. Inmotomajtokej* kej nopa tlapialmej tlen kintomauaj para nopa tonali kema kinmiktisej.
6 Inkintlatsakuiltijtokej uan inkinmiktijtokej katli kichiuaj tlen xitlauak. ¿Inmoiljuiaj ya amo inmechijixnamiki?
7 Yeka noikniuaj, xijpiakaj inmoyolo hasta kema toTeko tlakuepilis. Xikitakaj, nopa tlatojketl kinextia kipia iyolo pampa kichia ma tlaeli kema achtoui uetsi atl uan tlen uetsi hasta teipa.
8 Inmojuantij nojkia xijpiakaj inmoyolo; xijchiuakaj inmoyolo ma eli temachtli, pampa monechkauijtok nopa tonali kema toTeko tlakuepilis.
9 Noikniuaj, amo ximokualanikaj se ika seyok para toTeko amo inmechtlajtolsenkauas. Xikitakaj, nopa Juez ya itstok nechka, puertajteno.
10 Noikniuaj, ximoiljuikaj kenijkatsa nopa teokamanalouanij* katli kamanaltikej ipan itoka Jehová* kiijiyouijkej kema kiixnamijkej tlaouijkayotl uan kinextijkej kipiayayaj ininyolo, uan xijchiuakaj sanse kej inijuantij.
11 Xikitakaj, tikitaj yolpakij katli kiijiyouiaj tlaouijkayotl. Inmojuantij inkikaktokej kenijkatsa Job kiijiyouik tlaouijkayotl, uan inkikajkej kenijkatsa Jehová* kiteochijki, uajka inkimatij Jehová* tlauel teiknelia uan tetlasojtla.
12 Noikniuaj, tlen niinmechiljuis eli tlauel ipati, ayokmo xijtestigojketsakaj iluikaktli o Tlaltipaktli, uan ayokmo xitlatestigojketsakaj ika yon se tlamantli. Más kuali kema inkiijtosej “kena”, uajka ma eli kena, uan kema inkiijtosej “amo”, uajka ma eli amo, kiampa amo inmechtlajtolsenkauasej.
13 ¿Itstok se tlen inmojuantij katli tlaijiyouia? Nojua ma momaijtojto.* ¿Itstok se katli yolpaki? Ma uika salmos.
14 ¿Itstok kampa inmojuantij se katli mokokoua?* Ma kinnotsa ueuejtlakamej tlen tlanechikoli uan inijuantij ma momaijtokaj por ya, uan ma kiajalokaj aceite ipan itoka Jehová.*
15 Uan nopa tlamaijtoli tlen kichiuasej pampa tlaneltokaj, kipaleuis ma mochikaua katli mokokoua,* uan Jehová* kitlananas. Nojkia, tlaj kichijtok se tlajtlakoli, kitlapojpoljuisej.
16 Uajka, ximopouilikaj inmotlajtlakoljuaj se ika seyok uan ximomaijtokaj se ika seyok, uan kiampa inmochikauasej. Nopa tlamaijtoli tlen kichiua se katli eli xitlauak, kipia chikaualistli uan nelnelia tlauel tepaleuia.
17 Elías eliyaya se tlakatl katli kiyolmatiyaya sanse kej tojuantij, pero kema chikauak momaijtok para amo ma uetsi atl, ipan Tlaltipaktli amo uetski atl eyi xiuitl uan tlajko.
18 Uan kema sampa momaijtok, uetski atl uan tlaelki.
19 Noikniuaj, tlaj se akajya mouejkatlalia tlen melauak uan seyok kipaleuia ma mokuepa,
20 uajka xijmatikaj katli kipaleuia se tlajtlakolchijketl para ma kikaua nopa ojtli tlen amo kuali, kimakixtis* tlen mikilistli uan tlapaleuis para Dios* ma kitlapojpoljui nochi itlajtlakoljuaj.
Tlen ijkuilijtok tlatsintla
^ O “xiayijtikaj”.
^ Ika griego kiampa kiiljuiaj se piltlapialtsi katli nesi kej se pilpapalotsi tlen kikuajkua yoyomitl.
^ Ika griego “inkitomajtokej inmoyolo”.
^ O “profetas”.
^ Kanajya kiijtouaj “ma motlatlajtijto”.
^ Kanajya kiijtouaj “kokoya”.
^ O uelis “katli siajtok”.
^ O “kimanauis”.
^ Kanajya kiijtouaj “toTeotsij”.
