Ni kiijtojkej maseualmej katli amo kuali kiyolmatij. ¿Nojkia kiampa timomachilijtok o tikixmati se akajya katli kiampa momachilia?

Tlaj kena, xijmajto amo san ta kiampa timomachilia. Miakej maseualmej kipiaj ni kokolistli ipan inintlalnamikilis o se akajya katli kiikneliaj kiampa kipano.

Nama tiitstokej ipan tonali tlen “nelia fiero”, uan yeka onka miak tlamantli tlen kichiua ma timokuesokaj uan ma timoyolkokokaj (2 Timoteo 3:1). Nopa Organización Mundial de la Salud, kiijtoua se tlen chikueyij maseualmej kipiaj se kokolistli ipan inintlalnamikilis. Kema onkak kokolistli COVID-19 ipan xiuitl 2020, momiakilijkej katli mokokouayayaj, 26% pejkej tlauel moyolkuesouaj uan 28% pejkej mokuesouaj miak tonali.

Maske nojkia moneki tijmatisej keskij maseualmej moyolkuesouaj uan mokuesouaj miak tonali, nojua tlauel ipati tijmatisej tlake techpaleuis kuali ma tijyolmatikaj uan nojkia katli tikinikneliaj.

Kema se akajya kuali kiyolmati, kuali momachilia uan ueli kichiua tlen mojmostla kinamiki kichiuas. Ueli kiixnamiki tlen mojmostla kipano, kuali tekiti uan kuali kiyolmati ipan inemilis.

• AMO kiijtosneki amo tiyoltetik.

• KENA eli se kokolistli tlen kichiua se akajya tlauel ma mokueso uan nima ma mopatla tlen moiljuia, tlen kiyolmati uan tlen kichiua.

• Miakpa, katli kipiaj ni kokolistli ouij kimatij mokamanaljuisej ininuaya sekinok uan kichiuasej tlen mojmostla moneki.

• Nochi uelis kipiasej ni kokolistli, maske ya uejueyij o ayamo, momajtokej kichiuaj sekinok tlamantli, ualauij ipan seyok altepetl, amo sanse ininreligión, ixtlamatij o amo, uan tlatominpiaj o amo.

Kemantika, se akajya peua kipatla kej eli, ayokmo tlakua yon kochi kej achtouia, uelis uejkajkia mokuesoua, moyolkokoua uan motekipachoua. Tlaj kiampa mitspano, o se akajya tlen tikixmati, uelis monekis tias kampa se tepajtijketl, ya mitsiljuis kenke kiampa timomachilia uan tlake mitspaleuis sampa kuali xijyolmati. ¿Uan kanke uelis mitspaleuisej?

Jesús, katli tlauel tlalnamiki uan itstoya ipan Tlaltipaktli, kiijtok: “Se tetikatlakatl axkineki se tepajtijketl, pero se kokoxketl, kena” (Mateo 9:12). Katli mopajtiaj, ayokmo tlauel mokuesouaj uan yolpakij kej achtouia. Tlaj tlauel amo kuali tijyolmati o uejkajkia kiampa timomachilia, moneki nimantsi tijtemos ma mitspaleuikaj. a

Maske Biblia amo kiijtoua kenijkatsa moneki timopajtisej, tlen nopaya ijkuilijtok uelis techpaleuis kuali ma tijyolmatikaj. Ipan sekinok tlamachtili tikitasej kenijkatsa Biblia techpaleuis kuali ma tijyolmatikaj tlaj tijpiaj se kokolistli ipan totlalnamikilis. Timitstlaneuij xijpoua.