Maske Biblia amo kiijtoua kenijkatsa moneki timopajtisej, tlen kiijtoua kena kinpaleuia katli kipiaj se kokolistli ipan inintlalnamikilis. Ma tikitakaj se keski textos.

“Se tetika tlakatl axkineki se tepajtijketl pero se kokoxketl kena” (MATEO 9:12).

Biblia kiijtoua kemantika moneki tiasej kampa se tepajtijketl. Miakej maseualmej katli amo kuali kiyolmatij, tlauel kinpaleuijtok kema kiitaj tlake kokolistli kipiaj uan yauij kampa se tepajtijketl.

“Intla tijkualchijchiuas motlakayo, kualtitok” (1 TIMOTEO 4:8).

Tlaj timomatis tijchiuas se keski tlamantli, mitspaleuis kuali ximomachili ipan motlalnamikilis. Uelis tijkixtis tonali uan kiampa nochipa tijchiuas ejercicio, kuali titlakuas uan kuali tikochis.

“Yolpakilistli tepaleuia keja eliskia se kuali pajtli. Pero kema se tlakatl moyolkuesoua kitlamiltia ichikaualis keja se kokolistli tlen kiuatsa iomiyo” (PROVERBIOS 17:22).

Tlaj tijpouas textos ipan Biblia tlen mitsyolchikauas uan timosentlalis tijchiuas tlen kena tiuelis, mitspaleuis nojua tlauel xiyolpaki.  Tlaj timoiljuis ipan kuali tlamantli tlen tijpia uan timotemachis teipa kuali tiitstos, mitspaleuis xikijiyoui nopa kokolistli tlen tijpia ipan motlalnamikilis.

“Tlen moechkapantlaliaj kipantisej tlalnamikilistli” (PROVERBIOS 11:2).

Uelis amo ueli tijchiua se keski tlamantli, yeka xijkaua sekinok ma mitspaleuikaj. Uelis mouampoyouaj uan mochampoyouaj kinekij mitspaleuisej pero amo kimatij kenijkatsa kichiuasej. Yeka, xikiniljui kenijkatsa tijneki ma mitspaleuikaj, uan amo ximoiljui inijuantij kichiuasej nochi. Uan nojkia xikintlaskamatili pampa kinekij mitspaleuisej.

“Nikitak nechpanoyaya se tlamantli, yeka niajki kampa se tepajtijketl, ya nechiljuik tlen nechpanoyaya uan nopa nechpaleuik ma nikita nelnelia nimokokouayaya. Nojkia nechiljuik kenijkatsa ueliskia nimopajtis” (Nicole, a kipia trastorno bipolar).

“Tlauel nechpaleuia kema mojmostla nijpoua Biblia iuaya nosiua, kiampa ika ijnalok pejteua nimoiljuia tlamantli tlen nechyolchikaua. Nikitstok kema tlauel nimokuesoua nochipa nijpantia se versículo tlen nechyolchikaua” (Peter, tlauel mokuesoua miak tonali).

“Achtouia nipinauayaya nikiniljuis sekinok tlen nechpanoyaya. Se nouampo nechkuamachilik uan kinextik tlauel nechikneliyaya, nopa kichijki kuali ma nijyolmati uan nikitak amo niitstoya noselti” (Ji-yoo, amo tlakua kej kinamiki [trastorno alimentario]).

“Biblia nechpaleuijtok ayokmo tlauel ma nitekiti uan kuali ma nimosiajketsa, tlen nopaya kiijtoua nechpaleuijtok ika kokolistli tlen nijpia” (Timothy, kipia trastorno obsesivo-compulsivo).